Bibɔsoonliibi Gbɔŋku 5

Deeboora laŋŋu

1 Ŋwiin gbantee, Deeboora nì Abinoowaam jipɔɔn Baraaki nìn gāā nlan nee yii:

2 «Isirayeel tiŋkinee, bijanjaliibi nín bɔ́ntì ki cūtì kujaau puee,

samaa nín lēē nì dipɔbil diba ki cūtì kujaau puee,

Jāam̀maan ti-Dindaan!

3 Bibɔtiibi, pīlifìmaan!

Biyidambi, kpòom̄maan ni-tafaliŋ!

Man làá gāā ilan kí pàkà ti-Dindaan,

m làá nyɔ̄ŋkì ti-Dindaan Isirayeel Nimbɔtiu.

4 Ti-Dindaan, a nín nìn nyánní Seeyiir^a tiŋkinee,

a nín nìn yíkìń Eedoom satin ki dòońee,

kitiŋ nìn cīŋkì ní kutagbɔŋu cúu pīitì,

ní nnyim nyēeń atagbanni ki sìtīń taapu.

5 Ajoon nìn wūtì sii Siinaayi jool^b Dindaaŋwu nimbiin,

ŋi nìn wūtì sii ti-Dindaan Isirayeel Nimbɔtiu nimbiin.

6 Anaati jipɔɔn Samgaar nì Jaayeel yuntiŋuee,

binib kaa nìn gíti kàal̀ igutaamu ki còom̄ isanjaa pu,

bisaŋkinliibi nìn kíǹ ki pāantí ipampa ní ki jītí.

7 Binib nìn sáǹ ki nyáń ntimun ní mu kíǹ ki dɔ̄ fám.

Binib nìn sáǹ ki fá Isirayeel timmu

ki tin cáa sāā ŋyunti ŋun sii Deeboora dāa yíkì yilpuee,

ki tin sāā ŋyunti ŋun ní a yíkì kii ubinaati Isirayeel tiŋkinee.

8 Isirayeel yab nìn lēē inimbɔtipɔɔn ki jáaḿ,

an di yì-tì ní kujaau bāań ki gūū bi-timmu punyɔmmu.

Ama an nìn pɔ̄ɔ̄ á ká digbampɔɔl àá kikpaŋ

kí tīī binib kutukub imuŋku inaa Isirayeel tiŋkin.

9 M-pɔbil bí Isirayeel kpilib cee,

bin dū bi-ba ki sú samaa kansikinee.

Jāam̀maan ti-Dindaan!

10 Nimbi bin kàal̀ mmansapimu puee,

nimbi bin kàal̀ tisatakampati puee,

nimbi bin còom̄ adan puee,

dàkafìmaan.

11 Laakin bi cáǹ tiwaŋkuti ki nyùntī-tèe,

biwaŋkpaaliibi bíi máafí ti-Dindaan deedee tuuŋŋi bɔti,

deedee tuuŋŋi ŋin ní u ŋáaǹ Isirayeel tiŋkinee.

Niinee ní ti-Dindaan nibul nyáń

ki cūtìi kpáfì kitiŋ punyɔkɔpui.

12 Deeboora, fìntim̄eeee, fìntīmaan!

Fìntī malaa kí tóoń njanjalan.

Baraaki, yīkìm̄!

Kpáaǹ bin a cúú kuyuŋuee, Abinoowaam jipɔɔn.

13 Isirayeel yab bin kíǹ kaa kpíìyee

kpáfì ki kpákatì abɔtibil cee.

Ti-Dindaan nibul kpáfì nì bibaatandambi

ki kpákatìń m-cee.

14 Eefiraayiim naakookun yab kansikin ní bin jáń ki pɔ́ɔkiǹ Amaleeki yabee nyánní.

Beenjameen naakookun yab páaǹ bi-boon ki

kpákatì nì bi-janjaliibi.

Makiir yab kansikin ní bi lēē bijanjakpilib,

ní ki lēē Sabulɔn naakookun yab kansikin bikpootiliibi.

15 Isakaar kpilib bí Deeboora cee.

Isakaar naakookun yab bí Baraaki jandi,

ki páaǹ u-boon ki cūtì ditantakalin.

«Ama Rubeen naakookun yab nín pēē pēē mmaal puee bíǹ

kā ki kpákà an kaa kúntí.

