২
১ ꠅ ꠀꠝꠣꠞ ꠍꠣꠛꠣꠟ ꠅꠇꠟ,
ꠀꠝꠤ ꠔꠥꠝꠞꠣꠞ ꠉꠦꠍꠦ ꠁꠔꠣ ꠟꠦꠈꠞꠣꠝ,
ꠎꠣꠔꠦ ꠔꠥꠝꠞꠣ ꠉꠥꠘꠣꠞ ꠇꠣꠝ ꠕꠣꠇꠤ ꠛꠣꠌꠤꠀ ꠞꠅ।
ꠄꠞꠛꠣꠖꠦꠅ ꠇꠦꠃ ꠎꠥꠖꠤ ꠇꠥꠘꠥ ꠉꠥꠘꠣ ꠇꠞꠤꠟꠣꠄ,
ꠔꠦ ꠛꠦꠢꠦꠡ꠆ꠔꠤ ꠛꠣꠛꠣꠞ ꠖꠞꠛꠣꠞꠅ ꠀꠝꠞꠣꠞ ꠄꠇꠎꠘ ꠙꠣꠇ-ꠙꠞꠦꠎꠉꠣꠞ ꠡꠣꠚꠣꠄꠀꠔꠇꠣꠞꠤ ꠀꠍꠂꠘ,
ꠔꠣꠘ ꠘꠣꠝ ꠁꠍꠣ ꠀꠟ-ꠝꠍꠤ।
২ ꠎꠣꠘꠅ ꠘꠤ ꠔꠣꠁꠘ ꠇꠤꠔꠣ ꠇꠞꠍꠂꠘ?
ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
ꠈꠣꠟꠤ ꠀꠝꠞꠣꠞ ꠘꠣꠄ,
ꠛꠞꠋ ꠖꠥꠘꠤꠀꠞ ꠢꠇꠟ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠤꠍꠂꠘ।
৩ ꠅꠈꠘ ꠀꠝꠞꠣ ꠔꠣꠘꠞꠦ ꠌꠤꠘꠤ ꠘꠤ?
ꠘꠤꠌ꠆ꠌꠄ ꠌꠤꠘꠤ,
ꠀꠝꠞꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦ ꠛꠥꠎꠣ ꠎꠣꠁꠛ,
ꠀꠝꠞꠣ ꠔꠣꠘꠞꠦ ꠌꠤꠘꠤ।
৪ ꠀꠞ ꠎꠦ ꠝꠣꠘꠡꠦ ꠇꠄ ꠔꠣꠘꠞꠦ ꠌꠤꠘꠦ,
ꠌꠤꠘꠤꠀꠅ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠦ ꠘꠣ,
ꠢꠦ ꠝꠤꠍꠣ ꠝꠣꠔꠦ,
ꠔꠣꠞ ꠖꠤꠟꠅ ꠢꠇꠤꠇꠔꠤ ꠘꠣꠁ।
৫ ꠅꠁꠟꠦ ꠎꠦ ꠎꠘꠦ ꠔꠣꠘ ꠇꠣꠟꠣꠝ ꠝꠣꠚꠤꠇ ꠌꠟꠦ,
ꠔꠣꠞ ꠖꠤꠟꠞ ꠝꠣꠎꠦ ꠘꠤꠌ꠆ꠌꠄ ꠀꠟ꠆ꠟꠣꠁ ꠝꠢꠛ꠆ꠛꠔ ꠡꠥꠟ꠆ꠟꠀꠘꠣ ꠚꠟꠤꠍꠦ।
ꠔꠦ ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ ꠘꠤ?
