ꠁꠝꠣꠘꠤ ꠛꠥꠎꠥꠞ꠆ꠉꠣꠘ ꠀꠞ ꠀꠟ-ꠝꠍꠤꠞ ꠛꠣꠄ ꠌꠣꠁꠀ ꠍꠣꠝꠘꠦꠖꠤ ꠖꠃꠠꠣꠁ (১১:১-১৩:২৫)
ꠁꠝꠣꠘꠤ ꠛꠥꠎꠥꠞ꠆ꠉꠣꠘ
১১
১ ꠁꠝꠣꠘ ꠇꠤꠔꠣ?
ꠀꠝꠞꠣ ꠎꠦꠔꠣ ꠙꠣꠁꠝꠥ ꠇꠞꠤ ꠀꠡꠣ ꠇꠞꠍꠤ,
ꠁꠔꠣ ꠅꠈꠘ ꠘꠣ ꠙꠣꠁꠟꠦꠅ ꠛꠣꠖꠦ ꠙꠣꠁꠝꠥꠃ ꠙꠣꠁꠝꠥ,
ꠅꠃ ꠄꠇꠤꠘꠞ ꠘꠣꠝꠃ ꠁꠝꠣꠘ।
ꠅꠃ ꠁꠝꠣꠘꠞ ꠛꠟꠦꠃ ꠀꠝꠞꠣ ꠘꠤꠌ꠆ꠌꠤꠔ ꠅꠁꠀ ꠛꠥꠎꠤ,
ꠅꠈꠘ ꠎꠦꠔꠣ ꠀꠝꠞꠣꠞ ꠌꠃꠈꠦ ꠖꠦꠈꠞꠣꠝ ꠘꠣ,
ꠁꠔꠣ ꠀꠍꠟꠦꠅ ꠀꠍꠦ।
২ ꠅꠃ ꠁꠝꠣꠘꠞ ꠛꠟꠦꠃ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔꠣꠞꠤꠚ ꠇꠣꠝꠣꠁꠍꠂꠘ।
৩ ꠁꠝꠣꠘꠦꠃ ꠀꠝꠞꠣ ꠛꠥꠎꠞꠣꠝ ꠎꠦꠘ,
ꠀꠟ꠆ꠟꠣꠄ ꠔꠣꠘ ꠇꠣꠟꠣꠝꠞ ꠛꠟꠦꠃ ꠀꠍꠝꠣꠘ-ꠎꠝꠤꠘꠞ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ,
ꠁꠔꠣ ꠀꠝꠞꠣꠞ ꠌꠈꠥꠞ ꠖꠦꠈꠣ ꠇꠥꠘꠥ ꠌꠤꠎ ꠕꠣꠇꠤ ꠄꠝꠘꠦ ꠙꠄꠖꠣ ꠅꠁꠍꠦ ꠘꠣ।
৪ ꠁꠝꠣꠘꠞ ꠛꠟꠦ ꠢꠣꠛꠤꠟꠦ ꠀꠟ꠆ꠟꠣꠞ ꠘꠣꠝꠦ ꠇꠣꠛꠤꠟꠞ ꠌꠣꠁꠔꠦ ꠜꠣꠟꠣ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ।
ꠄꠞꠟꠣꠉꠤ ꠀꠟ꠆ꠟꠣꠄ ꠢꠣꠛꠤꠟꠞ ꠛꠦꠙꠣꠞꠦ ꠛꠣꠔꠣꠁꠟꠣ,
ꠄꠁꠘ ꠄꠇꠎꠘ ꠇꠣꠝꠤꠟ ꠝꠣꠘꠥꠡ।
ꠔꠦ ꠛꠃꠔ ꠎꠝꠣꠘꠣ ꠀꠉꠦ ꠢꠣꠛꠤꠟꠞ ꠝꠃꠔ ꠅꠁꠟꠦꠅ,
ꠁꠝꠣꠘꠞ ꠛꠦꠙꠣꠞꠦ ꠔꠣꠁꠘ ꠅꠈꠘꠅ ꠀꠝꠞꠣꠞ ꠟꠉꠦ ꠝꠣꠔꠤꠞꠣ।
