Akoobil 14

Unyaŋgbanti jɔkɔnti fíntitam marab

1 Ti-Dindaan sòon̄ nì Mooyiisi ki bí yii:

2 «Unyaŋgbanti yaa pɔ́ɔkèe, saraabi bin u máaǹ kí ŋá ní kí nyā u-weeŋyi jɔkɔntinee sɔ̀. Bi yaa cáań-u usaraaŋal ceeyee^a, 3 ní úǹ ń nyā dinaapaal kpaanceetiŋu kí kpèè-u. Unyaŋgbantee yaa lafun pɔ́ɔkèe, 4 ní usaraaŋal ń yàntī bí cáań ubunlee yil pu nnɔmbiyaamu mun ŋān̄ bí dūú ŋá saraayee muli nì mu-nimbiliŋ nì busubu bun bi yíì yii seediree dɔŋu nì gulfaman nì kifaapibiki kin bi yíì isɔpee^b. 5 Usaraaŋal ń yàntī bí làntì nnɔmbiyaamuee kiba kí dū ki-fatikuu kí ŋá ditansambil din poon nnyimbul nnyim kēe. 6 Ní ú yòon̄ kinɔmbiki kin kíǹee nì seedir dɔŋuee nì gulfamanee nì isɔpi faapibikee kí dūú bɔ̄ kinɔmbiki kin bi lāntèe fatikuun. 7 Niinee ní ú dū fatikuee kí yàaǹ un bi bíi ŋáań saraa kí fíntí u-jɔkɔntee pu ŋfunyɔm miluli. Míǹ boonee ní ú sòoǹ báà ŋma ń gbìl̄ yii udaan nyáń tijɔkɔndin ní kí gíiǹ kinɔmbiki kin baa kūūyee kí líí tisati watil pú. 8 Un bi ŋá saraa ki fíntì u-jɔkɔntee máaǹ kí fíntí u-wampeeŋkaati, kí kòol̀ u-wunti kɔkɔ pu kuti, kí fàl̀ ní kí nín nyā tijɔkɔndin. Míǹ boonee, u ŋūǹ kí gítí dinaapaal pu, ama waa nín máaǹ kí kɔ́ u-tantiu poon kí cáá sāā iwiin iluli ní. 9 Iwiin iluli dalee ní ú kòol̀ u-wunti kɔkɔ pu kuti, an dàkà yii u-yikpiti nì u-nyimpul nì u-niŋgbuŋkooŋyi nì tikuti tin pée bí u-wunti puee, ní kí fíntí u-wampeeŋkaati, kí fàl̀ ní kí nín nyā tijɔkɔndin.

10 «Iwiin inii dalee, ú cáań apibil ŋin laaba kaa wɔ̀b̄ee ali nì dibindi diba pisaliu un laaba kaa wɔ̀b̄ee, nì ŋyim min bi dū ŋkpam ki búuńee kiiloobi biwa nì ŋkpam liitiri dijandi. 11 Usaraaŋal un bíi ŋáań saraa gbantee ń dū un jɔkɔnti bi bíi fíntée nì saraabi bin u cáańee kɔkɔ kí síiń circir kɔŋkooŋŋu punyɔkɔki nyɔkɔpu. 12 Ú yòon̄ apibilee kansikin din bi làá dūú ŋá dibɔkpil saraauee nì ŋkpam liitiri dijandee yilpu kí fíiǹ fíiǹ ti-Dindaan nimbiin. 13 U yaa ŋá míǹ ki dóòyee ní ú làntì dipibilee laakin bi làntī ikpiti pɔ̄tam saraau nì saraawɔkaa waŋkutee, circir paaŋŋu laŋki gbanti. Di sá yii dibɔkpil saraau nì ikpiti pɔ̄tam saraau nanti sá ki tīī usaraaŋal ní. An sá circir páaa wanti ní. 14 Usaraaŋal ń dū dipibilee fatikuu kí jōō un jɔkɔnti bi bíi fíntée tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu. 15 Míǹ boonee ní ú bàtī ŋkpam kí ŋá u-ŋantilin ŋgan yal. 16 Ú dū u-ŋaŋgiiŋambiki kí sēē ŋkpam min kā u-ŋantil ŋgan yal poonee kí yàaǹ ŋfunyɔm miluli ti-Dindaan nimbiin. 17 Ú tí sēē ŋkpam min kíǹ ki kā u-ŋantilinee kí dūú jōō kijapaayee tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu, laakin u bàà dū dibɔkpil saraau fatikuu ki jōōyee táb. 18 Míǹ boonee ní ú dū ŋkpam min kíǹ ki kā u-ŋantilinee kí sìtī un saraau bi bíi ŋáańee yil pu ní kí ŋá dikoobil nín bālifì puee ti-Dindaan nimbiin kí fíntí udaan kpitii. 19 Usaraaŋal ń ŋá ikpiti pɔ̄tam saraau ní kí ŋá dikoobil nín sá puee kí fíntí kijapaayee ú nyā u-jɔkɔntin. U yaa ŋá míǹ ki dóòyee ní kí làntì saraawɔkaa waŋkuluku. 20 Ú yòon̄ saraawɔkaayee kɔkɔ nì tijimpin saraau kí cáá wà ŋŋmi nsaraafan pu. Niinee ní ú gíti ŋá dikoobil nín sá puee kí fíntí udaan kpitii ú nyā tijɔkɔndin.»

