ꠝꠣ-ꠛꠣꠚ ꠀꠞ ꠀꠅꠟꠣꠖꠞ ꠛꠦꠙꠣꠞꠦ ꠔꠣꠟꠤꠝ
৬
১ ꠅ ꠀꠅꠟꠣꠖ ꠅꠇꠟ,
ꠝꠣꠟꠤꠇꠞ ꠝꠞ꠆ꠎꠤ ꠝꠣꠚꠤꠇ ꠔꠥꠝꠞꠣꠞ ꠝꠣ-ꠛꠣꠚꠞ ꠇꠕꠣꠝꠔ ꠌꠟꠤꠅ,
ꠀꠞ ꠅꠟꠣ ꠌꠟꠣꠐꠣꠃ ꠔ ꠃꠌꠤꠔ।
২ ꠀꠟ꠆ꠟꠣꠞ ꠇꠣꠟꠣꠝꠞ ꠙꠄꠟꠣ ꠢꠥꠇꠥꠝ,
ꠎꠦ ꠢꠥꠇꠥꠝꠞ ꠟꠉꠦ ꠙꠥꠞꠥꠡ꠆ꠇꠣꠞꠞ ꠅꠀꠖꠣ ꠀꠍꠦ,
ꠁꠐꠣ ꠅꠁꠟ,
“ꠔꠥꠝꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।
৩ ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ,
ꠀꠞ ꠁ ꠖꠥꠘꠤꠀꠔ ꠔꠥꠝꠣꠞ ꠢꠣꠄꠀꠔꠤ ꠛꠣꠠꠤꠛ।”
৪ ꠔꠦ ꠔꠥꠝꠞꠣ ꠎꠦꠞꠣ ꠢꠥꠞꠥꠔ꠆ꠔꠣꠞ ꠛꠣꠚ ꠅꠁꠍ,
ꠔꠥꠝꠞꠣꠅ ꠘꠤꠎꠞ ꠀꠅꠟꠣꠖꠞꠦ ꠍꠣꠔꠣꠁꠅ ꠘꠣ,
ꠛꠞꠋ ꠝꠣꠟꠤꠇꠞ ꠔꠣꠟꠤꠝ ꠀꠞ ꠡ꠆ꠞꠤꠋꠈꠟꠣꠞ ꠝꠣꠎꠖꠤ ꠔꠣꠞꠣꠞꠦ ꠝꠣꠘꠥꠡ ꠛꠣꠘꠣꠅ।
ꠉꠥꠟꠣꠝ ꠀꠞ ꠝꠥꠘꠤꠛꠞ ꠟꠣꠉꠤ ꠔꠣꠟꠤꠝ
৫ ꠔꠥꠝꠞꠣ ꠎꠦꠞꠣ ꠉꠥꠟꠣꠝ,
ꠔꠥꠝꠞꠣ ꠀꠟ-ꠝꠍꠤꠞ ꠎꠦꠟꠣ ꠛꠣꠁꠖ꠆ꠖ,
ꠅꠃꠟꠣ ꠒꠞ ꠀꠞ ꠔꠣꠎꠤꠝꠦ ꠖꠤꠟꠦ-ꠎꠣꠘꠦ ꠔꠥꠝꠞꠣꠞ ꠎꠉꠔꠞ ꠝꠥꠘꠤꠛ ꠅꠇꠟꠞ ꠛꠣꠁꠖ꠆ꠖ ꠞꠁꠅ।
৬ ꠈꠣꠟꠤ ꠝꠣꠘꠡꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠝꠥꠘꠤꠛꠞ ꠍꠣꠝꠘꠦ ꠛꠣꠁꠖ꠆ꠖ ꠞꠁꠅ ꠘꠣ,
ꠛꠞꠋ ꠀꠟ-ꠝꠍꠤꠞ ꠉꠥꠟꠣꠝ ꠢꠤꠡꠣꠛꠦ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠞꠣꠄ ꠇꠞꠤꠀ ꠔꠥꠝꠞꠣꠞ ꠝꠥꠘꠤꠛꠞ ꠛꠣꠁꠖ꠆ꠖ ꠞꠁꠅ।
