2
01 Aflaay tuubuutwa taabireewwa kasseeh imir'eesoohna itkwakwna.
02 Tooyin t'asarama Ukwaasana ushaga ushagaamiyeeb kassooh faaysiya.
Aflaay tooyin t'asarama kassooh ushanhii fiiniya.
03 Ukwaasana kassooh ushanhii fiiniya akay tooyin t'asarama baarakiyaayt mugaddast ikwaas.
04 Tuun tuuna Ukwaasana kak toobuurwa teebireewwa id'iyeeb sootni hoon.
Ukwaasana teebreewwa toobuurt ikwaasihoob,
05 siyaam tari hindiib mhiin han yakaab kiikeen.
W'ankwana Ukwaasana bireeb han gadehaab kiiki.
Tubuutiib shagaami aadami han kiihaay.
06 Laakiin kwaan toobuutii ifir'a siiwiya,
kastooh toobuur aree gw'asiya.
07 Been oodoor W'ankwana Ukwaasana thiin yaksiyaayt w'aadami id'i.
Malya shuuk ignifeeb fuufiya.
W'aadami yakiya aree hamshuukiya.
08 W'ankwana Ukwaasana Adan iidni mhiin oomha beeti iifiinaay dir'aat id'i,
ootak aree beentooy daasiya.
09 Beet tudir'a Adan W'ankwana Ukwaasana gwida hindi daawriib m'ariit na iiktiin hooy yaksiya.
Tudir'aati bitik malu hindi iifiin.
Gaal yhindiyeeb midhhan iyiw,
weer aree tooshboowwa toomaagwa isuukin.
10 Adanee tudir'a gw'asi bhar kwaaniya.
Malya uun uubhar fadhig bhara iikti.
11 Oobhar oongaal oosmooh Biishoon iidna.
Kassooh Hawiilaay whaash idim'ara ataab bariisooh kwaani.
12 Been whaash nhas dim'araawwa,
shakwiintwa,
warib alya aweebwa hooy iifiin.
13 Oobhar umalyaay sim Giihoon iidna,
Kuushi haashii kwaani.
14 Oobhar umhaya Tiigriis iidna,
Aashuur iidni haashii oomha beeti kwaani.
Oobhar ufadhiga han Furaat iidna.
15 W'ankwana Ukwaasana been uutak shagaamiyi jillaaywa,
iigw'adi jillaaywa barooh Adaneet tudir'aatiib daasiya.
16 Laakiin W'ankwana Ukwaasana utakii dehaay,
<<Kasseeh yhindi tudir'aatiib eefeen hooy tamtiniyeet toona adgirtiniya.
17 Laakiin been whindi tooshboowwa toomaagwa isookiin ibakii hooy baatama.
Been whindii naat han tamtiniyeek,
sidik iiyyi tindiya.>>
idi.
18 W'ankwana Ukwaasana <<Uutak gaal ikatiyeet tuuna daayiit kitti.
Barooh tan'iib shamaamiigaab dehaay iid'i andi.>>
idi.
19 W'ankwana Ukwaasana kassooh ooreewwa eekilaywa whaashiib id'i.
Been utakii dehaay haay eeyaayt,
eesma baruuh iniiweeb iishibib.
Uutak soomyaneeb aasma sidik simaayeeh ikeena.
20 Uutak oon ooreewwa,
tidhhaniya kasteehwa,
eekilaywa soomiya.
Shaawti baraah simaab iibriin iiktiin.
Laakiin been oodoor Aadam it'awiib masi lawaab kiiki.
21 Aflaay W'ankwana Ukwaasana ootak winneet akraat n'ari diwisiya id'i.
Baruuh diwee akay,
Ukwaasana bariiyeeh itarabee miitaat gaat hooy iiyhi.
Malya doof geeb yhakwiraayt har'ii,
22 oon utaki tarabee takat id'i.
Malya batooh ootak marii haay eeya.
23 Uutak ajjabamiya,
<<Tooy aneeb t'iiti gaal eefi!
Tuun batuuh aniit tumiitaattiiwwa bashariiwwa shagaamamaati.
Batuuh takii tifir'a akay,
<Tootakat> titoosaam.>>
idi.
24 Oon usabbii,
uutak ubaabaawwa toondeewwa ishtiit,
takat ind'iir.
Baraah malyaab gaal bashar t'iiteeb ikatiin.
25 Aadamwa tutakatuuhwa mhallaah raboobaab iiktiineek han,
sikw'aab kiikeen.