ꠉꠥꠟꠣꠝꠤꠞ ꠛꠦꠡꠦ ꠈꠦꠎꠝꠔ ꠇꠞꠅ
৫
১ ꠅꠈꠘ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠞꠣꠝ,
ꠀꠝꠤꠅ ꠔ ꠄꠇꠎꠘ ꠝꠥꠞꠛ꠆ꠛꠤ,
ꠀꠝꠤ ꠘꠤꠎꠞ ꠌꠃꠈꠦ ꠀꠟ-ꠝꠍꠤꠞ ꠖꠥꠈ-ꠇꠡ꠆ꠐ ꠖꠦꠈꠍꠤ,
ꠀꠞ ꠔꠣꠘ ꠎꠦ ꠝꠢꠤꠝꠣ ꠎꠣꠁꠞ ꠅꠁꠛ,
ꠅꠃ ꠝꠢꠤꠝꠣꠔꠅ ꠡꠞꠤꠇ ꠅꠁꠝꠥ।
ꠀꠝꠤ ꠝꠤꠘꠔ ꠇꠞꠤ ꠇꠁꠞꠣꠝ,
২ ꠀꠟ꠆ꠟꠣꠁ ꠎꠦ ꠝꠦꠠꠣꠞ ꠙꠣꠟ ꠔꠥꠝꠞꠣꠞ ꠀꠅꠔꠣꠄ ꠀꠍꠂꠘ,
ꠄꠞꠣꠞ ꠞꠣꠈꠣꠟꠤ ꠇꠞꠅ।
ꠔꠣꠞꠣꠞ ꠁꠝꠣꠝꠔꠤ ꠇꠞꠅ,
ꠇꠞꠣ ꠟꠣꠉꠛ ꠇꠞꠤ ꠘꠣ ꠇꠞꠤꠀ ꠛꠣ ꠖꠥꠘꠤꠀꠛꠤ ꠟꠣꠜꠞ ꠀꠡꠣꠄ ꠘꠣ ꠇꠞꠤꠀ,
ꠈꠥꠡ ꠖꠤꠟꠦ ꠇꠞꠅ।
ꠀꠟ꠆ꠟꠣꠄ ꠔ ꠅꠟꠣ ꠁꠝꠣꠝꠔꠤꠃ ꠀꠡꠣ ꠇꠞꠂꠘ।
৩ ꠔꠥꠝꠞꠣꠞ ꠀꠅꠔꠣꠄ ꠎꠦꠞꠣ ꠀꠍꠦ,
ꠄꠞꠣꠞ ꠃꠙꠞꠦ ꠝꠥꠍꠖ꠆ꠖꠞꠤ ꠇꠞꠤꠅ ꠘꠣ,
ꠛꠞꠋ ꠙꠣꠟꠞ ꠞꠣꠈꠣꠟꠤ ꠇꠞꠤꠀ ꠔꠣꠞꠣꠞ ꠉꠦꠍꠦ ꠘꠝꠥꠘꠣ ꠛꠘꠅ।
৪ ꠔꠦꠃ ꠢꠃ ꠙꠞꠗꠣꠘ ꠞꠣꠈꠣꠟ ꠁꠍꠣꠄ ꠎꠦꠛꠟꠣ ꠖꠥꠘꠤꠀꠔ ꠢꠤꠞꠛꠣꠞ ꠔꠡꠞꠤꠚ ꠀꠘꠛꠣ,
ꠅꠃ ꠡꠝꠄ ꠔꠥꠝꠞꠣ ꠙꠥꠞꠥꠡ꠆ꠇꠣꠞ ꠢꠤꠡꠣꠛꠦ ꠅꠟꠣ ꠄꠇ ꠎꠂꠅꠞ ꠝꠣꠟꠣ ꠙꠣꠁꠛꠣꠄ ꠎꠦꠔꠣ ꠇꠥꠘꠥꠖꠤꠘ ꠛꠤꠘꠣꠡ ꠅꠁꠔ ꠘꠣꠄ।
৫ ꠅꠃ ꠟꠣꠈꠣꠘ ꠎꠥꠀꠘ ꠅꠇꠟꠦꠅ ꠔꠥꠝꠞꠣꠞ ꠝꠥꠞꠛ꠆ꠛꠤꠞꠦ ꠝꠣꠘꠤꠀ ꠌꠟꠅ।
ꠉꠥꠟꠣꠝꠤꠞ ꠛꠦꠡꠦ ꠢꠇꠟꠦꠃ ꠄꠇꠦ-ꠅꠁꠘ꠆ꠘꠞ ꠈꠦꠎꠝꠔ ꠇꠞꠅ,
ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
ꠀꠟ꠆ꠟꠣꠄ ꠅꠢꠋꠇꠣꠞꠤꠞ ꠛꠤꠞꠥꠖ꠆ꠖꠦ ꠕꠣꠇꠂꠘ,
ꠘꠞꠝ ꠖꠤꠟꠞ ꠝꠣꠘꠡꠞꠦ ꠞꠢꠝ ꠇꠞꠂꠘ।
৬ ꠄꠞꠟꠣꠉꠤ ꠀꠟ꠆ꠟꠣꠞ ꠈꠦꠝꠔꠣꠞ ꠍꠣꠝꠘꠦ ꠔꠥꠝꠞꠣ ꠘꠔ ꠅꠅ,
ꠔꠦꠃ ꠡꠝꠄ ꠝꠔ ꠀꠟ꠆ꠟꠣꠄ ꠔꠥꠝꠞꠣꠞꠦ ꠃꠌꠣ ꠇꠞꠛꠣ।
