ꠈꠣꠘꠦ-ꠖꠞ꠆ꠎꠣꠟ ꠕꠣꠇꠤ ꠢꠤꠞꠛꠣꠞ ꠡꠣꠛꠗꠣꠘ
৪
১ ꠅ ꠡꠥꠘꠣ ꠅꠇꠟ,
ꠖꠥꠘꠤꠀꠔ ꠛꠃꠔ ꠜꠘ꠆ꠒ ꠘꠛꠤ ꠛꠣꠞꠅꠁꠍꠂꠘ।
ꠄꠞꠟꠣꠉꠤ ꠇꠦꠃ ꠎꠥꠖꠤ ꠀꠁꠀ ꠇꠄ,
ꠀꠝꠤ ꠞꠥꠢꠥꠞ ꠛꠟꠦ ꠝꠣꠔꠤꠞꠣꠝ,
ꠔꠦ ꠔꠥꠝꠞꠣ ꠎꠟꠖꠤ ꠛꠤꠡ꠆ꠛꠣꠡ ꠇꠞꠤꠅ ꠘꠣ,
ꠛꠞꠋ ꠎꠣꠌꠣꠁ ꠇꠞꠤꠀ ꠖꠦꠈꠅ,
ꠁ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ ꠇꠤ ꠘꠣ।
২ ꠀꠟ꠆ꠟꠣꠁ ꠞꠥꠢꠥꠞꠦ ꠌꠤꠘꠣꠞ ꠘꠤꠅꠝ ꠅꠁꠟ,
ꠎꠦ ꠞꠥꠢꠦ ꠡ꠆ꠛꠤꠇꠣꠞ ꠇꠞꠦ ꠝꠣꠘꠥꠡ ꠍꠥꠞꠔꠦ ꠁꠍꠣ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠍꠂꠘ,
ꠅꠃ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ।
৩ ꠅꠁꠟꠦ ꠎꠦ ꠞꠥꠢꠦ ꠅꠃ ꠁꠍꠣꠞꠦ ꠡ꠆ꠛꠤꠇꠣꠞ ꠇꠞꠦ ꠘꠣ,
ꠁ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ।
ꠁꠔꠣ ꠅꠁꠟ ꠈꠣꠘꠦ-ꠖꠞ꠆ꠎꠣꠟꠞ ꠞꠥꠢꠥ,
ꠅꠃ ꠖꠞ꠆ꠎꠣꠟꠞ ꠞꠥꠢꠥ ꠀꠁꠛꠣꠞ ꠇꠕꠣ ꠔꠥꠝꠞꠣ ꠀꠉꠦ ꠢꠥꠘꠍ,
ꠀꠞ ꠅꠈꠘꠅ ꠢꠦ ꠅꠃ ꠎꠉꠔꠅ ꠀꠍꠦ।
৪ ꠅꠁꠟꠦ ꠅ ꠍꠣꠛꠣꠟ ꠅꠇꠟ,
ꠔꠥꠝꠞꠣ ꠔ ꠀꠟ꠆ꠟꠣꠞ ꠝꠣꠘꠥꠡ,
ꠢꠃ ꠜꠘ꠆ꠒ ꠅꠇꠟꠞ ꠃꠙꠞꠦ ꠔꠥꠝꠞꠣ ꠎꠤꠔꠤꠍ।
ꠔꠥꠝꠞꠣꠞ ꠖꠤꠟꠅ ꠎꠦ ꠞꠥꠢꠥ ꠀꠍꠂꠘ,
ꠄꠁꠘ ꠔ ꠁ ꠎꠉꠔꠞ ꠞꠥꠢꠥ ꠕꠣꠇꠤ ꠛꠃꠔ ꠝꠢꠣꠘ।
৫ ꠀꠍꠟꠦ ꠅꠃ ꠜꠘ꠆ꠒ ꠅꠇꠟ ꠔ ꠅꠃ ꠎꠉꠔꠞ,
ꠄꠞꠟꠣꠉꠤ ꠔꠣꠞꠣ ꠈꠣꠟꠤ ꠎꠉꠔꠞ ꠛꠥꠟꠤ ꠛꠥꠟꠦ,
ꠀꠞ ꠎꠉꠔꠦꠅ ꠔꠣꠞꠣꠞ ꠛꠥꠟꠤ ꠝꠣꠘꠦ।
৬ ꠀꠞ ꠀꠝꠞꠣ ꠅꠁꠟꠣꠝ ꠀꠟ꠆ꠟꠣꠞ ꠝꠣꠘꠥꠡ।
ꠀꠟ꠆ꠟꠣꠞꠦ ꠎꠦꠞꠣ ꠌꠤꠘꠦ,
