يَسُوعْ يْوَكِّلْ خَمْسَة آلاَفْ رَاجِلْ
(مَتَّى 14:13-21؛ مَرْقُسْ 6:30-44؛ لُوقَا 9:10-17)
6
1 مْبَاعِدْ تْعَدَّى يَسُوعْ بُحَيْرِةْ الجَلِيلْ الِّي يْسَمِّيوْهَا بُحَيْرِةْ طَبَرِيَّة، 2 تَبّْعُوهْ بَرْشَة نَاسْ، عْلَى خَاطِرْهُمْ شَافُوا المُعْجْزَاتْ مْتَاعُو كِشْفَى المُرْضَى. 3 وِطْلَعْ يَسُوعْ لِلجْبَلْ وِقْعَدْ عْلَى الأَرْضْ مْعَ تْلاَمِذْتُو. 4 وْوَقْتْهَا قْرُبْ عِيدْ الفِصْحْ مْتَاعْ اليْهُودْ. 5 هَزْ يَسُوعْ عِينِيهْ وْشَافْ النَّاسْ جَايِينْ، قَالْ لْفِيلِبُّسْ: «مْنِينْ نِشْرُولْهُمْ خُبْزْ بَاشْ يَاكْلُوا.» 6 قَالْ الكْلاَمْ هَاذَا بَاشْ يْجَرَّبْ فِيلِبُّسْ، وْيَسُوعْ كَانْ عَارِفْ رُوحُو آشْ بَاشْ يَعْمِلْ. 7 جَاوْبُو فِيلِبُّسْ: «حَتَّى كِنِشْرِيوْ بْمِيتِينْ قَطْعَة مِالفِضَّة، مَا هِيشْ بَاشْ تِكْفِي بَاشْ كُلْ وَاحِدْ مِنْهُمْ يَاخُذْ قِدْمَة.» 8 قَالُّو أَنْدَرَاوُسْ خُو سِمْعَانْ بُطْرُسْ وَاحِدْ مِنْ تْلاَمِذْتُو: 9 «ثَمَّة هْنَا شْكُونْ عَنْدُو خَمْسَة خُبْزَاتْ شْعِيرْ وْحُوتِّينْ صْغَارْ: آمَا آشْ بَاشْ يَعْمْلُوا لِلنَّاسْ هَاذُومَا.» 10 قَالْ يَسُوعْ: «قَعّْدُوا النَّاسْ لُوطَة.» وْكَانْ ثَمَّة بَرْشَة حْشِيشْ قَعْدُوا عْلِيهْ النَّاسْ. وْكَانُوا خَمْسَة آلاَفْ رَاجِلْ. 11 خْذَا يَسُوعْ الخُبْزَاتْ وْشْكَرْ اللهْ، وِعْطَى لِلمُوجُودِينْ الكُلْ قَدْ مَا حَبُّوا. وِعْمَلْ نَفْسْ الشَّيْء لِلحُوتِّينْ. 12 وْوَقْتِلِّي شَبْعُوا، قَالْ لِتْلاَمِذْتُو: «لِمُّوا الِّي فْضُلْ الكُلُّو بَاشْ مَا يْضِيعْ مِنُّو حَتَّى شَيْء.» 13 وَلاَّوْ لَمُّوهْ وْعَبَّاوْ ثْنَاشِنْ قُفَّة بِالخُبْزْ الِّي فْضُلْ مِالخَمْسَة خُبْزَاتْ مْتَاعْ الشْعِيرْ بَعْدْ مَا كْلاَوْ النَّاسْ. 