الوْلاَدَة مْتَاعْ يَسُوعْ المَسِيحْ
(مَتَّى 1:18-25)
2
1 وْفِي الأَيَّامَاتْ هَاذُوكُمْ أْمَرْ القَيْصِرْ أُغُسْطُسْ بَاشْ يْعِدُّوا السُّكَّانْ مْتَاعْ الإِمْبْرَاطُورِيَّة. 2 وْهَاذَا كَانْ أَوِّلْ عَدَّانْ يَاقَعْ فِي زْمَانْ كِيرِينْيُوسْ الوَالِي مْتَاعْ سُورْيَة. 3 وِمْشَاوْ النَّاسْ الكُلْ بَاشْ يْسَجّْلُوا أَسَامِيهُمْ، كُلْ وَاحِدْ فِي بْلاَدُو. 4 وِمْشَى يُوسُفْ زَادَا مِنْ مْدِينِةْ النَّاصْرَة المُوجُودَة فِي مَنْطِقْةْ الجَلِيلْ لِمْدِينِةْ دَاوُدْ الِّي تِتْسَمَّى بِيتْ لَحْمْ المُوجُودَة فِي مَنْطِقْةْ اليَهُودِيَّة عْلَى خَاطْرُو كَانْ مِنْ ذُرِّيِّةْ دَاوُدْ. 5 بَاشْ يِتْسَجِّلْ غَادِي هُوَ وْخَطِيبْتُو مَرْيَمْ الِّي كَانِتْ حِبْلَى. 6 وَقْتِلِّي كَانُوا مُوجُودِينْ الغَادِي جَا وَقْتْهَا بَاشْ تُولِدْ. 7 وْجَابِتْ وِلْدْهَا الأُوِّلْ وْقَمّْطِتُّو وْرَقّْدِتُّو فِي كُورِي عْلَى خَاطِرْ مَا كَانِشْ ثَمَّة بُقْعَة فَاضْيَة فِي الوْكَالَة.السُّرَّاحْ وِالمْلاَيْكَة
8 وْكَانُوا ثَمَّة سُرَّاحْ فِي المَنْطْقَة هَاذِيكَا يْبَاتُوا البَرَّة فِي اللِّيلْ وْكَانُوا يْعِسُّوا عْلَى الغْنَمْ. 9 وْإِذَا بْمَلاَكْ مِنْ عِنْدْ الرَّبْ ظْهَرِّلْهُمْ، وْمَجْدْ الرَّبْ ضْوَى عْلِيهُمْ، يَاخِي خَافُوا بَرْشَة. 10 وْقَالِلْهُمْ المَلاَكْ: «مَا تْخَافُوشْ! هَانِي نْبَشِّرْكُمْ بْفَرْحَة كْبِيرَة تْكُونْ لِلشَّعْبْ الكُلُّو 11 رَاهُو تِوْلِدِّلْكُمْ اليُومْ مُخَلِّصْ فِي مْدِينِةْ دَاوُدْ هُوَ المَسِيحْ الرَّبْ 12 وْبِشْ تْكُونِلْكُمْ العَلاَمَة هَاذِي: تَلْقَاوْ طْفُلْ مَلْفُوفْ بِقْمَاطَة وْرَاقِدْ فِي كُورِي.»
13 وْجَا مْعَ المَلاَكْ هَاذَاكَا جَيْشْ كْبِيرْ مِالمْلاَيْكَة مْتَاعْ السْمَاءْ يْسَبّْحُوا فِي اللهْ وِيْقُولُوا:
14 «المَجْدْ للهْ فِي السْمَاءْ وْسَلاَمْ عْلَى الأَرْضْ لِلنَّاسْ الِّي رَاضِي عْلِيهُمْ.»
15 وْبَعْدْ مَا طَلْعُوا المْلاَيْكَة لِلسْمَاء، قَالُوا سُرَّاحْ الغْنَمْ لِبْعَضْهُمْ: «هَيَّا نِمْشِيوْا لْبِيتْ لَحْمْ وِنْشُوفُوا الشَّيْء الِّي صَارْ وِلِّي قَالِلْنَا عْلِيهْ رَبِّي.»