ꠅꠄ,
ꠅꠃ ꠝꠘ꠆ꠔꠦ ꠛꠥꠎꠣ ꠎꠣꠄ ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ:
৬ ꠀꠞ ꠔꠣꠘ ꠝꠣꠎꠦ ꠛꠡꠔ ꠇꠞꠤ ꠇꠁꠟꠦ,
ꠀꠝꠞꠣꠞ ꠟꠣꠉꠤ ꠎꠞꠥꠞ ꠅꠁꠟ,
ꠔꠣꠁꠘ ꠎꠦꠟꠣ ꠌꠟꠍꠂꠘ,
ꠀꠝꠞꠣꠅ ꠅꠟꠣ ꠌꠟꠣ।
৭ ꠅ ꠡꠥꠘꠣ ꠅꠇꠟ,
ꠀꠝꠤ ꠔ ꠔꠥꠝꠞꠣꠞ ꠉꠦꠍꠦ ꠘꠄꠀ ꠇꠥꠘꠥ ꠢꠥꠇꠥꠝꠞ ꠇꠕꠣ ꠟꠦꠈꠞꠣꠝ ꠘꠣ,
ꠛꠞꠋ ꠅꠟꠣ ꠄꠇ ꠢꠥꠇꠥꠝꠞ ꠇꠕꠣ ꠟꠦꠈꠞꠣꠝ,
ꠎꠦꠔꠣ ꠙꠄꠟꠣ ꠕꠣꠇꠤꠃ ꠀꠍꠤꠟ।
ꠔꠥꠝꠞꠣ ꠀꠉꠦ ꠕꠣꠇꠤ ꠎꠦ ꠇꠣꠟꠣꠝ ꠢꠥꠘꠍ,
ꠅꠐꠣꠃ ꠅꠁꠟ ꠢꠃ ꠙꠥꠞꠣꠘꠣ ꠢꠥꠇꠥꠝ।
৮ ꠁꠔꠣꠞꠦ ꠙꠥꠞꠣꠘꠣ ꠇꠁꠟꠦꠅ ꠀꠍꠟꠦ ꠁꠔꠣ ꠘꠄꠀ।
ꠅꠃ ꠢꠥꠇꠥꠝꠞ ꠢꠇꠤꠇꠔꠤꠄ ꠁꠍꠣ ꠀꠟ-ꠝꠍꠤ ꠌꠟꠔꠣ,
ꠀꠞ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔꠅ ꠁꠔꠣ ꠀꠍꠦ।
ꠖꠦꠈꠞꠣꠄ ꠘꠤ,
ꠀꠘ꠆ꠖꠣꠁꠞ ꠇꠣꠐꠤ ꠎꠣꠞ,
ꠀꠍꠟ ꠘꠥꠞ ꠅꠈꠘ ꠎꠣꠁꠞ ꠅꠞ।
৯ ꠇꠥꠘꠥ ꠝꠣꠘꠡꠦ ꠎꠦꠛꠟꠣ ꠇꠄ,
ꠢꠦ ꠀꠟ꠆ꠟꠣꠁ ꠘꠥꠞꠞ ꠚꠞꠅ ꠀꠍꠦ,
ꠅꠕꠌ ꠔꠣꠞ ꠜꠣꠁꠞꠦ ꠊꠤꠘ꠆ꠘꠣꠄ,
ꠢꠦ ꠀꠍꠟꠦ ꠀꠘ꠆ꠖꠣꠞꠤꠔ ꠞꠁꠍꠦ।
১০ ꠀꠞ ꠎꠦ ꠝꠣꠘꠡꠦ ꠔꠣꠞ ꠜꠣꠁꠞꠦ ꠝꠣꠄꠀ-ꠝꠢꠛ꠆ꠛꠔ ꠇꠞꠦ,
ꠢꠦ ꠘꠥꠞꠞ ꠚꠞꠅ ꠛꠡꠔ ꠇꠞꠦ,
ꠄꠞꠟꠣꠉꠤ ꠢꠦ ꠀꠍꠣꠠ ꠈꠣꠅꠀꠞ ꠒꠞ ꠘꠣꠁ।
১১ ꠅꠁꠟꠦ ꠎꠦꠉꠤꠄ ꠔꠣꠞ ꠜꠣꠁꠞꠦ ꠊꠤꠘ꠆ꠘꠣꠄ,
ꠢꠦ ꠔ ꠀꠘ꠆ꠖꠣꠞꠤꠔ ꠙꠠꠤ ꠞꠁꠍꠦ,
