ꠖꠣꠖꠤꠞ ꠝꠥꠍꠟꠣ ꠛꠣꠖ ꠖꠤꠀ ꠀꠟ꠆ꠟꠣꠞ ꠞꠥꠢꠦ ꠄꠛꠣꠖꠔ ꠇꠞꠅ
৩
১ ꠅ ꠀꠝꠣꠞ ꠜꠣꠁ ꠅꠇꠟ,
ꠢꠦꠡ-ꠝꠦꠡ ꠇꠁꠞꠣꠝ,
ꠝꠣꠟꠤꠇꠞ ꠘꠣꠝꠦ ꠈꠥꠡꠤ ꠇꠞꠅ।
ꠄꠇ ꠛꠦꠙꠣꠞ ꠟꠁꠀ ꠛꠣꠞꠦ ꠛꠣꠞꠦ ꠟꠦꠈꠔꠦ ꠀꠝꠣꠞ ꠇꠥꠘꠥ ꠇꠡ꠆ꠐ ꠅꠃ ꠘꠣ,
ꠔꠥꠝꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠀꠝꠤ ꠁꠔꠣ ꠇꠞꠞꠣꠝ।
২ ꠢꠥꠘꠅ,
ꠢꠃ ꠇꠥꠇꠞꠞ ꠙꠣꠟ ꠕꠣꠇꠤ,
ꠝꠣꠘꠤ ꠘꠣꠚꠞꠝꠣꠘ ꠖꠟꠞ ꠖꠣꠖꠤꠞ ꠝꠥꠍꠟꠣ ꠕꠣꠇꠤ ꠢꠥꠡꠤꠀꠞ ꠞꠁꠅ।
ꠁꠔꠣꠄ ꠔ ꠔꠣꠞꠣꠞ ꠡꠞꠤꠟꠞ ꠇꠣꠐꠣ-ꠌꠤꠞꠣꠞ ꠃꠙꠞꠦꠃ ꠜꠞꠡꠣ ꠇꠞꠦ।
৩ ꠀꠍꠟꠦ ꠀꠝꠞꠣꠃ ꠅꠁꠟꠣꠝ ꠈꠣꠐꠤ ꠝꠍꠟꠝꠣꠘꠤ ꠇꠞꠣꠁꠟ ꠝꠣꠘꠥꠡ,
ꠀꠝꠞꠣ ꠔ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠉꠃꠞꠛ ꠇꠞꠤ,
ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠔꠣꠘ ꠄꠛꠣꠖꠔ ꠇꠞꠤ,
ꠡꠞꠤꠟꠤ ꠇꠥꠘꠥ ꠄꠛꠣꠖꠔꠞ ꠃꠙꠞꠦ ꠜꠞꠡꠣ ꠇꠞꠤ ꠘꠣ।
৪ ꠀꠍꠟꠦ ꠇꠦꠃ ꠎꠥꠖꠤ ꠝꠘꠅ ꠇꠞꠦ,
ꠘꠤꠎꠞ ꠡꠞꠤꠟꠤ ꠄꠛꠣꠖꠔꠞ ꠃꠙꠞꠦ ꠜꠞꠡꠣ ꠇꠞꠣꠞ ꠎꠥꠇ꠆ꠔꠤ ꠀꠍꠦ,
ꠔꠦ ꠢꠦ ꠛꠥꠎꠤꠟꠣꠃꠇ,
ꠔꠣꠞ ꠌꠣꠁꠔꠦ ꠀꠝꠣꠞ ꠀꠞꠅ ꠛꠦꠡꠤ ꠎꠥꠇ꠆ꠔꠤ ꠀꠍꠦ।
ꠀꠝꠤꠅ ꠁꠔꠣꠞ ꠃꠙꠞꠦ ꠜꠞꠡꠣ ꠇꠞꠔꠣꠝ ꠙꠣꠞꠟꠣꠝ ꠅꠘꠦ।
৫ ꠎꠘꠝꠞ ꠀꠐ ꠖꠤꠘꠞ ꠖꠤꠘꠃ ꠀꠝꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠤꠟ।
ꠀꠝꠤ ꠄꠇꠎꠘ ꠈꠣꠐꠤ ꠁꠛꠞꠣꠘꠤ,
ꠀꠝꠣꠞ ꠎꠘꠝ ꠅꠁꠍꠦ ꠔ ꠛꠘꠤ ꠁꠍꠞꠣꠁꠟꠞ ꠛꠤꠘ-ꠁꠀꠝꠤꠘ ꠉꠥꠡ꠆ꠐꠤꠔ।