ꠔꠣꠞꠣ ꠀꠝꠞꠣꠞ ꠛꠥꠟꠤ ꠝꠣꠘꠦ।
ꠅꠁꠟꠦ ꠎꠦꠞꠣ ꠀꠟ꠆ꠟꠣꠞ ꠘꠣꠄ,
ꠔꠣꠞꠣ ꠀꠝꠞꠣꠞ ꠇꠕꠣ ꠢꠥꠘꠦ ꠘꠣ।
ꠅꠃ ꠘꠝꠥꠘꠣꠄ ꠀꠝꠞꠣ ꠗꠥꠇꠣꠛꠣꠎ ꠞꠥꠢꠥ ꠀꠞ ꠀꠟ꠆ꠟꠣꠁ ꠢꠇ ꠞꠥꠢꠥꠞꠦ ꠌꠤꠘꠤ।
ꠀꠟ꠆ꠟꠣ ꠘꠤꠎꠦꠃ ꠝꠢꠛ꠆ꠛꠔ, ꠔꠦ ꠝꠢꠛ꠆ꠛꠔꠦ ꠌꠟꠅ
৭ ꠅ ꠡꠥꠘꠣ ꠅꠇꠟ,
ꠀꠟ꠆ꠟꠣꠞ ꠖꠦꠅꠀ ꠖꠣꠘ ꠅꠁꠟ ꠝꠢꠛ꠆ꠛꠔ,
ꠄꠞꠟꠣꠉꠤ ꠀꠝꠞꠣ ꠎꠣꠘꠥ ꠄꠇꠦ-ꠅꠁꠘ꠆ꠘꠦ ꠝꠢꠛ꠆ꠛꠔ ꠇꠞꠤ।
ꠎꠦ ꠛꠘ꠆ꠖꠣꠞ ꠖꠤꠟꠅ ꠝꠢꠛ꠆ꠛꠔ ꠀꠍꠦ,
ꠔꠣꠞ ꠎꠘꠝ ꠅꠁꠍꠦ ꠀꠟ꠆ꠟꠣꠞ ꠘꠥꠞ ꠕꠣꠇꠤ,
ꠢꠦ ꠀꠟ꠆ꠟꠣ ꠙꠣꠇꠞꠦ ꠌꠤꠘꠦ।
৮ ꠀꠞ ꠎꠦꠉꠥꠞ ꠜꠤꠔꠞꠦ ꠝꠢꠛ꠆ꠛꠔ ꠘꠣꠁ,
ꠢꠦ ꠔ ꠀꠟ꠆ꠟꠣ ꠙꠣꠇꠞꠦ ꠌꠤꠘꠦ ꠘꠣ,
ꠇꠣꠞꠘ ꠀꠟ꠆ꠟꠣ ꠘꠤꠎꠦꠃ ꠔ ꠝꠢꠛ꠆ꠛꠔ।
৯ ꠀꠟ꠆ꠟꠣ ꠙꠣꠇꠞ ꠝꠢꠛ꠆ꠛꠔ ꠀꠝꠞꠣꠞ ꠝꠣꠎꠦ ꠅꠃ ꠘꠝꠥꠘꠣꠄ ꠎꠣꠁꠞ ꠅꠁꠍꠦ,
ꠔꠣꠁꠘ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠅꠃ ꠖꠥꠘꠤꠀꠔ ꠛꠦꠎꠤꠍꠂꠘ,
ꠎꠣꠔꠦ ꠄꠘ ꠃꠍꠤꠟ꠆ꠟꠣꠄ ꠀꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠔꠣꠝ ꠙꠣꠞꠤ।
১০ ꠀꠞ ꠀꠝꠞꠣ ꠎꠦꠘ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠍꠟꠣꠝ ꠁꠟꠣ ꠇꠥꠘ꠆ꠔꠣ ꠘꠣꠄ,
ꠛꠞꠋ ꠔꠣꠁꠘ ꠘꠤꠎꠦꠃ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠤꠀ,
ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠅꠁꠛꠣꠞ ꠟꠣꠉꠤ,
ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠎꠉꠔꠅ ꠙꠣꠑꠣꠁ ꠖꠤꠟꠣ,
