২
১ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠌꠣꠁꠞꠣꠝ,
ꠀꠝꠤ ꠔ ꠔꠥꠝꠞꠣꠞ ꠟꠣꠉꠤ,
ꠟꠣꠅꠖꠤꠇꠦꠀ ꠐꠣꠃꠘꠞ ꠎꠝꠣꠔꠞ ꠟꠣꠉꠤ,
ꠀꠞ ꠎꠦꠞꠣ ꠀꠝꠣꠞꠦ ꠖꠦꠈꠍꠦ ꠘꠣ ꠔꠣꠞꠣꠞ ꠟꠣꠉꠤꠅ ꠇꠔ ꠝꠦꠘꠔ ꠇꠞꠞꠣꠝ।
২ ꠀꠝꠤ ꠌꠣꠁꠞꠣꠝ,
ꠔꠣꠞꠣꠞ ꠖꠤꠟꠅ ꠜꠞꠡꠣ ꠙꠣꠁꠀ ꠝꠢꠛ꠆ꠛꠔꠦ ꠄꠇ ꠅꠃꠇ।
ꠀꠞ ꠙꠥꠞꠣꠙꠥꠞ ꠀꠈꠟꠦ ꠀꠈꠟꠖꠣꠞ ꠛꠘꠤꠀ ꠘꠤꠌ꠆ꠌꠤꠔ ꠅꠃꠇ।
ꠔꠦꠃ ꠀꠟ꠆ꠟꠣꠞ ꠟꠥꠇꠣꠁꠟ ꠛꠣꠔꠥꠘꠤ ꠜꠦꠖ ꠛꠥꠎꠛ,
ꠝꠣꠘꠤ ꠀꠟ-ꠝꠍꠤꠞꠦ ꠔꠣꠞꠣ ꠌꠤꠘꠛ।
৩ ꠀꠟ-ꠝꠍꠤꠞ ꠝꠣꠎꠦꠃ ꠢꠇꠟ ꠀꠈꠟ-ꠢꠦꠇꠝꠔ ꠟꠥꠇꠣꠁꠟ ꠀꠍꠦ।
৪ ꠀꠝꠤ ꠁꠔꠣ ꠇꠁꠟꠣꠝ,
ꠎꠣꠔꠦ ꠇꠦꠃ ꠛꠣꠘꠥꠀꠐ ꠝꠣꠔ-ꠇꠕꠣ ꠝꠣꠔꠤꠀ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠤꠔ ꠘꠣ ꠙꠣꠞꠦ।
৫ ꠀꠝꠤ ꠡ-ꠡꠞꠤꠟꠦ ꠔꠥꠝꠞꠣꠞ ꠝꠣꠎꠦ ꠘꠣ ꠕꠣꠇꠟꠦꠅ ꠞꠥꠢꠥꠞ ꠛꠟꠦ ꠑꠤꠇꠃ ꠔꠥꠝꠞꠣꠞ ꠝꠣꠎꠦ ꠀꠎꠤꠞ ꠀꠍꠤ।
ꠔꠥꠝꠞꠣꠞ ꠜꠣꠟꠣ ꠌꠣꠟ-ꠌꠟꠘ ꠀꠞ ꠀꠟ-ꠝꠍꠤꠞ ꠃꠙꠞꠦ ꠝꠎꠛꠥꠔ ꠁꠝꠣꠘ ꠖꠦꠈꠤꠀ ꠀꠝꠣꠞ ꠈꠥꠛ ꠜꠣꠟꠣ ꠟꠣꠉꠦꠞ।
ꠀꠟ-ꠝꠍꠤꠞ ꠝꠣꠎꠦꠃ ꠀꠍꠟ ꠎꠤꠘ꠆ꠖꠦꠉꠤ
৬ ꠁꠍꠣ ꠀꠟ-ꠝꠍꠤꠞꠦ ꠔꠥꠝꠞꠣ ꠝꠣꠟꠤꠇ ꠢꠤꠡꠣꠛꠦ ꠎꠦꠟꠣ ꠇꠛꠥꠟ ꠇꠞꠍ,
ꠅꠃ ꠟꠣꠈꠣꠘ ꠔꠣꠘ ꠟꠉꠦ ꠞꠁꠀ ꠎꠤꠘ꠆ꠖꠦꠉꠤꠅ ꠇꠣꠐꠣꠅ।
৭ ꠀꠟ-ꠝꠍꠤꠞ ꠝꠣꠎꠦ ꠡꠥꠟ꠆ꠟꠀꠘꠣ ꠒꠥꠛ ꠖꠤꠀ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠞꠦ ꠉꠠꠤꠀ ꠔꠥꠟꠅ।
ꠔꠥꠝꠞꠣ ꠔꠣꠟꠤꠝ ꠙꠣꠁꠀ ꠎꠦ ꠁꠝꠣꠘ ꠀꠘꠍ,
ꠅꠃ ꠁꠝꠣꠘꠦ ꠝꠎꠛꠥꠔ ꠞꠅ ꠀꠞ ꠢꠣꠝꠦꠡꠣ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠅ।