ꠀꠘ꠆ꠖꠣꠞꠤꠞ ꠝꠣꠎꠦ ꠌꠟꠣ-ꠚꠤꠞꠣ ꠇꠞꠦ।
ꠀꠍꠟꠦ ꠀꠘ꠆ꠖꠣꠁꠞꠦ ꠔꠣꠞꠦ ꠀꠘ꠆ꠖꠣ ꠛꠣꠘꠣꠁꠟꠤꠍꠦ,
ꠄꠞꠟꠣꠉꠤ ꠢꠦ ꠎꠣꠘꠦꠃ ꠘꠣ,
ꠢꠦ ꠇꠥꠘ ꠙꠕꠦꠖꠤ ꠎꠣꠞ।
১২ ꠅ ꠍꠣꠛꠣꠟ ꠅꠇꠟ,
ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ,
ꠎꠣꠘꠅ ꠘꠤ,
ꠀꠟ-ꠝꠍꠤꠞ ꠘꠣꠝꠞ ꠈꠣꠔꠤꠞꠦ,
ꠔꠥꠝꠞꠣꠞ ꠔꠣꠝꠣꠝ ꠉꠥꠘꠣ-ꠇꠍꠥꠞꠤ ꠝꠣꠚ ꠇꠞꠣ ꠅꠁꠉꠦꠍꠦ।
১৩ ꠅ ꠛꠣꠚ ꠅꠇꠟ,
ꠀꠝꠤ ꠀꠙꠘꠣꠁꠘ꠆ꠔꠞ ꠉꠦꠍꠦꠅ ꠟꠦꠈꠞꠣꠝ,
ꠙꠄꠟꠣ ꠕꠣꠇꠤꠃ ꠎꠦꠁꠘ ꠀꠍꠂꠘ,
ꠀꠙꠘꠣꠞꠣ ꠔ ꠔꠣꠘꠞꠦ ꠌꠤꠘꠂꠘ।
ꠅ ꠎꠥꠀꠘ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠟꠦꠈꠞꠣꠝ,
ꠁꠛꠟꠤꠍꠞ ꠟꠉꠞ ꠝꠢꠣ-ꠟꠣꠠꠣꠁꠔ ꠔ,
ꠔꠥꠝꠤꠔꠣꠁꠘ ꠎꠤꠔꠤ ꠉꠦꠍ।
১৪ ꠅ ꠢꠥꠞꠥꠔ꠆ꠔꠣ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠟꠦꠈꠟꠣꠝ,
ꠔꠥꠝꠞꠣ ꠔ ꠛꠦꠢꠦꠡ꠆ꠔꠤ ꠛꠣꠚꠞꠦ ꠌꠤꠘꠤꠟꠤꠍ।
ꠅ ꠛꠣꠚ ꠅꠇꠟ,
ꠀꠝꠤ ꠀꠙꠘꠣꠁꠘ꠆ꠔꠞꠦ ꠟꠦꠈꠟꠣꠝ,
ꠀꠙꠘꠣꠞꠣ ꠔ ꠔꠣꠘꠞꠦ ꠌꠤꠘꠤꠟꠤꠍꠂꠘ,
ꠎꠦꠁꠘ ꠢꠇ꠆ꠇꠟꠔꠣꠞ ꠙꠄꠟꠣ ꠕꠣꠇꠤꠃ ꠀꠍꠂꠘ।
ꠅ ꠘꠃꠎꠥꠀꠘ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠟꠦꠈꠟꠣꠝ,
ꠔꠥꠝꠞꠣꠃ ꠛꠟꠛꠣꠘ,
ꠀꠟ꠆ꠟꠣꠞ ꠇꠣꠟꠣꠝ ꠔꠥꠝꠞꠣꠞ ꠖꠤꠟꠅ ꠉꠣꠕꠣ,
