Bibɔsoonliibi Gbɔŋku 7

Unimbɔti lēē binib alaataa ata ki tīī Geedeeyɔn

1 Kutaa wúntì kutaafaau pɔ̀lpɔlee ní Geedeeyɔn un bi páaǹ diyindi yii Yeerubaalee yíkì u nì samaa kɔkɔ ki cūtìi ŋātì dijanjanaapaal Eeni Aroodi buŋŋu caŋin. Madiyan yab bíǹ naapaal nìn bínní ŋgan pú, Mooree gbantaŋki taapu, ditantakalin.

2 Ní ti-Dindaan bí Geedeeyɔn yii: «Binib bin bí a-ceeyee wīikí tikpil ḿ dū Madiyan yab kí ŋá bi-ŋaan, kun puee Isirayeel yab dāa ŋūǹ kí gāā bi-bindi m-nimbiin kí lì yii: <Ti nì ti-pɔŋŋu ní ti jáń ki fīī ti-ba!> 3 An puee á bāakì kí tùkù diniwul kɔkɔ yii: <Ni-kansikin un di yaa fàŋkí u-wunti gbáàyee, udaan ń gbèen̄ Galaadi jool pu doo kí fàtīí nīn gítí!>» Ní binib kutukub mmuŋku nì bili bātì samaa poon ki fātìi nín gítí ní an kíǹ binib kutukub saalaa. 4 Ní ti-Dindaan tùkū Geedeeyɔn yii: «Binib nee dáá gbíntìi wīikí tikpil! Yàntī bí sìntī mbunni ḿ lútí bin làá nóó-see kí tīī-si. Un kamaa ní m yaa bí yii ú nóó-si kí cùee, udaan ń nóó-si. Un ní m yaa tí bí yii ú taa nóó-si kí cùee, udaan ń taa nóó-si.» 5 Ní Geedeeyɔn yāntì binib nín sìntī mbunni ní ti-Dindaan bí-u yii: «Un kamaa làá dū u-limbil kí nyɔ̀ nnyim kii kibɔkɔ nín nyù puee, á gàntī udaan kí yóoń dijandi diba, ní kí gàntī un kamaa yaa gbāaǹ u-tabiŋyiliŋ pu ki nyùn̄ nnyimee kí yóoń dijandi diba mun.» 6 Binib bin nìn dū bi-limbiliŋ ki nyùn̄ nnyim kii iboo nín nyù puee nìn kpáfì binib alaataa ata, ama binib bin nìn kíǹee kɔkɔ nìn gbāaǹ bi-tabiŋyiliŋ pu ní ki nyùn̄ nnyim. 7 Ní ti-Dindaan bí Geedeeyɔn yii: «Binib alaataa ata bin dū bi-limbiliŋ ki nyùn̄ nnyim nee pu ní m làá dī kí fīī-ni ní kí dū Madiyan yab kí ŋá a-ŋaan. Binib bin kíǹee bimbee, báà ŋma ń nīn kùǹ u-dumpu.» 8 Geedeeyɔn nìn yāntì binib alaataa atee gbíntì u-cee ní ki pú binib bin kíǹee kinyɔkɔ bí nīn gítí bi-tantibin. Binib alaataa atee nìn yōoǹ bin nín kùǹee jinti nì bi-yiŋyi.

Madiyan yab naapaal nìn bí Geedeeyɔn yɔŋu taapu ní ditantakalin.

Dijajil daaŋku

9 Kunyeeu gbanti ní ti-Dindaan bí Geedeeyɔn yii: «Yīkì kí sìntī Madiyan yab naapaal pu kí jáǹ-bi, di sá yii m dū-bi ki ŋá a-ŋaan. 10 Ama a yaa fàŋkéee, sii nì a-tɔntɔnliu Puura ń dá láá nóó kí sìntī dijanjanaapaal watil pú dibalin. 11 A yaa bàn̄ niinee, a làá gbìl̄ tin binib bí ki sòoǹee. Án làá tīī-si kunyannyaau ní á ŋmā kí sìntī Madiyan yab naapaal pu kí cùú jáǹ-bi.» Niinee Geedeeyɔn nì u-tɔntɔnliu cōom̀ ki tin gūū Madiyan yab naapaal. 12 Madiyan yab nì Amaleeki yab nì ŋwìiń nyalaŋki pú timmu yab kɔkɔ nìn kpátìi gbí ditantakalin ní bɔ̀mmm, ki wīikí kii inaakitoonee. Baa nìn ŋūǹ kí kàaǹ bi-gutaamui gba, kun puee i nìn wīikí ní tikpil tikpil, kii tiŋku gbandi bul nín wīikí puee. 13 Ŋyunti ŋun Geedeeyɔn bàn̄ee, uninja ubɔ nìn bí ki máafí u-bɔɔ kudamintiiu kun u dámintèe. U nìn bíi lì yii: «Kpèè, m dáá pée dámintì kudamintiiu kubɔ dee. Kudamintiiu gbanti poonee, m ká ɔɔji kpɔnɔu ubɔ bí ki ŋàaǹ ki màntī Madiyan yab naapaal yilpu. Kpɔnɔee ŋàan̄ ki bàn̄ tanti ubɔ ní ki yá-u ki lúkú ní u lábitì ki cìb̄ kitiŋ.» 14 Ní u-bɔɔ kíí-u yii: «Án sɔ̄ kí lā, an máaǹ ki pée sá uisirayeelja Joowaasi jipɔɔn Geedeeyɔn tàataajiki ní a dámintì. Unimbɔti dū Madiyan yab nì bi-janjanaapaal kɔkɔ ki ŋá u-ŋaan dee.» 15 Geedeeyɔn nín gbìl̄ bi máafì kudamintiiuee pu nì bi nín lēē ku-taapu mun puee, ní u gbāaǹ u-tabiŋyiliŋ pu ki jáam̀ Unimbɔti. Boonee ní u yíkì ki nín gítí Isirayeel yab naapaal pu ki bàn̄ee ki bí-bi yii: «Ní yīkìmaan, kun puee ti-Dindaan dū Madiyan yab nì bi-naapaal ki ŋá ni-ŋaan!»