14 وْوَقْتِلِّي شَافُوا النَّاسْ المُعْجْزَة هَاذِي الِّي عْمَلْهَا يَسُوعْ قَالُوا: «بِالحَقْ، هَاذَا هُوَ النَّبِي الِّي جَايْ لِلعَالَمْ!» 15 وِعْرَفْ يَسُوعْ الِّي هُومَا يْحِبُّوا يْهِزُّوهْ وِيْحُطُّوهْ مَلِكْ، يَاخِي بْعِدْ عْلِيهُمْ وِرْجَعْ وَحْدُو لِلجْبَلْ.يَسُوعْ يِمْشِي عْلَى المَاء
(مَتَّى 14:22-27؛ مَرْقُسْ 6:45-52)
16 وْفِي العْشِيَّة، هَبْطُوا تْلاَمِذْتُو لِلبُحَيْرَة. 17 وْطَلْعُوا فِي فْلُوكَة وِمْشَاوْ لِمْدِينِةْ كَفْرْنَاحُومْ فِي الشِّيرَة الأُخْرَى مْتَاعْ البُحَيْرَة وِظْلاَمِتْ الدِّنْيَا وْيَسُوعْ مَازَالْ مَا خْلَطْشْ عْلِيهُمْ. 18 هَبِّتْ رِيحْ قْوِيَّة، هَيّْجِتْ البُحَيْرَة. 19 وِمْبَاعِدْ مَا دَخْلُوا فِي البُحَيْرَة خَمْسَة وِلاَّ سِتَّة كِيلُومِيتْرَاتْ، خَافُوا كِشَافُوا يَسُوعْ يِمْشِي فُوقْ المَاء وِقْرُبْ لِلفْلُوكَة. 20 يَاخِي قَالِلْهُمْ: «مَا تْخَافُوشْ رَانِي آنَا هُوَ!» 21 وْحَبُّوا يْطَلّْعُوهْ مْعَاهُمْ فِي الفْلُوكَة، وْفِي الوَقْتْ هَاذَاكَا وُصْلِتْ الفْلُوكَة لِلأَرْضْ الِّي مَاشِينْ لِيهَا.
النَّاسْ يْلَوّْجُوا عْلَى يَسُوعْ
22 وْمِنْ غُدْوَة، النَّاسْ المُوجُودِينْ فِي الشِّيرَة الأُخْرَى مْتَاعْ البُحَيْرَة تْذَكّْرُوا الِّي هُومَا شَافُوا فْلُوكَة وَحْدَة وِلِّي يَسُوعْ مَا طْلَعْشْ فِيهَا مْعَاهُمْ وِلِّي التْلاَمْذَة مْشَاوْ وَحَّدْهُمْ. 23 آمَا ثَمَّة فْلاَيِكْ أُخْرَى جَاتْ مِنْ مْدِينِةْ طَبَرِيَّة لِلشَّطْ الِّي قْرِيبْ مِالبْلاَصَة الِّي كْلاَوْ فِيهَا الخُبْزْ بَعْدْ مَا الرَّبْ شْكَرْ عْلِيهْ. 24 وَقْتِلِّي النَّاسْ شَافُوا الِّي يَسُوعْ وِتْلاَمِذْتُو مَا هُمْشْ مُوجُودِينْ الغَادِي وَلُّوا رِكْبُوا فِي الفْلاَيِكْ وِمْشَاوْ يْلَوّْجُوا عْلِيهْ فِي كَفْرْنَاحُومْ.
