ꠀꠈꠦꠞꠤ ꠘꠍꠤꠅꠔ
১৩
১ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠜꠣꠁꠞ ꠟꠣꠈꠣꠘ ꠢꠣꠝꠦꠡꠣ ꠝꠣꠄꠀ ꠇꠞꠤꠅ।
২ ꠝꠦꠝꠣꠘꠖꠣꠞꠤ ꠇꠞꠣ ꠚꠣꠃꠞꠤꠅ ꠘꠣ।
ꠎꠣꠘꠅ ꠘꠤ,
ꠇꠥꠘꠥ ꠇꠥꠘꠥ ꠎꠘꠦ ꠘꠣ ꠌꠤꠘꠤꠀ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞꠅ ꠝꠦꠝꠣꠘꠖꠣꠞꠤ ꠇꠞꠍꠂꠘ।
৩ ꠎꠦꠟ ꠈꠣꠘꠣꠔ ꠎꠦꠔꠣ ꠝꠣꠘꠥꠡ ꠛꠘ꠆ꠖꠤ ꠀꠍꠂꠘ,
ꠘꠤꠎꠞꠦꠅ ꠅꠟꠣ ꠛꠘ꠆ꠖꠤ ꠝꠘꠅ ꠇꠞꠤꠀ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠤꠅ,
ꠀꠞ ꠎꠦꠞꠣꠞ ꠃꠙꠞꠦ ꠎꠥꠟꠥꠝ-ꠝꠍꠤꠛꠔ ꠇꠞꠣ ꠅꠞ,
ꠘꠤꠎꠦ ꠅꠃ ꠝꠍꠤꠛꠔꠅ ꠙꠠꠍ ꠝꠘꠅ ꠇꠞꠤꠀ,
ꠔꠣꠞꠣꠞꠦ ꠈꠤꠀꠟ ꠇꠞꠤꠅ।
৪ ꠢꠇꠟꠦꠃ ꠛꠤꠀ-ꠡꠣꠖꠤꠞꠦ ꠁꠎ꠆ꠎꠔ ꠇꠞꠤꠅ।
ꠎꠣꠝꠣꠁ-ꠛꠃꠞ ꠡꠝ꠆ꠙꠞ꠆ꠇꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠅ।
ꠝꠘꠅ ꠞꠣꠈꠤꠅ,
ꠀꠟ꠆ꠟꠣꠄ ꠇꠥ-ꠘꠎꠞꠤ,
ꠎꠤꠘꠣꠇꠥꠞ ꠀꠞ ꠟꠥꠌ꠆ꠌꠣ ꠅꠇꠟꠞ ꠛꠤꠌꠣꠞ ꠇꠞꠛꠣ।
৫ ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠟꠣꠟꠌ ꠕꠣꠇꠤ ꠢꠞꠤꠀ ꠞꠁꠅ।
ꠔꠥꠝꠞꠣꠞ ꠎꠦꠔꠣ ꠀꠍꠦ,
ꠅꠔꠣ ꠟꠁꠀꠃ ꠈꠥꠡꠤ ꠞꠁꠅ।
ꠀꠟ꠆ꠟꠣꠄ ꠛꠣꠔꠣꠁꠍꠂꠘ,
ꠀꠝꠤ ꠇꠥꠘꠥꠝꠘ꠆ꠔꠦꠃ ꠔꠥꠝꠣꠞꠦ ꠍꠣꠠꠔꠣꠝ ꠘꠣꠄ,
ꠇꠥꠘꠥ ꠢꠣꠟꠔꠦꠃ ꠔꠥꠝꠣꠞꠦ ꠚꠣꠟꠣꠁꠔꠣꠝ ꠘꠣꠄ।
৬ ꠄꠞꠟꠣꠉꠤꠃ ꠀꠝꠞꠣ ꠢꠤꠝ꠆ꠝꠔ ꠇꠞꠤꠀ ꠇꠁꠔꠣꠝ ꠙꠣꠞꠤꠀꠞ,
ꠝꠣꠛꠥꠖ ꠀꠝꠣꠞ ꠡꠢꠣꠄ ꠀꠍꠂꠘ,
ꠀꠝꠤ ꠒꠞꠣꠁꠔꠣꠝ ꠘꠣꠄ।
ꠝꠣꠘꠡꠦ ꠀꠝꠣꠞ ꠇꠤꠔꠣ ꠇꠞꠔ?
