Akoobil 25

Dibindi din tikpaatan máaǹ kí dòon̄ kí ŋùŋfèe

1 Ti-Dindaan sòon̄ nì Mooyiisi Siinaayi jool pu ki bí 2 ú tùkù Isirayeel yab yii:

«Ni yaa láa kɔ́ kitiŋ kin m làá dūú tīī-nee poonee, dibinluluútiil kamaayee, ní dāá yàntī kí taa kpɔ̀ ni-kpaatanti kí tīī man ni-Dindaan tinyool. 3 Ní dāá dū abin aluu kí kpɔ̀ kí bɔ̄l̀ ni-sati, kí ŋāŋkì ni-fiinyi sufii paŋŋi ní kí kìtī abil. 4 Ama dibinluluútiilee, ní dāá yàntī ni-kpaatanti ń dòon̄ kí ŋùŋfì. Ní dāá dū dibindi gbanti kí sú man ni-Dindaan. Ní taa láa kpɔ̀ kí bɔ̄l̀ ni-sati, kí taa ŋāŋkì ni-fiinyi sufii paŋŋi. 5 Ní taa láa cā dibindi din jítèe jinti tin sá aleenee àá kí kìtī ni-fiinyi sufii paŋŋi ŋin naa ŋáŋkèe pu abil, kun puee an dāa sá dibindi din tikpaatan máaǹ kí dòon̄ kí ŋùŋfèe ní. 6 Ama nimbi ni-ba nì ni-tɔntɔnliibi bininjab nì binimpoobi nì ni-paadambi nì bin kóò ni-puee dāa ŋūǹ kí jī tin kitiŋ làá dāá lòoǹ dibindi gbantee. 7 Míǹ mbaantiim ní ni-waŋkuti nì ipeel in bí ni-tiŋkinee mun dāa ŋūǹ kí jī tin ni-tiŋki làá dāá lòoǹee^a.»

Dibatɔl bindi

8 «Ní kàaǹ abin aluli miluli pu, an dàkà yii dibindi diba kpá ili nì saalaa. 9 Uŋmaluluúti, iwiin saalaa dal, an dàkà yii ikpiti pɔ̄tam wiŋkpaaŋŋu dalee, ní búń ŋyin kí fáá iwiliili kitiŋ kɔkɔ poon. 10 Ni yaa ŋá mimmee, ni dū dibindi ili nì disaalaatiilee ki sú Unimbɔti dee, ní kí bāakì kitiŋ kɔkɔ poon yii báà ŋma ń fōō u-ba. Dibindi gbanti ní bi yíì yii dibatɔl bindi. Báà ŋma ń dāá fàtīí fōō u-kpaatanti tin u nìn dūu nyáfèe, ní bin nìn dū bi-ba ki nyáfèe ń fàtīí kpì bi-dumpui. 11 Abin ili nì disaalaatiil sá dibatɔl bindi ní ki tīī-ni. Ní taa kpɔ̀ kí bɔ̄l̀ tiba, kí taa cā dibindi din jítèe jinti tin sá aleenee àá kí kìtī ni-fiinyi sufii paŋŋi ŋin naa ŋáŋkèe pu abil. 12 Di sá yii an sá dibatɔl bindi ní bi dūu sú ti-Dindaan. Ni ŋūǹ kí jī tin kitiŋ làá dāá lòoǹee.

13 «Dibatɔl bindi gbanti poonee, báà ŋma ń fàtīí fōō u-kpaatanti tin u nìn dūu nyáfèe. 14 Ni yaa bíi nyáfíǹ ni-nabiki tikpaatan àá ni bíi dāā u-cee tikpaatanee, ní taa mùul̀ tɔb. 15 Tikpaatanee daaku ń nóó nì abin ŋin páaǹ dibatɔl bindi din jítèe puee, ní kí kpèè ŋin kíǹ bí kpɔ̀ tikpaatanee pu ní dibatɔl bindi dipɔndi ń nín bàńee. 16 Abin yaa kíǹ ki náaǹee, kudaau mun máaǹ kí nīn pɔ̄ɔ̄ ní, ní abin ŋin kíǹee yaa kaa ti náaǹee, kudaau ń nīn pɔ̀fì, kun puee abin ŋin kíǹ ní kpɔ̀ tikpaatanee puee ní ni máaǹ kí kpèè ní kí nyāfiǹ-u. 17 Ni-kansikin ubɔ ń taa mùul̀ u-nabiki, ama ní fàŋkì man ni-Nimbɔtiu, kun puee man di sá ni-Dindaan ni-Nimbɔtiu. 18 Nín̄ ŋúb́maan m-bɔkpaaŋi nì m-koobiliŋ kí ŋá ŋi nín lī puee, án di làá yàntī ní kàl̄ kitiŋ nee poon nì ŋgbansɔŋfi. 19 Kitiŋ làá dāá lòoǹ mmɔntiim ní ká kí jī kí díkí, ní kí dāá kàl̄ ki-poon nì ŋgbansɔŋfi.

