Krooniiki Gbɔnliliitiiku 30

Eeseekiyaasi yāntì Isirayeel yab kɔkɔ jíń Dilákatil jiŋaaliu

1 Eeseekiyaasi nìn tú binib Isirayeel yab nì Juuda yab kɔkɔ cee, ní ki ŋmàn̄ tigbɔn ki tīī Eefiraayiim nì Manasee naantiibi yii bí dāan̄ Jeerusaleem kunimbɔtidiin bí jī Dilákatil jiŋaaliu kí jāam̀ ti-Dindaan, Isirayeel Nimbɔtiu. 2 Ubɔti nì u-kpambaliŋ nì samaa kɔkɔ nìn kíí yii bí jī Dilákatil jiŋaaliu gbanti uŋmaliliiti poon ní. 3 Di sá yii ŋyunti ŋun ní an bàà sá bí jī jiŋaal gbantee, baa nìn ŋúń ki jíń-u^a, kun puee bisaraaŋaliibi bin nìn ŋá bi-ba circiree kaa nìn náaǹ. Kí kūtì muee, samaa mun kaa nìn ŋúń ki kpáfì Jeerusaleem. 4 Bi nín nìn bɔ́ntì kí ŋá puee nìn kítì ubɔti nì samaa kɔkɔ cee. 5 Bi nìn tú binib Isirayeel yab kɔkɔ cee, kí yòon̄ Beerseeba kí cáá sāā Daani, bí yíiń-bi bí dāan̄ Jeerusaleem kí jī Dilákatil jiŋaaliu kí jāam̀ ti-Dindaan, Isirayeel Nimbɔtiu. Binib tikpil kaa nìn gíti jíń jiŋaal gbanti kii an nín ŋmàn̄ ki síiǹ bí nīn jīǹ-u puee. 6 Binib bin bi nìn túee nìn yōoǹ tigbɔn tin ní ubɔti nì u-kpambaliŋ ŋmàn̄ee ki yìin̄ Isirayeel nì Juuda timmu kɔkɔn, ki báakì ki nóó nì ubɔti nín síiǹ mara uŋyee yii: «Isirayeel yab, nimbi bin ŋmátì ki nyáń Asuur bɔtiu ŋaanee, ní fàtīí gítiḿmaan ti-Dindaan, Abraam nì Isaaki nì Isirayeel Nimbɔtiu cee, ní u mun ń fàtīí gítiń ni-cee. 7 Ní taa nín̄ bí kii ni-baabi nì ni-nabiyaamuee. Bíǹ kaa nìn yúl̀ nì ti-Dindaan, bi-naanjab Nimbɔtiu deedee. Ti-Dindaan nìn dū-bi ki líiǹ dinàandi, kii ni nín wāĺ pu nan ní. 8 Ní taa ŋá mpɔɔgbifin kii ni-naanjabee. Ama ní sìntī ni-ba taapu kí tīī ti-Dindaan. Dāam̄maan u-saraafaŋŋu ŋun ní u ŋá circir kí nīn cáa cá jaanjaanee poon, ní kí jāam̀ ti-Dindaan ni-Nimbɔtiu, án nín làá ŋá pu u-ŋuul ń sɔ̀ŋkì ni-puee. 9 Ni yaa fātìi gítìń ti-Dindaan ceeyee, bin cúú ni-nabiyaamu kuyuŋuee làá dàkà-bi tiniti ní kí yàntī bí fàtīí gítiń kitiŋ nee poon. Di sá yii ti-Dindaan ni-Nimbɔtiu cáá tiniti ní ki sūǹ isaa. Ni yaa lafun fātìi gítìń u-cee, waa làá fàtī u-boon kí tīī-ni.»

10 Bin bi túee nìn yìin̄ Eefiraayiim nì Manasee timmu kɔkɔn kiba kiba ní ki cūtìi nyáń Sabulɔn tiŋkin, ama ní binib nìn lāā-bi ki bèel̄-bi. 11 Nì míǹ kɔkɔee, Aseer nì Manasee nì Sabulɔn naakɔtin binib biba nìn sīntiǹ bi-ba taapu ki kíí ki dɔ́miń Jeerusaleem. 12 Juuda tiŋkinee, Unimbɔti nìn yāntì binib kɔkɔ ŋá kii unibaantee, ki kíí ki ŋá kii ubɔti nì u-kpambaliŋ nín bí yii bí ŋá puee, ki nóó nì ti-Dindaan nín síiǹ puee.

