قْيَامِةْ يَسُوعْ المَسِيحْ
(مَتَّى 28:1-10؛ مَرْقُسْ 16:1-8؛ يُوحَنَّا 20:1-10)
24
1 وِنْهَارْ الأَحَدْ فِي الصْبَاحْ بِكْرِي جَاوْ النْسَاء لِلقْبَرْ هَازِّينْ القْوَارِصْ الِّي حَضّْرُوهَا. 2 يَاخِي لْقَاوْ الحَجْرَة تْكَرْكْبِتْ مِنْ فُمْ القْبَرْ. 3 وْكِدَخْلُوا مَا لْقُوشْ البْدَنْ مْتَاعْ الرَّبْ يَسُوعْ. 4 وَقْتِلِّي هُومَا حَايْرِينْ فِي الِّي صَارْ إِذَا بْزُوزْ رْجَالْ لاَبْسِينْ حْوَايِجْ تِلْمَعْ وُقْفُوا بِجْنَبْهُمْ. 5 يَاخِي خَافُوا وْهَبّْطُوا رُوسْهُمْ فِي اللأَرْضْ، وَقْتْهَا قَالُولْهُمْ الزُّوزْ الرْجَالْ: «عْلاَشْ تْلَوّْجُوا عْلَى الحَيْ بِينْ المُوتَى؟ 6 هُوَ مُوشْ هْنَا، آمَا رَاهُو قَامْ، تْذَكّْرُوا آشْ قَالِلْكُمْ وَقْتِلِّي كَانْ فِي الجَلِيلْ؟ 7 وَقْتِلِّي قَالْ الِّي هُوَ إِبْنْ الإِنْسَانْ لاَزْمُو يْسَلّْمُوهْ لْنَاسْ مِذْنْبِينْ وْيِتْصْلَبْ وْفِي النْهَارْ الثَّالِثْ يْقُومْ.» 8 يَاخِي تْذَكّْرُوا كْلاَمُو. 9 وَقْتِلِّي رَجْعُوا مِالقْبَرْ خَبّْرُوا الرُّسُلْ لِحْدَاشْ وِالأُخْرِينْ الكُلْهُمْ بِالحَاجَاتْ الِّي صَارُوا. 10 وِلِّي خَبّْرُوا الرُّسُلْ بِالشَّيْء هَاذَا هُومَا مَرْيَمْ المَجْدَلِيَّة، وْيُوَنَّا وْمَرْيِمْ أُمْ يَعْقُوبْ وِالنْسَاء الأُخْرِينْ الِّي مْشَاوْ مْعَاهُمْ لِلقْبَرْ. 11 وِالرُّسُلْ ظْهَرِّلْهُمْ الِّي هُومَا يَحْكِيوْ فِي حْكَايَاتْ فَارْغَة وْمَا صَدّْقُوهُمْشْ. 12 آمَا بُطْرُسْ قَامْ وِجْرَى لِلقْبَرْ، طَلْ وْشَافْ الكْفَنْ مَلْفُوفْ وَحْدُو وْمِنْ بَعْدْ رَوِّحْ وْهُوَ مِتْعَجِّبْ مِلِّي صَارْ.يَسُوعْ يُظْهُرْ لْزُوزْ تْلاَمْذَة
(مَرْقُسْ 16:12-13)
13 وْفِي النْهَارْ هَاذَاكَا بِيدُو ثَمَّة زُوزْ مِالتْلاَمْذَة كَانُوا مَاشِينْ لْقَرْيَة تِبْعِدْ حْدَاشِنْ كِيلُومِتْرْ عْلَى أُورْشَلِيمْ اسْمْهَا عِمْوَاسْ. 14 وْكَانُوا مَاشِينْ وْيِتْكَلّْمُوا عَلِّي صَارْ الكُلُّو. 15 وْوَقْتِلِّي هُومَا يِتْحَدّْثُوا وْيِتْنَاقْشُوا إِذَا بْيَسُوعْ قْرُبِّلْهُمْ وِمْشَى مْعَاهُمْ. 16 شَافُوهْ آمَا مَا عَرْفُوهِشْ. 17 وِسْإِلْهُمْ: «فَاشْ قَاعْدِينْ تِتْحَدّْثُوا وْإِنْتُومَا مَاشِينْ؟» وُقْفُوا وْظَاهِرْ عْلَى وْجُوهْهُمْ الحُزْنْ. 18 وْجَاوِبْ وَاحِدْ مِنْهُمْ إِسْمُو كْلِيُوبَاسْ وْقَالُّو: «يَاخِي إِنْتِ وَحْدِكْ البَرَّانِي الِّي جِيتْ لْأُورْشَلِيمْ وْمَا تَعْرِفْشْ آشْ وْقَعْ فِي النْهَارَاتْ هَاذُومَا؟» 19 يَاخِي قَالِلْهُمْ: «شْنُوَّة الِّي صَارْ؟» قَالُوا: «الحَاجَاتْ الِّي وُقْعِتْ لْيَسُوعْ النَّاصْرِي الِّي كَانْ نَبِي قَادِرْ بِالقَوْلْ وْبِالفِعْلْ قُدَّامْ اللهْ وْقُدَّامْ النَّاسْ الكُلْ. 