৮ ꠔꠥꠝꠞꠣ ꠢꠥꠡꠤꠀꠞ ꠞꠁꠅ,
ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠔꠣꠟꠤꠝꠖꠤ ꠛꠣꠘ꠆ꠖꠤꠀ ꠛꠦ-ꠙꠕꠦ ꠐꠣꠘꠤꠀ ꠘꠤꠔ ꠘꠣ ꠙꠣꠞꠦ।
ꠀꠟ-ꠝꠍꠤꠞ ꠟꠉꠦ ꠁ ꠔꠣꠟꠤꠝꠞ ꠇꠥꠘꠥ ꠝꠤꠟ ꠘꠣꠁ,
ꠁꠔꠣ ꠔ ꠝꠣꠘꠡꠞ ꠝꠘꠉꠠꠣ ꠞꠍꠥꠝꠔ ꠀꠞ ꠖꠥꠘꠤꠀꠛꠤ ꠘꠣꠘꠣꠘ ꠀꠌꠣꠞ-ꠛꠦꠛꠢꠣꠞꠞ ꠃꠙꠞꠦ ꠜꠞꠡꠣ ꠇꠞꠦ।
৯ ꠀꠟ꠆ꠟꠣꠞ ꠢꠇ꠆ꠇꠟ ꠟꠣꠈꠣꠘ ꠉꠥꠘꠣꠉꠥꠘ ꠀꠟ-ꠝꠍꠤꠞ ꠇꠣꠄꠀꠞ ꠜꠤꠔꠞꠦ ꠀꠍꠦ।
১০ ꠄꠞꠟꠣꠉꠤ ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠀ ꠔꠥꠝꠞꠣꠅ ꠢꠇꠟ ꠉꠥꠘꠦ ꠇꠣꠝꠤꠟ ꠅꠁꠍ,
ꠔꠣꠘ ꠀꠡꠘ ꠔ ꠢꠇꠟ ꠘꠝꠥꠘꠣꠞ ꠡꠣꠡꠘꠇꠣꠞꠤ ꠀꠞ ꠈꠦꠝꠔꠣꠀꠟꠣ ꠢꠇ꠆ꠇꠟꠔꠣꠞ ꠃꠙꠞꠦ।
১১ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠔ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠦ।
ꠅꠃ ꠝꠍꠟꠝꠣꠘꠤ ꠇꠥꠘꠥ ꠝꠣꠘꠡꠞ ꠀꠔꠦ ꠇꠞꠣꠁꠟ ꠅꠁꠍꠦ ꠘꠣ,
ꠀꠟ-ꠝꠍꠤꠄ ꠘꠤꠎꠦꠃ ꠁꠔꠣ ꠇꠞꠍꠂꠘ,
ꠝꠣꠘꠤ ꠖꠤꠟꠞ ꠝꠣꠎꠦ ꠎꠦ ꠛꠖ ꠈꠣꠁꠡ ꠀꠍꠤꠟ,
ꠅꠃ ꠛꠖ ꠈꠣꠁꠡꠞꠦ ꠖꠤꠟ ꠕꠣꠇꠤ ꠇꠣꠐꠤꠀ ꠚꠣꠟꠣꠁꠍꠂꠘ।
১২ ꠔꠃꠛꠣꠞ ꠉꠥꠍꠟꠞ ꠝꠣꠎꠖꠤ ꠀꠟ-ꠝꠍꠤꠞ ꠟꠉꠦ ꠔꠥꠝꠞꠣꠞꠦꠅ ꠝꠣꠐꠤ ꠖꠦꠅꠀ ꠅꠁꠍꠤꠟ,
ꠀꠞ ꠎꠦꠁꠘ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ,
ꠢꠃ ꠀꠟ꠆ꠟꠣꠞ ꠇꠥꠖꠞꠔꠤ ꠛꠟꠦ ꠁꠝꠣꠘꠞ ꠝꠣꠎꠖꠤ ꠔꠥꠝꠞꠣꠞꠦꠅ ꠀꠟ-ꠝꠍꠤꠞ ꠟꠉꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