৫ ꠁꠝꠣꠘꠞ ꠛꠟꠞ ꠟꠣꠉꠤꠃ ꠁꠖ꠆ꠞꠤꠍ ꠘꠛꠤꠞ ꠝꠃꠔ ꠅꠁꠟ ꠘꠣ,
ꠀꠟ꠆ꠟꠣꠄ ꠔꠣꠘꠞꠦ ꠎꠤꠘ꠆ꠖꠣ ꠢꠣꠟꠔꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠤꠟꠣꠉꠤ,
ꠖꠥꠘꠤꠀꠔ ꠔꠣꠘꠞꠦ ꠔꠥꠇꠣꠁꠀ ꠝꠤꠟꠟ ꠘꠣ।
ꠁꠖ꠆ꠞꠤꠍꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀꠞ ꠀꠉꠦ ꠀꠟ꠆ꠟꠣꠄ ꠎꠣꠘꠣꠁꠍꠟꠣ,
ꠁꠖ꠆ꠞꠤꠍ ꠀꠝꠣꠞ ꠈꠥꠡꠤ ꠝꠣꠚꠤꠇ ꠌꠟꠍꠂꠘ।
৬ ꠅꠁꠟꠦ ꠁꠝꠣꠘ ꠍꠣꠠꠣ ꠔ ꠇꠦꠃ ꠀꠟ꠆ꠟꠣꠞꠦ ꠈꠥꠡꠤ ꠇꠞꠔ ꠙꠣꠞꠦ ꠘꠣ।
ꠎꠦꠇꠥꠘꠥ ꠝꠣꠘꠥꠡ ꠀꠟ꠆ꠟꠣꠞ ꠗꠣꠞꠅ ꠎꠣꠁꠔꠦ ꠌꠣꠁꠟꠦ,
ꠢꠦ ꠄꠇꠤꠘ ꠇꠞꠣ ꠟꠣꠉꠛ ꠎꠦꠘ,
ꠀꠟ꠆ꠟꠣ ꠀꠍꠂꠘ,
ꠀꠞ ꠎꠦꠞꠣ ꠔꠣꠘ ꠔꠣꠟ꠆ꠟꠣꠡ ꠇꠞꠦ,
ꠔꠣꠁꠘ ꠄꠞꠣꠞꠦ ꠙꠥꠞꠥꠡ꠆ꠇꠣꠞ ꠖꠦꠁꠘ।
৭ ꠁꠝꠣꠘꠞ ꠛꠟꠦ ꠘꠥꠢ ꠘꠛꠤꠞ ꠎꠝꠣꠘꠣꠔ ꠎꠦꠔꠣ ꠊꠐꠘꠣ ꠖꠦꠈꠣ ꠉꠦꠍꠤꠟ ꠘꠣ,
ꠀꠟ꠆ꠟꠣꠞ ꠢꠥꠡꠤꠀꠞꠤ ꠙꠣꠁꠀ ꠔꠣꠁꠘ ꠅꠔꠣ ꠄꠇꠤꠘ ꠇꠞꠟꠣ,
ꠄꠇꠤꠘ ꠇꠞꠤꠀ ꠘꠤꠎꠞ ꠙꠞꠤꠛꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ ꠄꠇꠈꠣꠘ ꠎꠣꠎ ꠛꠣꠘꠣꠁꠟꠣ।
ꠔꠣꠘ ꠅꠃ ꠁꠝꠣꠘꠤ ꠇꠣꠝꠞ ꠝꠣꠎꠖꠤ ꠎꠉꠔꠞ ꠘꠣꠚꠞꠝꠣꠘꠤꠞ ꠙꠞꠝꠣꠘ ꠖꠦꠈꠣꠁꠟꠣ,
ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠢꠤꠡꠣꠛꠦ ꠉꠁꠘ꠆ꠘ ꠅꠁꠉꠦꠟꠣ,