16 وْجُوا فِيسَعْ، يَاخِي لْقَاوْ مَرْيَمْ وْيُوسُفْ، وِالطْفُلْ رَاقِدْ فِي الكُورِي. 17 وَقْتِلِّي شَافُوهُمْ بْدَاوْا يَحْكِيوْ عْلَى الشَّيْء الِّي تقَالِلْهُمْ عْلَى الطْفُلْ هَاذَا. 18 وِلِّي سَمْعُوا الكُلْهُمْ بْقَاوْ مِسْتَغْرْبِينْ مِالشَّيْء الِّي قَالُوهُولْهُمْ سُرَّاحْ الغْنَمْ. 19 آمَا مَرْيَمْ حَطِّتْ الحْكَايَة هَاذِي فِي بَالْهَا وِبْقَاتْ تْفَكِّرْ فِيهَا دِيمَا. 20 وْمِنْ بَعْدْ رَجْعُوا سُرَّاحْ الغْنَمْ وْهُومَا يْمَجّْدُوا فِي اللهْ وِيْسَبّْحُوا فِيهْ عْلَى خَاطِرْ الِّي سَمْعُوهْ وْشَافُوهْ الكُلُّو كَانْ بِالضَّبْطْ كِيفْ مَا قَالِلْهُمْ المَلاَكْ.
الوْلِدْ يِتْسَمَّى يَسُوعْ
21 وْكِكِمْلُوا الثْمَنْيَة أَيَّامْ بَاشْ يْطَهّْرُوا الطْفُلْ تْسَمَّى يَسُوعْ كِيمَا قَالْ المَلاَكْ قْبَلْ مَا تِحْبِلْ بِيهْ أُمُّو.
22 وَقْتِلِّي كْمِلْ وَقْتْ التَّطْهِيرْ مْتَاعْهُمْ كِيفْ مَا قَالِتْ الشَّرِيعَة مْتَاعْ مُوسَى، طَلْعُوا بِيهْ لْأُورْشَلِيمْ بَاشْ يْقَدّْمُوهْ لْرَبِّي. 23 بِالضَّبْطْ كِيفْ مَا هُو مَكْتُوبْ فِي شَرِيعِةْ اللهْ: الِّي يِتْوْلِدْ الأُوِّلْ مِالذْكُورَا تْخَلِّيوْهْ عْلَى ذِمِّةْ رَبِّي 24 وِيْقَدّْمُوا ذْبِيحَة لْرَبِّي كِيفْ مَا وَصَّاتْ الشَّرِيعَة: زُوزْ طْيُورْ يْمَامْ وِلاَّ زُوزْ فْرُوخْ حْمَامْ.
25 وْكَانْ ثَمَّة رَاجِلْ فِي أُورْشَلِيمْ إِسْمُو سِمْعَانْ، الرَّاجِلْ هَاذَا بَارْ وِيْخَافْ رَبِّي وْكَانْ يِسْتَنَّى فِي إِنُّو اللهْ بَاشْ يْعَزِّي شَعْبْ إِسْرَائِيلْ، وْكَانْ الرُّوحْ القُدُسْ مْعَاهْ. 26 وِالرُّوحْ القُدُسْ وَرَّاهْ الِّي هُوَ مَا يْمُوتْ إِلاَّ مَا يْشُوفْ مَسِيحْ رَبِّي. 27 وِالرُّوحْ أَوْحَالُو بَاشْ يْجِي لِلهَيْكِلْ وْوَقْتِلِّي يُوسُفْ وْمَرْيِمْ جَابُوا وِلْدْهُمْ يَسُوعْ بَاشْ يَعْمْلُولُو الشَّيْء الِّي تْقُولْ عْلِيهْ الشَّرِيعَة 28 هَزُّو سِمْعَانْ بِينْ يْدِيهْ وْمَجِّدْ اللهْ وْقَالْ:
29 يَا رَبِّي خَلِّي عَبْدِكْ يِمْشِي بْسَلاَمْ كِيفْ مَا قُتْلُو
30 رَاهِي عِينَيَّ شَافِتْ خَلاَصِكْ.
31 الِّي لِلنَّاسْ الكُلْ حَضِّرْتُو.
32 نُورْ لِلشْعُوبْ الأُخْرِينْ وْمَجْدْ لْبَنِي إِسْرَائِيلْ شَعْبِكْ.
33 وْبُوهْ وْأُمُّو كَانُوا مِتْعَجّْبِينْ مِالكْلاَمْ الِّي تْقَالْ عْلِيهْ. 34 وْبَارِكْهُمْ سِمْعَانْ وْقَالْ لْمَرْيَمْ أُمُّو: «شُوفْ، الطْفُلْ هَاذَا تِبْعَثْ بَاشْ يْهَبِّطْ بَرْشَة نَاسْ وِيْعَلِّي بَرْشَة نَاسْ فِي بَنِي إِسْرَائِيلْ وِيْكُونْ أَمَارَة مِنْ عِنْدْ اللهْ بَاشْ يْعَارْضُوهَا. 35 وْإِنْتِ يَا مَرْيَمْ بَاشْ يُدْخُلْ فِي قَلْبِكْ سِيفْ، بَاشْ تِتْكْشِفْ النِّيَّاتْ مْتَاعْ بَرْشَة قْلُوبْ.»