Unyaŋgbanti un kaa cáá ŋŋmamee saraabi

21 «Ama udaan yaa sá usoodaan ní kaa cáá ŋŋmam kí ŋmā kí ká tin kɔkɔ bi bālifèe, ú cáań dipibil dibaba kí ŋá dibɔkpil saraau ní bí ŋá dikoobil nín sá puee kí fíntí u-jɔkɔnti. Ú cáań ŋyim min bi dū ŋkpam ki búuńee kiiloobi bita kí ŋá tijimpin saraau, nì ŋkpam liitiri dijandi. 22 Ú cáań ananjil ali àá abeenanjil ali kí nóó nì tin u ŋūǹ kí kée. Bí dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa. 23 Iwiin inii dalee, ú cáań saraabi gbanti kɔkɔ kí tīī usaraaŋal, circir kɔŋkooŋŋu punyɔkɔki nyɔkɔpu, ti-Dindaan nimbiin, bí dūú ŋá saraa kí fíntí u-jɔkɔnti. 24 Usaraaŋal ń yòon̄ dibɔkpil saraau pibil nì ŋkpamee yilpu kí fíiǹ fíiǹ ti-Dindaan nimbiin. 25 U yaa ŋá míǹ ki dóòyee ní ú làntì dipibilee ní kí dū di-fatikuu kí jōō un bi bíi fíntí u-jɔkɔntee tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu. 26 Ú bàtī ŋkpam kí ŋá u-ŋantil ŋgan yal poon. 27 Ú dū u-ŋambidakakaai ŋgiil yal kí sēē ŋkpam min kā u-ŋantil ŋgan yal poonee kí yàaǹ ti-Dindaan nimbiin ŋfunyɔm miluli. 28 Míǹ boonee ní ú dū ŋkpam min kā u-ŋantilinee kí jōō un jɔkɔnti u bíi fíntée tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu laakin u bàà dū dibɔkpil saraau fatikuu ki jōōyee táb. 29 Ŋkpam min kíǹ ki kā u-ŋantilinee, ú dūú sìtī kijapaayee yil pu kí ŋá kii mara nín bālifì puee ti-Dindaan nimbiin kí fíntí udaan jɔkɔnti. 30 U yaa ŋá míǹ ki dóòyee ní ú lēē ananjilee àá abeenanjilee diba, kí nóó nì tin udaan ŋúń ki cáańee. 31 Ú dū-dì kí ŋá ikpiti pɔ̄tam saraau ní kí dū din kíǹee kí ŋá saraawɔkaa, ní kí dū tijimpin saraau kí kūtì. Niinee ní usaraaŋal ń ŋá dikoobil nín bālifì puee ti-Dindaan nimbiin kí fíntí udaan jɔkɔnti.»