ꠈꠣꠟꠤ ꠁꠝꠣꠘꠞ ꠛꠟꠦꠃ ꠁꠟꠣ ꠅꠀ ꠎꠣꠄ।
৮ ꠁꠝꠣꠘꠞ ꠛꠟꠦ ꠁꠛ꠆ꠞꠣꠢꠤꠝ ꠘꠛꠤꠄ ꠀꠟ꠆ꠟꠣꠞ ꠢꠥꠇꠥꠝ ꠙꠣꠁꠀꠃ ꠘꠤꠎꠞ ꠜꠤꠐꠣ-ꠝꠣꠐꠤ ꠍꠣꠠꠤꠀ ꠞꠅꠀꠘꠣ ꠖꠤꠟꠣ।
ꠀꠟ꠆ꠟꠣꠄ ꠔꠣꠘꠞꠦ ꠎꠦ ꠖꠦꠡ ꠖꠤꠔꠣ ꠇꠞꠤ ꠅꠀꠖꠣ ꠇꠞꠍꠂꠘ,
ꠢꠤ ꠖꠦꠡꠈꠣꠘ ꠇꠥꠘ ꠎꠣꠉꠣꠔ,
ꠁꠈꠣꠘ ꠘꠣ ꠎꠣꠘꠤꠀꠅ ꠔꠣꠁꠘ ꠞꠅꠀꠘꠣ ꠅꠁꠉꠦꠟꠣ।
৯ ꠁꠝꠣꠘꠞ ꠛꠟꠦ ꠔꠣꠁꠘ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠇꠦꠘꠣꠘ ꠖꠦꠡꠞ ꠜꠤꠔꠞꠦꠅ ꠝꠥꠍꠣꠚꠤꠞꠞ ꠟꠣꠈꠣꠘ ꠖꠤꠘ ꠇꠣꠐꠣꠁꠟꠣ।
ꠔꠣꠘ ꠟꠉꠦ ꠀꠞꠅ ꠎꠦꠞꠣ ꠢꠤ ꠅꠀꠖꠣꠞ ꠜꠣꠉꠤ ꠀꠍꠟꠣ,
ꠢꠃ ꠁꠍꠢꠣꠇ ꠀꠞ ꠁꠀꠇꠥꠛꠞ ꠟꠣꠈꠣꠘ ꠔꠣꠁꠘꠅ ꠔꠣꠝ꠆ꠛꠥꠄ ꠔꠣꠝ꠆ꠛꠥꠄ ꠞꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠟꠣ।
১০ ꠀꠍꠟꠦ ꠎꠦ ꠐꠣꠃꠘ ꠢꠞ-ꠢꠣꠝꠦꠡꠣ ꠇꠣꠁꠝ ꠞꠁꠛ,
ꠢꠃ ꠛꠦꠢꠦꠡ꠆ꠔꠤ ꠐꠣꠃꠘꠞ ꠟꠣꠉꠤ ꠔꠣꠁꠘ ꠛꠣꠞ ꠌꠣꠅꠀꠔ ꠀꠍꠟꠣ,
ꠁ ꠐꠣꠃꠘꠞ ꠘꠇꠡꠣ-ꠘꠝꠥꠘꠣ ꠡꠢ ꠢꠇ꠆ꠇꠟ ꠇꠣꠞꠤꠉꠞꠤ ꠡ꠆ꠛꠄꠅꠋ ꠀꠟ꠆ꠟꠣꠞ ꠇꠣꠝ।
১১ ꠁꠝꠣꠘꠞ ꠛꠟꠦ ꠁꠛ꠆ꠞꠣꠢꠤꠝꠞ ꠘꠤꠀꠅꠟꠣꠖꠤ ꠛꠤꠛꠤ ꠍꠣꠄꠞꠣꠄ ꠀꠅꠟꠣꠖ ꠎꠘꠝ ꠖꠦꠅꠀꠞ ꠈꠦꠝꠔꠣ ꠙꠣꠁꠟꠣ,
ꠔꠣꠞꠣꠞ ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠄꠅꠡ ꠙꠣꠞꠅꠁꠉꠦꠟꠦꠅ ꠁꠛ꠆ꠞꠣꠢꠤꠝꠦ ꠄꠇꠤꠘ ꠇꠞꠍꠟꠣ,