১৩ ꠔꠥꠝꠞꠣꠞ ꠉꠥꠘꠣ ꠀꠞ ꠖꠤꠟꠞ ꠛꠖ ꠈꠣꠁꠡ ꠘꠣ ꠢꠞꠣꠘꠤꠄ ꠝꠥꠞ꠆ꠖꠣ ꠀꠍꠟꠣꠄ,
ꠅꠁꠟꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠟ-ꠝꠍꠤꠞ ꠟꠉꠦ ꠎꠤꠘ꠆ꠖꠣ ꠇꠞꠍꠂꠘ।
ꠔꠣꠁꠘ ꠀꠝꠞꠣꠞ ꠢꠇꠟ ꠉꠥꠘꠣꠞ ꠝꠣꠚꠤ ꠖꠤꠍꠂꠘ।
১৪ ꠀꠞ ꠀꠝꠞꠣꠞ ꠛꠖ ꠀꠝꠟ-ꠘꠝꠣꠞ ꠎꠦ ꠖꠟꠤꠟ ꠀꠍꠤꠟ,
ꠅꠃ ꠖꠟꠤꠟꠞꠦ ꠢꠇꠟ ꠎꠣꠔꠞ ꠖꠣꠛꠤ-ꠖꠣꠅꠀ ꠡꠥꠖ꠆ꠖꠣ ꠚꠥꠍꠤꠀ ꠚꠣꠟꠣꠁꠍꠂꠘ।
ꠟꠣꠇꠠꠤꠖꠤ ꠛꠣꠘꠣꠁꠟ ꠎꠦ ꠍꠟꠤꠛꠅ ꠁꠍꠣꠞꠦ ꠇꠣꠔꠟ ꠇꠞꠣ ꠅꠁꠍꠦ,
ꠅꠃ ꠍꠟꠤꠛꠅ ꠁ ꠖꠟꠤꠟꠞꠦ ꠙꠦꠞꠦꠉ ꠝꠣꠞꠤꠀ ꠛꠣꠔꠤꠟ ꠇꠞꠍꠂꠘ।
১৫ ꠀꠟ-ꠝꠍꠤꠄ ꠛꠖ ꠡꠣꠡꠘꠇꠣꠞꠤ ꠀꠞ ꠈꠦꠝꠔꠣꠀꠟꠣ ꠢꠇ꠆ꠇꠟꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠍꠂꠘ।
ꠍꠟꠤꠛꠅ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠔꠣꠞꠣꠞ ꠃꠙꠞꠦ ꠎꠂꠁ ꠅꠁꠍꠂꠘ ꠀꠞ ꠢꠇꠟꠞ ꠍꠣꠝꠘꠦ ꠔꠣꠞꠣꠞ ꠝꠥꠈ ꠘꠤꠌꠣ ꠇꠞꠍꠂꠘ।
ꠘꠇꠟ ꠔꠣꠟꠤꠝꠞ ꠛꠦꠙꠣꠞꠦ ꠢꠥꠡꠤꠀꠞꠤ
১৬ ꠄꠞꠟꠣꠉꠤꠃ ꠡꠤꠘ꠆ꠘꠤ-ꠍꠈꠣꠔ,
ꠙꠥꠎꠣ-ꠙ꠆ꠞꠡꠣꠖ ꠅꠝꠣꠛꠁꠡꠣ-ꠙꠥꠘ꠆ꠘꠤꠝꠣ,
ꠁꠖ ꠛꠣ ꠎꠥꠝ꠆ꠝꠣꠛꠣꠞꠞ ꠘꠤꠅꠝ-ꠇꠣꠘꠥꠘ ꠟꠁꠀ ꠔꠥꠝꠞꠣꠞꠦ ꠖꠥꠡꠤ ꠇꠞꠣꠞ ꠄꠈꠔꠤꠀꠞ ꠇꠦꠃꠞꠞ ꠘꠣꠁ।
১৭ ꠁꠔꠣ ꠔ ꠀꠍꠤꠟ,
ꠜꠛꠤꠡꠔꠦ ꠎꠦꠔꠣ ꠀꠁꠛ ꠅꠔꠣꠞ ꠄꠇꠐꠣ ꠘꠝꠥꠘꠣ ꠝꠣꠔ꠆ꠞ,
ꠅꠁꠟꠦ ꠀꠍꠟꠔꠣ ꠔ ꠀꠟ-ꠝꠍꠤꠞ ꠝꠣꠎꠦꠃ ꠀꠍꠦ।
১৮ ꠎꠦꠞꠣ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠦꠅꠀ ꠀꠞ ꠚꠤꠞꠤꠡ꠆ꠔꠣ ꠅꠇꠟꠞ ꠄꠛꠣꠖꠔ ꠇꠞꠣꠞꠦ ꠎꠞꠥꠞꠤ ꠝꠘꠅ ꠇꠞꠦ,
