Ruuti Gbɔŋku 4

Boowaasi cáab́ Ruuti

1 An yuntiŋuee Boowaasi nìn nín jɔ́ḿ kitiŋ punyɔkɔpu^a ki cūtìi kāl̀ niin. Kpalaayee kinabiki kin nì Eeliimeeleeki pēē kiŋkiŋ, Boowaasi sòon̄ u-bɔtee di jītée. Ní u yíiń-u ki bí yii: «Kinabiki, pàatīń kí dāá kàl̄ yéèyaa!» Ní kijapaayee pāatì ki kāl̀. 2 Ní Boowaasi yíiń bitindaŋkpilib kansikin binib saalaa ní ki bí bi mun yii: «Ní kàl̄maan doo!» Ní bi mun kāl̀. 3 Ní u bí uninja un nì Eeliimeeleeki pēē kiŋkiŋee yii: «Nawoomii nyánní Moowaab satin ki fātìi bāań ki bíi nyáfí ti-nabiki Eeliimeeleeki kpaatanti. 4 Ní m bí yii m máaǹ kí yàntī á gbìl̄ ní kí kpáàá kpòotī-si yii á kíí kí fōō tikpaatan gbanti bitindaŋkpilib nì binib bin bí doo nee kɔkɔ nimbiin. A yaa kíí ki làá fōō, á fōō. A yaa tí nyí yii aa là kí fōō, á tùkù-mi ḿ nīn nyí, kun puee sii di sá upeekaa ki cáá nsan kí fōō tikpaatan gbanti, sii boonee man di pá.» Ní kijapaayee kíí Boowaasi yii: «Iiin, m kíí ki làá fōō!» 5 Ní Boowaasi bí-u yii: «Daliŋkin ní a làá fōō kusaau gbanti Nawoomii ŋaanee, á nīn nyí yii a fōō ki kpáaǹ kimoowaabibiki Ruuti ukpiipu dee, u-cal un kaa ti bí ti-kansikinee yindi ń taa kúntí, ní u-kpaatanti tin sá u-fakalee ń gbíntí u-naakookun kí nīn cá jaanjaan.»

6 Niinee ní kijapaayee bí Boowaasi yii: «An yaa sée man kaa làá ŋmā kí fōō. Di sá yii m-kpátam boonee, án dāa ŋūǹ kí cáań digìńdi mama m-ba fakal pu. Míǹ puee a ŋūǹ kí yūĺ man yil pu kí fōō ti-nabiki wanti tin man bàà cáá nsan ki jítiǹ sii kí fōōyee, man kaa ti làá ŋmā kí fōō-tì!»

7 Too njaminee, Isirayeel yab ubɔ yaa làá nìn fàtīí fōō a-nabiki kiba wanti àá u nì ubɔ yaa làá nìn kpántí tɔb tiwanee, kí dàkà yii bi gbìlīǹ tɔbee, bi-kansikin ubɔ tákatí u-naatakal diba ní kí dūú tīī u-juti. Isirayeel tiŋkinee, an di nìn sá kudaaŋŋu yii bi sòon̄ ki bɔ́ntì tibɔti ki gbìlīǹ tɔb. 8 An pu ní kijapaayee nín tùkū Boowaasi yii u ŋūǹ kí yūĺ úǹ yil pu kí fōō bi-nabiki wantee, u tákatì u-naatakal diba ki dūu tīī Boowaasi. 9 Niinee ní Boowaasi bí bitindaŋkpilib nì samaa kɔkɔ yii: «Ni-kɔkɔ sá biseeradambi díǹ wiiŋŋu nee yii m fōō Nawoomii ŋaan Eeliimeeleeki nì u-jipɔmbi Maalɔn nì Kiiliyɔn wanti kɔkɔ kí nīn ŋúb́. 10 M fōō ki kpáaǹ Ruuti kimoowaabibiki, Maalɔn nimpuu ukpiipu, utaŋkpiil wanti ń gbíntí u-naakookun ní u-yindi ń taa wāŋkì u-nabiyaamu kansikin, kí taa wāŋkì u-tiŋki punyɔkɔpu mun. Ni sá biseeradambi díǹ wiiŋŋu nee yii m lafun ŋá mimmaaa?» 11 Ní bitindaŋkpilibee nì samaa un kpáfì kitiŋ punyɔkɔpuee kɔkɔ kíí-u yii: «Iiin, ti sá biseeradambi yii a ŋá míǹ! Ti-Dindaan ń yàntī unimpu un a làá fōō ú kɔ́ a-dicaŋkun nee ń nīn sá kii Raseel nì Leeya^b bin liitil náań Isirayeel nibulee. Ti mèé yii á kpántí unikpaan Eefiraata tiŋkin ní kí nyā diyiŋkpaandi Beetileem tiŋki kɔkɔn. 12 Mbiyaamu mun ní ti-Dindaan làá yàntī unimpusapɔɔn gbanti ń màal̀ kí tīī-see puee, a-naakooku ń nīn sá kii Peereesi^c un un Taamaar nìn màl̄ ki tīī Juudayee naakooku!»

Ruuti màl̄ kibininjabiki ki tīī Nawoomii

13 Míǹ ní Boowaasi fōō Ruuti ukpiipu ní u kpántì u-nimpuu. U nì Ruuti kpáfèe ní ti-Dindaan bīiǹ Ruuti boon u cáá dipool ní ki dūu màl̄ kibininjabiki. 14 Ní Beetileem nimpoobi bí Nawoomii yii: «Tí nyɔ̄ŋkìmaan ti-Dindaan! Díǹ pu nee waa ŋmīntì-si un làá dāá ŋúb́-si fool boonee. U làá dāá nyā diyindi Isirayeel tiŋki kɔkɔn! 15 Úǹ di làá yàntī a-bimbim ń kpántí a-maŋfal wiiŋyi in poon a bí nee, ní kí dāá nīn kpèé-si a-puti poon fool boon. An sá a-coopu un néeń-si tikpil, ki jítiǹ jipɔmbi biluli puee di màl̄ naantiiu gbanti ki tīī-si.» 16 Ní Nawoomii yōoǹ kibikee ki péé u-taaŋi pu ki kíĺ ki bíi lòó-kì. 17 Ní u-nimpujutiibi sòon̄ ki nāatì tɔb kibikee bɔti ki lī yii: «Bi màl̄ kibininjabiki ki tīī Nawoomii!» Bi nìn pú kibikee diyindi yii Oobeedi. Úǹ di dāa màl̄ Isayi, Daafiidi baa.

Daafiidi naanjab yiŋŋi

18 Peereesi maaliŋun yab nín nóó tɔb puee sɔ̀. Peereesi màl̄ Eesirɔn 19 ní Eesirɔn màl̄ Raam ní Raam màl̄ Amiinadaab 20 ní Amiinadaab màl̄ Naasɔn ní Naasɔn màl̄ Salima 21 ní Salima màl̄ Boowaasi ní Boowaasi màl̄ Oobeedi 22 ní Oobeedi màl̄ Isayi ní Isayi màl̄ Daafiidi.