ꠎꠦꠁꠘ ꠁ ꠅꠀꠖꠣ ꠇꠞꠍꠂꠘ,
ꠄꠁꠘ ꠔ ꠢꠇ,
ꠄꠁꠘ ꠘꠤꠎꠞ ꠅꠀꠖꠣ ꠙꠥꠞꠣꠁꠛꠣꠃ ꠙꠥꠞꠣꠁꠛꠣ।
১২ ꠄꠞꠟꠣꠉꠤ ꠛꠄꠅꠡꠞ ꠜꠣꠞꠦ ꠝꠞꠣꠞ ꠙꠕꠤ ꠅꠃ ꠄꠇ ꠁꠛ꠆ꠞꠣꠢꠤꠝ ꠕꠣꠇꠤ ꠅꠔ ꠝꠣꠘꠥꠡ ꠎꠘꠝ ꠟꠁꠟꠣ,
ꠎꠦꠞꠣ ꠀꠍꠝꠣꠘꠞ ꠔꠦꠞꠣ ꠀꠞ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ,
ꠉꠘꠤꠀ ꠚꠥꠞꠣꠁꠟ ꠎꠣꠄ ꠘꠣ।
১৩ ꠝꠎꠛꠥꠔ ꠁꠝꠣꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠀ ꠄꠞꠣ ꠢꠇꠟꠞ ꠝꠃꠔ ꠅꠁꠍꠦ,
ꠄꠞꠣ ꠇꠦꠃ ꠢꠤ ꠅꠀꠖꠣꠞ ꠚꠟ ꠜꠥꠉ ꠇꠞꠔꠣ ꠙꠣꠞꠍꠂꠘ ꠘꠣ,
ꠈꠣꠟꠤ ꠖꠥꠞꠁ ꠕꠣꠇꠤ ꠁꠔꠣ ꠖꠦꠈꠤꠀ ꠢꠣꠞꠤ ꠈꠥꠡꠤ ꠅꠁꠍꠂꠘ।
ꠁ ꠖꠥꠘꠤꠀꠔ ꠔꠣꠞꠣ ꠝꠥꠍꠣꠚꠤꠞꠤꠔ ꠀꠁꠍꠂꠘ,
ꠁꠈꠣꠘ ꠔꠣꠞꠣꠞ ꠘꠤꠎꠞ ꠛꠡꠔ ꠈꠣꠘꠣ ꠘꠣꠄ,
ꠁꠔꠣ ꠔ ꠔꠣꠞꠣ ꠝꠣꠘꠍꠂꠘ।
১৪ ꠀꠞ ꠎꠦꠞꠣ ꠁꠈꠣꠘ ꠝꠣꠘꠍꠂꠘ,
ꠔꠣꠞꠣ ꠢꠇꠟꠦꠃ ꠡꠥꠘ꠆ꠖꠞ ꠇꠞꠤ ꠛꠥꠎꠣꠁꠍꠂꠘ ꠎꠦꠘ,
ꠔꠣꠞꠣ ꠘꠤꠎꠞ ꠀꠙꠘ ꠖꠦꠡꠞ ꠔꠣꠟ꠆ꠟꠣꠡ ꠇꠞꠞꠣ।
১৫ ꠎꠦ ꠎꠝꠤꠘ ꠕꠣꠇꠤ ꠔꠣꠞꠣ ꠛꠣꠞꠅꠁꠀ ꠀꠁꠍꠟꠣ,
ꠢꠤ ꠎꠝꠤꠘꠞ ꠇꠕꠣ ꠈꠤꠀꠟ ꠇꠞꠟꠦ ꠔ ꠔꠣꠞꠣ ꠢꠤꠞꠛꠣꠞ ꠢꠘꠅ ꠢꠣꠝꠣꠘꠤꠞ ꠡꠥꠎꠥꠉ ꠙꠣꠁꠟꠣ ꠅꠘꠦ।
১৬ ꠅꠁꠟꠦ ꠔꠣꠞꠣ ꠔ ꠀꠞꠅ ꠜꠣꠟꠣ ꠄꠇ ꠖꠦꠡ,
ꠝꠣꠘꠤ ꠛꠦꠢꠦꠡ꠆ꠔꠞ ꠔꠣꠟ꠆ꠟꠣꠡ ꠇꠞꠍꠟꠣ।