৭ ꠔꠥꠝꠞꠣ ꠁꠈꠣꠘ ꠝꠘꠅ ꠇꠞꠤꠅ ꠘꠣ ꠎꠦ,
ꠔꠥꠝꠞꠣ ꠝꠣꠘꠡꠞ ꠈꠦꠎꠝꠔ ꠇꠞꠞꠣꠄ,
ꠛꠞꠋ ꠀꠍꠝꠣꠘꠤ ꠝꠣꠟꠤꠇꠞ ꠈꠦꠎꠝꠔ ꠇꠞꠞꠣꠄ ꠝꠘꠅ ꠇꠞꠤꠀ,
ꠎꠉꠔꠞ ꠝꠥꠘꠤꠛꠞ ꠈꠦꠎꠝꠔꠅ ꠈꠤꠀꠟꠤ ꠅꠅ।
৮ ꠝꠘꠅ ꠞꠣꠈꠤꠅ,
ꠝꠣꠟꠤꠇꠞ ꠉꠦꠍ ꠕꠣꠇꠤ ꠙꠞꠔꠦꠇ ꠝꠣꠘꠡꠦ ꠎꠣꠞꠎꠤꠞ ꠘꠦꠇ ꠇꠣꠝꠞ ꠙꠥꠞꠥꠡ꠆ꠇꠣꠞ ꠙꠣꠁꠛ,
ꠢꠦ ꠉꠥꠟꠣꠝ ꠅꠃꠇ ꠛꠣ ꠀꠎꠣꠖ ꠅꠃꠇ।
৯ ꠔꠥꠝꠞꠣ ꠎꠦꠞꠣ ꠝꠥꠘꠤꠛ,
ꠔꠥꠝꠞꠣꠅ ꠔꠥꠝꠞꠣꠞ ꠉꠥꠟꠣꠝ ꠅꠇꠟꠞ ꠟꠉꠦ ꠅꠃꠟꠣ ꠜꠣꠟꠣ ꠛꠦꠛꠢꠣꠞ ꠇꠞꠅ।
ꠔꠣꠞꠣꠞꠦ ꠒꠞ ꠖꠦꠈꠣꠘꠤ ꠛꠣꠖ ꠖꠦꠅ,
ꠇꠣꠞꠘ ꠔꠥꠝꠞꠣ ꠔ ꠎꠣꠘꠅ,
ꠔꠣꠞꠣ ꠛꠣ ꠔꠥꠝꠞꠣ ꠢꠇꠟꠞꠃ ꠝꠣꠟꠤꠇ ꠄꠇꠎꠘ,
ꠔꠣꠁꠘ ꠛꠦꠢꠦꠡ꠆ꠔꠅ ꠀꠍꠂꠘ;
ꠔꠣꠘ ꠘꠎꠞꠅ ꠢꠇꠟꠃ ꠡꠝꠣꠘ।
ꠀꠟ꠆ꠟꠣꠁ ꠀꠔꠤꠀꠞꠖꠤ ꠁꠛꠟꠤꠍꠞ ꠟꠉꠦ ꠎꠥꠖ꠆ꠖ ꠇꠞꠅ
১০ ꠢꠦꠡ-ꠝꠦꠡ ꠇꠁꠞꠣꠝ,
ꠔꠥꠝꠞꠣ ꠀꠍꠝꠣꠘꠤ ꠝꠣꠟꠤꠇꠞ ꠟꠉꠦ ꠝꠤꠟꠤꠀ ꠞꠁꠀ ꠔꠣꠘ ꠇꠥꠖꠞꠔꠤ ꠛꠟꠦ ꠛꠟꠀꠟꠣ ꠅꠅ।
১১ ꠎꠥꠖ꠆ꠖꠞ ꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠢꠇꠟ ꠘꠝꠥꠘꠣꠞ ꠀꠔꠤꠀꠞ ꠟꠣꠉꠣꠅ,
ꠔꠦꠃ ꠁꠛꠟꠤꠍꠞ ꠢꠇꠟ ꠍꠟ-ꠌꠔꠥꠞꠤꠞ ꠛꠤꠞꠥꠖ꠆ꠖꠦ ꠝꠎꠛꠥꠔ ꠅꠁꠀ ꠃꠛꠣꠁꠔꠣꠄ ꠙꠣꠞꠛꠣꠄ।
১২ ꠀꠝꠞꠣꠞ ꠅꠃ ꠎꠥꠖ꠆ꠖ ꠔ ꠇꠥꠘꠥ ꠝꠣꠘꠡꠞ ꠟꠉꠦ ꠘꠣꠄ,
ꠁꠔꠣ ꠅꠁꠟ ꠀꠘ꠆ꠖꠣꠁꠞ ꠎꠉꠔꠞ ꠢꠇꠟ ꠞꠣꠎꠣ ꠀꠞ ꠔꠣꠞ ꠈꠦꠝꠔꠣꠀꠟꠣ ꠅꠇꠟꠞ ꠛꠤꠞꠥꠖ꠆ꠖꠦ,