20 وْكِيفَاشْ رُؤَسَاءْ الكُهَّانْ وِالأَعْيَانْ مْتَاعْنَا سَلّْمُوهْ بَاشْ يِتْحْكَمْ عْلِيهْ بِالمُوتْ وْصَلْبُوهْ. 21 آمَا أَحْنَا كَانْ عِنْدْنَا أَمَلْ الِّي هُوَ بَاشْ يِفْدِي بَنِي إِسْرَائِيلْ، وْزِيدْ عْلَى هَاذَا الكُلْ، اليُومْ هُوَ النْهَارْ الثَّالِثْ مِلِّي صَارْ الشَّيْء هَاذَا. 22 وْأَكْثِرْ مِنْ هَاذَا ثَمَّة نْسَاء مِنْ جْمَاعِتْنَا حَيّْرُونَا وَقْتِلِّي مْشَاوْ لِلقْبَرْ فِي الصْبَاحْ بِكْرِي. 23 وْمَا لْقَاوْشْ الجُثَّة مْتَاعُو، رَجْعُوا وْقَالُولْنَا الِّي هُومَا شَافُوا رُؤْيَا مْتَاعْ زُوزْ مْلاَيْكَاتْ يْقُولُوا عْلِيهْ الِّي هُوَ حَيْ. 24 يَاخِي مْشَاوْ جْمَاعَة مِنَّا لِلقْبَرْ وِلْقَاوْ الحْكَايَة صْحِيحَة كِيمَا قَالُوا النْسَاء زَادَا، آمَا هُوَ مَا شَافُوهِشْ.» 25 يَاخِي قَالِلْهُمْ: «يَلِّي مَا تِفْهْمُوشْ وْيَلِّي قْلُوبْكُمْ المْسَكّْرَة مَا تِمِّنْشْ بِالشَّيْء الِّي قَالُوهْ الأَنْبِيَاءْ. 26 يَاخِي المَسِيحْ مُوشْ كَانْ لاَزْمُو يْعَانِى مِالوْجَايِعْ هَاذِي وْمِنْ بَعْدْ يُدْخُلْ لِلمَجْدْ مْتَاعُو؟» 27 مِنْ بَعْدْ بْدَا يْفَسّْرِلْهُمْ فِي الِّي تِكْتِبْ عْلِيهْ فِي الكْتُبْ الكُلْهَا مِنْ مُوسَى حَتَّى لِلأَنْبِيَاءْ الكُلْهُمْ.
28 وْ قُرْبُوا لِلقَرْيَة الِّي التْلاَمْذَة الزُّوزْ مَاشِينْ لِيهَا آمَا يَسُوعْ ظْهَرِّلْهُمْ الِّي هُوَ مَاشِي لِبْلاَصَة أَبْعِدْ. 29 وْشَدُّوا فِيهْ صْحِيحْ وْقَالُوا: «أُقْعُدْ مْعَانَا عْلَى خَاطِرْ النْهَارْ قْرِيبْ يُوفَى وِالدِّنْيَا بْدَاتْ تِظْلاَمْ» يَاخِي دْخَلْ وِقْعَدْ مْعَاهُمْ. 30 وْكِقْعَدْ مْعَاهُمْ بَاشْ يَاكْلُوا خْذَا الخُبْزْ وْشْكَرْ اللهْ وِقْسِمْ وِعْطَاهُمْ. 31 يَاخِي عِينِيهُمْ تْحَلِّتْ وْعَرْفُوهْ، آمَا هُوَ غَابْ عْلَى عِينِيهُمْ وْمَا عَادُوشْ يْشُوفُوا فِيهْ. 32 يَاخِي وَاحِدْ مِنْهُمْ قَالْ لِلآخَرْ: «مُوشْ قْلُوبْنَا شِعْلِتْ فِيهَا النَّارْ وَقْتِلِّي كَانْ يْكَلِّمْ فِينَا فِي الطْرِيقْ وِيْفَسّْرِلْنَا فِي الكْتُبْ؟» 33 وْفِي الوَقْتْ هَاذَاكَا بِالضَّبْطْ قَامُوا وْرَجْعُوا لْأُورْشَلِيمْ وِلْقَاوْ الرُّسُلْ لِحْدَاشْ وِالأُخْرِينْ الِّي مْعَاهُمْ مُجْتَمْعِينْ. 34 وْكَانُوا يْقُولُوا: «بِالحَقْ الرَّبْ قَامْ مِالمُوتْ وِظْهُرْ لْسِمْعَانْ.» 35 وْقَالُولْهُمْ عْلَى الشَّيْء الِّي صَارْ فِي الطْرِيقْ وْكِيفَاشْ عَرْفُوا يَسُوعْ بَعْدْ مَا قْسِمْ الخُبْزْ.