ꠄꠞꠟꠣꠉꠤꠃ ꠀꠟ꠆ꠟꠣ ꠙꠣꠇꠦ ꠘꠤꠎꠞꠦ ꠔꠣꠞꠣꠞ ꠀꠟ꠆ꠟꠣ ꠇꠁꠀ ꠙꠞꠤꠌꠄ ꠖꠤꠔꠦ ꠇꠥꠘꠥ ꠡꠞꠝ ꠙꠣꠁꠘ ꠘꠣ,
ꠔꠣꠁꠘꠃ ꠔꠣꠞꠣꠞ ꠟꠣꠉꠤꠀ ꠀꠞꠣꠝꠞ ꠄꠇ ꠐꠣꠃꠘ ꠔꠤꠀꠞ ꠇꠞꠍꠂꠘ।
১৭ ꠁꠛ꠆ꠞꠣꠢꠤꠝ ꠘꠛꠤ ꠙꠞꠤꠇ꠆ꠇꠣꠔ ꠙꠠꠤꠀ ꠢꠣꠞꠤ ꠁꠝꠣꠘꠞ ꠛꠟꠦꠃ ꠔꠣꠘ ꠙꠥꠀ ꠁꠍꠢꠣꠇꠞꠦ ꠇꠥꠞꠛꠣꠘꠤ ꠖꠤꠍꠟꠣ।
ꠎꠦ ꠁꠛ꠆ꠞꠣꠢꠤꠝꠞ ꠟꠉꠦ ꠀꠟ꠆ꠟꠣꠄ ꠘꠤꠎꠦ ꠅꠀꠖꠣ ꠇꠞꠍꠂꠘ,
ꠢꠃ ꠎꠘꠦ ꠔꠣꠘ ꠈꠣꠍ ꠝꠣꠄꠀꠞ ꠙꠥꠔꠞꠦ ꠇꠥꠞꠛꠣꠘꠤ ꠖꠤꠟꠣꠁꠔꠣ ꠌꠣꠁꠍꠂꠘ।
১৮ ꠎꠦ ꠙꠥꠔꠞ ꠛꠦꠙꠣꠞꠦ ꠀꠟ꠆ꠟꠣꠄ ꠛꠣꠔꠣꠁꠍꠟꠣ,
“ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ।”
১৯ ꠁꠛ꠆ꠞꠣꠢꠤꠝꠞ ꠖꠤꠟꠞ ꠅꠃ ꠄꠇꠤꠘꠦ ꠔꠣꠁꠘ ꠇꠥꠞꠛꠣꠘꠤ ꠖꠤꠔꠦ ꠞꠣꠎꠤ ꠅꠁꠍꠟꠣ ꠎꠦꠘ,
ꠀꠟ꠆ꠟꠣꠄ ꠔ ꠝꠥꠞ꠆ꠖꠣꠞꠦꠅ ꠎꠤꠘ꠆ꠖꠣ ꠇꠞꠔꠣ ꠙꠣꠞꠂꠘ।
ꠀꠞ ꠢꠣꠍꠣꠃ ꠝꠃꠔꠞ ꠔꠟ ꠕꠣꠇꠤ ꠁꠍꠢꠣꠇꠞꠦ ꠚꠤꠞꠔ ꠙꠣꠁꠟꠣ।
২০ ꠁꠝꠣꠘꠞ ꠛꠟꠦ ꠁꠍꠢꠣꠇꠦ ꠔꠣꠘ ꠙꠥꠀꠂꠘ ꠁꠀꠇꠥꠛ ꠀꠞ ꠁꠡꠞ ꠜꠛꠤꠡꠔ ꠎꠤꠘ꠆ꠖꠦꠉꠤꠞ ꠟꠣꠉꠤ ꠖꠥꠀ ꠖꠤꠍꠟꠣ।
২১ ꠁꠝꠣꠘꠞ ꠛꠟꠦ ꠁꠀꠇꠥꠛꠦ ꠝꠃꠔꠞ ꠅꠇ꠆ꠔꠅ ꠁꠃꠍꠥꠚꠞ ꠖꠥꠁꠅ ꠙꠥꠀꠞꠦ ꠖꠥꠀ ꠖꠤꠟꠣ,
ꠔꠣꠁꠘ ꠘꠤꠎꠞ ꠟꠣꠑꠤꠞ ꠃꠙꠞꠦ ꠜꠞꠖꠤ ꠀꠟ꠆ꠟꠣꠞ ꠄꠛꠣꠖꠔꠤ ꠇꠞꠟꠣ।
২২ ꠁꠝꠣꠘꠞ ꠛꠟꠦ ꠁꠃꠍꠥꠚꠦ ꠝꠃꠔꠞ ꠅꠇ꠆ꠔꠅ ꠇꠁꠍꠟꠣ,
