Yoob 32

TIN EELIIWUU SÒON̄EE

1 Yoob nìn gbíntìi cɔ́ yii u sá deedeedaan, an puee Eeliifaasi nì Biilidaadi nì Soofaar nìn gbēeǹ kaa ti bíi kíikí-u. 2 Ama Eeliiwuu úǹ nìn gíí diŋuul. Eeliiwuu gbanti nìn sá Buusi naakookun, Ram dicaŋkun yɔu un bi yíì Barakeelee jipɔɔn ní. Kun pu u nìn gíí diŋuulee di sá yii Yoob nìn bíi pɔ̀ u-ba Unimbɔti nimbiin. 3 U nìn gíí Yoob bɔɔbi bitee mun pu diŋuul, kun puee baa nìn béè bi nín máaǹ kí kíí Yoob puee ki yāntì Unimbɔti fōō dibɔkpil. 4 Eeliiwuu nìn cúú u-ba kí taa sòoǹ nì Yoob, di sá yii bin kɔkɔ kíǹee nìn kpíǹ-u. 5 Ama Eeliiwuu nín ká yii bininjab bitee kaa ti cáá tiba kí kííyee, ní u fōō mbum.

Eeliiwuu bíi lì kun pu ní an sá ú sòoǹee

6 Ubuusija Barakeel jipɔɔn Eeliiwuu sòon̄ yii:

M dáá pɔ̀ɔǹ ní nimbi cíkitì.

An pu ní m fāŋkì kaa bàà là

kí dū tin ma mun nyée kí bíĺ ni-nimbiin.

7 M lī m-ban yii: «Binicikitikaabi di máaǹ kí sòoǹ,

bin yúntèe di máaǹ kí dàkà iciin!»

8 Ibaamɔn poonee, Unimbɔti Mpɔŋkɔdaan Fam

di tìì unil dinyil.

9 An kaa sá a yaa púĺee ŋmaniŋma ní a kpántí uciŋfiti,

an kaa sá titikpiti ŋmaniŋma di yàntī unil ń béé tin bí deedeeyee.

10 An pu ní m bíi gbàam̄-ni yii ní pīlifiǹ-mi:

ma mun là kí sòoǹ tin m nyée.

11 M pílifì soooo kí bàà gbìl̄ tin ni cáá kí sòoǹee,

ni nín bíi nyàab̀ anyɔɔbun kí sòoǹee, m kpōoǹ m-tafal ní ki pílifì.

12 M baasii pílifì ní soooo,

ama ni-kansikin báà ubɔ kaa ŋúń ki kíí Yoob,

tin u sòon̄ee, ubɔ kaa ŋúń ki kíí ki líì-u.

13 Ní taa lì yii: «Ti ká iciin:

Unimbɔti baba di ŋūǹ kí sòoǹ kí líí-u.»

14 An kaa sá man ní Yoob bíi sòoǹ nì,

ama maa làá kíí-u kii nimbi nín kíí-u puee.

15 Yoob, anyɔɔbun lóò a-bɔɔbi bita nee,

baa ti cáá tiba kí sòoǹ nì si.

16 M kāl̀ ki cíitì. Bi nín kaa ti cáá tiba

kí sòoǹ ki ŋmíl̀ee puee,

maa làá nīn yú kí taa sòoǹ nì si.

17 Ma mun yuntiŋu bāań ḿ sòoǹ dee!

m làá dū tin ma mun nyée kí bíĺ a-nimbiin.

18 M cáá tibɔti tikpil ki làá sòoǹ,

ŋfam min bí m-nee téekí-mi ḿ sòoǹ.

19 An nùuǹ m-poon sàbsab kii ndaamee,

a lì kii ndaam lɔti tin làá pōōyee.

20 M làá sòoǹ ní kí tɔ̄ m-ba,

m làá wàan̄ m-nyɔkɔ kí kíí.

21 Maa làá sòoǹ kí pɔ̀ gandi,

kaa tí làá pàkà ubɔ fám.

22 Maa nyí bi nín pàkà unil pu fámee,

m yaa bàà ŋáań míǹ, m-náanliu bàà yōoǹ-mi dooooyee.