Samiyeel Peepeekaa 7

1 Kiiriyati-Yeeyariim yab nìn dɔ́miń ki yōoǹ ti-Dindaan dakaau ki cáa cūnnì Abinadaab dumpu kigbantaŋ pu^a. Bi nìn lēē u-jipɔɔn Eeleeyasaar ú nīn cí ti-Dindaan dakaau.

Samiyeel Isirayeel kpootiliu. Bi jáń ki pɔ́ɔkiǹ Fiiliistii yab

2 An yúntì ki bàn̄ kii abin mmuŋku nyɔkɔm bi nín yōoǹ ti-Dindaan dakaau ki cáań Kiiriyati-Yeeyariim tiŋkinee. Ŋyunti gbanti ní Isirayeel yab kíĺ ki bíi nyàab̀ kí gítiń ti-Dindaan cee. 3 Niinee ní Samiyeel bí Isirayeel yab kɔkɔ yii: «An yaa lafun sá nì ni-pɔbil kɔkɔ ní ni là kí gítiń ti-Dindaan ceeyee, ní nyāntí awaa Asitaartee nì awaa ŋin pée kíǹee kɔkɔ ni-cee. Ní dū ni-ba kí nákáǹ ti-Dindaan nì ni-pɔbiliŋ kɔkɔ kí nīn jáaḿ úǹ baba. Ni yaa ŋá mimmee, u làá nyāntí-ni Fiiliistii yab ŋaan.» 4 Ní Isirayeel yab nyántì awaa Baal nì Asitaartee bi-kansikin ki fá, ní ki kíǹ ki jáaḿ ti-Dindaan baba. 5 Míǹ boonee ní Samiyeel bí-bi yii: «Ní kpāfìmaan Isirayeel yab kɔkɔ Miisipa ḿ gbàam̀ ti-Dindaan ni-pu.» 6 Ní bi dɔ́miń ki kpáfì Miisipa, ki lúń nnyim ki pɔ̀l̄ kitiŋ ti-Dindaan nimbiin. Bi nìn bóob́ kinyɔkɔ yaadal wiiŋŋu, ki bīitì bi-kpitii pu ki bí yii: «Ti yīntiǹ ti-Dindaan.» Miisipa niin ní Samiyeel kpántì Isirayeel yab kpootiliu.

7 Fiiliistii yab gbìl̄ yii Isirayeel yab kpáfì Miisipa. Niinee ní bi-bɔtiibi yíkì kí cùú jáǹ-bi. Isirayeel yab nín gbìl̄ an bɔtee ní bi fāŋkì Fiiliistii yab. 8 Bi nìn bí Samiyeel yii: «Taa nín̄ kā ki ŋmí! Taa dū-ti kí fá! Kúuǹ kí yíiń ti-Dindaan ti-Nimbɔtiu ú fīī-ti Fiiliistii yab ŋaan.» 9 Ní Samiyeel dū kipibiki kin dáá ŋáaḿee ki ŋá saraawɔkaa ki tīī ti-Dindaan, ní ki gbāam̀-u ú tūtuǹ Isirayeel yab, ní ti-Dindaan fōō u-wimmeem. 10 Ŋyunti ŋun Samiyeel bí ki ŋáań saraawɔkaayee, Fiiliistii yab tíibiń kí dāá já nì Isirayeel yab. Ŋyunti gbantee ní ti-Dindaan yāntì utaa téeń bi-pu ní bi-pɔbil bíil̀, ní Isirayeel yab jáń ki pɔ́ɔkiǹ-bi. 11 Isirayeel yab nyáń Miisipa ki kùl̄ ki bīiǹ Fiiliistii yab boon ki kūū-bi ki tin cáa sāā Beeti-Kaar tiŋki poon. 12 Ní Samiyeel dū ditaŋkpal diba ki cóoǹ Miisipa nì ditaŋkpal din náań nì Dinyindee kansikin ní ki pú-dì diyindi yii: «Eebeen-Eeseer», an taapu di sá yii: <Dijòońdi taŋkpal>. U bí yii: «Ti-Dindaan jòoń-ti ki dāa cáa sāā doooo doo ní.»

13 Isirayeel yab jajil nìn yāntì an sīntì Fiiliistii yab taapu, ní baa ti gítìń Isirayeel yab timmun. Ti-Dindaan nìn dàkā Fiiliistii yab u-pɔŋŋu Samiyeel maŋfal wiiŋyi kɔkɔ poon. 14 Fiiliistii yab nìn jáń ki fōō Isirayeel yab timmu, kí yòon̄ Eekrɔn kí cáá sāā Gaati. Bi nìn fātìi gíiǹ-mu ki tīī-bi ní Isirayeel yab fōō bi-tiŋki Fiiliistii yab ŋaan. Ŋgbansɔŋfi nìn dōoǹ Isirayeel yab nì Amɔɔr yab kansikin.

15 Samiyeel nìn kpōotì Isirayeel yab míǹ ki tin sāā u-kúm dal. 16 Dibindi kamaayee, u nìn cá Beeteel nì Giilgaal nì Miisipa ki sòoǹ Isirayeel yab bɔti ntimu gbantin. 17 Míǹ boonee ní ú fàtī Raama u-dumpu kí sòoǹ kí ŋāŋkì Isirayeel yab kansikin bɔti. Raama niin ní u nìn tí máń ti-Dindaan nsaraafan.