32 Unyaŋgbanti un kaa cáá ŋŋmam kí cáań tin u máaǹ kí cáańee nín ŋáań saraabi bin kí nyā u-jɔkɔntinee marab dee.

Dinyaŋgbandi din tòó adiin puee marab

33 Ti-Dindaan sòon̄ nì Mooyiisi nì Aarɔn yii:

34 «Ni yaa láa kɔ́ Kanaan tiŋki kin m làá dūú tīī-ni ní nīn kíǹ ki yèe poon, ní m yaa láa yāntì dinyaŋgbandi daaŋku nyáń kitiŋ kin poon ni kóòyee diiku kubɔ puee, 35 un yì kudii gbantee ń dāá cùú ká usaraaŋal kí tùkù-u yii: <An bí-mi kii dinyaŋgbandi daaŋku bí m-diiku puee.> 36 Usaraaŋal ń yàntī bí kóoǹ tin kɔkɔ pée bí kudii gbanti poonee kí nyāntí ní ú nín cù kí kpèè kudaaŋŋuee. Mimmee tin kɔkɔ bí ku-nee kaa kóò tijɔkɔndi. Míǹ boonee ní usaraaŋal ń kɔ́ kí kpèè kudiiyee. 37 U yaa kɔ́ ki kpēē kudaaŋŋuee ní ki ká yii apɔkɔ sɔ̀m̀ gùŋgum, àá an máǹ gàaa ki ŋmɔ́ ki kɔ́ kudii guŋŋi poonee, 38 ní ú nyā kí yūĺ kudiiyee punyɔkɔpu kí dū-ku kí pìin̄ áli iwiin iluli. 39 Iwiin iluli dalee ní usaraaŋal ń fàtīí gítí kí kpèè kudiiyee. U yaa ká yii kudaaŋŋuee lālim̀ kudiiyee guŋŋi puee, 40 ú yàntī bí lēē ataŋkpee ŋin pu ní kudaaŋŋuee kēe kí cáá fá kitiŋ kpaanceetiŋu, laakin bi féeń tin pée kɔ́ tijɔkɔndee. 41 Ú yàntī bí kɔ́tí kudiiyee guŋŋi kɔkɔ poon kí cáá ntam min bi kɔ́tèe kí fá kitiŋ kpaanceetiŋu, tijɔkɔndi paaŋŋuee pu. 42 Míǹ boonee bí nyàab̀ ataŋkpapɔɔn kí téeǹ ŋin bi lēēyee paaŋŋu ní kí fàtīí nyàab̀ ntampɔm kí póoń kudiiyee.

43 «Bi yaa lēē ataŋkpee kudii pu míǹ ki kɔ́tì agun ki fātìi póoń ní míǹ boonee kudaaŋŋuee fātìi nyáńee, 44 usaraaŋal ń fàtīí gítí kí kpèè. Kudaaŋŋuee yaa lālim̀ ki gbí kudii kɔkɔ poonee, an dàkà yii baa ti ŋūǹ kí nyāntí kudaaŋŋuee kudii gbanti pu dee. Kudiiyee kɔ́ tijɔkɔndi. 45 Bí gbá kí wīī kudiiyee, ní kí kóoǹ ku-taŋkpeeŋi nì ku-dɔi nì ku-tampóoŋkaam kɔkɔ kí cáá fá kitiŋ kpaanceetiŋu tijɔkɔndi paaŋŋuee pu.

46 «Ŋyunti ŋun bi pīiǹ kudiiyee, un yaa kɔ́ ku-nee kɔ́ tijɔkɔndi kí cáá sāā kujoou. 47 Un di yaa dōoǹ kudiiyee poon àá ki jíń ku-poon tijinee ń fíntí u-wampeeŋkaati.

48 «Ama ŋyunti ŋun bi fātìi póoń kudiiyee, usaraaŋal yaa gítì ki kpēē ní ki ká yii kudaaŋŋuee kaa fātìi nyáńee, ú sòoǹ báà ŋma ń gbìl̄ yii kudiiyee nyáń tijɔkɔndin, kun puee kudaaŋŋuee wáŋkì.

49 «Usaraaŋal yaa làá ŋá saraabi kí nyāntí kudiiyee tijɔkɔndinee, ú yòon̄ nnɔmbiyaamu muli nì busubu bun bi yíì yii seediree dɔŋu nì gulfaman nì kifaapibiki kin bi yíì isɔpee. 50 Ú yàntī bí làntì nnɔmbiyaamuee kiba kí dū ki-fatikuu kí ŋá ditansambil din poon nnyimbul nyim kēe. 51 Míǹ boonee ní ú yòon̄ kinɔmbiki kin kíǹee nì seedir dɔŋuee nì gulfamanee nì isɔpi faapibikee kí dūú bɔ̄ kinɔmbiki kin bi lāntèe fatikuu nì nnyimbul nyimee ni, kí yàaǹ kudiiyee pu ŋfunyɔm miluli. 52 Míǹ ní usaraaŋal máaǹ kí ŋá ní kí dū kinɔmbikee fatikuu nì nnyimbul nyimee nì kinɔmbiki kin kíǹee nì seedir dɔŋuee nì isɔpi faapibikee nì gulfaman cínciŋee kí fíntí kudiiyee kí nyāntí-ku ku-jɔkɔntin. 53 Ú dāá gíiǹ kinɔmbiki kin kíǹ baa kūūyee kí líí tisati watil pú. Míǹ boonee ní ú ŋá akoobil nín sá puee kí fíntí kudiiyee kí nyāntí ku-jɔkɔntin ní kú lafun nyā tijɔkɔndin.»

54 Marab bin bi síiǹ dinyaŋgbandi nì kideeŋŋi, 55 nì kudaaŋŋu kun tòó tiwampeeŋkaal nì adiin ki náań nì dinyaŋgbandee, 56 nì ndulim nì tikalindi nì unil wunti laaba yaa líkitì ki máǹee puee dee. 57 Marab gbanti di nìn yàntī bi béetí yii unil, àá tiwan kɔ́ tijɔkɔndi àá tàa kɔ́. Marab bin bi nìn síiǹ dinyaŋgbandi puee dee.