Yasuu'iib Eemtaal W'injiiliib
Yuhanna umoosanaay usalal isoomir
1
1 Uun baruuh usakana udaayiinaay isuurdaba.
Yasuu'a Umasiih W'ankwanaay Ooriib hadiidiiniibu.
2 Aan ibhali unabi Ish'aayaay ooktaabiib kataba,
<<Ukwaasana <Udiigwat kinaayu usalal dehook isoomiiree dehaay suurook afandiig.>
diyaabu.
3 Umingaayiib waliikiini hiss,
<Umasiihiib usalal soomirna!
Tilagiiteeh fadhadht kwaasna!>
indi.>>
idi.
4 Beenhoob Yuhanna umoosana umingaayiib lawiya.
Udehayii dehaay,
<<Tuubaana!
Ukwaasana tumaagnaay tugwibbaab tikatiineet afooyi hookna indi.
Bariiyooh dehay agarna!
Ani malyaab yameeb anmiis hookna.>>
iid.
5 Gwida dehay Yahuudaaywa Alguduseewwa bariiyooh dehaay eeyaan.
Baraah timaagnay afray sakna miyaadiib eeyaaniit ifdhadhnaka,
Uurduni ubhariib itoomaasna.
6 Yuhanna kaami hamooyee halakaab ikwee,
habaab aree ilbabaayt,
yaaweetwa awitwa tami.
7 Udehayii dehaay,
<<Aniika akraka y'aa indi,
ani oon barooh kishiyaayooh akeetiit tigidh'aateeyooh imhakwara afandiigeet toona han ka'astehalan.
8 Ani yamee anmiis hookna.
Been baruuh laakiin Eeshuuk Itageegaayee inmiis hookna.>>
idi.
Yasuu'a itoomaas aree uubliis barooh jarrabiya
9 Beenhoob Yasuu'a Naasiraay eeya.
Naasiraa Jaliileeb teefi.
Beentooy Yuhanna barooh W'uurduni bhariib imis.
10 Yasuu'a iyamee ifir'ihoob,
teebiri nigalee rhiya.
Aashuuk Itageega aree kwibheeriitiit hay'aatiit dehaay gidehee rhiya,
11 <<W'ooru winneet w'areeyanyeeb barookwa.
Ani akraab hook afirhaabu.>>
iid hiss tibireetee itmassaaw.
Uubliis Yasuu'aab jarrabiya
12 Aashuuk Yasuu'aab umingaay beeti salooliyaan.
13 Beentooy uubliis fadhig tamuun yinaat,
middaat barooh jarrabiya.
Beenhoob Yasuu'a malaaliit dhhanyaati gwad iifii,
imalak aree barooh shagaamiin.
Yasuu'a Usakana Udaayiib sooya
14 Yuhanna yhakwaraayt har'ii,
Yasuu'a Jaliilee dehaay eeyaayt Ukwaasanaay usakana udaayiib sooya.
15 Yasuu'a <<Oont'a idaman y'aaba,
Ukwaasanaayt tehad'aayi dawiltooknaatu.
Tuubaana,
usakana udaayiib aamanaana!>>
idi.
Yasuu'a ilinguuma y'awwaliib waliikiya
16 Yasuu'a Jaliileeb iyami ginnaalii sakee,
malu aashoob aabki Sim'oonwa usanooh Andariyaaswa rhiya.
Baraah tishabakaateehna ubhariib iigidna.
17 Yasuu'a bareeyooh dehaay,
<<Yakaana,
gwadu m'aana!
Dehayi aabki iikwsi hookna andi.>>
idi.
18 Gaalhoob tishabakaateehna ingadna id'iiniit barooh iramna.
19 Yasuu'a shalikt midda hiireeriyaayt har'ii,
Yaaguub Sabadi oorwa oosan Yuhannaawwa falluukaatiib rhiya.
Baraah tishabakaateehna ishiishbuubna.
20 Igidiyeesooh Yasuu'a bareeh waliikiya.
Baraah ubaaba Sabadiib tufalluukaatiib eenda ishagaamanaayi geeb y'ishniit,
Yasuu'aab iramna.
Yasuu'a takii jin mhaliya
21 Yasuu'aawwa tikwiriyaawwa Kafarnaahuum iidneet Jaliileeb teefeet madiinaatii dehaay ikwibarna eeyaan.
Oodehay Iyahuudi diini gawiib toosab agriisiin.