৭ ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠟꠁꠀꠃ ꠌꠤꠘ꠆ꠔꠣ ꠇꠞꠂꠘ,
ꠄꠞꠟꠣꠉꠤ ꠢꠇꠟ ꠌꠤꠘ꠆ꠔꠣ-ꠜꠣꠛꠘꠣꠞ ꠜꠣꠞ ꠔꠣꠘ ꠃꠙꠞꠦ ꠖꠤꠟꠣꠅ।
৮ ꠔꠥꠝꠞꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ ꠀꠞ ꠢꠥꠡꠤꠀꠞ ꠅꠅ।
ꠇꠣꠞꠘ ꠔꠥꠝꠞꠣꠞ ꠖꠥꠡꠝꠘ ꠁꠛꠟꠤꠍꠦ ꠉꠞ꠆ꠎꠘ ꠇꠞꠞꠣ ꠛꠣꠊꠞ ꠟꠣꠈꠣꠘ,
ꠔꠥꠝꠞꠣꠞꠦ ꠈꠣꠁꠟꠤꠔ ꠇꠞꠤ ꠈꠣꠙ ꠗꠞꠤꠀ ꠊꠥꠞꠦꠞ।
৯ ꠄꠞꠟꠣꠉꠤ ꠁꠝꠣꠘꠦ ꠝꠎꠛꠥꠔ ꠞꠁꠀ ꠔꠣꠞ ꠝꠥꠇꠣꠛꠤꠟꠣ ꠇꠞꠅ।
ꠔꠥꠝꠞꠣ ꠔ ꠎꠣꠘꠅ,
ꠖꠥꠘꠤꠀꠞ ꠢꠇꠟ ꠎꠣꠉꠣꠔ ꠔꠥꠝꠞꠣꠞ ꠁꠝꠣꠘꠖꠣꠞ ꠜꠣꠁꠀꠂꠘ꠆ꠔꠦ ꠄꠇꠁ ꠟꠣꠈꠣꠘ ꠖꠥꠈ-ꠇꠡ꠆ꠐ ꠇꠞꠦꠞ।
১০ ꠞꠢꠝꠣꠘꠥꠞ ꠞꠢꠤꠝ ꠀꠟ꠆ꠟꠣ ꠙꠣꠇꠦ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠀꠟ-ꠝꠍꠤꠞ ꠟꠉꠦ ꠅꠁꠀ ꠔꠣꠘ ꠌꠤꠞꠡ꠆ꠕꠣꠄꠁ ꠝꠢꠤꠝꠣꠞ ꠜꠣꠉꠤ ꠅꠀꠞ ꠟꠣꠉꠤ।
ꠕꠥꠠꠣ ꠇꠄꠖꠤꠘ ꠖꠥꠈ-ꠇꠡ꠆ꠐ ꠇꠞꠤꠀ ꠢꠣꠞꠟꠦ,
ꠔꠣꠁꠘ ꠘꠤꠎꠦꠃ ꠔꠥꠝꠞꠣꠞꠦ ꠑꠤꠇ-ꠑꠣꠇ ꠇꠞꠛꠣ ꠀꠞ ꠕꠤꠞ ꠞꠣꠈꠛꠣ,
ꠔꠥꠝꠞꠣꠞꠦ ꠛꠟꠛꠣꠘ ꠇꠞꠤꠀ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠈꠣꠠꠣ ꠇꠞꠣꠁꠛꠣ।
১১ ꠔꠣꠘ ꠞꠣꠎ-ꠈꠦꠝꠔꠣ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ।
ꠀꠝꠤꠘ।
ꠡꠦꠡ ꠇꠕꠣ
১২ ꠅꠃ ꠌꠤꠑꠤꠈꠣꠘ ꠀꠝꠤ ꠍꠤꠟꠣꠍ ꠝꠢꠞꠤꠞ ꠍꠣꠛꠞꠦꠖꠤ ꠈꠥꠛ ꠇꠝ ꠇꠕꠣꠄ ꠔꠥꠝꠞꠣꠞ ꠉꠦꠍꠦ ꠟꠦꠈꠣꠁꠍꠤ,
ꠀꠝꠤ ꠔꠣꠘꠞꠦ ꠢꠇ-ꠢꠣꠟꠣꠟ ꠜꠣꠁ ꠝꠘꠅ ꠇꠞꠤ।
ꠀꠝꠤ ꠌꠣꠁꠞꠣꠝ ꠀꠟ꠆ꠟꠣꠞ ꠈꠣꠍ ꠞꠢꠝꠔꠞ ꠅꠃ ꠡꠣꠇ꠆ꠇꠤ ꠢꠥꠘꠤꠀ ꠔꠥꠝꠞꠣꠞ ꠡꠣꠅꠡ ꠛꠣꠠꠃꠇ,
ꠀꠞ ꠔꠥꠝꠞꠣ ꠅꠘꠅ ꠕꠤꠞ ꠅꠁꠀ ꠞꠅ।