ꠎꠝꠣꠔꠞ ꠌꠣꠟꠇꠖꠣꠞ ꠀꠞ ꠈꠣꠖꠤꠝ
৩
১ ꠢꠥꠘꠅ,
ꠀꠍꠟ ꠢꠇ ꠇꠕꠣ ꠅꠁꠟ,
ꠇꠦꠃ ꠎꠥꠖꠤ ꠎꠝꠣꠔꠞ ꠌꠣꠟꠇꠖꠣꠞ ꠅꠁꠔꠣ ꠌꠣꠁꠘ,
ꠔꠦ ꠔꠣꠁꠘ ꠔ ꠘꠦꠇ ꠇꠣꠝ ꠇꠞꠣꠞ ꠈꠤꠀꠟꠤ ꠅꠁꠍꠂꠘ।
২ ꠎꠝꠣꠔꠞ ꠌꠣꠟꠇꠖꠣꠞ ꠝꠣꠘꠡꠞ ꠌꠈꠥꠔ ꠘꠤꠈꠥꠔ ꠅꠁꠔꠦ ꠅꠁꠛ।
ꠔꠣꠘ ꠈꠣꠟꠤ ꠄꠇ ꠛꠃ ꠅꠁꠛ।
ꠔꠣꠁꠘ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠛꠣ,
ꠔꠣꠘ ꠜꠣꠟꠣ ꠀꠈꠟ-ꠛꠥꠖ꠆ꠖꠤ ꠞꠁꠛ,
ꠡ꠆ꠛꠜꠣꠛ ꠅꠁꠛ ꠜꠖ꠆ꠞ,
ꠀꠞ ꠝꠦꠝꠣꠘꠖꠣꠞꠤ ꠇꠞꠔꠦ ꠜꠣꠟꠣ ꠙꠣꠁꠛꠣ।
ꠝꠣꠘꠡꠞꠦ ꠔꠣꠟꠤꠝ ꠖꠦꠅꠀꠞ ꠈꠦꠝꠔꠣ ꠕꠣꠇꠔꠦ ꠅꠁꠛ।
৩ ꠔꠣꠁꠘ ꠎꠣꠘꠥ ꠝꠖꠈꠥꠞ ꠀꠞ ꠛꠖ-ꠝꠤꠎꠣꠎꠤ ꠘꠣ ꠅꠁꠘ,
ꠛꠞꠋ ꠔꠣꠘ ꠡ꠆ꠛꠜꠣꠛ ꠅꠁꠛ ꠘꠞꠝ,
ꠔꠣꠁꠘ ꠎꠣꠘꠥ ꠝꠣꠁꠞ-ꠖꠣꠋꠉꠣ ꠇꠞꠞꠣ ꠛꠣ ꠐꠦꠇꠣ-ꠙꠄꠡꠣꠞ ꠟꠣꠟꠌꠤ ꠘꠣ ꠅꠁꠘ।
৪ ꠔꠣꠁꠘ ꠎꠣꠘꠥ ꠡꠑꠤꠇ ꠜꠣꠛꠦ ꠔꠣꠘ ꠘꠤꠎꠞ ꠙꠞꠤꠛꠣꠞꠞ ꠢꠇ꠆ꠇꠟꠔꠣ ꠌꠣꠟꠣꠁꠘ,
ꠔꠣꠘ ꠢꠥꠞꠥꠔ꠆ꠔꠣꠂꠘ ꠅꠁꠛꠣ ꠛꠣꠁꠖ꠆ꠖ ꠀꠞ ꠀꠖꠛ-ꠇꠣꠄꠖꠣ ꠝꠣꠘꠞꠣ।
৫ ꠎꠦ ꠝꠣꠘꠡꠦ ꠔꠣꠞ ꠘꠤꠎꠞ ꠊꠞ ꠡꠣꠝꠟꠣꠁꠔ ꠙꠣꠞꠦ ꠘꠣ,
ꠢꠦ ꠀꠟ꠆ꠟꠣꠞ ꠎꠝꠣꠔꠞꠦ ꠇꠤꠟꠣ ꠖꠦꠈꠣ-ꠢꠥꠘꠣ ꠇꠞꠛ?