ꠄꠞꠣ ꠎꠣꠘꠥ ꠔꠥꠝꠞꠣꠞꠦ ꠙꠥꠞꠥꠡ꠆ꠇꠣꠞꠞ ꠙꠕ ꠕꠣꠇꠤ ꠢꠞꠣꠁꠔ ꠘꠣ ꠙꠣꠞꠦ।
ꠅꠃ ꠘꠝꠥꠘꠣꠞ ꠝꠣꠘꠡꠦ ꠎꠦꠔꠣ ꠖꠦꠈꠍꠦ ꠇꠁꠀ ꠈꠣꠝꠈꠣ ꠛꠠꠣꠁ-ꠛꠦꠐꠣꠉꠤꠞꠤ ꠇꠞꠦ,
ꠀꠞ ꠅꠔꠣ ꠟꠁꠀ ꠛꠠ ꠛꠠ ꠉꠚ ꠝꠣꠞꠦ,
ꠀꠍꠟꠦ ꠄꠞꠣꠞ ꠅꠘ꠆ꠔꠞ ꠔ ꠈꠣꠟꠤ ꠖꠥꠘꠤꠀꠛꠤ ꠌꠤꠘ꠆ꠔꠣꠄ ꠜꠞꠣ।
১৯ ꠔꠣꠞꠣ ꠔ ꠝꠣꠕꠣꠞꠦ,
ꠝꠣꠘꠤ ꠁꠍꠣ ꠀꠟ-ꠝꠍꠤꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠦ ꠘꠣ,
ꠅꠃ ꠝꠣꠕꠣꠞ ꠈꠦꠝꠔꠣꠄ ꠀꠡ꠆ꠔꠣ ꠡꠞꠤꠟꠞ ꠀꠒ꠆ꠒꠤ-ꠝꠣꠋꠡ ꠛꠟ-ꠡꠇ꠆ꠔꠤ ꠙꠣꠁꠀ ꠄꠇꠈꠣꠘꠅ ꠞꠄ,
ꠀꠞ ꠀꠟ꠆ꠟꠣꠁ ꠛꠟꠦ ꠛꠣꠠꠦ।
২০ ꠀꠟ-ꠝꠍꠤꠞ ꠟꠉꠦ ꠝꠣꠞꠣ ꠉꠤꠀ ꠔꠥꠝꠞꠣ ꠎꠦꠛꠟꠣ ꠖꠥꠘꠤꠀꠛꠤ ꠢꠇꠟ ꠌꠣꠟ-ꠌꠟꠘ ꠕꠣꠇꠤ ꠢꠞꠤꠀ ꠀꠁꠍ,
ꠔꠦ ꠢꠤꠞꠛꠣꠞ ꠇꠦꠘꠦ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠖꠥꠘꠤꠀꠛꠤ ꠘꠤꠅꠝ-ꠘꠤꠔꠤꠞ ꠉꠥꠟꠣꠝ ꠅꠁꠞꠣꠄ?
২১-২২ ꠢꠥꠘꠅ,
ꠎꠦ ꠎꠤꠘꠤꠡ ꠛꠦꠛꠢꠣꠞ ꠇꠞꠔꠦ ꠇꠞꠔꠦ ꠛꠞꠛꠣꠖ ꠅꠁꠎꠣꠄ,
ꠅꠃ ꠎꠤꠘꠤꠡꠞ ꠛꠦꠙꠣꠞꠦ ꠅꠟꠣ ꠘꠤꠅꠝ ꠀꠍꠦ,
ꠁꠔꠣ ꠗꠞꠤꠅ ꠘꠣ,
ꠍꠁꠅ ꠘꠣ,
ꠈꠣꠁꠅ ꠘꠣ।
ꠁꠔꠣ ꠔ ꠈꠣꠟꠤ ꠝꠣꠘꠡꠞ ꠝꠘꠉꠠꠣ ꠢꠥꠇꠥꠝ ꠀꠞ ꠔꠣꠟꠤꠝ।
২৩ ꠇꠦꠝꠘꠦ ꠄꠛꠣꠖꠔ ꠇꠞꠣ,
ꠘꠤꠎꠞꠦ ꠘꠤꠌꠣ ꠇꠞꠣ,
ꠇꠦꠝꠘꠦ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠦꠅꠀ,
ꠅꠃ ꠘꠤꠅꠝ-ꠘꠤꠔꠤꠄ ꠅꠔꠣ ꠢꠤꠇꠣꠄ।
ꠁ ꠘꠤꠅꠝ-ꠘꠤꠔꠤ ꠖꠦꠈꠟꠦ ꠝꠘꠅ ꠅꠄ,
ꠁꠔꠣ ꠈꠥꠛ ꠀꠈꠟꠞ ꠇꠣꠝ,
ꠅꠁꠟꠦ ꠖꠤꠟꠞ ꠛꠖ ꠈꠣꠁꠡꠞꠦ ꠖꠝꠘ ꠇꠞꠣꠞ ꠟꠣꠉꠤ ꠁꠔꠣꠞ ꠇꠥꠘꠥ ꠖꠣꠝꠃ ꠘꠣꠁ।