ꠁꠛꠟꠤꠍꠞ ꠟꠉꠞ ꠝꠢꠣ-ꠟꠣꠠꠣꠁꠔ ꠔꠥꠝꠞꠣ ꠎꠤꠔꠍ।
১৫ ꠅꠈꠘ ꠈꠤꠀꠟ ꠇꠞꠤ ꠢꠥꠘꠅ,
ꠔꠥꠝꠞꠣ ꠁ ꠖꠥꠘꠤꠀ ꠀꠞ ꠎꠉꠔ-ꠡꠋꠡꠣꠞꠞ ꠇꠥꠘꠥꠔꠣꠞ ꠝꠣꠄꠀꠔ ꠙꠠꠤꠅ ꠘꠣ।
ꠎꠦ ꠝꠣꠘꠥꠡ ꠖꠥꠘꠤꠀꠞ ꠝꠣꠄꠀꠔ ꠙꠠꠤꠎꠣꠄ,
ꠢꠦ ꠔ ꠘꠤꠎꠞ ꠛꠦꠢꠦꠡ꠆ꠔꠤ ꠛꠣꠚꠞꠦ ꠝꠢꠛ꠆ꠛꠔ ꠇꠞꠦ ꠘꠣ।
১৬ ꠎꠣꠘꠅ ꠔ,
ꠖꠥꠘꠤꠀꠔ ꠎꠦꠔꠣ ꠝꠤꠟꠦ,
ꠁꠔꠣ ꠅꠁꠟ,
ꠞꠇ꠆ꠔ-ꠝꠣꠋꠡꠞ ꠈꠣꠁꠡ,
ꠌꠃꠈꠞ ꠟꠥꠜ-ꠟꠣꠟꠌ ꠀꠞ ꠡꠋꠡꠣꠞꠞ ꠛꠣꠢꠣꠖꠥꠞꠤ,
ꠁꠔꠣ ꠇꠥꠘꠥꠐꠣꠃ ꠛꠦꠢꠦꠡ꠆ꠔꠤ ꠛꠣꠚꠞ ꠉꠦꠍ ꠕꠣꠇꠤ ꠀꠄ ꠘꠣ,
ꠈꠣꠟꠤ ꠖꠥꠘꠤꠀ ꠕꠣꠇꠤ ꠀꠄ।
১৭ ꠔꠦ ꠖꠥꠘꠤꠀꠛꠤ ꠎꠉꠔ-ꠡꠋꠡꠣꠞꠞ ꠢꠇ꠆ꠇꠟ ꠛꠣꠢꠣꠖꠥꠞꠤꠞ ꠖꠤꠘ ꠚꠥꠠꠣꠁ ꠎꠣꠞ,
ꠅꠁꠟꠦ ꠎꠦ ꠛꠘ꠆ꠖꠣꠄ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁ ꠌꠟꠦ,
ꠢꠦ ꠔ ꠌꠤꠞꠇꠣꠟ ꠐꠤꠇꠤꠀ ꠞꠁꠛ।
ꠈꠣꠘꠦ-ꠖꠞ꠆ꠎꠣꠟ ꠕꠣꠇꠤ ꠡꠣꠛꠗꠣꠘ
১৮ ꠛꠣꠛꠣ ꠅꠇꠟꠞꠦ,
ꠇꠤꠀꠝꠔ ꠗꠣꠞꠅ ꠀꠁꠌ꠆ꠍꠦ।
ꠔꠦ ꠔꠥꠝꠞꠣ ꠘꠤꠌ꠆ꠌꠄ ꠢꠥꠘꠍ,
ꠈꠣꠘꠦ-ꠖꠞ꠆ꠎꠣꠟ ꠀꠅꠀꠞ ꠡꠝꠄ ꠅꠁꠉꠦꠍꠦ।
ꠀꠞ ꠀꠍꠟ ꠇꠕꠣ ꠅꠁꠟ,
ꠄꠞꠝꠣꠎꠦ ꠛꠃꠔ ꠖꠞ꠆ꠎꠣꠟ ꠀꠁꠀ ꠢꠣꠞꠍꠂꠘ।
ꠅꠔꠣ ꠖꠦꠈꠤꠀ ꠀꠝꠞꠣ ꠛꠥꠎꠤꠀꠞ,
ꠢꠣꠍꠣꠃ ꠇꠤꠀꠝꠔ ꠗꠣꠞꠅ ꠀꠁꠌ꠆ꠍꠦ।
১৯ ꠅꠃ ꠖꠞ꠆ꠎꠣꠟ ꠅꠇꠟ ꠔ ꠀꠝꠞꠣꠞ ꠝꠣꠎ ꠕꠣꠇꠤꠃ ꠛꠣꠞꠅꠁꠍꠂꠘ।