৬ ꠇꠥꠘꠥ ꠘꠄꠀ ꠁꠝꠣꠘꠖꠣꠞ ꠜꠣꠁ ꠎꠝꠣꠔꠞ ꠌꠣꠟꠇꠖꠣꠞ ꠅꠀ ꠑꠤꠇ ꠘꠣꠄ,
ꠁꠟꠣ ꠅꠁꠟꠦ ꠔꠣꠁꠘ ꠢꠄꠔ ꠛꠠꠣꠁ-ꠛꠦꠐꠣꠉꠤꠞꠤꠄ ꠛꠣꠢꠣꠖꠥꠞꠤ ꠇꠞꠛꠣ,
ꠀꠞ ꠁꠛꠟꠤꠍꠞ ꠟꠣꠉꠤ ꠑꠤꠇ ꠇꠞꠣ ꠡꠣꠎꠣꠞ ꠜꠣꠉꠤ ꠅꠁꠛꠣ।
৭ ꠎꠝꠣꠔꠞ ꠛꠣꠁꠞꠞ ꠝꠣꠘꠡꠞ ꠉꠦꠍꠦ ꠔꠣꠘ ꠡꠥꠘꠣꠝ ꠕꠣꠇꠣ ꠖꠞꠇꠣꠞ,
ꠎꠣꠔꠦ ꠀꠈꠔꠣ ꠇꠥꠘꠥ ꠛꠖꠘꠣꠝꠞ ꠜꠣꠉꠤ ꠘꠣ ꠅꠁꠘ ꠀꠞ ꠁꠛꠟꠤꠍꠞ ꠚꠣꠘ꠆ꠖꠅ ꠘꠣ ꠙꠠꠂꠘ।
৮ ꠅꠃꠟꠣ ꠎꠝꠣꠔꠞ ꠈꠣꠖꠤꠝ ꠅꠇꠟꠅ ꠁꠎ꠆ꠎꠔꠤ ꠀꠞ ꠄꠇ ꠇꠕꠣꠞ ꠝꠣꠘꠥꠡ ꠅꠀ ꠎꠞꠥꠞꠤ।
ꠄꠞꠣ ꠎꠣꠔꠦ ꠝꠖꠈꠥꠞ ꠀꠞ ꠢꠣꠞꠣꠝ ꠟꠥꠜ-ꠟꠣꠟꠌꠤ ꠘꠣ ꠅꠁꠘ।
৯ ꠔꠣꠞꠣ ꠎꠣꠘꠥ ꠢꠇ ꠛꠤꠛꠦꠇꠦ ꠁꠍꠣꠄꠁ ꠁꠝꠣꠘꠞ ꠛꠣꠔꠥꠘꠤ ꠛꠦꠙꠣꠞꠞꠦ ꠝꠎꠛꠥꠔ ꠇꠞꠤ ꠖꠤꠟꠅ ꠞꠣꠈꠂꠘ।
১০ ꠄꠞꠟꠣꠉꠤ ꠙꠄꠟꠣ ꠔꠣꠞꠣꠞꠦ ꠎꠣꠌꠣꠁ ꠇꠞꠤ ꠖꠦꠈꠣ ꠎꠞꠥꠞ,
ꠎꠣꠌꠣꠁꠔ ꠎꠥꠖꠤ ꠔꠣꠞꠣ ꠘꠤꠈꠥꠔ ꠅꠁꠘ,
ꠔꠦ ꠎꠝꠣꠔꠞ ꠈꠣꠖꠤꠝ ꠅꠁꠔꠣ ꠙꠣꠞꠛꠣ।
১১ ꠑꠤꠇ ꠅꠟꠣꠈꠣꠘ ꠛꠦꠐꠤ ꠝꠣꠘꠥꠡꠅ ꠎꠣꠘꠥ ꠁꠎ꠆ꠎꠔꠤ ꠅꠁꠘ।
ꠄꠞꠣ ꠝꠣꠘꠡꠞ ꠛꠖꠘꠣꠝ ꠘꠣ ꠉꠣꠁꠘ,
ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ,
ꠀꠞ ꠢꠇꠟ ꠛꠦꠙꠣꠞꠦ ꠛꠤꠡ꠆ꠛꠣꠡꠤ ꠅꠁꠘ।
১২ ꠈꠣꠖꠤꠝ ꠍꠣꠛ ꠈꠣꠟꠤ ꠄꠇ ꠛꠃꠀꠟꠣ ꠝꠣꠘꠥꠡ ꠅꠁꠛꠣ।
ꠔꠣꠁꠘ ꠎꠣꠘꠥ ꠜꠣꠟꠣꠝꠘ꠆ꠔꠦ ꠔꠣꠘ ꠛꠃ ꠙꠥꠀ-ꠙꠥꠠꠤꠘ ꠀꠞ ꠡꠋꠡꠣꠞꠞ ꠖꠦꠈꠣ-ꠢꠥꠘꠣ ꠇꠞꠂꠘ।