ꠀꠘ꠆ꠖꠣꠁꠞ ꠎꠉꠔꠞ ꠡꠇ꠆ꠔꠤꠀꠟꠣ ꠛꠖ ꠞꠥꠢꠥ ꠅꠇꠟꠞ ꠛꠤꠞꠥꠖ꠆ꠖꠦ,
ꠀꠞ ꠀꠍꠝꠣꠘꠞ ꠁꠛꠟꠤꠍ-ꠡꠄꠔꠣꠘ ꠖꠟꠞ ꠛꠤꠞꠥꠖ꠆ꠖꠦ।
১৩ ꠔꠦ ꠅꠃ ꠎꠥꠖ꠆ꠖꠞ ꠟꠣꠉꠤ ꠔꠥꠝꠞꠣ ꠀꠟ꠆ꠟꠣꠞ ꠖꠦꠅꠀ ꠢꠇꠟ ꠘꠝꠥꠘꠣꠞ ꠀꠔꠤꠀꠞ ꠚꠤꠘ꠆ꠖꠤꠟꠣꠅ,
ꠎꠣꠔꠦ ꠁꠛꠟꠤꠍꠦ ꠎꠦꠛꠟꠣ ꠢꠣꠝꠟꠣ ꠇꠞꠛ ꠅꠃ ꠡꠝꠄ ꠝꠎꠛꠥꠔ ꠅꠁꠀ ꠃꠛꠣꠁꠔꠣꠄ ꠙꠣꠞ,
ꠀꠞ ꠢꠦꠡ-ꠝꠦꠡ ꠕꠤꠞ ꠞꠁꠔꠣꠄ ꠙꠣꠞ।
১৪ ꠄꠞꠟꠣꠉꠤ ꠀꠟ꠆ꠟꠣꠁ ꠢꠇꠤꠇꠔꠤꠞ ꠛꠦꠟꠐ ꠇꠝꠞꠅ ꠛꠣꠘ꠆ꠖꠅ,
ꠀꠞ ꠛꠥꠇ ꠛꠣꠌꠣꠘꠤꠞ ꠟꠣꠉꠤ ꠙꠞꠦꠎꠉꠣꠞꠤꠞ ꠀꠝꠟ ꠖꠤꠀ ꠛꠥꠇ ꠉꠥꠞꠤꠀ ꠞꠣꠈꠅ,
১৫ ꠍꠤꠙꠣꠁ ꠅꠇꠟꠞ ꠟꠣꠈꠣꠘ ꠖꠥꠁꠅ ꠙꠣꠅꠅ ꠎꠥꠔꠣ ꠟꠣꠉꠣꠅ,
ꠎꠣꠔꠦ ꠡꠣꠘ꠆ꠔꠤꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠎꠥꠁꠔ ꠕꠣꠇꠔꠣꠄ ꠙꠣꠞ।
১৬ ꠀꠞ ꠍꠤꠙꠣꠁ ꠅꠇꠟꠦ ꠘꠤꠎꠞꠦ ꠛꠣꠌꠣꠘꠤꠞ ꠟꠣꠉꠤ ꠎꠦ ꠓꠣꠟꠣ ꠛꠦꠛꠢꠣꠞ ꠇꠞꠦ,
ꠅꠃꠟꠣ ꠢꠇꠟ ꠡꠝꠄ ꠔꠥꠝꠞꠣ ꠁꠝꠣꠘꠞ ꠓꠣꠟꠣ ꠀꠔꠅ ꠟꠅ,
ꠅꠃ ꠓꠣꠟꠣ ꠖꠤꠀ ꠁꠛꠟꠤꠍꠞ ꠢꠇꠟ ꠎꠣꠟꠣꠁꠟ ꠔꠤꠞ ꠘꠤꠜꠣꠁꠔꠣꠄ ꠙꠣꠞꠛꠣꠄ।
১৭ ꠝꠣꠕꠣꠞꠦ ꠛꠣꠌꠣꠘꠤꠞ ꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠘꠣꠎꠣꠔ ꠍꠤꠙꠣꠁꠞ ꠇꠦꠙꠞ ꠟꠣꠈꠣꠘ ꠚꠤꠘ꠆ꠖꠤꠟꠣꠅ।
ꠀꠞ ꠙꠣꠇ ꠞꠥꠢꠥꠞ ꠔꠟꠥꠀꠞ ꠝꠣꠘꠤ,
ꠀꠟ꠆ꠟꠣꠞ ꠇꠣꠟꠣꠝꠞꠦ ꠝꠎꠛꠥꠔ ꠇꠞꠤ ꠗꠞꠅ।
১৮ ꠙꠣꠇ ꠞꠥꠢꠥꠞ ꠛꠟꠦ ꠖꠤꠟꠦ-ꠎꠣꠘꠦ ꠢꠞ-ꠢꠣꠝꠦꠡꠣ ꠝꠥꠘꠣꠎꠣꠔ ꠇꠞꠅ।