৭ ꠢꠥꠘꠅ,
ꠎꠦ ꠛꠥꠎꠥꠞ꠆ꠉ ꠅꠇꠟꠦ ꠔꠥꠝꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠔꠣꠟꠤꠝ ꠖꠤꠍꠂꠘ,
ꠔꠣꠞꠣꠞ ꠇꠕꠣ ꠁꠀꠖ ꠇꠞꠤꠅ।
ꠔꠣꠞꠣꠞ ꠎꠤꠘ꠆ꠖꠦꠉꠤꠞ ꠢꠣꠟꠔꠞ ꠇꠕꠣ ꠜꠣꠟꠣꠝꠘ꠆ꠔꠦ ꠌꠤꠘ꠆ꠔꠣ ꠇꠞꠤꠀ,
ꠔꠥꠝꠞꠣꠅ ꠔꠣꠞꠣꠞ ꠟꠣꠈꠣꠘ ꠁꠝꠣꠘꠦ ꠝꠎꠛꠥꠔ ꠅꠅ।
৮ ꠁꠍꠣ ꠀꠟ-ꠝꠍꠤ ꠉꠔꠇꠣꠁꠟ ꠎꠦꠟꠣ ꠀꠍꠟꠣ,
ꠀꠁꠎꠅ ꠅꠟꠣ ꠀꠍꠂꠘ,
ꠀꠞ ꠢꠞ-ꠢꠣꠝꠦꠡꠣꠃ ꠅꠟꠣ ꠞꠁꠛꠣ।
৯ ꠘꠣꠘꠣꠘ ꠘꠝꠥꠘꠣꠞ ꠘꠄꠀ ꠘꠄꠀ ꠔꠣꠟꠤꠝꠦ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ,
ꠈꠣꠘꠣ-ꠙꠤꠘꠣꠞ ꠈꠥꠐꠤꠘꠣꠐꠤ ꠛꠤꠡꠄ ꠘꠣ ꠔꠥꠇꠣꠁꠀ,
ꠛꠞꠋ ꠀꠟ꠆ꠟꠣꠞ ꠞꠢꠝꠔꠞ ꠃꠙꠞꠦ ꠇꠣꠁꠝ ꠞꠅ।
ꠁꠟꠣ ꠈꠥꠐꠤꠘꠣꠐꠤ ꠘꠤꠅꠝꠞ ꠃꠙꠞꠦ ꠎꠦꠞꠣ ꠜꠞꠡꠣ ꠇꠞꠔ,
ꠁꠔꠣꠄ ꠔ ꠔꠣꠞꠣꠞ ꠇꠥꠘꠥ ꠟꠣꠜ ꠅꠁꠍꠦ ꠘꠣ।
১০ ꠀꠝꠞꠣꠞ ꠔ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠀꠍꠦ,
ꠁꠈꠣꠘꠞ ꠇꠥꠘ꠆ꠔꠣ ꠈꠣꠁꠛꠣꠞ ꠄꠈꠔꠤꠀꠞ ꠝꠥꠍꠣ ꠘꠛꠤꠞ ꠄꠛꠣꠖꠔ-ꠔꠣꠝ꠆ꠛꠥꠞ ꠁꠝꠣꠝ ꠅꠇꠟꠞ ꠘꠣꠁ।
১১ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠎꠛꠅ ꠇꠞꠣ ꠙꠡꠥꠞ ꠟꠃ ꠟꠁꠀ,
ꠛꠘꠤ ꠁꠍꠞꠣꠁꠟꠞ ꠙꠞꠗꠣꠘ ꠁꠝꠣꠝ ꠅꠇꠟ ꠄꠛꠣꠖꠔ ꠈꠣꠘꠣꠞ ꠈꠣꠍ ꠙꠣꠇ ꠎꠣꠉꠣꠔ ꠢꠣꠝꠣꠁꠘ,