Geedeeyɔn jáń ki pɔ́ɔkiǹ Madiyan yab

16 Geedeeyɔn nìn cúú binib alaataa atee ki yākatì akiti ata. U nìn dū ŋyin ŋun bi búǹ kujaaunee ŋubɔ nì kibàŋ́kuliŋŋi kiba ki ŋúbiǹ báà ŋma, ní ŋŋminaapool kā kibaŋŋi kamaa poon. 17 U bɔ́ntì-bi míǹ ki dóòyee ní ki bí-bi yii: «Ní nīn pée kpèé-mi, m yaa ŋá puee ní ŋá míǹ. M yaa bàn̄ Madiyan yab janjanaapaal caŋin ní ki yaa pée ŋá puee, ni mun ń ŋá míǹ mbaantiim. 18 M làá búń ŋyin, man nì bin làá nīn bí m-ceeyee kɔkɔ. Ni mun ń búń iyin míǹ mbaantiim, kí nīn còom̄ ki màntīi gɔ́ǹ dijanjanaapaal ki tátí ki lì yii: <Ti-Dindaan yindi pu nì Geedeeyɔn yindi pu!>»

19 Geedeeyɔn nì u-yab binib dilaataal bin nìn nóó-uee nìn bàn̄ Madiyan yab naapaal caŋin kunyataasiiu búmbum ní. Ŋyunti gbantee bi nìn kpántì bijanjaliibi bin fōō bikpikib bin nìn dáá kpákatì sintil pu kpalaayee dee. Di sá ní Geedeeyɔn nì u-yab nìn kíĺ ki bíi búǹ iyin, ki fátí ki wìil̄ mbamu mun bi nìn ŋúb́ee. 20 Niinee ní akiti atee kíĺ ki bíi búǹ iyin ki fátí ki wìil̄ mbamu. Bi nìn ŋúb́ iŋminaapool ŋŋaŋgan ní ki ŋúb́ iyin ŋŋaŋgiil ki búǹ, ní ki nìn tátí mpɔn ki lì yii: «Tí jámaan ti-Dindaan yindi pu nì Geedeeyɔn yindi pu!» 21 Isirayeel yab māntìi gɔ́ń Madiyan yab naapaal míǹ, báà ŋma gbíntìi yú u-paaŋŋu. Dijanjanaapaal puee, báà ŋma nìn kíĺ ki bíi sáń ki tátí an kɔkɔ pu ki nyàab̀ kí ŋmátí. 22 Ŋyunti ŋun Isirayeel yab binib alaataa atee bí ki búǹ iyinee, ní ti-Dindaan yāntì dijanjanaapaal kɔkɔ puee báà ŋma kíǹ ki fàtī u-tàataajiki ki sàatī u-juti. Ní binib kɔkɔ sáǹ ki kátì ki tin bàn̄ Beeti-Siita tiŋki, ki gítí Seereera tiŋki watil pú, ní ki yōoǹ ki tin cáa gūū Abeel-Meewoola tiŋki, Tabaati tiŋki caŋin.

23 Niinee ní bi yíiń Isirayeel yab bininjab bin sá Neefitalii nì Aseer nì Manasee naakɔtinee, ní bi kùl̄ ki páaǹ Madiyan yab boon. 24 Geedeeyɔn nìn lēē binib ki tú Eefiraayiim jooŋŋi pu bí cùú bāakì kí tùkù bin kóò niinee yii: «Ní sìntīmaan kí tūŋkì Madiyan yab, kí péeǹ-bi kí jī mpaan anyimbɔbil nì inyimbul kɔkɔn, kí yòon̄ kí tin cáá sāā Beeti-Baara tiŋki nì Jɔɔdan buŋŋu.» Míǹ ní bi yíiń Eefiraayiim yab bininjab kɔkɔ ki kpáfì ní bi cūtìi jíń mpaan anyimbɔbil nì inyimbul kɔkɔn, ki yōoǹ ki tin cáa sāā Beeti-Baara tiŋki nì Jɔɔdan buŋŋu. 25 Bi nìn cúú Madiyan kpilib bili. Bi nìn yíì ubɔ Ooreeb ní ki yíì un kíǹee Seeyeeb. Bi nìn kūū Ooreeb laakin bi yíì yii Ooreeb Taŋkpalee ní ki kūū Seeyeeb laakin bi yíì yii Seeyeeb Bɔbil din poon bi tà fiinyi biliŋ ki lèekī ndamamee. Bi kūū bikpilib gbanti liitil míǹ ki dóòyee ní ki nìkī ki jìn̄ Madiyan yab ki dūtì Jɔɔdan buŋŋu. Bi nìn ŋúbiń Ooreeb nì Seeyeeb yiliŋ ki nyánní lapu pu buŋgbandi ki cáań ki tīī Geedeeyɔn.