22 Uudehay bariiyooh w'agriistiib winneet hooy ajjabamiyaan.
Whaggi allamanaayeet kiiki,
ibhaliyaah aree takweet iibiriin.
23 Been oodiini gawiib jin hooy iifiini tak iifi.
Uun uutak aadhiya,
24 <<Yasuu'a W'annaasiraay!
Naan hoon harriiwa?
Kwidhsitiyoon dehaay y'aabwa han?
Ani akteen hook,
baruuk W'ankwana Utageegaaywaaya!>>
idi.
25 Yasuu'a eejin idnint,
<<Tim akaat hooy fir'aa!>>
idi.
26 Beenhoob aajin ootak dehayi bitkeeb irgisniit,
adaayaab baakaay hooy ifir'ana.
27 Beenhoob uudehay kassaah irkwiiniit,
<<Aan naa bhaliya?
Baruuh eejin akrireewwa takweeteewwa isfar'a.
Eejin han <Fir'ana!>
indihoob,
ifir'ana>> idiiniit taktak raatiyaan.
28 Yasuu'iib usakana kassooh Jaliileeb whaashiib willa ibrar.
Yasuu'a gwida dehay mheelya
29 Yasuu'a udiini gawii giigiyaayt,
Yaaguubwa Yuhannaay geeb,
Sim'ooniibwa Andariyaasiibwa ugawiib shuumiya.
30 Beenhoob Sim'oon tehamtuuh akra abaaki barii n'aaliib imb'iti akay,
<<Tutakat dehoon mheela!>>
idiin.
31 Yasuu'a tutakatiit tumadhamti gadam ingadaayt,
een y'abaaki idninihoob,
tutakatii ifir'ana.
Beenhoob batuuh w'abkiisooh yaktaayt bareeh shagaamta.
32 Tuuyin dhibtaanihoob,
kassuuh uudehay warit lhanayt iibriin ingaalka y'amshaayeeh hay eeyaan.
Yasuu'a een bareeh gaalka shiishiyaay isin'ir.
33 Kastooh tumadiinaatii uudehay ugawi dheefaay suurii idbalna.
34 Yasuu'a udehayii gwida jin ifir'a.
Gwidaat lhanay iibiriin oodehay han mheeliya.
Aajin baruuh aab iiktiyeet toona ikanna akay,
Yasuu'a bareeh wari bhali hadiidsaab kiiki.
Yasuu'a mingaayama mhiiniib sileeliya
35 Tuuyin talawtanihoob Yasuu'a yakiyaayt sileeliyi jillaay nageema mhiin ibi.
36 Sim'oonwa y'arawaah bariiyooh harawaay yakiyaan.
37 Imriinihoob aree,
<<Uudehay kassuuh barook harriiw.>>
idiin.
38 Laakiin Yasuu'a bareeyooh dehaay,
<<Ani timadiina tirawteeb eefeen oodehay han W'ankwanaayt had'ayeeti usakana udaayiib ibakii aniiweet toonaati.
Toon toonaatii dehaay W'ankwana diigwatiyaheeb.>>
idi.
39 Yasuu'a Jaliileeb Iyahuudi diini gawaayeeb usakana udaayiib igwibi.
Yasuu'a tak bhadh iibriib mheelya
40 Tak kassuuh ubashar bhadh akaab iiktiyi Yasuu'ii dehaay eeya.
Whaashiib bariiyooh whii dhibiyaayt aree winneet in'al,
<<Duuraay,
sin'iraheeb,
harriiweek na tisin'iirheeba!>>
idi.
41 Yasuu'a dehaay n'akw manaayaayt w'ayooh suurii y'abik,
ootak tehiyaayt,
<<Aharriiw,
nhas akaa!>>
idi.
42 Igidiyeesooh utakii uubhadh kwidhyaa iihaayt in'ir.
43 Yasuu'a ootak akra soob sooyaayt,
44 <<Toon toona gaal tak han baasooya!
Difaat ugarooyook ufagiiri rhisa,
iminhiseeyook dehaay been unabi Muusaa,
<Fir'ana!>
diyaab iiktiyeet beet toona fir'a!>>
idi.
45 Laakiin uutak giigiyaayt kassooh udehayi kehii oon usakana ibrir.
Toon toonaati sabbii,
Yasuu'a madiinaat gaanaati shuumti han adgirat irib.
Baruuh ood'ooh daayaneek han,
uudehay masi kasseeh yhashee dehaay y'iin.