ꠢꠎꠞꠔ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠛꠦꠙꠣꠞꠦ ꠀꠝꠤ ꠔ ꠚꠞꠤꠡꠤ ꠎꠝꠣꠔꠞ।
৬ ꠡꠞꠤꠅꠔ ꠝꠣꠘꠣꠞ ꠛꠦꠙꠣꠞꠦ ꠇꠥꠘꠥ ꠝꠣꠘꠡꠦ ꠀꠝꠣꠞ ꠈꠥꠔ ꠛꠣꠞ ꠇꠞꠔ ꠙꠣꠞꠍꠦ ꠘꠣ।
ꠗꠞ꠆ꠝꠞ ꠛꠦꠙꠣꠞꠦ ꠀꠝꠤ ꠈꠥꠛ ꠇꠠꠣ,
ꠀꠟ-ꠝꠍꠤꠞ ꠎꠝꠣꠔꠞ ꠃꠙꠞꠦꠅ ꠀꠝꠤ ꠎꠥꠟꠥꠝ ꠇꠞꠔꠣꠝ।
৭ ꠅꠁꠟꠦ ꠅꠃ ꠀꠝꠟ ꠇꠞꠣꠄ ꠀꠝꠣꠞ ꠎꠔ ꠚꠣꠄꠖꠣ ꠅꠁꠍꠤꠟ,
ꠅꠈꠘ ꠀꠟ-ꠝꠍꠤꠞ ꠟꠣꠉꠤ ꠀꠝꠤ ꠁꠔꠣꠞꠦ ꠈꠦꠔꠤ ꠝꠘꠅ ꠇꠞꠤ।
৮ ꠀꠍꠟꠦ ꠀꠝꠤ ꠎꠣꠞ ꠟꠣꠉꠤ ꠁ ꠈꠦꠔꠤ ꠡ꠆ꠛꠤꠇꠣꠞ ꠇꠞꠤꠀꠞ,
ꠄꠁꠘꠃ ꠀꠝꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤ।
ꠔꠣꠘꠞꠦ ꠎꠣꠘꠣꠞ ꠝꠣꠎꠦꠃ ꠢꠇꠟ ꠕꠣꠇꠤ ꠛꠠ ꠚꠣꠄꠖꠣ,
ꠔꠣꠘ ꠔꠥꠟꠘꠣꠄ ꠛꠣꠖ-ꠛꠣꠇꠤ ꠢꠇ꠆ꠇꠟꠔꠣꠞꠦꠃ ꠀꠝꠤ ꠈꠦꠔꠤ ꠝꠘꠅ ꠇꠞꠤ।
ꠀꠝꠤ ꠎꠣꠔꠦ ꠀꠟ-ꠝꠍꠤꠞꠦ ꠙꠣꠁ,
ꠀꠞ ꠀꠝꠣꠞꠦ ꠎꠣꠔꠦ ꠀꠟ-ꠝꠍꠤꠞ ꠟꠉꠦ ꠄꠇꠈꠣꠘꠅ ꠝꠤꠟꠣꠁꠟ ꠖꠦꠈꠣ ꠎꠣꠄ,
ꠅꠃ ꠘꠤꠅꠔꠦꠃ ꠀꠝꠤ ꠁꠔꠣ ꠢꠇ꠆ꠇꠟꠔꠣꠞꠦ ꠝꠄꠟꠣꠞ ꠟꠣꠈꠣꠘ ꠢꠞꠣꠁꠀ ꠚꠣꠟꠣꠁꠍꠤ।
৯ ꠔꠦ ꠡꠞꠤꠅꠔ ꠝꠣꠘꠣꠄ ꠀꠝꠤ ꠎꠦ ꠙꠞꠦꠎꠉꠣꠞ ꠛꠘꠤꠉꠦꠍꠤ,
ꠁꠈꠣꠘ ꠘꠣꠄ,
ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄꠃ ꠀꠟ꠆ꠟꠣꠄ ꠀꠝꠣꠞꠦ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠇꠞꠍꠂꠘ।
ꠁ ꠙꠞꠦꠎꠉꠣꠞꠤ ꠈꠣꠟꠤ ꠀꠟ꠆ꠟꠣ ꠕꠣꠇꠤꠃ ꠝꠤꠟꠦ,
ꠁꠔꠣ ꠔ ꠁꠝꠣꠘꠞ ꠃꠙꠞꠦ ꠘꠤꠞꠜꠞ ꠇꠞꠦ।
ꠀꠟ-ꠝꠍꠤꠞ ꠟꠉꠦ ꠝꠤꠟꠣꠞ ꠛꠣꠖꠦꠃ ꠀꠝꠣꠞ ꠅꠃ ꠢꠣꠟꠔ ꠅꠁꠍꠦ।
