ꠈꠤꠀꠟꠤ ꠅꠀꠞ ꠟꠣꠉꠤ ꠢꠥꠡꠤꠀꠞꠤ
২
১ ꠔꠦ ꠅꠃ ꠙꠥꠔꠞ ꠛꠦꠙꠣꠞꠦ ꠀꠝꠞꠣ ꠎꠔꠔꠣ ꠢꠥꠘꠍꠤ,
ꠁꠔꠣ ꠈꠥꠛ ꠈꠤꠀꠟ ꠇꠞꠤꠀ ꠡꠝꠎꠣ ꠖꠞꠇꠣꠞ,
ꠀꠞꠘꠣꠄ ꠀꠡ꠆ꠔꠦ ꠀꠡ꠆ꠔꠦ ꠀꠝꠞꠣ ꠁ ꠔꠣꠟꠤꠝ ꠕꠣꠇꠤ ꠛꠦ-ꠙꠕꠦ ꠎꠣꠁꠔꠣꠝꠉꠤ ꠙꠣꠞꠤ।
২ ꠚꠤꠞꠤꠡ꠆ꠔꠣꠞ ꠝꠣꠞꠚꠔꠦ ꠛꠣꠔꠣꠁꠟ ꠇꠣꠟꠣꠝ ꠎꠦꠛꠟꠣ ꠇꠣꠁꠝ ꠞꠁꠍꠦ,
ꠀꠞ ꠎꠦꠞꠣ ꠁ ꠇꠣꠟꠣꠝꠞ ꠃꠟꠐꠣ ꠌꠟꠍꠤꠟ,
ꠄꠞꠣꠅ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠙꠣꠁꠍꠦ,
৩ ꠔꠣꠁꠟꠦ ꠀꠟ꠆ꠟꠣꠄ ꠔꠣꠘ ꠈꠣꠍ ꠝꠦꠢꠦꠞꠛꠣꠘꠤꠄ ꠀꠝꠞꠣꠞ ꠟꠣꠉꠤ ꠅꠈꠘ ꠎꠦ ꠘꠣꠎꠣꠔꠞ ꠙꠕ ꠔꠤꠀꠞ ꠇꠞꠍꠂꠘ,
ꠁ ꠙꠕꠞ ꠃꠟꠐꠣ ꠌꠟꠟꠦ ꠀꠝꠞꠣ ꠇꠥꠘꠥ ꠛꠣꠌꠝꠥ ꠘꠤ?
ꠅꠃ ꠘꠣꠎꠣꠔꠞ ꠇꠕꠣ ꠔ ꠢꠇ꠆ꠇꠟ ꠙꠄꠟꠣ ꠝꠣꠟꠤꠇ ꠁꠍꠣ ꠘꠤꠎꠦꠃ ꠇꠁꠍꠂꠘ,
ꠀꠞ ꠎꠦꠞꠣ ꠁꠔꠣ ꠢꠥꠘꠍꠤꠟ ꠔꠣꠞꠣꠅ ꠙꠥꠞꠣꠙꠥꠞ ꠍꠣꠚ ꠇꠞꠤꠀ ꠀꠝꠞꠣꠞꠦ ꠇꠁꠍꠂꠘ,
ꠁꠔꠣ ꠄꠇ꠆ꠇꠦꠛꠣꠞꠦ ꠢꠣꠍꠣ।
৪ ꠄꠞꠣꠞ ꠟꠉꠦ ꠀꠟ꠆ꠟꠣꠄ ꠘꠤꠎꠦꠅ ꠘꠣꠘꠣꠘ ꠇꠤꠍꠤꠝꠞ ꠇꠥꠖꠞꠔꠤ ꠀꠟꠣꠝꠔ,
ꠇꠦꠞꠣꠝꠔꠤꠞ ꠛꠟ-ꠔꠣꠇ꠆ꠇꠔꠖꠤ ꠅꠃ ꠘꠣꠎꠣꠔꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠍꠂꠘ।
ꠀꠞ ꠘꠤꠎꠞ ꠝꠞ꠆ꠎꠤꠄ ꠙꠣꠇ ꠞꠥꠢꠥꠞ ꠖꠦꠅꠀ ꠘꠣꠘꠣꠘ ꠘꠤꠀꠝꠔ ꠛꠤꠟꠣꠁ ꠖꠤꠀꠅ ꠡꠣꠇ꠆ꠇꠤ ꠖꠤꠍꠂꠘ।
ꠖꠥꠈ-ꠇꠡ꠆ꠐꠞ ꠝꠣꠎꠖꠤ ꠢꠎꠞꠔ ꠁꠍꠣ ꠘꠣꠎꠣꠔꠞ ꠇꠣꠘ꠆ꠒꠣꠞꠤ