ꠅꠁꠟꠦ ꠅꠃ ꠙꠡꠥꠞ ꠀꠒ꠆ꠒꠤ-ꠝꠣꠋꠡ ꠢꠇꠟꠔꠣ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠎꠣꠟꠣꠁꠟ ꠅꠄ।
১২ ꠅꠃ ꠟꠣꠈꠣꠘ ꠢꠎꠞꠔ ꠁꠍꠣꠅ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠛꠣꠞꠦ ꠉꠤꠀ ꠎꠥꠟꠥꠝ-ꠇꠡ꠆ꠐ ꠡꠁꠎ꠆ꠎ ꠇꠞꠤꠀ ꠝꠃꠔ ꠇꠛꠥꠟ ꠇꠞꠟꠣ,
ꠎꠣꠔꠦ ꠔꠣꠘ ꠘꠤꠎꠞ ꠟꠃꠞ ꠃꠍꠤꠟ꠆ꠟꠣꠄ ꠝꠣꠘꠡꠞꠦ ꠉꠥꠘꠣ ꠕꠣꠇꠤ ꠙꠣꠇ-ꠍꠣꠚ ꠇꠞꠔꠣ ꠙꠣꠞꠂꠘ।
১৩ ꠅꠈꠘ ꠀꠃꠇ꠆ꠇꠣ,
ꠀꠝꠞꠣꠅ ꠔꠣꠘ ꠛꠖꠘꠣꠝꠞꠦ ꠘꠤꠎꠞ ꠇꠣꠘ꠆ꠖꠅ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠔꠣꠘ ꠇꠣꠘ꠆ꠖꠣꠔ ꠎꠣꠁꠉꠤ।
১৪ ꠇꠣꠞꠘ ꠁ ꠖꠥꠘꠤꠀꠔ ꠀꠝꠞꠣꠞ ꠟꠣꠉꠤ ꠡ꠆ꠕꠣꠄꠁ ꠇꠥꠘꠥ ꠐꠣꠃꠘ ꠘꠣꠁ,
ꠀꠝꠞꠣ ꠈꠣꠟꠤ ꠢꠃ ꠐꠣꠃꠘꠞ ꠔꠣꠟ꠆ꠟꠣꠡ ꠇꠞꠞꠣꠝ,
ꠎꠦ ꠐꠣꠃꠘꠞ ꠖꠤꠖꠣꠞ ꠛꠣꠖꠦ ꠙꠣꠁꠝꠥ।
১৫ ꠔꠦ ꠅꠈꠘ ꠀꠝꠞꠣ ꠀꠟ-ꠝꠍꠤꠞ ꠎꠞꠤꠀꠄ ꠟꠁꠀ ꠢꠣꠝꠦꠡꠣ ꠀꠟ꠆ꠟꠣꠞ ꠖꠞꠛꠣꠞꠅ ꠎꠤꠇꠤꠞ-ꠀꠎꠇꠣꠞ ꠇꠥꠞꠛꠣꠘꠤ ꠇꠞꠤ,
ꠝꠣꠘꠤ ꠖꠥꠁꠅ ꠑꠥꠐꠦ ꠔꠣꠘ ꠘꠣꠝꠞ ꠉꠥꠘꠉꠣꠘ ꠉꠣꠁ।
১৬ ꠘꠦꠇ ꠇꠣꠝ ꠇꠞꠣ ꠀꠞ ꠅꠜꠣꠛꠤ ꠝꠣꠘꠡꠞꠦ ꠖꠣꠘ-ꠈꠄꠞꠣꠔ ꠛꠤꠟꠣꠘꠤ ꠚꠣꠃꠞꠤꠅ ꠘꠣ,
ꠇꠣꠞꠘ ꠅꠃ ꠟꠣꠈꠣꠘ ꠇꠥꠞꠛꠣꠘꠤꠄ ꠀꠟ꠆ꠟꠣ ꠙꠣꠇ ꠈꠥꠡꠤ ꠅꠁꠘ।
