Krooniiki Gbɔnliliitiiku 35

Joosiyaasi yāntì bi jíń Dilákatil jiŋaaliu.

(Kpèè 2 Bib 23.21-23)

1 Joosiyaasi nìn jíń Dilákatil jiŋaaliu Jeerusaleem ki tīī ti-Dindaan tinyool. Uŋmapeekaa, ŋwiin ŋubɔ kpá saalku dalee, ní bi kūū Dilákatil jiŋaaliu waŋkuti. 2 U nìn dū bisaraaŋaliibi tundi nín sá puee ki ŋúbiǹ-bi ní ki tīī-bi kunyannyaau bí tɔ̄ ti-Dindaan Diikun tundi. 3 U nìn bí Leefii yab bin nìn dū biba ki sú ti-Dindaan ki dàkà Isirayeel yab kɔkɔee yii: «Ní dū ti-Dindaan Dakaau kí síiń kunimbɔtidii kun ní Isirayeel bɔtiu Saloomɔn, Daafiidi jipɔɔn máńee poon. An kaa ti bàlifī ní nīn gbíntìi yòontí ki bùkuntí. Kɔŋkɔnnee, ní tɔ̄ ti-Dindaan ni-Nimbɔtiu nì u-nibul Isirayeel tundi. 4 Ní bɔ́ntímaan ni-ba kí nóó nì ni-maalii nì ni-tuuŋŋi nín sá puee, kii an nín ŋmàn̄ pu ki kā Isirayeel bɔtiu Daafiidi nì u-jipɔɔn Saloomɔn gbɔntin puee^a. 5 Nín̄ bímaan circir paaŋŋu pu kí nóó nì ni-dicaŋŋi nín sá puee, ní kí tɔ̄ ditundi kí tīī ni-nabiyaamu Isirayeel yab kí nóó nì bi-maalii nín sá puee. 6 Kpɔ̀maan Dilákatil jiŋaaliu waŋkuti, ŋámaan ni-ba circir ní kí tūtuǹ ni-nabiyaamu Isirayeel yab bí ŋá ti-Dindaan nín dī Mooyiisi pu ki sòon̄ pu ki síiǹee.»

7 Ubɔti Joosiyaasi nìn lēē úǹ u-ba waŋkuti poon apibil nì aŋɔbil kutukub mmuŋku nì saalaa nì inajaa kutukub bita ki tīī binib bin kɔkɔ nìn bí niinee bí dūú ŋá Dilákatil jiŋaaliu saraabi. 8 U-kàliŋkpilib mun nìn tīī samaa nì bisaraaŋaliibi nì Leefii yab tiwaŋkuti nì nlammɔntiim. Ilikiya nì Seekariyawuu nì Yeeyiyeel nín nìn kpèé kunimbɔtidii. Bíǹ nìn tīī bisaraaŋaliibi apibil kutukub bili nì alaataa aluu nì inajaa alaataa ata bí dūú ŋá Dilákatil jiŋaaliu saraabi. 9 Leefii yab kpilib Koonaniyawuu nì u-naalib Seemayawuu nì Neetaneeyeel nì Asabiya nì Yeeyiyeel nì Yoosabaadi nìn tīī Leefii yab apibil kutukub biŋmoo nì inajaa alaataa aŋmoo bí dūú ŋá Dilákatil jiŋaaliu saraabi. 10 Bi nín nìn bɔ́ntì jiŋaal gbanti puee sɔ̀. Bisaraaŋaliibi nìn yú bi-paaŋŋu ní Leefii yab mun yúl̀ akiti akiti ki nóó nì ubɔti nín nìn síiǹ-bi puee. 11 Bi nìn làntī Dilákatil jiŋaaliu waŋkuti ní bisaraaŋaliibi tīkintí fatiku ki cáa yàantí nsaraafan pu ní Leefii yab lèekī igban. 12 Bi nìn gāntì tiwaŋkuti tin bi làá dūú ŋá ti-Dindaan saraawɔkaayee, cilinjee inajaayee. Bi nìn yākatì ki tīī samaa ki nóó nì bi-maalii kii an nín ŋmàn̄ pu ki kā Mooyiisi gbɔŋkun puee. 13 Bi nìn púĺ Dilákatil jiŋaaliu pibiliŋ kii dikoobil nín sá puee^b, ní ki dū saraabi bin kíǹee nanti ki tɔ́kɔǹ daanseebin nì ŋkumbɔbiyaamun nì sirbabin. Bi nìn ŋáań malaa ki cáa yàkatī ki tìì samaa kɔkɔ. 14 Leefii yab nìn ŋá míǹ ki dóòyee ní ki bɔ́ntì bíǹ bi-ba nì bisaraaŋaliibi yati, di sá yii bisaraaŋaliibi, Aarɔn naantiibee kaa nìn cáá mpaan. Bi nìn bí ki ŋáań bisaraawɔkaabi ki cáá ŋkpam ki wù ŋŋmi áli kunyeeu dāa mɔ́. An pu ní Leefii yab nìn bɔ́ntì bíǹ bi-ba nì bisaraaŋaliibi jinti. 15 Asafi naantiibi bilaŋgaaliibi nìn yú bi-paaŋŋu ki nóó nì Daafiidi nì Asafi nì Eeman nì Yeedutun, ubɔti saŋkiliu nín nìn síiǹ puee^c. Bipunyɔɔciitiliibi mun nìn yú ki cí kipunyɔkɔ kamaa. Báà ŋma nìn pée bí u-tundin ní, di sá yii bi-nabiyaamu Leefii yab nìn bɔ́ntì bi mun jinti ki tīī-bi. 16 Kii ubɔti Joosiyaasi nín nìn tīī mara puee, bi nìn bɔ́ntì atuun kɔkɔ ŋwiin gbanti kí jāam̀ ti-Dindaan, kí jī Dilákatil jiŋaaliu ní kí ŋmā kí ŋá bisaraawɔkaabi ti-Dindaan saraafaŋŋu pu.