ꠔꠣ-ꠅ ꠄꠞꠣ ꠀꠍꠟꠦ ꠀꠝꠞꠣꠞ ꠔꠞꠤꠇꠣꠔ ꠀꠍꠤꠟ ꠘꠣ,
ꠀꠝꠞꠣꠞ ꠔꠞꠤꠇꠣꠞ ꠅꠁꠟꠦ ꠔ ꠀꠝꠞꠣꠞ ꠟꠉꠦ ꠞꠁꠟ ꠅꠘꠦ।
ꠔꠣꠞꠣ ꠛꠣꠞꠅꠁꠀ ꠉꠦꠍꠦꠉꠤ ꠇꠞꠤꠃ ꠛꠥꠎꠣ ꠎꠣꠄ,
ꠔꠣꠞꠣ ꠇꠦꠃ ꠀꠝꠞꠣꠞ ꠘꠣꠄ।
২০ ꠅꠁꠟꠦ ꠔꠥꠝꠞꠣ ꠔ ꠢꠃ ꠙꠛꠤꠔ꠆ꠞ ꠎꠘꠞ ꠉꠦꠍ ꠕꠣꠇꠤ ꠈꠦꠟꠣꠚꠔꠤ ꠙꠣꠁꠍ ꠀꠞ ꠢꠇꠟꠦꠃ ꠢꠇ ꠀꠈꠟ ꠙꠣꠁꠍ।
২১ ꠔꠥꠝꠞꠣ ꠢꠇꠤꠇꠔꠤ ꠌꠤꠘꠅ ꠘꠣ ꠝꠘꠅ ꠇꠞꠤꠀ ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ ꠘꠤ?
ꠘꠣ,
ꠁꠟꠣ ꠇꠥꠘ꠆ꠔꠣ ꠘꠣꠄ।
ꠀꠍꠟꠦ ꠔꠥꠝꠞꠣ ꠢꠇꠤꠇꠔꠤ ꠌꠤꠘꠅ,
ꠀꠞ ꠢꠇ ꠕꠣꠇꠤ ꠇꠥꠘꠥꠝꠘ꠆ꠔꠦꠃ ꠘꠣ-ꠢꠇ ꠛꠣꠞꠅꠄ ꠘꠣ,
ꠄꠞꠟꠣꠉꠤꠃ ꠔꠥꠝꠞꠣꠞꠦ ꠟꠦꠈꠟꠣꠝ।
২২ ꠢꠎꠞꠔ ꠁꠍꠣꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤ,
ꠁꠈꠣꠘ ꠎꠦꠉꠤꠄ ꠡ꠆ꠛꠤꠇꠣꠞ ꠇꠞꠦ ꠘꠣ,
ꠢꠦ ꠔ ꠘꠤꠌ꠆ꠌꠤꠔ ꠝꠤꠍꠣ ꠝꠣꠔꠞꠣ।
ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠎꠦꠉꠤꠄ ꠅꠡ꠆ꠛꠤꠇꠣꠞ ꠇꠞꠦ,
ꠢꠦ-ꠃ ꠢꠃ ꠖꠞ꠆ꠎꠣꠟ।
২৩ ꠅꠃ ꠝꠣꠄꠀꠞ ꠎꠘꠞꠦ ꠎꠦꠉꠤꠄ ꠅꠡ꠆ꠛꠤꠇꠣꠞ ꠇꠞꠦ,
ꠛꠦꠢꠦꠡ꠆ꠔꠤ ꠛꠣꠚꠞ ꠟꠉꠦ ꠔꠣꠞ ꠇꠥꠘꠥ ꠈꠣꠔꠤꠞ-ꠡꠝ꠆ꠙꠞ꠆ꠇ ꠘꠣꠁ,
ꠀꠞ ꠎꠦ ꠝꠣꠘꠡꠦ ꠝꠣꠄꠀꠞ ꠎꠘꠞꠦ ꠡ꠆ꠛꠤꠇꠣꠞ ꠇꠞꠦ,
ꠔꠣꠞ ꠟꠉꠦ ꠔ ꠛꠦꠢꠦꠡ꠆ꠔꠤ ꠛꠣꠚꠞꠅ ꠈꠣꠔꠤꠞ-ꠡꠝ꠆ꠙꠞ꠆ꠇ ꠀꠍꠦ।