Eeseekiyaasi jíń Dilákatil jiŋaaliu

13 Dinikitikpaandi di nìn kpáfì Jeerusaleem dibindi ŋmaliliitiu poon kí jī jiŋaal un poon ní bi ŋmóò kpɔnɔb bin kaa cáá ŋkpɔnɔnyɔkɔee. Binib bin nìn kpáfèe nìn baasii náaǹ ní. 14 Bi nìn gbáń ki wīil̀ isaraafan in nìn bí Jeerusaleem tiŋkinee. Bi nìn kpīkitì isaraafan in pu bi nìn tùutī talaalutuukaayee, ní ki kóoǹ ki cáa fá Seedrɔn tantakalin. 15 Uŋmaliliiti ŋwiin ŋubɔ kpá saalku dal ní bi lāntì tiwaŋkuti ki jíń Dilákatil jiŋaaliu. Icoo nìn cúú bisaraaŋaliibi nì Leefii yab ní bi ŋá bi-ba circir ní ki cáań bisaraawɔkaabi kunimbɔtidiin. 16 Bi nìn cūtìi fōō bi-paaŋyi kunimbɔtidiin ki nóó nì Unimbɔti niliu Mooyiisi nín nìn síiǹ mara bí nīn ŋáań puee. Leefii yab nìn cáá fatiku ki nàatī bisaraaŋaliibi ní bíǹ cáa yàantí nsaraafan pu. 17 Samaa kansikinee, binib tikpil kaa nìn ŋá bi-ba circir. Míǹ puee baa nìn ŋūǹ kí ŋá saraa kí tīī ti-Dindaan. An puee Leefii yab nìn fōō bin kɔkɔ kaa nìn bí circir gbantee waŋkuti ki lāntì ki tīī-bi. 18 Binib tikpil, cilinjee Eefiraayiim nì Manasee nì Isakaar nì Sabulɔn naakɔtin yab tikpil kaa nìn ŋá bi-ba circir. Ama nì min kɔkɔ an ŋmàn̄ yii baa bàà máaǹ kí jī Dilákatil jiŋaaliu jintee, bi nìn jíń-tì. An pu ní Eeseekiyaasi nìn mēē ki tīī-bi yii: «Ti-Dindaan, sii un poon mɔ̄ee, 19 dū bin kɔkɔ bíi pɔ̄ɔntí ki nyàab̀ sii ti-Dindaan Unimbɔti, bi-baabi Nimbɔtiu nee kpitii kí pɔ̄-bi, báà bi yaa kaa bí circir ki nóó nì mara nín síiǹ puee.» 20 Ti-Dindaan nìn fōō Eeseekiyaasi wimmeem ní ki wúń u-nibul pu.

21 Isirayeel yab bin nìn bí Jeerusaleemee nìn dū iwiin iluli ki jíń jiŋaal un poon bi ŋmóò kpɔnɔb bin kaa cáá ŋkpɔnɔnyɔkɔee nì dipɔɔpiŋkpaandi. Baabadalee Leefii yab nì bisaraaŋaliibi nìn gà ilan ki bɔ̀ɔ́ tibɔɔkaal ki nyɔ́ŋkí ti-Dindaan. 22 Eeseekiyaasi nìn sòon̄ ki tīī Leefii yab kunyannyaau, ní bíǹ mun dū nlammɔntiim ki túń ti-Dindaan tundi nì dipɔbil diba. Iwiin iluli gbanti kɔkɔ poonee, bi nìn jíń Dilákatil jiŋaaliu jinti, ki ŋá mpèé saraabi ní ki nyɔ́ŋkì ti-Dindaan, bi-baabi Nimbɔtiu. 23 Samaa kɔkɔ nìn ká yii bí gíti dū iwiin iluli kí jī jiŋaal gbanti, ní bi gíti dū iwiin iluli ki jíń jiŋaal gbanti nì dipɔɔpindi. 24 Di sá yii Juuda bɔtiu Eeseekiyaasi nìn tīī samaa inajaa kutuku, ipii nì iŋoobu kutukub biluli, ní akpambal mun tīī inajaa kutuku nì ipii nì iŋoobu kutukub saalaa. Bisaraaŋaliibi kupaau nìn ŋá bi-ba circir. 25 Juuda yab kɔkɔ nìn bí dipɔɔpindin, ki kpáaǹ bisaraaŋaliibi nì Leefii yab nì bin nìn nyánní Isirayeel beelinee, nì bin nìn dɔ́miń ki kíǹ kóò Juuda beelinee. 26 Dipɔɔpiŋkpaandi di nìn bí Jeerusaleem, di sá yii kí yòon̄ Isirayeel bɔtiu Daafiidi jipɔɔn Saloomɔn yuntiŋuee, baa ti pée jíń jiŋaal gbanti míǹ Jeerusaleem tiŋkin. 27 Bisaraaŋaliibi nì Leefii yab^b nìn yíkìi yúl̀ ní ki mēē ki bīiǹ samaa pu. Unimbɔti nìn fōō bi-wimmeem, di sá yii mì nìn bàn̄ yilpu, u-circir kɔŋkooŋŋu laŋki.