ꠔꠣꠘ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠅꠁꠀ ꠎꠣꠁꠛꠣ,
ꠔꠣꠞꠣ ꠎꠣꠅꠀꠞ ꠇꠣꠟꠅ ꠔꠣꠘ ꠀꠒ꠆ꠒꠤ-ꠉꠥꠒ꠆ꠒꠤꠞꠦ ꠛꠁꠀ ꠘꠦꠅꠀꠞ ꠢꠥꠇꠥꠝ ꠖꠤꠟꠣ।
২৩ ꠁꠝꠣꠘꠞ ꠛꠟꠦꠃ ꠝꠥꠍꠣꠞ ꠝꠣ-ꠛꠣꠚꠦ ꠝꠥꠍꠣꠞ ꠎꠘꠝꠞ ꠛꠣꠖꠦ ꠔꠤꠘ ꠝꠣꠡ ꠙꠞ꠆ꠎꠘ꠆ꠔ ꠟꠥꠇꠣꠁꠀ ꠕꠁꠟꠣ,
ꠔꠣꠞꠣ ꠖꠦꠈꠍꠟꠣ,
ꠙꠥꠀꠉꠥ ꠈꠥꠛ ꠡꠥꠘ꠆ꠖꠞ,
ꠛꠣꠖꠡꠣꠞ ꠢꠥꠇꠥꠝꠦꠅ ꠔꠣꠞꠣ ꠒꠞꠣꠁꠟꠣ ꠘꠣ।
২৪ ꠁꠝꠣꠘꠞ ꠛꠟꠦꠃ ꠝꠥꠍꠣꠄ,
ꠔꠣꠘ ꠛꠥꠎꠖꠣꠞ ꠅꠀꠞ ꠛꠣꠖꠦ ꠚꠦꠞꠣꠃꠘꠞ ꠙꠥꠠꠤꠞ ꠊꠞꠞ ꠘꠣꠔꠤ ꠇꠁꠀ ꠙꠞꠤꠌꠄ ꠖꠤꠔꠦ ꠞꠣꠎꠤ ꠅꠁꠟꠣ ꠘꠣ।
২৫ ꠔꠣꠁꠘ ꠉꠥꠘꠣꠞ ꠝꠣꠎꠦ ꠞꠁꠀ ꠕꠥꠠꠣ ꠇꠄꠖꠤꠘ ꠡꠥꠈ ꠇꠣꠝꠣꠘꠤꠞ ꠌꠣꠁꠔꠦ,
ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞ ꠟꠉꠦ ꠝꠤꠟꠤꠀ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦ ꠞꠅꠀꠃ ꠙꠍꠘ꠆ꠖ ꠇꠞꠟꠣ।
২৬ ꠔꠣꠁꠘ ꠝꠤꠡꠞꠞ ꠢꠇ꠆ꠇꠟ ꠎꠣꠇ-ꠎꠝꠇꠞ ꠌꠣꠁꠔꠦ,
ꠀꠟ-ꠝꠍꠤꠞ ꠘꠣꠝꠦ ꠖꠥꠞꠘꠣꠝ ꠢꠣꠍꠤꠟꠞꠦꠃ ꠛꠦꠡꠤ ꠝꠥꠟ꠆ꠟꠛꠣꠘ ꠝꠘꠅ ꠇꠞꠟꠣ,
ꠇꠣꠞꠘ ꠔꠣꠘ ꠘꠎꠞ ꠀꠍꠤꠟ ꠛꠦꠢꠦꠡ꠆ꠔꠤ ꠙꠥꠞꠥꠡ꠆ꠇꠣꠞꠞ ꠛꠣꠄ।
২৭ ꠁꠝꠣꠘꠞ ꠛꠟꠦ ꠔꠣꠁꠘ ꠝꠤꠡꠞ ꠕꠣꠇꠤ ꠛꠣꠞꠅꠁ ꠉꠦꠟꠣ,
ꠛꠣꠖꠡꠣꠞ ꠉꠥꠍꠣꠞꠦꠅ ꠒꠞꠣꠁꠟꠣ ꠘꠣ।
ꠘꠤꠞꠣꠇꠣꠞ ꠀꠟ꠆ꠟꠣꠞꠦ ꠖꠦꠈꠤꠟꠣꠁꠍꠂꠘ,