36 وْكَانِتْ ثَمَّة مْرَا نَبِيَّة اسْمْهَا حَنَّة بِنْتْ فَنُوئِيلْ مِنْ عَرْشْ أَشِيرْ وْكَانِتْ كْبِيرَة فِي العْمُرْ وْمَا عَاشِتْ مْعَ رَاجِلْهَا كَانْ سَبْعَة سْنِينْ بَعْدْ مَا عَرّْسُوا 37 وْعَنْدْهَا أَرْبْعَة وِثْمَانِينْ سْنَة مِلِّي مَاتْ رَاجِلْهَا وْمَا عَرّْسِتْشْ وِعْمُرْهَا مَا بِعْدِتْ عْلَى الهَيْكِلْ وْكَانِتْ تِعْبِدْ فِي رَبِّي لِيلْ وِنْهَارْ وْهِيَ تْصَلِّي وِتْصُومْ. 38 جَاتْ فِي الوَقْتْ هَاذَاكَا وِبْدَاتْ تْسَبِّحْ فِي اللهْ وْتِتْكَلِّمْ عْلَى يَسُوعْ مْعَ النَّاسْ الكُلْ الِّي قَاعْدِينْ يِسْتَنَّاوْ فِي رَبِّي بَاشْ يِفْدِي أُورْشَلِيمْ.
39 وْبَعْدْ مَا عَمْلُوا يُوسُفْ وْمَرْيِمْ الحَاجَاتْ الكُلْهُمْ الِّي قَالِتْ عْلِيهُمْ الشَّرِيعَة مْتَاعْ رَبِّي رَجْعُوا لِلنَّاصْرَة، المْدِينَة مْتَاعْهُمْ الِّي فِي الجَلِيلْ. 40 الوْلَدْ كَانْ يِكْبِرْ وْيِتْقَوَّى، وْكَانْ مَلْيَانْ بِالحِكْمَة وِالله نْعِمْ عْلِيهْ.
الطْفُلْ يَسُوعْ فِي الهَيْكِلْ
41 وْوَالْدِيهْ كَانُوا كُلْ عَامْ يِمْشِيوْ لْأُورْشَلِيمْ فِي عِيدْ الفِصْحْ 42 وْكِالوْلِدْ وْصُلْ عُمْرُو ثْنَاشِنْ سْنَة مْشَاوْ كِالعَادَة لْأُورْشَلِيمْ فِي العِيدْ. 43 وْكِوْفَاوْ نْهَارَاتْ العِيدْ، رَجْعُوا وِالوْلَدْ يَسُوعْ بْقَى فِي أُورْشَلِيمْ وْهُومَا مَا كَانُوشْ يَعْرْفُوا. 44 آمَا هُومَا مْشَى فِي بَالْهُمْ الِّي هُوَ مُوجُودْ مْعَ بْقِيِّةْ النَّاسْ وِمْشَاوْ مْسَافِةْ نْهَارْ كَامِلْ وْمِنْ بَعْدْ بْدَاوْا يْلَوّْجُوا عْلِيهْ بِينْ الأقَارِبْ وِالنَّاسْ الِّي يَعْرْفُوهُمْ. 45 وْكِمَا لْقَاوْهِشْ رَجْعُوا لْأُورْشَلِيمْ يْلَوّْجُوا عْلِيهْ. 46 وْبَعْدْ ثْلاَثَة أَيَّامْ لْقُوهْ فِي الهَيْكِلْ قَاعِدْ وُسْطْ المُعَلّْمِينْ يِسْمَعْ فِيهُمْ وْيِسْإِلْ فِيهُمْ 47 وِلِّي سَمْعُوهْ الكُلْهُمْ بْقَاوْ بَاهْتِينْ فِي الذْكَاءْ وِالأَجْوْبَة مْتَاعُو. 48 وِسْتَغْرْبُوا وَالْدِيهْ وَقْتِلِّي شَافُوهْ وْأُمُّو قَالِتْ: «يَا وْلِيدِي عْلاَشْ عْمَلْتْ فِينَا هَكَّا؟ رَانِي آنَا وْبُوكْ كُنَّا نلَوّْجُوا عْلِيكْ وْإِحْنَا مِتْحَيّْرِينْ!»
49 جَاوِبْهُمْ وْقَالْ: «عْلاَشْ تْلَوّْجُوا عْلِيَّ؟ يَاخِي مَا تَعْرْفُوشْ الِّي آنَا يِلْزِمْنِي نْكُونْ فِي بِيتْ بَابَا؟» 50 آمَا هُومَا مَا فِهْمُوا حَتَّى شَيْء مِلِّي قَالْهُولْهُمْ.