17 Míǹ ní Isirayeel yab bin nìn bí niinee nìn jíń Dilákatil jiŋaaliu ŋyunti gbanti, ní ki dū iwiin iluli ki jíń jiŋaal un bi ŋmóò kpɔnɔ un kaa cáá ŋkpɔnɔnyɔkɔee^d. 18 Baa nìn gíti jíń Dilákatil jiŋaaliu ubɔ míǹ Isirayeel tiŋkin kí yòon̄ doooo Unimbɔti bɔnaatiliu Samiyeel yuntiŋu. Isirayeel bɔtiu ubɔ mun kaa nìn jíń Dilákatil jiŋaaliu ubɔ kii un ní Joosiyaasi nì bisaraaŋaliibi nì Leefii yab nì Juuda yab nì Isirayeel yab bin kɔkɔ nìn bí niinee nì Jeerusaleem yab jíńee. 19 Joosiyaasi nín jíń dibeel abin ali kpá mmuŋku poonee ní bi jíń Dilákatil jiŋaaliu gbanti.

Joosiyaasi maŋfal wiiŋyi nín kúntì puee

(Kpèè 2 Bib 23.28-30)

20 Tin bí nee kɔkɔ boonee, ŋyunti ŋun ní Joosiyaasi ŋáŋkì kunimbɔtidii ki dóòyee ní Eejipiti bɔtiu Neekoo nín cá Kaarkeemiisi, Eefiraati mɔɔl caŋin kí já kujaau. Joosiyaasi nìn túŋkì-u kí bàà pìin̄-u nsan. 21 Ama ní Neekoo tú binib bí tùkù-u yii: «Juuda bɔtiu, tilati di bí man nì sii kansikin? An kaa sá sii ní m dòoń kí já kujaau díǹ, ama m-nannanliu ubɔ mun ní m dòoń kí jáǹ. Unimbɔti bí-mi yii ḿ yáb́. Unimbɔti bí m-cee. An puee á taa jáǹ Unimbɔti, yaa sá fám, u làá kpɔ̀-si.» 22 Ama Joosiyaasi kaa nìn kpántì u-landɔkɔŋu. Di sá yii waa nìn pílifiǹ Neekoo bɔti tin nìn nyánní Unimbɔti u-ba ceeyee. U nìn cúú u-beebɔkutil ki pēetì bí taa béé-u ní ki cūtìi bíi jáà kujaau Meegiidoo^e tantakalin. 23 Bi bíi jáà mimmee ní bin tòó ipiinee tɔ́ ipiin ki yá-u ní u bí u-tɔntɔnliibi yii: «Yòom̄maan-mi kí cùnnì, di sá yii m fōō tiweendi.» 24 Ní u-tɔntɔnliibi kpákatì-u janjatɔrɔku poon ní ki yōoǹ-u ki ŋá u-tɔrɔkuliliitiu poon ki cáá-u ki cūnnì Jeerusaleem. Niin ní u kpíì ní bi síb́-u u-baabi kaakuliŋin. Bin kɔkɔ nìn kóò Jeerusaleemee nì Juuda yab nìn súń u-kpool.

25 Unimbɔti bɔnaatiliu Yeereemii nìn gāā Joosiyaasi ŋkpiisilan. Kí yòon̄ ŋyunti gbanti kí cáá sāā díǹ, bilaŋgaaliibi bininjab nì binimpoobi gà ikpiisilan ki téetí Joosiyaasi kúm pu. An nìn dūu kpántì dikoobil ní Isirayeel tiŋkin. Bi ŋmàn̄ ilan gbanti nyɔɔbuŋŋi ki ŋá Iyaliŋki gbɔŋkun.

26 Joosiyaasi tuuŋŋi ŋin kíǹee, u-deedee tuuŋŋi ŋin u túń ki nóó nì tin ŋmàn̄ ki kā ti-Dindaan marab gbɔŋkunee, 27 nì ubɔti nín kíĺ pu ki dāa kúntì puee kɔkɔ ŋmàn̄ ki kā Isirayeel nì Juuda bɔtiibi gbɔŋkun.