جَيَّانْ الحُكَمَاءْ
2
1 وَقْتِلِّي تُولِدْ يَسُوعْ فِي بِيتْ لَحْمْ الِّي فِي مَنْطِقْةْ اليَهُودِيَّة، فِي وَقْتْ المَلِكْ هِيرُودُسْ، جَاوْ جْمَاعَة حُكَمَاءْ مِالشَّرقْ لْأُورْشَلِيمْ. 2 وْقَالُوا: «وِينُو مَلِكْ اليْهُودْ الِّي تُولِدْ؟ رَانَا شُفْنَا النِّجْمَة مْتَاعُو ظُهْرِتْ فِي الشَّرْقْ، يَاخِي جِينَا بَاشْ نِسْجْدُولُو.» 3 وْكِسْمَعْ المَلِكْ هِيرُودُسْ الشَّيْء هَاذَا، تْقَلِّقْ هُوَ وْأُورْشَلِيمْ الكُلْهَا. 4 وْلَمْ رُؤَسَاءْ الكُهَّانْ وِالكُتَّابْ مْتَاعْ اليْهُودْ لْكُلْهُمْ وِسْإِلْهُمْ عْلَى البْلاَصَة الِّي يِتْوْلِدْ فِيهَا المَسِيحْ. 5 جَاوْبُوهْ: «فِي بِيتْ لَحْمْ الِّي فِي مَنْطِقْةْ اليَهُودِيَّة، عْلَى خَاطِرْ هَاذَا الِّي كِتْبُو النَّبِي فِي الكْتَابْ:6 وْإِنْتِ يَا بِيتْ لَحْمْ الِّي فِي أَرْضْ يَهُوذَا،
مَاكِشْ أَصْغِرْ وَحْدَة فِي مُدُنْ يَهُوذَا،
بَاشْ يُخْرِجْ مِنِّكْ رَئِيسْ،
يَرْعَى شَعْبِي إِسْرَائِيلْ.»
7 وَلَّى عَيِّطْ هِيرُودُسْ لِلحُكَمَاءْ مِنْ غِيرْ مَا يِسْمَعْ حَدْ وْثَبِّتْ مِنْهُمْ عْلَى الوَقْتْ الِّي ظُهْرِتْ فِيهْ النِّجْمَة، 8 وِمْبَاعِدْ بْعَثْهُمْ لْبِيتْ لَحْمْ وْقَالِلْهُمْ: «إِمْشِيوْ وْلَوّْجُوا عْلَى الطْفُلْ. وْكِتَلْقَاوْهْ، إِيجَاوْ وْخَبّْرُونِي بَاشْ آنَا زَادَا نِمْشِي وْنُسْجُدْلُو.»
9 بَعْدْ مَا سَمْعُوا كْلاَمْ المَلِكْ مْشَاوْ. وْوَقْتِلِّي هُومَا فِي الطْرِيقْ إِذَا بِيهَا النِّجْمَة الِّي شَافُوهَا قْبَلْ فِي الشَّرْقْ قَاعْدَة تِمْشِي قُدَّامْهُمْ حَتَّى لِينْ وُصْلِتْ وْوُقْفِتْ فُوقْ البْلاَصَة الِّي فِيهَا الطْفُلْ. 10 وْوَقْتِلِّي شَافُوا النِّجْمَة فَرْحُوا بَرْشَة، 11 وْدُخْلُوا لِلدَّارْ وِلْقُوا الطْفُلْ مْعَ أُمُّو مَرْيَمْ. يَاخِي هُبْطُوا عْلَى رْكَايِبْهُمْ وْسِجْدُولُو، وْحَلُّوا شْكَايِرْهُمْ وِهْدُولُو ذْهَبْ وِبْخُورْ وْمُرْ. 12 وْنَبِّهْهُمْ رَبِّي فِي الحِلْمْ بَاشْ مَا يَرْجْعُوشْ لْهِيرُودُسْ، وَلاَّوْ جَابُوا طْرِيقْ آخَرْ وْرَوّْحُوا لبْلاَدْهُمْ.