১৩ ꠎꠦ ꠈꠣꠖꠤꠝꠦ ꠜꠣꠟꠣꠝꠘ꠆ꠔꠦ ꠈꠦꠎꠝꠔ ꠇꠞꠂꠘ,
ꠄꠁꠘ ꠡꠥꠘꠣꠝ ꠙꠣꠁꠘ,
ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠕꠣꠇꠣꠄ ꠔꠣꠘ ꠖꠤꠟ ꠡꠣꠅꠡꠦ ꠜꠞꠣ ꠞꠄ।
ꠁꠍꠣꠄꠁ ꠁꠝꠣꠘꠞ ꠛꠣꠔꠥꠘꠤ ꠛꠦꠙꠣꠞ
১৪ ꠅ ꠔꠤꠝꠕꠤ,
ꠀꠝꠤ ꠀꠡꠣ ꠇꠞꠞꠣꠝ ꠈꠥꠛ ꠎꠟꠖꠤꠃ ꠔꠥꠝꠣꠞ ꠉꠦꠍꠦ ꠀꠁꠔꠣꠝ।
ꠅꠈꠣꠘ ꠝꠘꠅ ꠇꠞꠤꠀ ꠔꠥꠝꠣꠞꠦ ꠁꠔꠣ ꠟꠦꠈꠞꠣꠝ।
১৫ ꠎꠥꠖꠤ ꠇꠥꠘꠥ ꠇꠣꠞꠘꠦ ꠀꠝꠣꠞ ꠀꠁꠔꠦ ꠖꠦꠞꠤ ꠅꠁꠎꠣꠄ,
ꠔꠦ ꠁ ꠟꠦꠈꠣ ꠙꠠꠟꠦ ꠔꠥꠝꠤ ꠛꠥꠎꠛꠣꠄ,
ꠀꠟ꠆ꠟꠣꠞ ꠙꠞꠤꠛꠣꠞꠞ ꠝꠣꠘꠡꠞ ꠌꠣꠟ-ꠌꠟꠘ ꠇꠤꠟꠣ ꠅꠁꠔ।
ꠁ ꠙꠞꠤꠛꠣꠞ ꠔ ꠎꠤꠘ꠆ꠖꠣ ꠀꠟ꠆ꠟꠣꠞ ꠎꠝꠣꠔ,
ꠀꠟ꠆ꠟꠣꠁ ꠢꠇꠤꠇꠔꠞ ꠜꠤꠔ ꠀꠞ ꠁꠀꠘ ꠈꠥꠐꠤ।
১৬ ꠁꠍꠣꠄꠁ ꠁꠝꠣꠘꠞ ꠝꠣꠞꠤꠚꠔꠤ ꠇꠔ ꠝꠢꠣꠘ,
ꠁꠔꠣ ꠔ ꠅꠡ꠆ꠛꠤꠇꠣꠞ ꠇꠞꠣ ꠎꠣꠄ ꠘꠣ।
ꠅꠃ ꠝꠣꠞꠤꠚꠔꠤ ꠅꠃꠟꠣ ꠎꠣꠁꠞ ꠅꠁꠟ,
ꠔꠣꠁꠘ ꠝꠣꠘꠥꠡ ꠍꠥꠞꠔꠦ ꠎꠣꠁꠞ ꠅꠁꠟꠣ,
ꠙꠣꠇ ꠞꠥꠢꠦ ꠙꠞꠝꠣꠘ ꠅꠁꠟꠣ ꠛꠦ-ꠇꠍꠥꠞ,
ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠘ ꠖꠞꠡꠘ ꠙꠣꠁꠟꠣ।
ꠔꠣꠘ ꠛꠦꠙꠣꠞꠦ ꠢꠇ꠆ꠇꠟ ꠎꠣꠔꠤꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠁꠟ,
ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ,
ꠉꠃꠞꠛ-ꠝꠢꠤꠝꠣꠄ ꠔꠣꠘꠞꠦ ꠃꠙꠞꠦ ꠔꠥꠟꠤ ꠘꠦꠅꠀ ꠅꠁꠟ।