১০ ꠔꠦ ꠀꠝꠤ ꠀꠟ-ꠝꠍꠤꠞꠦ ꠌꠤꠘꠔꠣꠝ ꠌꠣꠁ,
ꠎꠦ ꠇꠥꠖꠞꠔꠤ ꠛꠟꠦ ꠔꠣꠘꠞꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠤꠟ,
ꠅꠃ ꠛꠟꠞꠦꠅ ꠌꠤꠘꠔꠣꠝ ꠌꠣꠁ।
ꠀꠝꠤ ꠔꠣꠘ ꠖꠥꠈ-ꠝꠍꠤꠛꠔꠞ ꠜꠣꠉꠤ ꠅꠁꠔꠣꠝ ꠌꠣꠁ,
ꠔꠣꠁꠘ ꠎꠦꠟꠣ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠟꠣ,
ꠀꠝꠤꠅ ꠅꠃ ꠝꠃꠔꠅ ꠡꠞꠤꠇ ꠅꠁꠔꠣꠝ ꠌꠣꠁ।
১১ ꠀꠞ ꠎꠦꠇꠥꠘꠥ ꠟꠣꠈꠣꠘ ꠝꠞꠘ ꠕꠣꠇꠤ ꠎꠤꠘ꠆ꠖꠣ ꠅꠀꠔꠅ ꠡꠞꠤꠇ ꠞꠁ।
ꠀꠈꠦꠞꠣꠔꠞ ꠙꠕꠦ ꠌꠟꠅ
১২ ꠔꠦ ꠀꠝꠤ ꠎꠦꠔꠣ ꠙꠣꠁꠔꠣꠝ ꠌꠣꠁꠞꠣꠝ,
ꠁꠔꠣ ꠎꠦ ꠅꠈꠘꠃ ꠙꠣꠁꠟꠤꠍꠤ,
ꠛꠣ ꠙꠥꠞꠣꠙꠥꠞ ꠇꠣꠝꠤꠀꠛ ꠅꠁꠉꠦꠍꠤ ꠁꠟꠣ ꠇꠥꠘ꠆ꠔꠣ ꠘꠣꠄ।
ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠎꠦ ꠘꠤꠅꠔꠦ ꠀꠝꠣꠞꠦ ꠛꠘ꠆ꠖꠤ ꠇꠞꠍꠂꠘ,
ꠅꠃ ꠘꠤꠅꠔ ꠙꠥꠞꠣ ꠇꠞꠣꠞ ꠀꠝꠤ ꠖꠃꠠꠣꠁꠞꠣꠝ।
১৩ ꠜꠣꠁ ꠅꠇꠟ,
ꠀꠝꠤ ꠝꠘꠅ ꠇꠞꠞꠣꠝ ꠘꠣ,
ꠀꠝꠤ ꠁꠔꠣꠞ ꠟꠣꠉꠣꠟ ꠙꠣꠁꠟꠤꠍꠤ।
ꠅꠁꠟꠦ ꠈꠞꠞ ꠢꠇꠟꠔꠣ ꠚꠣꠟꠣꠁꠀ ꠀꠝꠤ ꠖꠤꠟꠦ-ꠎꠣꠘꠦ ꠍꠣꠝꠘꠦꠖꠤ ꠖꠃꠠꠣꠁꠀꠞ।
১৪ ꠖꠃꠠꠣꠁ ꠖꠃꠠꠣꠁ ꠌꠦꠡ꠆ꠐꠣ ꠇꠞꠤꠀꠞ,
ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ ꠀꠟ꠆ꠟꠣ ꠙꠣꠇꠞ ꠎꠦ ꠛꠦꠢꠦꠡ꠆ꠔꠤ ꠖꠣꠅꠔ ꠀꠍꠦ,
ꠙꠥꠞꠥꠡ꠆ꠇꠣꠞ ꠢꠤꠡꠣꠛꠦ ꠅꠃ ꠖꠣꠅꠔꠅ ꠢꠣꠝꠣꠁꠔꠣꠝ ꠙꠣꠞꠤ।
১৫ ꠄꠞꠟꠣꠉꠤ ꠇꠁꠞꠣꠝ,
ꠀꠝꠞꠣ ꠎꠣꠞꠣ ꠢꠎꠞꠔ ꠁꠍꠣꠞ ꠙꠕꠦ ꠛꠃꠔ ꠀꠉꠥꠀꠁ ꠉꠦꠍꠤ,
ꠀꠝꠞꠣꠞ ꠘꠤꠅꠔꠅ ꠅꠟꠣꠈꠣꠘ ꠅꠀ ꠎꠞꠥꠞ।
ꠀꠞ ꠔꠥꠝꠞꠣꠞ ꠎꠥꠖꠤ ꠅꠁꠘ꠆ꠘ ꠇꠥꠘꠥ ꠘꠤꠅꠔ ꠕꠣꠇꠦ,