الهْرُوبْ لْمَصْرْ
13 وْبَعْدْ مَا رَوّْحُوا الحُكَمَاءْ، ظْهُرْ مَلاَكْ الرَّبْ لْيُوسُفْ فِي الحِلْمْ وْقَالُّو: «قُومْ! هِزْ الطْفُلْ وْأُمُّو وْأُهْرُبْ لْمَصْرْ وْأَبْقَى لْغَادِي، حَتَّى لِينْ نْقُلِّكْ وَقْتَاشْ تَرْجَعْ، عْلَى خَاطِرْ هِيرُودُسْ بَاشْ يْلَوِّجْ عْلَى الطْفُلْ وْيُقْتْلُو.» 14 يَاخِي قَامْ يُوسُفْ وْهَزْ الطْفُلْ وْأُمُّو فِي اللِّيلْ وِمْشَى لْمَصْرْ. 15 وِسْكِنْ فِيهَا حَتَّى لِينْ مَاتْ هِيرُودُسْ، بَاشْ يْتِمْ الشَّيْء الِّي قَالُو الرَّبْ عْلَى لْسَانْ النَّبِي: «مِنْ مَصْرْ نَادِيتْ ابْنِي.»
قَتْلاَنْ الصْغَارْ فِي بِيتْ لَحْمْ
16 وْوَقْتِلِّي شَافْ هِيرُودُسْ الِّي الحُكَمَاءْ تْمَسْخْرُوا عْلِيهْ، تْغَشِشْ بَرْشَة وِأْمَرْ بْقَتْلاَنْ الصْغَارْ الكُلْ فِي بِيتْ لَحْمْ وْفِي البْلاَيِصْ الِّي دَايْرَة بِيهَا مِلِّي عْمُرْهُمْ عَامِينْ وْأَقَلْ، بْحَسْبْ الوَقْتْ الِّي قَالُولُو عْلِيهْ الحُكَمَاءْ. 17 يَاخِي تَمْ الشَّيْء الِّي قَالُو النَّبِي إِرْمِيَا:
18 «فِي الرَّامَة سَمْعُوا صْيَاحْ،
وْبَرْشَة بْكَاءْ وِنْوَاحْ،
رَاحِيلْ تِبْكِي عْلَى وْلاَدْهَا
وْمَا تْحِبِّشْ تِقْبِلْ العْزَاء
وْهُومَا مُوشْ هْنَا.»
الرْجُوعْ مِنْ مَصْرْ لِلنَّاصْرَة
19 وْوَقْتِلِّي مَاتْ هِيرُودُسْ ظْهُرْ مَلاَكْ الرَّبْ لْيُوسُفْ فِي الحِلْمْ، وَقْتِلِّي هُوَ فِي مَصْرْ، 20 وْقَالُّو: «قُومْ! هِزْ الطْفُلْ وْأُمُّو وْأَرْجِعْ لْأَرْضْ إِسْرَائِيلْ، عْلَى خَاطِرْ الِّي حَبُّوا يُقْتْلُوهْ مَاتُوا.» 21 يَاخِي قَامْ وْهَزْ الطْفُلْ وْأُمُّو وِرْجَعْ لْأَرْضْ إِسْرَائِيلْ. 22 آمَا كِسْمَعْ الِّي أَرْخِيلاَوُسْ وَلَّى مَلِكْ عْلَى اليَهُودِيَّة فِي بْلاَصِةْ بُوهْ هِيرُودُسْ، خَافْ بَاشْ يِمْشِيلْهَا. يَاخِي نَبّْهُو اللهْ فِي الحِلْمْ، وَلَّى مْشَى لْمَنْطِقْةْ الجَلِيلْ. 23 وِمْشَى لِمْدِينَة إِسْمْهَا النَّاصْرَة وِسْكِنْ فِيهَا بَاشْ يْتِمْ الِّي قَالُوهْ الأَنْبِيَاءْ: «بَاشْ يِتْسَمَّى نَاصْرِي.»