Dinyeel 12

ABRAAM 12–25

Unimbɔti yíiń Abram ú yīkì u-tiŋki pu

1 Dalbee ní ti-Dindaan bí Abram yii:

«Yīkì a-tiŋki pu, a-tincaliiki yab kansikin nì a-baa cindin kí nīn cá kitiŋ kin poon m làá dàkà-see^a. 2 M làá dī a-pu ní kí náań ditimbuŋkpaandi ní kí bìin̄ a-boon. M làá yòon̄ a-yindi yilpu. A-pu ní m làá dī kí bìin̄ inibool kɔkɔ pu. 3 Bin yaa ŋá-si tiŋanee, m làá ŋá bidambi tiŋan, bin yaa tɔ́-si mbusuee, m làá tɔ̄-bi mbusu. A-puee, m làá ŋá kitiŋ pu nibuliŋ kɔkɔ tiŋan^b.»

4 Abram gbìl̄ mimmee ní ki yíkìi búntì kii ti-Dindaan nín tùkū-u puee, ní Looti nóó-u. Ŋyunti ŋun Abram nìn yíkì Kaaran tiŋkinee, u nìn cáá abin aŋmoo kpá imuŋku inaa ní. 5 U nìn kpáaǹ u-nimpuu Saarayi ki kútì u-nabiki Aran jipɔɔn Looti pu, ki kpáaǹ u-gaajawanti tin u nìn cááyee kɔkɔ, nì iyumbu in u nìn dáal̀ Kaaran tiŋkinee. Bi nìn yíkìi kāl̀ nsan pu ki cōom̀ ki cūtì Kanaan tiŋkin.

Abram bí Kanaan tiŋkin

Ŋyunti ŋun Abram bàn̄ Kanaan tiŋkinee, 6 ní bi yìin̄ kitiŋ gbanti poon ki tin bàn̄ laaba bi yíì niin yii Siikeem, ní ki tin nyáń Mooree^c subu pu. Ŋyunti gbantee, Kanaan yab di nìn dá láá kóò kitiŋ gbantin.

7 Ní ti-Dindaan nyántì u-ba ki dàkā Abram ki lī yii: «A-niboolii ní m làá dāá dū kitiŋ nee kí tīī.» Ní Abram máń nsaraafan niin ki tīī ti-Dindaan un nìn nyántì u-ba ki dàkā-uee^d. 8 Míǹ boonee ní u yíkì niin ki nín cá ajoon ŋin pìlīǹ Beeteel tiŋki ŋwìiń nyalaŋki púee. U bàn̄ee ní ki gāā u-tantiu Beeteel nì Aayi timmu kansikin, ní Beeteel bí ŋwìiń jeetilaŋki pú ní Aayi bí ŋwìiń nyalaŋki pú. U nìn gíti máń ti-Dindaan nsaraafan ŋubɔ niin mun ní ki jáam̀-u. 9 Míǹ boonee ní Abram tí yíkì ki còom̄ ki kàal̀ ntimu ki nìkì ki cá Neegeeb watil pú.

10 Boonee ní ŋkùm dāa nyáń kitiŋ kin poon Abram kóòyee, ní u yíkì ki nín sìntī Eejipiti tiŋkin kí cùú kàl̄ niin, kun puee ŋkùm nìn pɔ̄ɔ̄ kitiŋ kin poon u nìn kóòyee tikpil. 11 Bi tóob́ kí kɔ́ Eejipiti tiŋkinee ní u bí u-nimpuu Saarayi yii: «M nyí yii a baasii ŋān̄ unimpu. 12 Eejipiti yab yaa ká-see, bi làá lì yii m-nimpuu di sá-si, ní kí cúú-mi, kí kpɔ̀-mi ní kí yàntī sii ń nīn bí. 13 An puee m gbāam̀-si, bi yaa tin bālifì-see, á lì yii m-niisal di sá-si, án nín làá ŋá pu a-puee, bí ŋúb́-mi tiŋan kí taa kpɔ̀-mee.»

14 Bi dūu bàn̄ Eejipitee, niin yab ká yii u-nimpuu ŋān̄ tikpil. 15 Faaroo^e kàliŋkpilib mun nìn ká u-nimpuu gbanti ní ki cūtìi máafì Faaroo unimpuee nyaaŋku pu, ki yōoǹ-u ki cáa cūnnì Faaroo cindi. 16 U-puee, Faaroo fōō Abram tiŋan, ki tīī-u ipii nì inaa nì mmamu nì bitɔntɔnliibi bininjab nì binimpoobi, nì mmansalimu nì igutaamu. 17 Ama ní Abram nimpuu Saarayi puee, ti-Dindaan yāntì iweeŋkpaan iba dɔ́miń ki jéetì Faaroo nì u-cindi yab kɔkɔ pu. 18 Niinee ní Faaroo yíiń Abram ní ki bālifì-u yii: «Ba ŋá ní a ŋá-mi mimmee? Ba pu ní saa tùkū-mi yii unimpu nee sá a-nimpuu? 19 Ba pu ní a bí yii u sá a-niisal ki yāntì m dū-u ki kpántì m-nimpuu? Too, a-nimpuu sèé! Fōō a-wanti kí kpáàá yīkì.»

20 Ní Faaroo pú u-yab kinyɔkɔ yii bí nyāntí u nì u-nimpuu, ú kpáaǹ u-wanti tin u cááyee kɔkɔ nì u-nimpuu kí nīn cá.