১৭ ꠔꠥꠝꠞꠣꠞ ꠝꠥꠞꠛ꠆ꠛꠤ ꠅꠇꠟꠞ ꠢꠥꠇꠥꠝ ꠝꠣꠘꠤꠀ ꠔꠣꠞꠣꠞ ꠉꠦꠍꠦ ꠝꠣꠕꠣ ꠘꠥꠀꠁꠀ ꠞꠁꠅ,
ꠀꠟ꠆ꠟꠣꠞ ꠖꠞꠛꠣꠞꠅ ꠢꠤꠡꠣꠛ ꠖꠦꠅꠀ ꠟꠣꠉꠛ ꠇꠞꠤ ꠔꠣꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠎꠣꠘꠞ ꠙꠣꠞꠣꠖꠣꠞ ꠅꠁꠀ ꠇꠣꠝ ꠇꠞꠞꠣ।
ꠅꠈꠘ ꠔꠣꠞꠣ ꠎꠣꠔꠦ ꠈꠥꠡꠤ ꠝꠘꠦ ꠁꠔꠣ ꠇꠞꠂꠘ,
ꠄꠞꠟꠣꠉꠤ ꠔꠥꠝꠞꠣ ꠛꠣꠁꠖ꠆ꠖ ꠞꠁꠅ।
ꠔꠣꠞꠣ ꠎꠥꠖꠤ ꠝꠘꠅ ꠖꠥꠈ ꠙꠣꠁꠀ ꠔꠥꠝꠞꠣꠞ ꠟꠣꠉꠤ ꠇꠣꠝ ꠇꠞꠂꠘ,
ꠔꠦ ꠔꠥꠝꠞꠣꠞ ꠜꠣꠟꠣꠁ ꠅꠁꠔ ꠘꠣꠄ।
১৮ ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
ꠀꠝꠞꠣ ꠔ ꠎꠣꠘꠤ,
ꠀꠝꠞꠣꠞ ꠛꠤꠛꠦꠇ ꠍꠣꠚ-ꠍꠚꠣ ꠀꠍꠦ,
ꠢꠇ꠆ꠇꠟ ꠛꠦꠙꠣꠞꠦ ꠢꠇ ꠙꠕꠦ ꠌꠟꠔꠣꠝ ꠌꠣꠁ।
১৯ ꠀꠝꠤ ꠈꠣꠍ ꠇꠞꠤ ꠔꠥꠝꠞꠣꠞ ꠉꠦꠍꠦ ꠅꠃ ꠖꠥꠀ ꠌꠣꠁꠞꠣꠝ,
ꠎꠣꠔꠦ ꠎꠟꠖꠤ ꠇꠞꠤ ꠀꠝꠤ ꠢꠤꠞꠛꠣꠞ ꠔꠥꠝꠞꠣꠞ ꠟꠉꠦ ꠝꠥꠟꠣꠇꠣꠔ ꠇꠞꠔꠣꠝ ꠙꠣꠞꠤ।
ꠛꠤꠖꠣꠄꠁ ꠍꠣꠟꠣꠝ ꠀꠞ ꠖꠥꠀ
২০ ꠀꠟ꠆ꠟꠣꠞ ꠟꠉꠦ ꠀꠝꠞꠣꠞ ꠝꠤꠟꠘ,
ꠢꠞ-ꠢꠣꠝꠦꠡꠣꠇꠥꠞ ꠃꠍꠤꠟ꠆ꠟꠣ,
ꠙꠥꠞꠣꠙꠥꠞ ꠇꠣꠁꠝ ꠇꠞꠣꠞ ꠟꠣꠉꠤꠀ,
ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣ,
ꠘꠤꠎꠞ ꠟꠃ ꠛꠤꠟꠣꠁ ꠖꠤꠀ,
ꠝꠦꠠꠣ ꠙꠣꠟꠞ ꠝꠢꠣꠘ ꠞꠣꠈꠣꠟ ꠛꠘꠤꠍꠂꠘ।
