Krooniiki Gbɔmpeepeekaaku 11

Daafiidi kpántì Isirayeel kɔkɔ bɔtiu

(Kpèè 2 Sami 5.1-3)

1 Isirayeel yab nibul kɔkɔ nìn kóoǹ ki kpáfì Daafiidi cee Eebrɔn^a tiŋkin ní ki bí-u yii: «Ti baasii pēē dinabiil ní. 2 Iyunti in jítèe, min Saayuul nìn sá ti-bɔtiuee, sii di nìn līī Isirayeel yab janjaliibi nyɔkɔpu ki cáǹ-bi kujaau. Ní ti-Dindaan nìn pōoǹ-si yii: <Sii di làá dāá kpàà Isirayeel yab man nibul kí nīn sá bi-bɔtiu>» 3 Isirayeel yab kpilib kɔkɔ nìn dɔ́miń Eebrɔn tiŋkin Daafiidi cee. Niin ní u nì bi ŋá mpèé ti-Dindaan nimbiin, ní bi bātì ŋkpam ki sītì u-yil pu ú nīn sá Isirayeel yab bɔtiu kí nóó nì ti-Dindaan nín nìn dī Samiyeel pu ki sòon̄ tiŋyee.

Daafiidi jáń ki fōō Jeerusaleem tiŋki

(Kpèè Sami 2, 5.6-10)

4 Daafiidi nì Isirayeel yab kɔkɔ nìn cūtì kí já nì Jeerusaleem tiŋki. Bi nìn gíti yíì kitiŋ gbanti yii Jeebusi tiŋki, di sá yii Jeebusi yab di nìn kóò niin. 5 Jeebusi yab nìn bí Daafiidi yii: «Ni kpá kí kɔ́nní ti-tiŋkin!» Ama ní Daafiidi jáń ki fōō Siiyɔn tiŋki laakin bi nìn máń digundi ki túee. Kí yòon̄ ŋyunti gbanti ní bi kíǹ ki yíì niin yii Daafiidi Tiŋki. 6 Daafiidi nìn lī yii: «Unil un làá péé kí já nì Jeebusi yabee di làá nīn sá bijanjaliibi kɔkɔ kpiliu.» Seeruya jipɔɔn Joowaab di nìn līntì nsan ki cūtìi jáń nì Jeebusi yab, ní ki kpántì bijanjaliibi kɔkɔ kpiliu. 7 Daafiidi nìn cūtìi kāl̀ kitiŋ pɔ̀ti pu laakin bi máń diguŋkpaandi ki túee ní ki pú niin diyindi yii <Daafiidi Tiŋki>. 8 Boonee, u nìn fātìi máń ki māntìi tú Miiloo tiŋki ki wāaǹ-kì, ní Joowaab máń kitiŋ laakin kíǹee kɔkɔ. 9 Daafiidi nìn mɔ̀tīi kāntí mpɔn ki cá, ní ti-Dindaan Unimbɔti Mpɔŋkɔdaan nìn bí u-cee.

Daafiidi janjaliibi

(Kpèè 2 Sami 23.8-39)

10 Daafiidi janjakpilib bin nìn tíkí-uee sèé. Bíǹ nì Isirayeel yab kɔkɔ di nìn kāaǹ-u dibeel kii ti-Dindaan nín nìn sòon̄ u-nibul pu puee. 11 Daafiidi janjakpilib gbanti yiŋŋi sèé^b:

Uakimoonja Iseebaal di nìn sá bin cí ubɔtee kpiliu. Dalba úǹ di dū u-kpaŋki ki jáń ki kūū bijanjaliibi alaataa ata kɔkɔ dikɔmbaantiil poon. 12 Úǹ boonee, Doodoo un nìn sá Ayooya tiŋkinee jipɔɔn Eelasaar di nìn pá. U nìn kútì <bibaatandambi Bitee kitil> poon. 13 Úǹ di nìn bí Daafiidi cee Paasi-Damiim tiŋkin, ŋyunti ŋun Fiiliistii yab nìn kpáfì kí já nì Isirayeel yab kujaauee. Isirayeel yab nìn sáǹ. Ɔɔji kpaabu bubɔ nìn dɔ̄ niin. 14 Eelasaar nì u-naacimbi nìn síl̀ bukpaayee kansikin ní ki jáń ki fōō-bu ki pɔ́ɔkiǹ Fiiliistii yab. Míǹ ní ti-Dindaan nìn tīī Isirayeel yab dijajikpaandi.

15 Dalba Fiiliistii yab ŋātì bi-janjanaapaal Rafayii yab tantakalin. Niinee bijanjaliibi bimɔntiibi Mmuŋku nì Saalaa bin cīití ubɔtee kitil poon bita dɔ́miń ki ká Daafiidi Adulaam taŋkpalɔkɔlin^c. 16 Daafiidi nìn bál̀ kutaŋkpanaakoouee poon, ní Fiiliistii yab gɔminau nìn bí Beetileem tiŋkin. 17 Ní kpɔkɔsi ubɔ cúú Daafiidi ní u bí yii: «Ŋma di làá cùú cáań-mi lɔkɔ un bí Beetileem punyɔkɔki caŋinee nyim ḿ nyɔ̀ dee?» 18 Niinee bijanjaliibi bitee kɔ́ Fiiliistii yab janjanaapaalin, ki lúnní nnyim lɔkɔ un dɔ̄ Beetileem punyɔkɔki caŋinee ki cáań ki tīī Daafiidi. Ama u nìn yíì kaa nyùn̄-mì. U nìn dū-mi ki fá ti-Dindaan ní. 19 Ní u bí yii: «Ti-Dindaan ń cúú-mi ḿ taa nyɔ̀ nnyim nee! Mì sá-mi kii binib bin kaa mɔ́tì bi-ba pu ki cūtìi nyàabìń-mèe fatikuu ní.» Ní u yíì kaa nyùn̄-mì.