৫ ꠔꠦ ꠀꠝꠞꠣ ꠎꠦ ꠛꠣꠔꠥꠘꠤ ꠛꠣꠖꠡꠣꠁꠞ ꠇꠕꠣ ꠇꠁꠀꠞ,
ꠁ ꠛꠣꠖꠡꠣꠁ ꠔ ꠀꠟ꠆ꠟꠣꠄ ꠇꠥꠘꠥ ꠚꠤꠞꠤꠡ꠆ꠔꠣꠞ ꠎꠤꠝ꠆ꠝꠣꠄ ꠞꠣꠈꠍꠂꠘ ꠘꠣ।
৬ ꠛꠞꠋ ꠀꠟ꠆ꠟꠣꠞ ꠇꠣꠟꠣꠝꠞ ꠝꠣꠎꠦ ꠄꠇꠎꠘꠦ ꠛꠣꠔꠣꠁꠍꠂꠘ,
ꠝꠣꠘꠥꠡ ꠀꠞꠇꠔꠣ ꠇꠤꠔꠣ ꠎꠦꠘ ꠔꠥꠝꠤ ꠔꠣꠞꠣꠞꠦ ꠁꠀꠖ ꠇꠞꠅ?
ꠝꠣꠘꠡꠞ ꠀꠅꠟꠣꠖꠃ ꠛꠣ ꠇꠤꠔꠣ ꠎꠦꠘ ꠔꠥꠝꠤ ꠔꠣꠞꠣꠞꠦ ꠖꠦꠈꠣ-ꠢꠥꠘꠣ ꠇꠞꠅ?
৭ ꠔꠥꠝꠤ ꠔ ꠝꠣꠘꠡꠞꠦ ꠚꠤꠞꠤꠡ꠆ꠔꠣ ꠕꠣꠇꠤ ꠈꠣꠟꠤ ꠕꠥꠠꠣ ꠟꠣꠝꠣꠔ ꠟꠣꠝꠣꠁꠍ,
ꠉꠃꠞꠛ ꠀꠞ ꠁꠎ꠆ꠎꠔꠞ ꠝꠣꠟꠣ ꠔ ꠔꠥꠝꠤ ꠝꠣꠘꠡꠞꠦꠃ ꠖꠣꠘ ꠇꠞꠍ।
ꠔꠥꠝꠣꠞ ꠙꠄꠖꠣ ꠢꠇ꠆ꠇꠟꠔꠣꠞ ꠃꠙꠞꠦ ꠄꠞꠣꠞꠦ ꠁꠎ꠆ꠎꠔ ꠖꠤꠍ,
৮ ꠢꠇ꠆ꠇꠟꠔꠣꠃ ꠄꠞꠣꠞ ꠙꠣꠅꠞ ꠔꠟꠣꠔ,
ꠄꠞꠣꠞ ꠀꠅꠔꠣꠄ ꠞꠣꠈꠍ।
ꠔꠦ ꠀꠟ꠆ꠟꠣꠄ ꠢꠇ꠆ꠇꠟꠔꠣꠞꠦ ꠄꠞꠣꠞ ꠀꠅꠔꠣꠄ ꠀꠘꠣꠄ,
ꠄꠞꠣꠞ ꠈꠦꠝꠔꠣꠞ ꠛꠣꠞꠦ ꠀꠞ ꠇꠥꠘ꠆ꠔꠣꠃ ꠞꠁꠍꠦ ꠘꠣ।
ꠅꠁꠟꠦ ꠅꠈꠘꠅ ꠔ ꠢꠇ꠆ꠇꠟꠔꠣꠞꠦ ꠀꠝꠞꠣꠞ ꠘꠤꠎꠞ ꠀꠅꠔꠣꠄ ꠖꠦꠈꠞꠣꠝ ꠘꠣ।
৯ ꠈꠣꠟꠤ ꠢꠃ ꠁꠍꠣꠞꠦ ꠖꠦꠈꠞꠣꠝ,
ꠔꠣꠘꠞꠦ ꠚꠤꠞꠤꠡ꠆ꠔꠣ ꠅꠇꠟ ꠕꠣꠇꠤ ꠕꠥꠠꠣ ꠟꠣꠝꠣꠔ ꠟꠣꠝꠣꠁꠟ ꠅꠁꠍꠤꠟ,
ꠎꠣꠔꠦ ꠀꠟ꠆ꠟꠣꠞ ꠞꠢꠝꠔꠦ ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ,
ꠔꠣꠘ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠁꠘ।
ꠢꠣꠍꠣꠃ ꠔꠣꠁꠘ ꠈꠥꠛ ꠇꠡ꠆ꠐ ꠙꠣꠁꠀ ꠘꠤꠎꠞ ꠎꠣꠘ ꠛꠤꠟꠣꠁ ꠖꠤꠀ ꠝꠣꠞꠣ ꠉꠦꠍꠂꠘ,
ꠄꠞꠟꠣꠉꠤꠃ ꠖꠦꠈꠞꠣꠝ,