ꠢꠎꠞꠔ ꠁꠍꠣꠞ ꠝꠃꠔꠞ ꠛꠣꠖꠦ,
ꠡꠣꠘ꠆ꠔꠤ ꠖꠦꠃꠞꠣ ꠀꠟ꠆ꠟꠣ ꠙꠣꠇꠦ,
ꠝꠥꠞ꠆ꠖꠣ ꠕꠣꠇꠤ ꠔꠣꠘꠞꠦ ꠎꠤꠘ꠆ꠖꠣ ꠇꠞꠤꠍꠂꠘ।
২১ ꠢꠇꠟ ꠘꠦꠇ ꠇꠣꠝꠞ ꠔꠃꠚꠤꠇ ꠖꠦꠃꠇ꠆ꠇꠣ,
ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠣꠞ,
ꠀꠞ ꠔꠣꠁꠘ ꠎꠦꠔꠣ ꠙꠍꠘ꠆ꠖ ꠇꠞꠂꠘ,
ꠖꠤꠟꠅ ꠅꠔꠣꠞ ꠄꠡꠇꠤ ꠖꠦꠃꠇ꠆ꠇꠣ,
ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ,
ꠄꠘ ꠝꠢꠤꠝꠣ ꠢꠞ-ꠢꠣꠝꠦꠡꠣ ꠞꠃꠇ,
ꠀꠝꠤꠘ।
২২ ꠜꠣꠁ ꠅꠇꠟ,
ꠔꠥꠝꠞꠣꠞ ꠉꠦꠍꠦ ꠝꠤꠘꠔ ꠇꠞꠞꠣꠝ,
ꠔꠥꠝꠞꠣ ꠛꠤꠞꠇ꠆ꠔ ꠘꠣ ꠅꠁꠀ ꠁ ꠘꠍꠤꠅꠔ ꠢꠥꠘꠅ,
ꠀꠝꠤ ꠈꠥꠛ ꠡꠐꠇꠣꠐꠦ ꠟꠦꠈꠟꠣꠝ।
২৩ ꠢꠥꠘꠅ,
ꠀꠝꠞꠣꠞ ꠜꠣꠁ ꠔꠤꠝꠕꠤꠄ ꠈꠣꠟꠣꠍ ꠙꠣꠁꠍꠂꠘ,
ꠔꠣꠁꠘ ꠎꠥꠖꠤ ꠡꠝꠄ ꠝꠔ ꠀꠝꠣꠞ ꠅꠘꠅ ꠀꠁꠘ,
ꠔꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠅꠀꠞ ꠡꠝꠄ ꠔꠣꠘꠦ ꠟꠉꠦ ꠟꠁꠀ ꠀꠁꠝꠥ।
২৪ ꠔꠥꠝꠞꠣ ꠘꠤꠎꠞ ꠝꠥꠞꠛ꠆ꠛꠤ ꠅꠇꠟꠞꠦ,
ꠀꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
ꠁꠔꠣꠟꠤ ꠖꠦꠡꠞ ꠝꠣꠘꠡꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
২৫ ꠔꠥꠝꠞꠣ ꠢꠇꠟꠞ ꠃꠙꠞꠦ ꠀꠟ꠆ꠟꠣꠞ ꠞꠢꠝꠔ ꠇꠣꠁꠝ ꠞꠃꠇ।
ꠀꠝꠤꠘ॥