ꠔꠦ ꠀꠟ꠆ꠟꠣꠄꠃ ꠙꠕ ꠛꠣꠔꠣꠁ ꠖꠤꠛꠣꠘꠦ।
১৬ ꠎꠣꠁ ꠅꠃꠇ,
ꠀꠝꠞꠣ ꠎꠔꠈꠣꠘ ꠀꠉꠥꠀꠁꠍꠤ,
ꠅꠃ ꠟꠣꠈꠣꠘ ꠎꠤꠘ꠆ꠖꠦꠉꠤꠅ ꠇꠣꠐꠣꠘꠤ ꠃꠌꠤꠔ।
১৭ ꠜꠣꠁ ꠅꠇꠟ,
ꠔꠥꠝꠞꠣ ꠇꠤꠟꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠄ,
ꠁꠔꠣ ꠔ ꠀꠝꠤ ꠢꠤꠇꠣꠁꠍꠤ।
ꠔꠥꠝꠞꠣ ꠀꠝꠣꠞ ꠟꠣꠈꠣꠘ ꠌꠟꠅ,
ꠀꠞ ꠅꠃ ꠟꠣꠈꠣꠘ ꠎꠣꠞꠣ ꠌꠟꠦ,
ꠔꠣꠞꠣꠞꠦ ꠖꠦꠈꠤꠀ ꠢꠤꠇꠅ।
১৮ ꠀꠝꠤ ꠔ ꠛꠃꠔ ꠛꠣꠞ ꠔꠥꠝꠞꠣꠞꠦ ꠇꠁꠍꠤ,
ꠀꠞ ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠅꠈꠘꠅ ꠇꠁꠞꠣꠝ,
ꠁꠟꠣꠅ ꠛꠃꠔ ꠎꠘ ꠀꠍꠦ,
ꠎꠦꠞꠣ ꠀꠟ-ꠝꠍꠤꠞ ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠖꠥꠡꠝꠘꠞ ꠟꠣꠈꠣꠘ ꠌꠟꠦꠞ।
১৯ ꠔꠣꠞꠣꠞ ꠇꠙꠣꠟꠅ ꠀꠍꠦ ꠛꠤꠘꠣꠡ।
ꠔꠣꠞꠣꠞ ꠙꠦꠐꠃ ꠔꠣꠞꠣꠞ ꠀꠟ꠆ꠟꠣ।
ꠘꠣꠚꠞꠝꠣꠘꠤ ꠇꠣꠝ ꠟꠁꠀ ꠔꠣꠞꠣ ꠛꠠꠣꠁ ꠇꠞꠦ,
ꠈꠣꠟꠤ ꠖꠥꠘꠤꠀꠞ ꠗꠣꠘ꠆ꠖꠣꠄ ꠙꠣꠉꠟ।
২০ ꠅꠁꠟꠦ ꠀꠝꠞꠣꠞ ꠀꠍꠟ ꠛꠣꠠꠤ ꠔ ꠛꠦꠢꠦꠡ꠆ꠔꠅ।
ꠀꠝꠞꠣꠞ ꠔꠞꠣꠅꠞꠣ ꠝꠣꠟꠤꠇ,
ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠢꠘ ꠕꠣꠇꠤ ꠔꠡꠞꠤꠚ ꠀꠘꠛꠣ।
ꠀꠝꠞꠣ ꠔꠣꠘ ꠟꠣꠉꠤ ꠖꠤꠟꠦ-ꠎꠣꠘꠦ ꠛꠣꠞ ꠌꠣꠁꠞꠣꠝ।
২১ ꠔꠣꠁꠘ ꠀꠁꠀ ꠀꠝꠞꠣꠞ ꠅꠃ ꠇꠝꠎꠥꠞ ꠇꠣꠄꠀ ꠛꠖꠟꠣꠁꠀ,
ꠔꠣꠘ ꠇꠣꠄꠀꠞ ꠟꠣꠈꠣꠘ ꠈꠦꠝꠔꠣꠀꠟꠣ ꠘꠥꠞꠞ ꠇꠣꠄꠀ ꠖꠤꠛꠣ।
ꠎꠦ ꠇꠥꠖꠞꠔꠤ ꠛꠟꠦ ꠔꠣꠁꠘ ꠢꠇ꠆ꠇꠟꠔꠣ ꠇꠞꠔꠣ ꠙꠣꠞꠂꠘ,
ꠢꠃ ꠛꠟꠦꠃ ꠔꠣꠁꠘ ꠁꠔꠣ ꠇꠞꠛꠣ।