Dinyeel 39

Jooseefi bí Pootifaar cee Eejipiti

1 Isimaayeel yab cáá Jooseefi ki cūnnì Eejipitee ní Faaroo janjakpiliu Pootifaar, ueejipitija dá-u bi-cee. Pootifaar gbanti di nìn sá bin cí Faaroo cindee kpiliu. 2 Ti-Dindaan nìn yú Jooseefi boon^a ní tin kɔkɔ u ŋáańee nìn còom̄-u tiŋan. U nìn kóò u-kpiliu ueejipitijee dumpu ní. 3 Jooseefi kpiliu nìn dáań ki ká yii ti-Dindaan yú u-boon, ki yàntī tin kɔkɔ u ŋáańee cá nyɔkɔpu. 4 An puee Jooseefi nìn ká diyimɔɔl u-kpiliu cee u dū-u ki kpántì úǹ u-ba tɔntɔnliu, ní ki dū-u ki ŋá ukpil ú nīn kpèé u-cindi poon tuuŋŋi nì tin kɔkɔ u cááyee. 5 Kí yòon̄ ŋyunti ŋun Pootifaar dū Jooseefi ki kāaǹ tikpiti ú nīn kpèé u-cindi nì u-wanti kɔkɔee, ní Jooseefi puee, ti-Dindaan bīiǹ ueejipitijee dicaŋku pu, ní ki bīiǹ ki kpáaǹ tin kɔkɔ u nìn cáá u-cindi nì u-satinee pu. 6 U ká mimmee ní ki dū tikɔkɔ nì tikɔkɔ ki ŋá Jooseefi ŋaan kaa ti pée kpèé báà tiba, asee tijin tin u làá jēe baba pu ní u dàkafī.

Jooseefi nì u-kpiliu nimpuu bɔti

Jooseefi nìn yáà unil ní ki nìn ŋān̄ unaacimpɔɔn an kaa cáá bí lì. 7 An dāa bāań ŋyunti ŋubɔee ní u-kpiliu nimpuu dū u-nimbiliŋ ki mántì u-pu ní ki bí-u yii: «Dāan̄ kí dòon̄ nì mi.» 8 Ní u yíì, ní ki bí u-kpiliu nimpuu yii: «Kpèè, man ní m-kpiliu dū dicindi tundi kɔkɔ ki ŋúbiǹ. U cáá m-pu dimákal, an puee waa ti kpèé tiba dicindi poon. 9 Ubɔ kaa jítiǹ-mi dicindi nee poon. U pú-mi nsan ḿ ŋá tikɔkɔ, asee sii baba ní maa máaǹ kí gbēē, kun puee a sá u-nimpuu. An puee maa ŋūǹ kí ŋá ikpitikpaan gbanti kí yìntīǹ Unimbɔti.» 10 Baabadal unimpuee pée páb̀ Jooseefi ní yii ú dòon̄ nì u, ama ní úǹ kaa pílifíǹ-u.

11 Dalbee Jooseefi kɔ́ kudii poon ki bíi tūǹ ditundi báà ubɔ nì ubɔ kpá. 12 Niinee ní unimpuee cúú Jooseefi bɔkutil ní ki bí-u yii: «Dòon̄ nì mi!» Ní Jooseefi sáǹ ki nyáń mmɔŋki ki yāntì u-bɔkutil unimpuee ŋaan. 13 Unimpuee nín ká yii dibɔkutil gbíntì u-ŋaan Jooseefi sáǹ ki nyáńee, 14 ní u yíiń dicindin nib, ní ki bí-bi yii: «Dāá kpèèmaan! Bi cáań-ti ueebruja ú nīn cáá-ti ki gbíilíǹ ní! U dɔ́miń kí bàà dòon̄ nì man dee ní m fáá mbiil. 15 U nín gbìl̄ m fáá mbiilee ní u sáǹ ki nín nyēē ki fá u-bɔkutil.»

16 Ní u dū Jooseefi bɔkutilee ki bíl̀ ki kɔ́ĺ u-ba u-cal ń bàń. 17 U-cal Pootifaar dāa bāańee ní u gíiǹ ki téeǹ míǹ mbaantiim yii: «Ueebruja uyumbu un a cáań-tee dɔ́miń kí dòon̄ nì mi. 18 Ŋyunti ŋun m fáá mbiilee ní u sáǹ ki fá u-bɔkutil m-cee.» 19 Jooseefi kpiliu nín gbìl̄ u-nimpuu sòon̄ ki lī yii: «Kpèè a-yumbuuee nín ŋá-mi puee!» ní u fōō diŋuul tikpil. 20 Ní u yāntì bi cúú Jooseefi ki cáa tɔ́ sarka laakin ubɔti nìn pìintí bin yīntiǹ-uee.

Jooseefi bí sarka

Jooseefi kpántì usarkadaan. 21 Ama ti-Dindaan nìn yú Jooseefi boon sarkan, ki dàkā-u u-ŋanti ní ki yāntì u ká diyimɔɔl ujanjakpil un kpèé bisarkadambee cee. 22 Ujanjakpilee nìn dū bisarkadambi kɔkɔ ní ki ŋúbiǹ Jooseefi. Úǹ di nìn kpèé atuun ŋin kɔkɔ bi nìn tūǹee. 23 Ujanjakpilee kaa nìn gíti kpèé atuun ŋin u nìn dūu ŋúbiǹ Jooseefee, kun puee ti-Dindaan nìn yú Jooseefi boon ní ki yàntī u-tuuŋŋi kɔkɔ còom̄-u tiŋan.