يَسُوعْ يُظْهُرْ لِلتْلاَمْذَة
(مَتَّى 28:16-20؛ مَرْقُسْ 16:14-18؛ يُوحَنَّا 20:19-23؛ أَعْمَالْ 1:6-8)
36 وَقْتْ يَحْكِيوْ عْلَى الحَاجَاتْ هَاذِي، وْقُفْ يَسُوعْ بِيدُو فِي وُسْطْهُمْ وْقَالِلْهُمْ: «السَّلاَمْ عْلِيكُمْ!» 37 آمَا هُومَا تْفَجْعُوا وْخَافُوا وِمْشَى فِي بَالْهُمْ الِّي هُومَا قَاعْدِينْ يْشُوفُوا فِي عُبِّيثَة. 38 يَاخِي قَالِلْهُمْ: «شْبِيكُمْ دَاخْلِينْ بْعَضْكُمْ وْمَفْجُوعِينْ؟ وِعْلاَشْ تْشِكُّوا فِي قْلُوبْكُمْ؟ 39 شُوفُوا يْدَيَّا وْسَاقَيَّ، آنَا هُوَ بِيدِي، مِسُّونِي وِتْأَكّْدُوا، رَاهِي العُبِّيثَة لاَ عِنْدْهَا لاَ لْحَمْ وْلاَ دَمْ كِيفْ مَا آنَا عِنْدِي.» 40 وْكِقَالْ الشَّيْء هَاذَا وَرَّاهُمْ يْدِيهْ وْسَاقِيهْ. 41 وْكِمَا صَدّْقُوشْ مِالفَرْحَة وِبْقَاوْ مِتْعَجّْبِينْ قَالِلْهُمْ: «عِنْدْكُمْشْ مَا يِتَّاكِلْ؟» 42 يَاخِي عْطَاوْهْ طَرْفْ حُوتْ مِشْوِي. 43 خْذَاهْ وِكْلاَهْ قُدَّامْهُمْ.
44 مِنْ بَعْدْ قَالِلْهُمْ: «هَاذَا هُوَ الكْلاَمْ الِّي قُلْتْهُولْكُمْ وْآنَا مَازِلْتْ مْعَاكُمْ، إِنُّو الِّي تِكْتِبْ عْلِيَّ فِي شَرِيعِةْ مُوسَى وِكْتُبْ الأَنْبِيَاءْ وِالمَزَامِيرْ لاَزْمُو الكُلُّو يْتِمْ.» 45 مِنْ بَعْدْ نَوّْرِلْهُمْ عْقُولْهُمْ بَاشْ يِفْهْمُوا الكْتُبْ. 46 وْقَالِلْهُمْ: «هَاذَا الِّي تِكْتِبْ، الِّي المَسِيحْ لاَزْمُو يِتْعَذِّبْ وِيْقُومْ مِنْ بِينْ المُوتَى فِي النْهَارْ الثَّالِثْ. 47 وِيْبَشّْرُوا الشْعُوبْ الكُلْهَا بِالتَّوْبَة وْغُفْرَانْ الذْنُوبْ بْإِسْمُوا وْيَبْدَاوْا بِمْدِينِةْ أُورْشَلِيمْ. 48 وْإِنْتُومَا شَاهْدِينْ عْلَى الحَاجَاتْ هَاذِي. 49 وْآنَا بَاشْ نَبْعْثِلْكُمْ الِّي وْعِدْ بِيهْ بَابَا. آمَا أُقْعْدُوا فِي المْدِينَة حَتَّى لِينْ تَاخْذُوا قُوَّة مِالسْمَاءْ.»
الرَّبْ يَسُوعْ يَطْلِعْ لِلسْمَاء
(مَرْقُسْ 16:19-20؛ أَعْمَالْ 1:9-11)
50 مِنْ بَعْدْ هَزّْهُمْ لْبَرَّة مِالمْدِينَة لْبِيتْ عَنْيَا، وْهَزْ يْدِيهْ وْبَارِكْهُمْ. 51 وَقْتِلِّي كَانْ يْبَارِكْ فِيهُمْ، بْعِدْ عْلِيهُمْ وْتِرْفَعْ لِلسْمَاء. 52 يَاخِي سِجْدُولُو الكُلْهُمْ، وْمِنْ بَعْدْ رُجْعُوا لْأُورْشَلِيمْ وْهُومَا فَرْحَانِينْ بَرْشَة. 53 وْكَانُوا دِيمَا مُوجُودِينْ فِي الهَيْكِلْ يْسَبّْحُوا فِي اللهْ.