ꠀꠟ꠆ꠟꠣꠄ ꠔꠣꠘꠞꠦ ꠅꠃ ꠁꠎ꠆ꠎꠔ ꠀꠞ ꠉꠃꠞꠛꠞ ꠝꠣꠟꠣ ꠚꠤꠘ꠆ꠖꠣꠁꠍꠂꠘ।
১০ ꠀꠍꠟꠦ ꠢꠇ꠆ꠇꠟꠔꠣꠃ ꠔ ꠀꠟ꠆ꠟꠣꠞ ꠟꠣꠉꠤ,
ꠔꠣꠁꠘꠃ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ,
ꠀꠞ ꠔꠣꠘ ꠈꠤꠀꠟ ꠅꠁꠟ ꠔꠣꠘ ꠛꠃꠔ ꠀꠅꠟꠣꠖꠅ ꠔꠣꠘ ꠡꠣꠘ-ꠝꠢꠤꠝꠣꠞ ꠜꠣꠉꠤ ꠅꠁꠘ।
ꠄꠞꠟꠣꠉꠤꠃ ꠔꠣꠞꠣꠞ ꠘꠣꠎꠣꠔꠞ ꠇꠣꠘ꠆ꠒꠣꠞꠤ ꠅꠃ ꠁꠍꠣꠞꠦ ꠖꠥꠈ-ꠇꠡ꠆ꠐ ꠖꠤꠀ ꠇꠣꠝꠤꠟ ꠛꠣꠘꠣꠁꠍꠂꠘ,
ꠎꠣꠔꠦ ꠄꠘ ꠟꠉ ꠗꠞꠤꠀ ꠄꠞꠣ ꠔꠣꠘ ꠉꠦꠍꠦ ꠀꠁꠘ।
১১ ꠔꠦ ꠎꠦ ꠁꠍꠣꠄ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠂꠘ ꠀꠞ ꠎꠦꠞꠣ ꠙꠣꠇ-ꠍꠣꠚ ꠛꠘꠂꠘ,
ꠄꠞꠣ ꠢꠇ꠆ꠇꠟꠃ ꠔ ꠄꠇ ꠀꠟ꠆ꠟꠣꠞ ꠙꠞꠤꠛꠣꠞꠞ।
ꠅꠔꠣꠞ ꠖꠣꠄ ꠁꠍꠣꠄ ꠄꠞꠣꠞꠦ ꠜꠣꠁ ꠇꠁꠀ ꠒꠣꠇꠔꠦ ꠇꠥꠘꠥ ꠡꠞꠝ ꠙꠣꠁꠘ ꠘꠣ।
১২ ꠔꠣꠁꠘ ꠇꠁꠍꠂꠘ,
ꠀꠝꠤ ꠀꠝꠣꠞ ꠜꠣꠁꠀꠂꠘ꠆ꠔꠞ ꠉꠦꠍꠦ ꠔꠥꠝꠣꠞ ꠘꠣꠝ ꠔꠛꠟꠤꠉ ꠇꠞꠝꠥ,
ꠡꠝꠣꠎꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ-ꠉꠎꠟ ꠉꠣꠁꠝꠥ।
১৩ ꠔꠣꠁꠘ ꠢꠤꠞꠛꠣꠞ ꠇꠁꠍꠂꠘ,
ꠀꠝꠤ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠝꠥ।
ꠀꠞ ꠀꠞꠇꠛꠣꠞ ꠇꠁꠍꠂꠘ,
ꠖꠦꠈꠃꠇ꠆ꠇꠣ,
ꠀꠝꠤꠅ ꠀꠍꠤ ꠀꠞ ꠢꠃ ꠀꠅꠟꠣꠖ ꠅꠇꠟꠅ ꠅꠘꠅ ꠀꠍꠂꠘ,
ꠎꠦꠞꠣꠞꠦ ꠀꠟ꠆ꠟꠣꠄ ꠀꠝꠣꠞ ꠀꠔꠅ ꠡꠙꠤꠀ ꠖꠤꠍꠂꠘ।