ꠅꠇꠐꠣꠞꠦꠃ ꠇꠄ ꠝꠢꠛ꠆ꠛꠔ।
১১ ꠅ ꠡꠥꠘꠣ ꠅꠇꠟ,
ꠀꠟ꠆ꠟꠣ ꠙꠣꠇꠦ ꠎꠦꠛꠟꠣ ꠀꠝꠞꠣꠞꠦ ꠅꠟꠣ ꠝꠢꠛ꠆ꠛꠔ ꠇꠞꠟꠣ,
ꠔꠦ ꠀꠝꠞꠣꠞ ꠟꠣꠉꠤꠅ ꠎꠞꠥꠞ ꠅꠁꠟ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠣ।
১২ ꠀꠟ꠆ꠟꠣꠞꠦ ꠔ ꠇꠦꠃ ꠇꠥꠘꠥꠖꠤꠘ ꠖꠦꠈꠍꠦ ꠘꠣ।
ꠅꠈꠘ ꠀꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠤ,
ꠔꠦ ꠛꠥꠎꠣ ꠎꠣꠁꠛ,
ꠔꠣꠁꠘ ꠀꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ,
ꠔꠣꠘ ꠝꠢꠛ꠆ꠛꠔꠦ ꠀꠝꠞꠣꠞ ꠖꠤꠟꠅ ꠙꠥꠞꠣꠙꠥꠞ ꠚꠟ ꠗꠞꠍꠦ।
১৩ ꠀꠝꠞꠣꠞꠦ ꠔꠣꠘ ꠞꠥꠢꠥ ꠝꠥꠛꠣꠞꠇ ꠖꠣꠘ ꠇꠞꠍꠂꠘ,
ꠄꠞꠟꠣꠉꠤ ꠛꠥꠎꠞꠣꠝ,
ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ,
ꠀꠞ ꠔꠣꠁꠘꠅ ꠀꠝꠞꠣꠞ ꠝꠣꠎꠦ ꠛꠡꠔ ꠇꠞꠂꠘ।
১৪ ꠀꠝꠞꠣ ꠘꠤꠎꠦ ꠖꠦꠈꠍꠤ,
ꠖꠦꠈꠤꠀ ꠢꠣꠞꠤ ꠅꠃ ꠡꠣꠇ꠆ꠇꠤ ꠖꠤꠞꠣꠝ,
ꠎꠉꠔꠞ ꠔꠞꠣꠘꠦꠀꠟꠣ ꠇꠣꠘ꠆ꠒꠣꠞꠤ ꠢꠤꠡꠣꠛꠦ,
ꠉꠣꠁꠛꠤ ꠛꠣꠚꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠛꠦꠎꠤꠍꠂꠘ।
১৫ ꠄꠞꠟꠣꠉꠤ ꠎꠦ ꠎꠘꠦ ꠡ꠆ꠛꠤꠇꠣꠞ ꠇꠞꠦ,
ꠢꠎꠞꠔ ꠁꠍꠣꠞ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠔꠣꠞ ꠖꠤꠟꠅ ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇ ꠛꠡꠔ ꠇꠞꠂꠘ,
ꠀꠞ ꠢꠦ-ꠅ ꠀꠟ꠆ꠟꠣꠞ ꠝꠣꠎꠦ ꠛꠡꠔ ꠇꠞꠦ।
১৬ ꠀꠝꠞꠣꠞ ꠟꠉꠦ ꠀꠟ꠆ꠟꠣꠞ ꠎꠦ ꠝꠢꠛ꠆ꠛꠔ ꠀꠍꠦ,