ꠄꠞꠟꠣꠉꠤ ꠢꠎꠣꠉ ꠞꠁꠀ ꠢꠇꠟ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠡꠛ ꠡꠝꠄ ꠝꠥꠘꠣꠎꠣꠔ ꠇꠞꠣꠔ ꠞꠁꠅ।
১৯ ꠀꠝꠣꠞ ꠟꠣꠉꠤꠅ ꠖꠥꠀ ꠇꠞꠤꠅ,
ꠀꠝꠤ ꠇꠕꠣ ꠝꠣꠔꠣꠞ ꠛꠣꠟꠣ ꠎꠣꠘꠥ ꠀꠟ꠆ꠟꠣꠄ ꠀꠝꠣꠞ ꠝꠥꠈꠞ ꠛꠥꠟꠤ ꠎꠥꠉꠣꠁ ꠖꠦꠁꠘ,
ꠎꠣꠔꠦ ꠔꠛꠟꠤꠉ ꠇꠞꠣꠞ ꠡꠝꠄ ꠀꠝꠤ ꠡꠣꠅꠡ ꠈꠣꠐꠣꠁꠀ ꠈꠥꠡ-ꠈꠛꠞꠤꠞ ꠀꠍꠟ ꠛꠣꠔꠥꠘꠤ ꠜꠦꠖ ꠝꠣꠘꠡꠞꠦ ꠛꠥꠎꠣꠁꠔꠣꠝ ꠙꠣꠞꠤ।
২০ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠟꠥꠀꠞ ꠌꠦꠁꠘꠖꠤ ꠛꠣꠘ꠆ꠖꠣ ꠢꠣꠟꠔꠦꠅ ꠀꠝꠤ ꠀꠟ-ꠝꠍꠤꠞ ꠘꠣꠁꠛ ꠢꠤꠡꠣꠛꠦ ꠇꠣꠝ ꠇꠞꠞꠣꠝ।
ꠔꠦ ꠎꠦꠟꠞ ꠝꠣꠎꠦ ꠞꠁꠀ ꠎꠦꠟꠣꠈꠣꠘ ꠡꠣꠅꠡ ꠈꠣꠐꠣꠁꠀ ꠔꠛꠟꠤꠉ ꠇꠞꠣ ꠎꠞꠥꠞ,
ꠖꠥꠀ ꠇꠞꠤꠅ,
ꠀꠝꠤ ꠎꠣꠔꠦ ꠅꠟꠣ ꠇꠞꠔꠣꠝ ꠙꠣꠞꠤ।
ꠛꠤꠖꠣꠄꠁ ꠖꠥꠀ
২১ ꠀꠝꠣꠞ ꠢꠣꠟ-ꠢꠇꠤꠇꠔ ꠇꠤꠟꠣꠈꠣꠘ ꠀꠞ ꠀꠝꠣꠞ ꠖꠤꠘ-ꠇꠣꠟ ꠇꠤꠟꠣ ꠎꠣꠞ,
ꠁꠔꠣ ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠔꠥꠈꠤꠇ ꠜꠣꠁꠞ ꠉꠦꠍ ꠕꠣꠇꠤ ꠢꠥꠘꠛꠣꠄ।
ꠄꠁꠘ ꠀꠝꠞꠣꠞ ꠝꠣꠟꠤꠇꠞ ꠢꠇ-ꠢꠣꠟꠣꠟ ꠈꠦꠎꠝꠔꠇꠣꠞꠤ।
২২ ꠀꠝꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ,
ꠔꠥꠝꠞꠣ ꠔꠣꠘ ꠝꠥꠈ ꠕꠣꠇꠤ ꠀꠝꠞꠣꠞ ꠈꠛꠞꠣ-ꠈꠛꠞ ꠢꠥꠘꠛꠣꠄ,
ꠔꠣꠁꠘ ꠉꠤꠀ ꠔꠥꠝꠞꠣꠞꠦ ꠃꠔꠡꠣꠢ ꠖꠤꠛꠣ।