16 Ba ŋá ní sii gbíntì awaŋgul ali kansikin

ki pílifí bi nín búǹ awul ki yíì tiwaŋkuti puee?

Rubeen naakookun yab nín pēē pēē mmaal puee bíǹ

lafun kā ki kpákà an kaa kúntí.

17 Galaadi tiŋki bí Jɔɔdan buŋgbandi ŋwìiń nyalaŋki pú ní.

Ba di ŋá ní Daani naakookun yab kóò meelabin ní?

Aseer naakookun yab kāl̀ tiŋku caŋin,

ki kóò ki pìlīǹ laakin meelab yūlifée.

18 Sabulɔn naakookun yab nì Neefitalii naakookun yab

di sá binib bin kaa fāŋkì ŋkúm,

ki jɔ́m̀ dikɔmbool pu ki jáń kujaauee.

19 Bibɔtiibi dɔ́miń ki jáń kujaau,

Kanaan bɔtiibi jáń kujaau

Taanaki tiŋkin, Meegiidoo nyiŋfii caŋin.

Ama baa ká animbil kúti ki yōoǹ.

20 Iŋmalbijaa kālìń yilpu ki jáń kujaau,

i kālìń i-laŋki kutagbɔŋu pu ki jáń nì Siiseela.

21 Kiisɔn buŋŋu yōoǹ bi-kɔkɔ ki cáa búntì,

cannaaku buŋŋu, Kiisɔn buŋŋu dee!

M-naŋki, còom̀ nì tininjati!

22 Niinee ní itaamu kíĺ ditaatandi i-taaŋi gbáà kitiŋ.

i tòó ki tòó kii kpaŋkpakantiku taamuuyee.»

23 Ti-Dindaan tuuŋŋu bí yii:

«Ní tɔ̄ Meeroosi tiŋki mbusu,

ní tɔ̄ kitiŋ gbanti nib mbusu ŋkpitim pu,

kun puee baa nyáń ki tútúǹ ti-Dindaan,

baa tútúǹ ti-Dindaan nì bibaatandambi.

24 Binimpoobi kansikinee, bí nyɔ̄ŋkì Jaayeel,

Eebeer un sá Keeni maaliŋunee nimpuu!

Bí nyɔ̄ŋkì-u binimpoobi bin pée kóò

tantibinee kɔkɔwoooo kansikin!

25 Siiseela mēē-u nnyim,

ama ní úǹ tīī-u nnaabiim.

U bātì nnaabiim min kìl̄ee

ki sītì-u bibɔtiibi sambinyɔkaakin.

26 Jaayeel tāntì u-ŋal ki cúú dikpakpaal,

ki tāntì u-ŋaŋgiil ki dúkutì bitɔntɔnliibi kújal.

U gbáń ki mátì Siiseela yil,

u sāā u-taŋkpanjil ki cíl̀.

27 Ní Siiseela nyáń ki lítì u-taaŋi taapu ki dōoǹ,

u-taaŋi taapu ní Siiseela nyáń ki lítì.

Laakin u nyáń ki lítèe, niin ní u dōoǹ ki kpíì!

28 «Siiseela na gbóoń tɔkɔla ki kpēē,

tɔkɔla boon ní u bí yii:

<Ba pu ní u-janjatɔrɔkuu kaa bíi bàń malaa ní?

Ba pu ní u-janjatɔrɔkub còomìń soooo míǹ?>

29 Binimpoobi bin bí u-ceeyee

kansikin un cáá iciinee kíí-u,

ní úǹ u-ba bí ki lì ki kùbitī yii:

30 <An yaa yíì bi tin jáń ki ká tiwan ki bíi yàkatī:

ujanjal kamaa tin ká usapɔɔn ubɔ kii bili,

Siiseela tin ká satab bin nyim bí miba mibee,

ujajil tin ká ŋŋaabu ŋun bi gbáń mili puee

kí dūú fìn̄ u-sil.>

31 Ti-Dindaan, yàntī a-nannanliibi kɔkɔ

ń kpú míǹ mbaantiim,

ama bin sá a-bɔɔbee ń nīn bí kii

ŋwìiń nín nyēeń nì ŋu-pɔŋŋu puee!»

Ní Isirayeel tiŋki ká ŋgbansɔŋfi ki tin sāā abin imuŋku ili.