بْلِيسْ يْجَرَّبْ يَسُوعْ
(مَرْقُسْ 1:12-13؛ لُوقَا 4:1-13)
4
1 وْهَزْ الرُّوحْ القُدُسْ يَسُوعْ لِلخْلاَء بَاشْ بْلِيسْ يْجَرّْبُو. 2 يَاخِي صَامْ أَرْبْعِينْ يُومْ وْأَرْبْعِينْ لِيلَة حَتَّى لِينْ جَاعْ. 3 قْرُبْلُو الِّي بَاشْ يْجَرّْبُو وْقَالُّو: «إِذَا كَانْ إِنْتِ إِبْنْ اللهْ، قُولْ لِلحْجَرْ هَاذَا يْوَلِّي خُبْزْ.» 4 جَاوْبُو يَسُوعْ: «يْقُولْ الكْتَابْ المُقَدَّسْ:مُوشْ بِالخُبْزْ بَرْكْ الإِنْسَانْ يْعِيشْ،
آمَا بْكُلْ كِلْمَة تُخْرُجْ مِنْ عِنْدْ اللهْ.»
5 وْهَزُّو بْلِيسْ لِلمْدِينَة المُقَدّْسَة، وْوَقّْفُو عْلَى حَرْفْ السْطَحْ مْتَاعْ الهَيْكِلْ، 6 وْقَالُّو: «كَانِكْ إِنْتِ إِبْنْ اللهْ ارْمِي رُوحِكْ الُّوطَا، عْلَى خَاطِرْ مَكْتُوبْ فِي الكْتَابْ المُقَدَّسْ:
يْوَصِّي عْلِيكْ مْلاَيِكْتُو،
بِينْ يْدِيهُمْ يْهِزُّوكْ
بَاشْ مَا تِتْضْرَبْشْ فِي حَجْرَة رِجْلِكْ.»
7 جَاوْبُو يَسُوعْ: «مَكْتُوبْ زَادَا: "مَا تْجَرِّبْشْ الرَّبْ إِلاَهِكْ."» 8 زَادْ هَزُّو بْلِيسْ وْحَطُّو فُوقْ جْبَلْ عَالِي بَرْشَة، وْوَرَّاهْ المَمَالِكْ مْتَاعْ الدِّنْيَا الكُلْهَا وِالمَجْدْ الِّي فِيهُمْ، 9 وْقَالُّو: «نَعْطِيكْ الشَّيْء هَاذَا الكُلُّو، إِذَا كَانْ تَهْبِطْ عْلَى رْكَايْبِكْ وْتُسْجُدْلِي.» 10 يَاخِي جَاوْبُو يَسُوعْ: «إِبْعِدْ عْلِيَّ يَا شِيطَانْ! عْلَى خَاطِرْ مَكْتُوبْ فِي الكْتَابْ المُقَدَّسْ،
الرَّبْ إِلاَهِكْ وَحْدُو تُسْجُدْلُو،
وْهُوَ وَحْدُو تِعْبْدُو.»
11 وْخَلاَّهْ بْلِيسْ وِمْشَى، وْجَاتْ المْلاَيْكَة وِبْدَاتْ تِخْدِمْ فِيهْ.
يَسُوعْ يْبَشِّرْ فِي الجَلِيلْ
(مَرْقُسْ 1:14-15؛ لُوقَا 4:14-15)
12 وْكِسْمَعْ يَسُوعْ الِّي يُوحَنَّا تْشَدْ رْجَعْ لْمَنْطِقْةْ الجَلِيلْ. 13 وِخْرَجْ مِالنَّاصْرَة وِمْشَى وِسْكِنْ فِي كَفْرْنَاحُومْ الِّي عْلَى البْحَرْ فِي الحَدْ مْتَاعْ مَنْطِقْةْ زَبُولُونْ وْنَفْتَالِي، 14 بَاشْ يْتِمْ الشَّيْء الِّي قَالُو النَّبِي إِشَعْيَاءْ:
15 أَرْضْ نَفْتَالِي وْأَرْضْ زَبُولُونْ،
عْلَى البْحَرْعْلَى طْرِيقْ الأُرْدُنْ،
الجَلِيلْ، أَرْضْ الشْعُوبْ الأُخْرِينْ!