১৪ ꠀꠁꠌ꠆ꠍꠣ,
ꠔꠦ ꠁ ꠀꠅꠟꠣꠖ ꠅꠇꠟ ꠔ ꠞꠇ꠆ꠔ-ꠝꠣꠋꠡꠞ ꠝꠣꠘꠥꠡ,
ꠉꠔꠤꠇꠦ ꠁꠍꠣ ꠘꠤꠎꠦꠅ ꠅꠃꠟꠣ ꠞꠇ꠆ꠔ-ꠝꠣꠋꠡꠞ ꠇꠣꠄꠀꠄ ꠎꠘꠝ ꠟꠁꠟꠣ।
ꠈꠣꠟꠤ ꠅꠃ ꠇꠣꠄꠀꠞ ꠝꠃꠔꠞ ꠃꠍꠤꠟ꠆ꠟꠣꠄ,
ꠝꠃꠔꠞ ꠈꠦꠝꠔꠣꠞ ꠝꠣꠟꠤꠇ ꠢꠃ ꠁꠛꠟꠤꠍꠞꠦ ꠊꠣꠄꠄꠟ ꠇꠞꠔꠣ ꠙꠣꠞꠂꠘ,
১৫ ꠀꠞ ꠝꠞꠘꠞ ꠒꠞꠦ ꠎꠦꠞꠣ ꠢꠣꠞꠣ ꠎꠤꠘ꠆ꠖꠦꠉꠤ ꠝꠃꠔꠞ ꠉꠥꠟꠣꠝꠞ ꠟꠣꠈꠣꠘ ꠇꠣꠐꠣꠁꠞꠣ,
ꠔꠣꠞꠣꠞꠦꠅ ꠀꠎꠣꠖ ꠇꠞꠔꠣ ꠙꠣꠞꠂꠘ।
১৬ ꠔꠣꠁꠘ ꠔ ꠚꠤꠞꠤꠡ꠆ꠔꠣ ꠅꠇꠟꠞꠦ ꠡꠣꠁꠎ꠆ꠎ ꠇꠞꠂꠘ ꠘꠣ,
ꠈꠣꠟꠤ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠅꠇꠟꠞꠦꠃ ꠡꠣꠁꠎ꠆ꠎ ꠇꠞꠞꠣ।
১৭ ꠁ ꠢꠇ꠆ꠇꠟꠔꠣ ꠙꠥꠞꠣꠙꠥꠞ ꠀꠖꠣꠄ ꠇꠞꠣꠞ ꠟꠣꠉꠤ ꠁꠍꠣꠞꠅ ꠎꠞꠥꠞ ꠀꠍꠤꠟ,
ꠔꠣꠁꠘ ꠘꠤꠎꠦꠅ ꠅꠃ ꠜꠣꠁꠀꠂꠘ꠆ꠔꠞ ꠟꠉꠦ ꠢꠇꠟ ꠛꠦꠙꠣꠞꠦ ꠢꠝꠣꠘꠤ ꠅꠀ।
ꠢꠝꠣꠘꠤ ꠅꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠘꠤꠞꠜꠞ ꠇꠞꠣꠞ ꠎꠥꠇꠣ,
ꠖꠤꠟ-ꠖꠞꠖꠤ ꠙꠞꠗꠣꠘ ꠁꠝꠣꠝ ꠅꠁꠔꠣ ꠙꠣꠞꠂꠘ।
ꠁꠝꠣꠝ ꠛꠘꠤꠀ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠦꠁꠘ।
১৮ ꠔꠣꠁꠘ ꠘꠤꠎꠦ ꠙꠞꠤꠇ꠆ꠇꠣꠔ ꠙꠠꠤꠀ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠍꠂꠘ,
ꠄꠞꠟꠣꠉꠤꠃ ꠎꠦꠞꠣ ꠙꠞꠤꠇ꠆ꠇꠣꠔ ꠙꠠꠂꠘ ꠔꠣꠞꠣꠞꠦꠅ ꠔꠣꠁꠘ ꠡꠣꠁꠎ꠆ꠎ ꠇꠞꠔꠣ ꠙꠣꠞꠂꠘ।