يَسُوعْ خُبْزْ الحَيَاةْ
25 وْوَقْتِلِّي لْقَاوْهْ فِي الشِّيرَة الأُخْرَى مْتَاعْ البُحَيْرَة قَالُولُو: «يَا مُعَلِّمْ، وَقْتَاشْ وْصُلْتْ؟» 26 جَاوِبْهُمْ يَسُوعْ وْقَالِلْهُمْ: «نْقُلْكُمْ الحَقْ الحَقْ: إِنْتُومَا تْلَوّْجُوا عْلِيَّ مُوشْ عْلَى خَاطِرْكُمْ شُفْتُوا المُعْجْزَاتْ، آمَا عْلَى خَاطِرْكُمْ كْلِيتُوا مِالخُبْزْ وِشْبَعْتُوا. الخُبْزْ هَاذَا طَبْعُو اللهْ الآبْ بِالخَاتَمْ مْتَاعُو. 27 مَا تِجْرِيوْشْ وْرَاء المَاكْلَة الِّي تَفْنَى آمَا إِجْرُوا وْرَاء المَاكْلَة الِّي تْدُومْ لِلحَيَاةْ الأَبَدِيَّة. المَاكْلَة هَاذِي نَعْطِيهَالْكُمْ آنَا إِبْنْ الإِنْسَانْ الِّي اللهْ الآبْ حَطْ عْلِيَّ عَلاَمِةْ القْبُولْ مْتَاعُو.» 28 قَالُولُو: «شْنُوَّة الشَّيْء الِّي اللهْ يْحِبّْنَا نَعْمْلُوهْ؟» 29 جَاوِبْهُمْ يَسُوعْ وْقَالِلْهُمْ: «هَاذَا هُوَ الشَّيْء الِّي يْحِبْ عْلِيهْ اللهْ هُوَ إِنّْكُمْ تِمّْنُوا بِلِّي بَعْثُو.» 30 قَالُولُو: «شْنُوَّة المُعْجْزَة الِّي تْنَجِّمْ تَعْمِلْهَا بَاشْ نِمّْنُوا بِيكْ؟ 31 جْدُودْنَا كْلاَوْ المَنْ فِي الصَّحْرَاء، كِيمَا مَكْتُوبْ فِي الكْتَابْ المُقَدَّسْ: "عْطَاهُمْ خُبْزْ مِالسْمَاءْ بَاشْ يَاكْلُوهْ."» 32 إِمَّالاَ قَالِلْهُمْ يَسُوعْ: «نْقُلْكُمْ الحَقْ الحَقْ: مُوشْ مُوسَى الِّي عْطَاكُمْ الخُبْزْ مِالسْمَاءْ. بَابَا وَحْدُو هُوَ الِّي يَعْطِيكُمْ الخُبْزْ الحَقَّانِي مِالسْمَاءْ. 33 رَاهُو خُبْزْ اللهْ هُوَ الِّي يِنْزِلْ مِالسْمَاءْ وْيَعْطِي حَيَاةْ لِلعَالَمْ.»
34 قَالُولُو: «يَا سِيدْنَا، أَعْطِينَا مِالخُبْزْ هَاذَا دِيمَا!» 35 قَالِلْهُمْ يَسُوعْ: «آنَا هُوَ خُبْزْ الحَيَاةْ. الِّي يْجِينِي مَا يْجُوعِشْ، الِّي يِمِّنْ بِيَّ مَا يَعْطِشْ لِلأَبَدْ. 36 آنَا قُلْتِلْكُمْ: شُفْتُونِي آمَا مَا امِّنْتُوشْ. 37 الِّي يَعْطِيهُمْلِي الآبْ الكُلْهُمْ يْجِيوْنِي، وِلِّي يْجِينِي مَا نْخَرّْجُوشْ البَرَّا. 38 رَانِي مَا نْزِلْتِشْ مِنْ السْمَاءْ بَاشْ نَعْمِلْ الِّي نْحِبْ عْلِيهْ آنَا، آمَا بَاشْ نَعْمِلْ الِّي يْحِبْ عْلِيهْ الِّي بْعَثْنِي. 39 وِلِّي بْعَثْنِي يْحِبّْنِي نْقَيِّمْ الِّي عْطَاهُمْلِي مِنْ المُوتْ يُومْ القْيَامَة، وْمَا نْضَيَّعْشْ حَتَّى وَاحِدْ مِنْهُمْ. 40 وْهَاذَا الِّي يْحِبْ عْلِيهْ بَابَا: كُلْ مِنْ يْشُوفْ الإِبْنْ وْيِمِّنْ بِيهْ يْنَالْ الحَيَاةْ الأَبَدِيَّة وْآنَا نْقَيّْمُو مِنْ المُوتْ يُومْ القْيَامَة.»