16 الشَّعْبْ الِّي قَاعِدْ فِي الظْلاَمْ،
شَافْ نُورْ عْظِيمْ،
وِلِّي فِي ظُلْ أَرْضْ المُوتْ قَاعْدِينْ،
النُّورْ ضْوَى عْلِيهُمْ.
17 وْمِالوَقْتْ هَاذَاكَا بْدَا يَسُوعْ يْبَشِّرْ وِيْقُولْ: «تُوبُوا، رَاهِي مَمْلِكْةْ السْمَاوَاتْ قُرْبِتْ.»
يَسُوعْ يْنَادِي التْلاَمْذَة اللْوَالَى
(مَرْقُسْ 1:16-20؛ لُوقَا 5:1-11)
18 وْكِكَانْ يَسُوعْ يِمْشِي عْلَى شَطْ البُحَيْرَة مْتَاعْ الجَلِيلْ، شَافْ زُوزْ إِخْوَة هُومَا سِمْعَانْ الِّي يْعَيّْطُولُو بُطْرُسْ وْخُوهْ أَنْدَرَاوُسْ يَرْمِيوْ فِي الشْبَاكْ فِي البُحَيْرَة، عْلَى خَاطِرْهُمْ كَانُوا صَيَّادَا. 19 وْقَالِلْهُمْ: «تَبّْعُونِي وْآنَا بَاشْ نْرُدْكُمْ صَيَّادَا مْتَاعْ نَاسْ.» 20 وْبِالوَقْتْ خَلاَّوْ الشْبَاكْ مْتَاعْهُمْ وْتَبّْعُوهْ. 21 وْهُوَ مَاشِي مِالغَادِي شَافْ زُوزْ إِخْوَة أُخْرِينْ: يَعْقُوبْ وِلْدْ زَبَدِي وْخُوهْ يُوحَنَّا، فِي الفْلُوكَة مْعَ بُوهُمْ زَبَدِي يْصَلّْحُوا فِي الشْبَاكْ، وَلَّى نَادَالْهُمْ. 22 وْبِالوَقْتْ خَلاَّوْ بُوهُمْ فِي الفْلُوكَة وْتَبّْعُوهْ.
يَسُوعْ يْعَلِّمْ وِيْبَشِّرْ وْيِشْفِي المُرْضَى
(لُوقَا 6:17-19)
23 وْدَارْ يَسُوعْ فِي مَنْطِقْةْ الجَلِيلْ الكُلْهَا يْعَلِّمْ فِي المَجَامِعْ مْتَاعْهُمْ، وِيْبَشِّرْ بِالإِنْجِيلْ مْتَاعْ مَمْلِكْةْ اللهْ وْيِشْفِي فِي النَّاسْ مِالأَمْرَاضْ وِالوْجَايِعْ الكُلْهَا. 24 وْتِنْشَرْ خَبْرُو فِي سُورْيَة الكُلْهَا. وْجَابُولُو المُرْضَى وِلِّي تِعْدُوا ابَّرْشَة أَنْوَاعْ مْتَاعْ أَمْرَاضْ وِوْجَايِعْ، وِلِّي سَاكْنِتْهُمْ الشْوَاطِنْ وِالمَصْرُوعِينْ وِالمَشْلُولِينْ، يَاخِي شْفَاهُمْ. 25 وْتَبّْعُوهْ بَرْشَة نَاسْ مِنْ الجَلِيلْ وِالمَنْطْقَة الِّي تِتْسَمَّى العَشْرَة مُدُنْ وْأُورْشَلِيمْ وِاليَهُودِيَّة وِالمَنْطْقَة الِّي فِي الجِيهَة الأُخْرَى مْتَاعْ الأُرْدُنْ.