20 «An yaa yíì ni ŋūǹ kí bàlifì ni-ba yii: <Ti nín kaa cáá nsan kí kpɔ̀ kí bɔ̄l̀ ti-sati, kaa tí cáá nsan kí cā dibinluluútiil kamaa nee, kin ba ní ti làá nīn jīǹ dee?> 21 Tiŋman, m làá dāá bìin̄ ni-boon ní dibinluluutiil ń lòoǹ abin ata jinti. 22 Ni dāa bí ki būul̀ dibinniniitiil poon ní ki jīǹ tijiŋkpikil kí cáá sāā dibiŋwawatiil poon, ŋyunti ŋun ni làá dāá cā tijimpɔnee.»

Unil cáá nsan kí fàtīí dā u-tiŋki

23 Ní taa nyāfì kitiŋ katanjoolii, di sá yii man di yì kitiŋ. Nimbi kóò man pu kii binikɔkaabi àá binicambee ní. 24 An puee kitiŋ kin m làá dūú tīī-nee kɔkɔ poonee, ní dāá pɔ̄ un dū u-tiŋki ki nyáfèe nsan ú dāá fàtīí dā-kì.

25 Disool yaa cúú ni-nabiyaamu kansikin kiba ní kì gíí ki-kpaatanti dijandi ki nyáfèe, udaan nabiki u nì un pēē udaan cáá nsan kí fàtīí dā tikpaatan gbantee ń dā-tì. 26 Udaan yaa kaa cáá u nì un pēēyee ń fàtīí dā kitiŋee, ama ní úǹ u-ba ká ŋŋmam kí fàtīí dēe, 27 ú cɔ́tí u nín nyáfì kitiŋee abin nín nyáń puee, kí pà abin ŋin kíǹ dibatɔl bindi ń nín bàńee nimbiliŋ kí tīī un u nìn dū u-tiŋki ki nyáfiǹee, ní kí fàtīí fōō u-tiŋki. 28 Ama úǹ u-ba yaa kaa ká ŋŋmam kí pà kí fàtīí fōō u-tiŋkee, kí gbíntí un di dá-kèe ŋaan kí cáá sāā dibatɔl bindi. Dibatɔl bindi gbanti poonee, ú fàtīí fōō u-tiŋki.

29 Kudii yaa bí kitiŋ kin bi máń digundi ki māntìi túee poon ní ubɔ dū-ku ki nyáfèe, udaan cáá dibimmɔndi kí fàtīí dā-ku. An kaa máaǹ kí jītí dibindi pu, kí kíĺ ŋwiin ŋun u dū-ku ki nyáfèe. 30 Dibimmɔndi yaa jítì ní un nyáfì kudiiyee kaa ŋúń ki fātìi dá-kuee, un di dá kudiiyee nì u-naantiibi di kíǹ ki yì-ku kí nīn cá talku. An kaa ti bàlifī yii ú gíiǹ kudiiyee kí tīī un cee u nìn dée dibatɔl bindin. 31 Ama adiin ŋin bí ntimbilimu mun baa máń digundi ki māntìi túee poonee ŋman bí kii tikpaatanee dee. Bi cáá nsan kí fàtīí dā-ŋi, ní dibatɔl bindi poonee, bí fàtīí fōō-ŋi.

32 Leefii yab bíǹ cáá nsan ŋyunti ŋun ní bi yaa lèe kí fàtīí dā bi-diiŋŋi ŋin yú bi-timmu poon bi dūu nyáfèe^b. 33 Báà gba Leefii yab ubɔ di yaa fātìi dá u-juti uleefiija cee kudii ní dibatɔl bindi yaa bāańee, an sá ú nyā ní kí gíiǹ kudiiyee kí tīī ku-dindaan. Di sá yii Leefii yab diiŋŋi sá bi-fakal ní Isirayeel yab kansikin. 34 Ama tikpaatan tin māntìi tú ntimu mun poon bi kóòyee, baa máaǹ kí dūú nyāfì. Di sá yii an sá bi-wanti ní kí nīn cá talku.

An nín máaǹ bí pìnnì usoodaan tiwan puee

35 «A-nabiki yaa kpántì usoodaan kaa ti ŋūǹ kí kpèè u-bee, á tūtuǹ-u, kí tīī-u ú jī kí ŋmátí. An yaa sá unicaaneeee, unikɔkaayeeee, á ŋá míǹ kí tīī-u^c. 36 Á taa yàntī ú dāá téeǹ-si kí jītíǹ tin a tīī-uee pu, ama á fàŋkì man Unimbɔti, kí yàntī ú nīn bí ki kɔ́ĺ-si. 37 Á taa pìnnì a-nabiki animbil kí yàntī ú dāá téeǹ-si kí páań, kí taa tí pìnnì-u tijin ú dāá téeǹ-si kí páań^d. 38 Man di sá ni-Dindaan, ni-Nimbɔtiu un di nyántìń-ni Eejipiti tiŋkin ki dū Kanaan tiŋki ki tīī-ni, án nín làá ŋá pu ḿ nīn sá ni-Nimbɔtiuee.»