41 وِتْشَكَّاوْ اليْهُودْ عْلَى يَسُوعْ عْلَى خَاطْرُو قَالْ: «آنَا هُوَ الخُبْزْ الِّي نْزِلْ مِنْ السْمَاءْ»، 42 وْقَالُولُو: «يَاخِي هَاذَا مُوشْ يَسُوعْ وِلْدْ يُوسُفْ؟ أَحْنَا نَعْرْفُوا بُوهْ وْأُمُّو، إِمَّالاَ كِيفَاشْ تَوْ يْقُولْ الِّي هُوَ نْزِلْ مِنْ السْمَاءْ.» 43 جَاوِبْهُمْ يَسُوعْ وْقَالِلْهُمْ: «مَا تِتْشَكَّاوْشْ مَا بِينَاتْكُمْ. 44 حَتَّى حَدْ مَا يْنَجِّمْ يْجِينِي إِلاَّ إِذَا كَانْ الآبْ الِّي بْعَثْنِي جِبْدُو وْآنَا نْقَوّْمُو مِنْ المُوتْ يُومْ القْيَامَة. 45 كِيفْ مَا جَا فِي كْتُبْ الأَنْبِيَاءْ، الِّي الكُلْهُمْ بَاشْ يِتْعَلّْمُوا مِنْ اللهْ. كُلْ مِنْ يِسْمَعْ الآبْ وْيِتْعَلِّمْ مِنُّو يْجِينِي. 46 حَتَّى حَدْ مَا شَافْ الآبْ كَانْ الِّي هُوَ مِنْ عِنْدْ اللهْ: هَاذَاكَا هُوَ الِّي شَافْ الآبْ. 47 نْقُلْكُمْ الحَقْ الحَقْ: الِّي يِمِّنْ بِيَّ، يْنَالْ الحَيَاةْ الأَبَدِيَّة. 48 آنَا هُوَ خُبْزْ الحَيَاةْ. 49 جْدُودْكُمْ كْلاَوْ المَنْ فِي الصَّحْرَاء وْمَاتُوا، 50 هَاذَا هُوَ الخُبْزْ الِّي نَازِلْ مِنْ السْمَاءْ بَاشْ الِّي يَاكُلْ مِنُّو مَا يْمُوتْشْ. 51 آنَا هُوَ الخُبْزْ الحَيْ الِّي نْزِلْ مِالسْمَاءْ. الِّي يَاكُلْ مِنْ الخُبْزْ هَاذَا يْعِيشْ لِلأَبَدْ. وِالخُبْزْ الِّي نَعْطِيهْ هُوَ البْدَنْ مْتَاعِي، الِّي نَعْطِيهْ بَاشْ العَالَمْ يَحْيَى.»
52 وِتْعَارْكُوا اليْهُودْ فِي بْعَضْهُمْ وْقَالُوا: «كِيفَاشْ هَاذَا يْنَجِّمْ يَعْطِينَا البْدَنْ مْتَاعُو بَاشْ نَاكْلُوهْ؟» 53 إِمَّالاَ قَالِلْهُمْ يَسُوعْ: «نْقُلْكُمْ الحَقْ الحَقْ: إِذَا مَا تَاكْلُوشْ البْدَنْ مْتَاعِي آنَا إِبْنْ الإِنْسَانْ وْمَا تُشْرْبُوشْ دَمِّي، مُوشْ بَاشْ تْكُونْ عِنْدْكُمْ حَيَاةْ فِيكُمْ. 54 الِّي يَاكُلْ البْدَنْ مْتَاعِي وْيُشْرُبْ مِنْ دَمِّي يْنَالْ الحَيَاةْ الأَبَدِيَّة، وْآنَا نْقَوّْمُو مِنْ المُوتْ يُومْ القْيَامَة. 55 رَاهُو البْدَنْ مْتَاعِي هُوَ المَاكْلَة الحَقَّانِيَّة، وْدَمِّي هُوَ المَاء الحَقَّانِي. 56 الِّي يَاكُلْ مِنْ البْدَنْ مْتَاعِي وْيُشْرُبْ مِنْ دَمِّي هُوَ يِثْبِتْ فِيَّ، وْآنَا نِثْبِتْ فِيهْ. 57 وْكِيفْ مَا الآبْ الحَيْ بْعَثْنِي وْآنَا نَحْيَى بِيهْ، الِّي يَاكُلْنِي زَادَا يَحْيَى بِيَّا. 58 هَاذَا هُوَ الخُبْزْ الِّي نْزِلْ مِالسْمَاءْ، وْرَاهُو مُوشْ كِيفْ المَنْ الِّي كْلاَوْهْ جْدُودْكُمْ وْمَاتُوا. الِّي يَاكُلْ مِالخُبْزْ هَاذَا يَحْيَى لِلأَبَدْ.» 59 الكْلاَمْ هَاذَا قَالُوا وَقْتِلِّي كَانْ يْعَلِّمْ فِي المَجْمَعْ مْتَاعْ كَفْرْنَاحُومْ.