২৪ ꠔꠦ ꠙꠄꠟꠣ ꠕꠣꠇꠤ ꠔꠥꠝꠞꠣ ꠎꠦꠔꠣ ꠢꠥꠘꠤꠀ ꠀꠁꠞꠣꠄ,
ꠁꠔꠣ ꠎꠣꠘꠥ ꠔꠥꠝꠞꠣꠞ ꠖꠤꠟꠅ ꠉꠣꠕꠣ ꠞꠄ।
ꠁꠔꠣ ꠖꠤꠟꠅ ꠞꠁꠟꠦ,
ꠛꠦꠢꠦꠡ꠆ꠔꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠟꠉꠦ ꠔꠥꠝꠞꠣꠅ ꠉꠣꠕꠣ ꠞꠁꠛꠣꠄ।
২৫ ꠀꠞ ꠁꠔꠣꠃ ꠅꠁꠟ ꠢꠃ ꠀꠈꠦꠞꠤ ꠎꠤꠘ꠆ꠖꠦꠉꠤ,
ꠎꠦ ꠎꠤꠘ꠆ꠖꠦꠉꠤ ꠀꠟ-ꠝꠍꠤꠄ ꠀꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ।
২৬ ꠢꠥꠘꠅ,
ꠔꠥꠝꠞꠣꠞꠦ ꠎꠦꠉꠥꠁꠘ꠆ꠔꠦ ꠛꠦ-ꠙꠕꠤ ꠛꠣꠘꠣꠁꠔ ꠌꠣꠄ,
ꠅꠔꠣꠞ ꠙꠞꠤꠌꠄ ꠎꠣꠘꠣꠘꠤꠞ ꠟꠣꠉꠤ ꠀꠝꠤ ꠁꠔꠣ ꠟꠦꠈꠟꠣꠝ।
২৭ ꠀꠍꠟꠦ ꠀꠟ-ꠝꠍꠤ ꠕꠣꠇꠤ ꠔꠥꠝꠞꠣ ꠎꠦ ꠈꠦꠟꠣꠚꠔꠤ ꠙꠣꠁꠍ,
ꠅꠃ ꠈꠦꠟꠣꠚꠔꠤ ꠔ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠦ।
ꠄꠞꠟꠣꠉꠤ ꠖꠥꠍꠞꠣ ꠇꠦꠃꠞꠞ ꠉꠦꠍ ꠕꠣꠇꠤ ꠔꠣꠟꠤꠝ ꠘꠤꠛꠣꠞ ꠇꠥꠘꠥ ꠎꠞꠥꠞ ꠘꠣꠄ,
ꠅꠃ ꠈꠦꠟꠣꠚꠔꠤꠞ ꠞꠥꠢꠦ ꠔꠥꠝꠞꠣꠞꠦ ꠖꠞꠇꠣꠞꠤ ꠢꠇꠟꠔꠣ ꠢꠤꠇꠣꠁꠛꠣ।
ꠔꠣꠁꠘ ꠔ ꠢꠇ,
ꠔꠣꠘ ꠝꠣꠎꠦ ꠘꠣ-ꠢꠇ ꠇꠥꠘ꠆ꠔꠣ ꠘꠣꠁ।
ꠅꠈꠘ ꠀꠟ-ꠝꠍꠤꠞ ꠝꠣꠎꠦ ꠛꠡꠔ ꠇꠞꠣꠞ ꠟꠣꠉꠤ ꠔꠣꠁꠘ ꠎꠦꠟꠣ ꠔꠣꠟꠤꠝ ꠖꠤꠍꠂꠘ,
ꠔꠥꠝꠞꠣ ꠑꠤꠇ ꠅꠃꠟꠣ ꠞꠅ।
ꠀꠟ꠆ꠟꠣꠞ ꠘꠥꠞꠞ ꠀꠅꠟꠣꠖ ꠛꠘꠤꠀ ꠘꠦꠇꠤꠞ ꠀꠡꠤꠇ ꠅꠅ