ꠁꠈꠣꠘ ꠀꠝꠞꠣ ꠎꠣꠘꠤ,
ꠎꠣꠘꠤꠀ ꠄꠇꠤꠘꠅ ꠇꠞꠤ।
ꠀꠍꠟꠦ ꠀꠟ꠆ꠟꠣ ꠘꠤꠎꠦꠃ ꠝꠢꠛ꠆ꠛꠔ।
ꠝꠢꠛ꠆ꠛꠔꠞ ꠝꠣꠎꠦ ꠎꠦ ꠛꠘ꠆ꠖꠣ ꠛꠡꠔ ꠇꠞꠦ,
ꠢꠦ ꠀꠟ꠆ꠟꠣꠞ ꠝꠣꠎꠦꠃ ꠛꠡꠔ ꠇꠞꠦ,
ꠀꠞ ꠀꠟ꠆ꠟꠣ ꠙꠣꠇꠅ ꠔꠣꠞ ꠝꠣꠎꠦ ꠛꠡꠔ ꠇꠞꠂꠘ।
১৭ ꠅꠃ ꠘꠝꠥꠘꠣꠄ ꠝꠢꠛ꠆ꠛꠔ ꠀꠝꠞꠣꠞ ꠖꠤꠟꠞ ꠝꠣꠎꠦ ꠙꠥꠞꠣꠙꠥꠞ ꠚꠟꠀꠟꠣ ꠅꠄ।
ꠔꠦꠃ ꠇꠤꠀꠝꠔꠞ ꠖꠤꠘ ꠀꠝꠞꠣ ꠡꠣꠅꠡꠤ ꠛꠘꠤ,
ꠇꠣꠞꠘ ꠅꠃ ꠎꠉꠔꠅ ꠀꠝꠞꠣ ꠔꠣꠘ ꠞꠋꠉꠦ ꠞꠋꠉꠤ ꠉꠦꠍꠤ।
১৮ ꠝꠢꠛ꠆ꠛꠔꠞ ꠝꠣꠎꠦ ꠇꠥꠘꠥ ꠒꠞ-ꠜꠄ ꠘꠣꠁ,
ꠡꠥꠟ꠆ꠟꠀꠘꠣ ꠝꠢꠛ꠆ꠛꠔꠦ ꠛꠞꠋ ꠒꠞ-ꠜꠄꠞꠦ ꠈꠦꠖꠣꠁ ꠖꠦꠄ।
ꠒꠞ-ꠜꠄꠞ ꠝꠣꠎꠦ ꠔ ꠡꠣꠎꠣ ꠙꠣꠅꠀꠞ ꠜꠣꠛ-ꠡꠣꠛ ꠀꠍꠦ,
ꠄꠞꠟꠣꠉꠤ ꠒꠞ-ꠜꠄ ꠎꠣꠞ ꠜꠤꠔꠞꠦ,
ꠢꠦ ꠝꠢꠛ꠆ꠛꠔꠞ ꠡꠥꠟ꠆ꠟꠀꠘꠣ ꠚꠟ ꠗꠞꠍꠦ ꠘꠣ।
১৯ ꠔꠦ ꠀꠝꠞꠣ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠤ,
ꠇꠣꠞꠘ ꠔꠣꠁꠘ ꠀꠝꠞꠣꠞꠦ ꠙꠄꠟꠣ ꠝꠢꠛ꠆ꠛꠔ ꠇꠞꠍꠂꠘ।
২০ ꠀꠞ ꠎꠦ ꠝꠣꠘꠡꠦ ꠇꠄ,
ꠢꠦ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠦ,
ꠇꠁꠀ ꠔꠣꠞ ꠝꠥꠝꠤꠘ ꠜꠣꠁꠞꠦ ꠊꠤꠘ꠆ꠘꠣꠄ,
ꠢꠦ ꠔ ꠝꠤꠍꠣ ꠝꠣꠔꠞꠣ।
ꠇꠣꠞꠘ ꠘꠤꠎꠞ ꠌꠃꠈꠦ ꠖꠦꠈꠣ ꠜꠣꠁꠞꠦ ꠎꠦꠉꠤꠄ ꠝꠢꠛ꠆ꠛꠔ ꠇꠞꠦ ꠘꠣ,
ꠀ-ꠖꠦꠈꠣ ꠀꠟ꠆ꠟꠣꠞꠦ ꠇꠤꠟꠣ ꠝꠢꠛ꠆ꠛꠔ ꠇꠞꠛ?
২১ ꠀꠝꠞꠣ ꠔ ꠔꠣꠘ ꠉꠦꠍ ꠕꠣꠇꠤ ꠅꠃ ꠢꠥꠇꠥꠝ ꠙꠣꠁꠍꠤ,
ꠎꠦ ꠛꠘ꠆ꠖꠣꠄ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠦ,
ꠢꠦ ꠎꠣꠘꠥ ꠔꠣꠞ ꠜꠣꠁꠞꠦꠅ ꠝꠢꠛ꠆ꠛꠔ ꠇꠞꠦ।