Bi ŋūǹ kí fàtīí dā un dū u-ba ki nyáfèe

39 «A-nabiki yaa kpántì usoodaan ní ki dū u-ba ki nyáfiǹ-see, á taa tīī-u ditundi din sá uyumbu tundee. 40 Nín̄ ŋúb́-u kii bi nín ŋúb̀ upaadaan àá unikɔkaa puee. Ú nīn bí a-cee ki tūǹ ditundi kí cáá sāā dibatɔl bindi. 41 Ŋyunti gbantee, u tɔ́ u-ba ki kpáaǹ u-biyaamu kí fàtīí gítí u-dicaŋkun, u-baabi timmun. 42 Di sá yii Isirayeel yab bin m nyántìń Eejipiti tiŋkinee sá man tɔntɔnliibi ní. Baa ti máaǹ kí dū-bi kí nyāfì kii bi nín nyáfí iyumbu puee. 43 Ní fàŋkìmaan man ni-Nimbɔtiu kí taa wɔ́b́-bi.

44 «Ni yaa là kí nīn cáá iyumbu, bininjab nì binimpoobee, atimbun ŋin māntìi tú-nee yab cee ní ní dā-i. 45 Ni tí ŋūǹ kí dā binicambi bin kóò ni-kansikinee nì bi-dicaŋŋi poon mbiyaamu mun bi màl̄ ni-tiŋkinee bí kpántí ni-yumbui ní nīn yì. 46 Ni-kpátam boonee, bí kpántí ni-biyaamu fakal bí nīn yì. Bimbee, ni ŋūǹ kí yàntī bí nīn sá iyumbu kí nīn cá jaanjaan, ama ni-kansikin ubɔ ń taa wɔ́b́ u-nabiki kin sá Isirayeel yab kansikinee ubɔ^e.

47 «Unicaan àá binikɔkaabi bin kóò ni-puee ubɔ yaa kpántì ugaaja ní disool cúú ni-nabiki kiba ní udaan dū u-ba ki nyáfiǹ ugaajee àá u-dicaŋkun yab ubɔee, 48 an pú nsan bí fàtīí dā-u kí líí. U-nabiki kiba ń fàtīí dā-u kí líí. 49 U yaa kaa cáá u nì un pēē kiŋkiŋee, u-baawaai àá u-baawaai jipɔɔn àá u nì un pēē mmaalee ubɔ ŋūǹ kí dā-u kí líí. Úǹ u-ba yaa tí ká ŋŋmam, u ŋūǹ kí dā u-ba kí líí. 50 U nì un dá-uee dāa kàal̀ ní kí cɔ́tí kí kpèè yii, kí yòon̄ ŋwiin ŋun u dū u-ba ki nyáfiǹ-uee kí cáá sāā dibatɔl bindee, abin ŋin nyɔkɔm an nyáńee. Míǹ boonee ní bí cɔ́tí kí kpèè ŋin kíǹ dibatɔl bindi ń nín bàńee, ní ú pà míǹ kí nóó nì upaadaan nín fòol̄ pu ŋwiinee. 51 Abin ŋin kíǹee yaa náaǹee, ú nyàab̀ un dá-uee nimbiliŋ dijaŋkpaandi kí tīī-u. 52 Abin ŋin kíǹ dibatɔl bindi ń nín bàńee yaa kaa ti náaǹee, ú cɔ́tí kí kpèè abin gbanti nimbiliŋ kí téeǹ-u. 53 Ama ŋyunti ŋun ní u dáá bí u-kpiliu ceeyee, u ŋman sá kii upaadaanee ní, kí nīn fòol̄ dibindi kamaa u-paati. Ní taa yàntī u-kpiliu ń nīn wɔ́b̀-u ni kā ki kpèé. 54 U-nabiki yaa kaa ŋúń ki dá-u ki líì ní úǹ u-ba kaa ŋúń ki dá u-ba ki líì ní dibatɔl bindi yaa dūu bāańee, u nì u-dicaŋku kɔkɔ fōō bi-ba.»

Man di sá ni-Dindaan ni-Nimbɔtiu

55 «Tiŋman, Isirayeel yab sá man tɔntɔnliibi ní. Bi lafun sá man tɔntɔnliibi, di sá yii man di nyántìń-bi Eejipiti tiŋkin. Man di sá ni-Dindaan ni-Nimbɔtiu.