Krooniiki Gbɔnliliitiiku 17

Joosafaati kpántì ubɔti

1 Asaa jipɔɔn Joosafaati fōō u-yil ki kpántì ubɔti. U nìn bɔ́ntì u-janjaliibi kí ŋmā kí jáǹ Isirayeel beel. 2 U nìn dū bijanjaliibi ki síiǹ Juuda timmu mun bi nìn máń agun ki túee kɔkɔ poon, ní ki nìn kāaǹ gɔmina Juuda nì Eefiraayiim timmu mun u-baa nìn jáń ki fōōyee. 3 Ti-Dindaan nìn bí Joosafaati cee. Di sá yii u-naanja Daafiidi nín nìn dī nsan ŋun mpeepeekaamee ní u nìn nóó. Waa nìn jáam̀ diwaal Baal. 4 Ama u nìn nyàab̄ ti-Dindaan, u-baa Nimbɔtiu, ní ki nìn tɔ́ u-marab. U nìn fātì u-boon ki tīī Isirayeel beel yab ŋáaǹtam. 5 Ti-Dindaan nìn tīī Joosafaati beel mpɔn ní Juuda yab kɔkɔ nìn cāabìń tiwan ki pūǹ-u. U nìn dūu kpántì ugaajakpaan ki ká tinyool tikpil. 6 U nìn dū u-pɔbil kɔkɔ ki tīī ki nóó ti-Dindaan, ní ki nìn kúntì iwaatootipaan in pu bi nìn tòotī awaayee nì diwaal Aseera ŋgbantamu puee nì iwindɔ Juuda tiŋkin.

7 U nín jíń dibeel dibintataatiil poonee ní u lēē u-kàliŋkpaambi biba ki tú Juuda timmun bí cùú dàkà niin yab. Bin u nìn lēē ki túee di sá Been-Ayiil nì Oobadiya nì Seekariyawuu nì Neetaneeyeel nì Miikayawuu. 8 U nìn yāntì Leefii yab biba céeǹ-bi. Bíǹ di sá Seemayawuu nì Neetaniyawuu nì Seebadiyawuu nì Asayeel nì Seemiiramooti nì Yoonatan nì Adooniyasi nì Toobiyawuu nì Toob-Adooniya. Bisaraaŋaliibi bili biba mun nìn kútì bi-pu, bíǹ di sá Eeliisama nì Yooram. 9 Bi nìn yōoǹ ti-Dindaan Marau gbɔŋku ní ki yìin̄ Juuda timmu kɔkɔn ki dàkā mu-nib ti-Dindaan marau.

Joosafaati pɔŋŋu

10 Abee ŋin nìn bí ki māntìi tú Juuda tiŋkee nìn fāŋkì ti-Dindaan, ní báà ubɔ kaa nìn kíikí kí jáǹ Joosafaati. 11 Fiiliistii yab gba nìn cāabìń tiwampɔkaal nì animbil nì patantib ki tìì Joosafaati. Bilaalibub mun nìn cāabìń tiwaŋkuti ki pūǹ-u. Bi nìn cáań ipijaa kutukub biluli nì alaataa aluli nì iŋɔjaa kutukub biluli.

12 Joosafaati nìn mɔ̀tīi kāntí mpɔn ní ki cá. U nìn máń agun ki māntìi tú ntimu mubɔ, ní ki nìn máń mubɔ mun poon adiin bí nīn kpáafí tijin. 13 U nìn kpáafì tijin tikpil tikpil Juuda timmun. U nìn dū bijanjaliibi bin sá bibaatandambee ki kāaǹ Jeerusaleem tiŋkin ní. 14 U nìn yākatì bijanjaliibi gbanti akiti akiti ki nóó nì bi-dicaŋŋi. Juuda naakookunee, bin nìn kpòotī bijanjaliibi kutukub kutukubee sɔ̀. Ujanjakpil Adina nìn kpòotī bijanjaliibi bin sá bibaatandambee kutukub alaataa ata, 15 ní un dī-uee di sá ujanjakpil Yoowanan. Úǹ nìn kpòotī bijanjaliibi kutukub alaataa ali nì imuŋku inaa. 16 Utataati di sá Sikirii jipɔɔn Amaseeyaawuu. Úǹ nìn dū u-ba ki tīī kí tɔ̄ ti-Dindaan tundi. U nìn kpòotī bijanjaliibi kutukub alaataa ali ní. 17 Beenjameen naakookunee, ubaatandaan ubɔ nìn bí bi yíì-u Eeliyadaa. Úǹ di nìn kpòotī bijanjaliibi bin jáà nì abaatan nì agbampɔɔyee binib kutukub alaataa ali. 18 Un nìn dī-uee di sá Yoosabaadi. Úǹ nìn kpòotī bijanjaliibi bin bɔ́ntì kí cù dikɔ̀ndee binib kutukub dilaataal nì imuŋku ili ní. 19 Bijanjaliibi bin nìn bí ubɔti tundin Jeerusaleemee dee. Bijanjaliibi bin ubɔti nìn dūu kāaǹ Juuda timmu mun bi máń agun ki túee poon kaa kútì.