كْلاَمْ الحَيَاةْ الأَبَدِيَّة
60 وَقْتِلِّي سَمْعُوهْ بَرْشَة مِنْ تْلاَمِذْتُو قَالُوا: «مَا اصْعْبُو الكْلاَمْ هَاذَا، شْكُونْ يْنَجِّمْ يِسْمْعُو؟» 61 وِعْرَفْ يَسُوعْ فِي قَلْبُو الِّي تْلاَمِذْتُو شَكُّوا، وَلَّى سْإِلْهُمْ: «يَاخِي الكْلاَمْ هَاذَا يْخَلِّيكُمْ تْشِكُّوا؟ 62 إِمَّالاَ آشْ بَاشْ تَعْمْلُوا كَانْ تْشُوفُونِي آنَا إِبْنْ الإِنْسَانْ طَالِعْ لِلبْلاَصَة الِّي كُنْتْ فِيهَا قْبَلْ؟ 63 الرُّوحْ هُوَ الِّي يَعْطِي الحَيَاةْ، آمَا البْدَنْ رَاهُو مَا يِنْفَعْ بْحَتَّى شَيْء. رَاهُو الكْلاَمْ الِّي قُلْتْهُولْكُمْ رُوحْ وْحَيَاةْ. 64 آمَا ثَمَّة شْكُونْ فِيكُمْ الِّي مَا يِمّْنُوشْ.» يَسُوعْ كَانْ مِالأُوِّلْ يَعْرِفْ شْكُونْهُمْ الِّي مَا هُمْشْ بَاشْ يِمّْنُوا بِيهْ وِشْكُونُو الِّي بَاشْ يْخُونُو. 65 وْقَالْ: «هَاذَاكَا عْلاَشْ آنَا قُلْتِلْكُمْ رَاهُو مَا يْنَجِّمْ حَتَّى حَدْ يْجِينِي إِلاَّ إِذَا كَانْ الآبْ خَلاَّهْ يْجِينِي.»
66 مِالوَقْتْ هَاذَاكَا بَرْشَة مِنْ تْلاَمِذْتُو بَطّْلُوا مَا عَادِشْ يْتَبّْعُوهْ. 67 يَاخِي دَارْ لِلأَثْنَاشْ وْقَالِلْهُمْ: «إِنْتُومَا زَادَا تْحِبُّوا تِمْشِيوْ كِيفْهُمْ؟» 68 جَاوْبُو سِمْعَانْ بُطْرُسْ: «يَا رَبْ لِشْكُونْ بَاشْ نِمْشِيوْا، وْإِنْتِ عِنْدِكْ كْلاَمْ الحَيَاةْ الأَبَدِيَّة؟ 69 وْإِحْنَا امِّنَّا وِعْرَفْنَا الِّي إِنْتِ قُدُّوسْ اللهْ.» 70 جَاوِبْهُمْ يَسُوعْ: «يَاخِي مُوشْ آنَا الِّي خْتَرْتْكُمْ إِنْتُومَا الأَثْنَاشْ رَغْمِلِّي وَاحِدْ مِنْكُمْ شِيطَانْ!» 71 وِقْصَدْ بِكْلاَمُو هَاذَا يَهُوذَا وِلْدْ سِمْعَانْ الإِسْخَرْيُوطِي، الِّي بَاشْ يْخُونُو، رَغْمِلِّي هُوَ وَاحِدْ مِنْ الأَثْنَاشْ.