Bibaatandambi bitee nín nìn túń dituŋkpaandi diŋyee dee.

20 Joowaab naal Abisayi di nìn sá <Bibaatandambi Bitee kitil> kpiliu. Dalba úǹ di dū u-kpaŋki ki jáń nì binannanliibi alaataa ata, ki kūū-bi ní ki nyáń diyindi Bibaatandambi Bitee kitil poon. 21 U nìn nyáń diyindi mili pu ki jítiǹ bibaatandambi bili bin kíǹee. Úǹ di nìn kpántì bi-kpiliu gba. Waa cáá juti bíǹ Bitee kitil poon.

22 Yooyadaa jipɔɔn Beenaya un sá Kabiseeyeel tiŋkinee nìn sá ubaatandaan un dàkā tininjati ŋfunyɔm kupaauee. Úǹ di nìn kūū Moowaab tiŋkin janjakpaambi bili. Dalba mun ntaayim nìn lítì ki bīī kitiŋ pu ní u kɔ́ mbòó ŋubɔ poon ki kūū gbikinti. 23 U nìn tí kūū ueejipitija ubɔ u fɔ̀kɔ̀ ki bàn̄ kii meetab bili nì dijandi nyɔkɔm. Kikpaŋ kin unaaciinee nìn ŋúb̀ee nìn gbìfì kii ndɔfɔkɔ ŋun bi cáa lù satabee ní. Beenaya nìn ŋúb́ ditambɔndi ní ki kpìl̄ unaaciinee, ki cúú u-kpaŋki ki fōō u-ŋaan ní ki gíiǹ ki kūū-u. 24 Beenaya nín nìn ŋá puee dee. Míǹ ní u nyáń diyindi kii bibaatandambi bitee. 25 Dikitil mmuŋku nì saalaayee kansikinee, úǹ di nìn nyáń diyindi ki jítiǹ bin kíǹee, ama waa nín kútì <Bibaatandambi Bitee kitil> poon ní. Daafiidi nìn dū-u ki ŋá bijanjaliibi bin cí-uee kpiliu ní.

26 Bibaatandambi bin kíǹee di nìn sá Joowaab naal Asayeel, nì Doodoo un sá Beetileem tiŋkinee jipɔɔn Eelanan, 27 nì Samooti un sá Arɔɔr tiŋkinee, nì Eeleesi un sá Peelɔn tiŋkinee, 28 nì Ikeesi un sá Teekoowa tiŋkinee jipɔɔn Ira, nì Abiyeeseer un sá Anatooti tiŋkinee, 29 nì Siibkayi un sá Usa tiŋkinee, nì Ilayi un sá Ayooya tiŋkinee, 30 nì Maraayi un sá Neetoofa tiŋkinee, nì Baana un sá Neetoofa tiŋkinee jipɔɔn Eeleedi, 31 nì Riibayi un sá Giibeeya tiŋkin Beenjameen naakookunee jipɔɔn Itaayii, nì Beenaya un sá Piiratɔn tiŋkinee, 32 nì Urayi un nyánní Gaasi buŋyi caŋinee, nì Abiyeel un sá Beeti-Arabaa tiŋkinee, 33 nì Asimafeeti un sá Bawuriim tiŋkinee, nì Eeliyaba un sá Saalbɔn tiŋkinee, 34 nì Beenee Aseem un sá Giisɔn tiŋkinee, nì Saagee un sá Araar tiŋkinee jipɔɔn Joonatan, 35 nì Saakaar un sá Araar tiŋkinee jipɔɔn Akiyaam, nì Uur jipɔɔn Eeliifaal, 36 nì Eefeer un sá Meekeera tiŋkinee, nì Ayiiya un sá Peelɔn tiŋkinee, 37 nì Eesiroo un sá Kaarmeel tiŋkinee, nì Eesbayi jipɔɔn Naarayi, 38 nì Naatan naal Jooweel, nì Agrii jipɔɔn Miibaar, 39 nì Seeleeki un sá Amɔn tiŋkinee, nì Seeruya jipɔɔn Nakirayi un sá Beerooti tiŋkin ki nìn ŋúb̀ Joowaab janjawantee, 40 nì Ira un sá Yiitirii maaliŋunee, nì Gareeb un mun sá Yiitirii maaliŋunee, 41 nì Urii un sá Eeti maaliŋunee, nì Alayi jipɔɔn Sabaadi, 42 nì Siisa jipɔɔn Adina un sá Rubeen naakookun kpilib ubɔee, u nì bijanjaliibi mmuŋku nì saalaa, 43 nì Maaka jipɔɔn Anan, nì Joosafaati un sá Miiteen tiŋkinee, 44 nì Usiya un sá Asitarooti tiŋkinee, nì Ootam jipɔmbi Saama nì Yeeyeel bin sá Arooweer tiŋkinee, 45 nì Simrii jipɔɔn Yeediyayeel nì u-nabiki Joowa un sá Tiisi tiŋkinee, 46 nì Eeliyeel un sá Maafa tiŋkinee, nì Eelnaam jipɔmbi Jeeriibayi nì Joosafiya, nì Yiitima un sá Moowaab tiŋkinee, 47 nì Eeliyeel nì Oobeedi nì Jaasiyeel bin sá Sooba tiŋkinee.