ꠅꠃꠟꠣ ꠝꠘꠅ ꠇꠞꠤꠀꠃ ꠔꠣꠁꠘ ꠍꠛꠞ ꠇꠞꠤ ꠞꠁꠟꠣ।
২৮ ꠁꠝꠣꠘꠞ ꠛꠟꠦꠃ ꠔꠣꠁꠘ ꠀꠎꠣꠖꠤ ꠁꠖ ꠀꠞ ꠟꠃ ꠍꠤꠐꠣꠁꠀ ꠖꠦꠅꠀꠞ ꠘꠤꠅꠝ ꠝꠣꠘꠟꠣ,
ꠎꠣꠔꠦ ꠀꠎꠞꠣꠁꠟ ꠚꠤꠞꠤꠡ꠆ꠔꠣꠄ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞꠦ ꠘꠣ ꠍꠂꠘ।
২৯ ꠁꠝꠣꠘꠞ ꠛꠟꠦꠃ ꠝꠣꠘꠡꠦ ꠘꠤꠟ ꠖꠞꠤꠀꠞ ꠝꠣꠎꠦꠖꠤ ꠢꠥꠇꠘꠣ ꠝꠣꠐꠤꠞ ꠙꠕꠞ ꠟꠣꠈꠣꠘ ꠀꠐꠤꠀ ꠉꠦꠟꠣ,
ꠅꠁꠟꠦ ꠝꠤꠡꠞꠤ ꠅꠇꠟꠦ ꠁꠟꠣ ꠎꠣꠅꠀꠔ ꠟꠣꠉꠤꠀ ꠛꠥꠠꠤꠀ ꠝꠞꠟꠣ।
৩০ ꠁꠝꠣꠘꠞ ꠛꠟꠦꠃ ꠛꠘꠤ ꠁꠍꠞꠣꠁꠟꠦ ꠎꠤꠞꠤꠢꠅ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟ ꠡꠣꠔꠖꠤꠘ ꠌꠇ꠆ꠇꠞ ꠖꠦꠅꠀꠞ ꠛꠣꠖꠦ ꠄꠝꠘꠦꠃ ꠙꠠꠤꠉꠦꠟ।
৩১ ꠁꠝꠣꠘꠞ ꠛꠟꠦꠃ ꠅꠃ ꠐꠣꠃꠘꠞ ꠞꠣꠢꠛꠣ ꠘꠣꠝꠞ ꠛꠖꠝꠣꠁꠡ ꠛꠦꠐꠤꠄ ꠛꠘꠤ ꠁꠍꠞꠣꠁꠟꠞ ꠉꠥꠁꠀ ꠅꠇꠟꠞꠦ ꠝꠦꠝꠣꠘꠖꠣꠞꠤ ꠇꠞꠣꠄ,
ꠢꠤꠘꠞ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠁ ꠛꠦꠐꠤ ꠛꠤꠘꠣꠡ ꠅꠁꠟꠣ ꠘꠣ।
৩২ ꠀꠞ ꠇꠔ ꠎꠘꠞ ꠛꠄꠀꠘ ꠇꠁꠔꠣꠝ?
ꠎꠤꠖꠣꠃꠘ,
ꠛꠣꠞꠣꠇ,
ꠡꠤꠝꠡꠥꠘ,
ꠁꠚꠔꠣ,
ꠖꠣꠃꠖ,
ꠡꠣꠝꠥꠄꠟ ꠀꠞ ꠘꠛꠤ ꠅꠇꠟꠞ ꠁꠝꠣꠘꠤ ꠛꠟꠞ ꠛꠄꠀꠘ ꠇꠞꠣꠔ ꠟꠣꠉꠟꠦ ꠡꠝꠄꠄ ꠇꠥꠟꠣꠁꠔ ꠘꠣꠄ।
৩৩ ꠁꠝꠣꠘꠞ ꠛꠟꠦ ꠄꠞꠣ ꠛꠃꠔ ꠖꠦꠡ ꠖꠈꠟ ꠇꠞꠍꠂꠘ,
ꠢꠇ ꠁꠘꠍꠣꠚ ꠇꠣꠁꠝ ꠇꠞꠍꠂꠘ,
