ꠙꠛꠤꠔ꠆ꠞ ꠀꠍꠝꠣꠘꠤ ꠇꠤꠔꠣꠛꠞ ꠅꠃ ꠀꠟ-ꠁꠛꠞꠣꠘꠤ ꠍꠤꠙꠣꠞꠣ ꠟꠦꠈꠍꠂꠘ,

ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤꠄ।

ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৩০-৩৫ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠟꠦꠈꠣ ꠅꠁꠍꠦ।

ꠢꠎꠞꠔ ꠝꠥꠍꠣ (ꠀ꠩)-ꠅꠞ ꠃꠝ꠆ꠝꠔ ꠁꠢꠥꠖꠤ ꠗꠞ꠆ꠝꠞ ꠎꠦꠔꠣ ꠝꠣꠘꠡꠦ ꠢꠎꠞꠔ ꠁꠍꠣꠞ ꠔꠞꠤꠇꠣ ꠇꠛꠥꠟ ꠇꠞꠍꠤꠟꠣ,

ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠛꠤꠙꠖꠅ ꠙꠠꠟꠣ,

ꠅꠃ ꠛꠤꠙꠖꠞ ꠟꠣꠉꠤ ꠔꠣꠞꠣꠞ ꠝꠣꠎꠞ ꠇꠦꠃ ꠇꠦꠃ ꠢꠤꠞꠛꠣꠞ ꠙꠥꠞꠣꠘꠣ ꠗꠞ꠆ꠝꠔ ꠚꠤꠞꠤꠀ ꠎꠣꠁꠔꠣꠉꠤ ꠌꠣꠁꠍꠂꠘ,

ꠄꠞꠣꠞꠦ ꠃꠔꠡꠣꠢ ꠖꠤꠛꠣꠞ ꠟꠣꠉꠤ ꠅꠃ ꠍꠤꠙꠣꠞꠣ ꠟꠦꠈꠣ ꠅꠁꠍꠦ।

ꠀꠝꠞꠣ ꠎꠣꠘꠤ,

ꠖꠥꠘꠤꠀꠞ ꠢꠇꠟ ꠗꠞ꠆ꠝꠞ ꠄꠛꠣꠖꠔ ꠈꠣꠘꠣꠞ ꠝꠣꠎꠦ ꠄꠇꠐꠣ ꠈꠣꠍ ꠙꠛꠤꠔ꠆ꠞ ꠎꠣꠉꠣ ꠛꠣ ꠢꠦꠞꠦꠝ ꠡꠞꠤꠚ ꠕꠣꠇꠦ,

ꠄꠞ ꠜꠤꠔꠞꠦ ꠡꠣꠗꠣꠞꠘ ꠄꠛꠣꠖꠔꠇꠣꠞꠤ ꠢꠣꠝꠣꠘꠤ ꠘꠤꠡꠦꠗ।

ꠅꠔꠣ ꠕꠣꠇꠤ ꠀꠝꠞꠣ ꠛꠥꠎꠤ,

ꠗꠞ꠆ꠝ ꠝꠣꠘꠤꠀ ꠀꠟ꠆ꠟꠣꠞ ꠗꠣꠞꠅ ꠎꠣꠁꠛꠣꠞ ꠃꠙꠣꠄ ꠘꠣꠁ,

ꠇꠥꠘꠥꠝꠘ꠆ꠔꠦꠃ ꠀꠟ꠆ꠟꠣꠞ ꠈꠣꠍ ꠖꠤꠖꠣꠞ ꠝꠤꠟꠦ ꠘꠣ।

ꠔꠣꠘ ꠖꠤꠖꠣꠞ ꠝꠤꠟꠦ ꠈꠣꠟꠤ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ;

ꠎꠦꠟꠣ ꠁ ꠍꠤꠙꠣꠞꠣꠞ ৯ ꠞꠥꠇꠥ ২৪ ꠀꠄꠀꠔꠅ ꠀꠍꠦ,

“ꠀꠟ-ꠝꠍꠤ ꠔ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠇꠥꠘꠥ ꠙꠣꠇ ꠎꠣꠉꠣꠔ ꠢꠣꠝꠣꠁꠍꠂꠘ ꠘꠣ,

ꠔꠣꠁꠘ ꠈꠣꠟꠤ ꠀꠍꠟ ꠛꠦꠢꠦꠡ꠆ꠔꠅ ꠢꠣꠝꠣꠁꠍꠂꠘ,

ꠎꠣꠔꠦ ꠀꠝꠞꠣꠞ ꠘꠣꠎꠣꠔꠞ ꠟꠣꠉꠤ ꠀꠟ꠆ꠟꠣꠞ ꠍꠣꠝꠘꠦ ꠅꠈꠘ ꠀꠎꠤꠞ ꠅꠁꠔꠣ ꠙꠣꠞꠂꠘ।”

ꠀꠞ ১০ ꠞꠥꠇꠥ ১৯ ꠀꠄꠀꠔꠅ ꠀꠍꠦ,

“ꠄꠞꠟꠣꠉꠤꠃ ꠅ ꠜꠣꠁ ꠅꠇꠟ,

ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠃꠞ ꠎꠞꠤꠀꠄ,

ꠀꠝꠞꠣ ꠛꠦꠢꠦꠡ꠆ꠔꠤ ꠈꠣꠍ ꠙꠣꠇ ꠎꠣꠉꠣꠔ ꠢꠣꠝꠣꠘꠤꠞ ꠡꠣꠅꠡ ꠙꠣꠁꠍꠤ।”