ꠀꠟ꠆ꠟꠣꠁ ꠅꠀꠖꠣꠞ ꠚꠣꠄꠖꠣ ꠢꠣꠍꠤꠟ ꠇꠞꠍꠂꠘ,
ꠡꠤꠋꠢꠞ ꠝꠥꠈ ꠛꠘ꠆ꠖ ꠇꠞꠍꠂꠘ,
৩৪ ꠀꠉꠥꠘꠤꠞ ꠇꠥꠘ꠆ꠒꠟꠤꠞ ꠔꠦꠎ ꠇꠝꠣꠁꠟꠤꠍꠂꠘ,
ꠔꠟꠥꠀꠞꠞ ꠍꠣꠝꠘ ꠕꠣꠇꠤ ꠞꠦꠢꠣꠁ ꠙꠣꠁꠍꠂꠘ,
ꠇꠝꠎꠥꠞ ꠕꠣꠇꠤꠅ ꠛꠟ ꠢꠣꠍꠤꠟ ꠇꠞꠍꠂꠘ,
ꠎꠤꠢꠣꠖꠞ ꠝꠣꠎꠦ ꠛꠟ-ꠈꠦꠝꠔꠣ ꠖꠦꠈꠣꠁꠍꠂꠘ,
ꠜꠤꠘ-ꠖꠦꠡꠤ ꠅꠇꠟꠞ ꠚꠅꠃꠎꠞꠦ ꠈꠦꠖꠣꠁꠀ ꠖꠤꠍꠂꠘ।
৩৫ ꠛꠦꠐꠤꠘ꠆ꠔꠦ ꠔꠣꠞꠣ ꠎꠣꠞꠎꠤꠞ ꠝꠥꠞ꠆ꠖꠣ ꠅꠇꠟꠞꠦ ꠢꠤꠞꠛꠣꠞ ꠎꠤꠘ꠆ꠖꠣ ꠢꠣꠟꠔꠦ ꠙꠣꠁꠟꠣ।
ꠀꠞꠅ ꠛꠃꠔꠦ ꠎꠣꠘꠞ ꠝꠣꠄꠀ ꠍꠣꠠꠤꠀ ꠎꠥꠟꠥꠝ-ꠘꠤꠞ꠆ꠎꠣꠔꠘ ꠡꠁꠎ꠆ꠎ ꠇꠞꠤꠀ ꠝꠞꠟꠣ,
ꠎꠣꠔꠦ ꠇꠤꠀꠝꠔꠞ ꠛꠣꠖꠦ ꠛꠦꠢꠦꠡ꠆ꠔꠤ ꠡꠥꠈ ꠙꠣꠁꠘ।
৩৬ ꠛꠃꠔꠦ ꠐꠣꠐ꠆ꠐꠣ-ꠝꠡꠇꠞꠣ ꠀꠞ ꠝꠣꠁꠞ-ꠗꠁꠞ ꠡꠁꠎ꠆ꠎ ꠇꠞꠍꠂꠘ,
ꠛꠃꠔꠦ ꠒꠣꠘ꠆ꠒꠣ-ꠛꠦꠠꠤ ꠡꠢ ꠎꠦꠟ ꠈꠣꠐꠤꠍꠂꠘ।
৩৭ ꠝꠣꠘꠡꠦ ꠔꠣꠞꠣꠞꠦ ꠇꠣꠋꠇꠠꠖꠤ ꠁꠐꠣꠁꠍꠂꠘ,
ꠇꠞꠣꠔꠖꠤ ꠌꠤꠞꠤꠀ ꠖꠥꠁ ꠐꠥꠇꠞꠣ ꠇꠞꠍꠂꠘ,
ꠔꠟꠥꠀꠞꠖꠤ ꠇꠣꠔꠟ ꠇꠞꠍꠂꠘ।
ꠔꠣꠞꠣ ꠎꠥꠟꠥꠝ-ꠝꠍꠤꠛꠔ,
ꠎꠣꠟꠣ-ꠎꠘꠔ꠆ꠞꠘꠣ ꠙꠣꠁꠍꠂꠘ,
ꠅꠜꠣꠛꠞ ꠑꠦꠟꠣꠄ ꠙꠡꠥꠞ ꠌꠣꠝꠠꠣ ꠚꠤꠘ꠆ꠖꠤꠀ ꠡꠞꠝ ꠟꠥꠇꠣꠁꠍꠂꠘ।
৩৮ ꠁ ꠖꠥꠘꠤꠀ ꠔꠣꠞꠣꠞ ꠎꠥꠇꠣ ꠀꠍꠤꠟ ꠘꠣ,
ꠔꠣꠞꠣ ꠙꠣꠠ-ꠎꠋꠉꠟ,
ꠝꠞꠥꠜꠥꠝꠤ,
ꠀꠞ ꠉꠣꠔ-ꠉꠣꠠꠣꠞ ꠝꠣꠎꠦ ꠞꠁꠀ ꠖꠥꠘꠤꠀꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠂꠘ।