Alaŋkpan Gbɔŋku 29

1 Bi yaa bíi wòoǹ unil ní u pɔ́ɔkí u-pɔbilee, án làá nàan̄-u dibɔbilin niin ní nnyɔkɔ kpá.

2 Deedeedambi yaa ŋúb́ kitiŋee, samaa kɔkɔ fàal̀ ní. Ama unikpiti yaa ŋúb́ kitiŋee, samaa kɔkɔ yáliŋkí ní.

3 Unil un néeń iciinee tìì u-baa dipɔɔsɔŋkil. Ama un gbōō ki cá nnimpulaakpaamu ceeyee bíiĺ u-gaajati ní.

4 Ubɔti yaa nóó deedee saŋŋuee, u-tiŋki cá nyɔkɔpu ní. Ama un fòol̄ lampoo tikpilee gīintí u-tiŋki boon ní.

5 Unil un bíi pàkà u-jutee bíi pīil̀-u kutaliŋŋu dee.

6 Ikpiti in unikpiti ŋáańee sá kutaliŋŋu ní, ama deedeedaan úǹ fàal̀ ní an mɔ̄ǹ-u.

7 Deedeedaan nyí biwɔfib bɔti, ama unikpiti úǹ kaa cáá dinyil kí ŋmā kí béé-tì.

8 Binib bin kaa bí tibanee cāabìń fikil fikil kitiŋin, ama biciŋfitiibi bíǹ sɔ̀ŋkī binib pɔbil.

9 Uciŋfiti nì ugbaan yaa cáá tɔb ki bàn̄ ibɔsoon laŋkee, báà u yaa gíí diŋuulaaa, u yaa lāāyaaa, u kpá kí ŋùŋfì.

10 Binikpɔliibi ná bibulcinnib, ama deedeedambi nyàab̀ bíǹ ní.

11 Ugbaan nyāntí u-ŋuul kɔkɔ ní mpaampiin pu, ama uciŋfiti cútí u-ba ní ki sɔ̀ŋkī u-ŋuul.

12 Uyidaan yaa pílifí tinyimɔmbɔtee, u-kpambaliŋ kɔkɔ kpántí binikpitib ní.

13 Unandaan nì un wɔ́b́-uee sá ubaanti ní, ti-Dindaan di tīī bi-liitil animbil ní bi cáa kpèé.

14 Ubɔti yaa sòoǹ biwɔfib bɔti nì ibaamɔnee, u-beel làá nīn bá ki pɔ̄ɔ̄ ní ki cá jaanjaan.

15 Mbambaan nì isaŋki dàkà kibiki iciin ní, kibiki kin ŋáań min kì lèe kɔ̄ntí ki-na icoo ní.

16 Binikpitib yaa ŋúb́ kitiŋee, ikpiti gbóotí ní. Ama deedeedambi làá dāá ká binikpitib gbanti lítitam.

17 Dáaĺ a-biki tafal ní kí dāá ká diŋuŋfil. Kì làá dāá tīī-si dipɔɔpindi.

18 Dileedakal yaa kaa ti bée, dinibul ŋáań di nín là puee ní. Ama un yaa ŋúb́ Unimbɔti Marauee bí mmɔnni!

19 Baa dátí utɔntɔnli tafal nì anyɔɔbun fám. Báà u yaa gbìl̄ taapu, waa làá ŋá míǹ.

20 A yaa tin ká unil sòoǹ kaa dàkafēe, a yaa pūtì máká ugbaan pu gba an sɔ́.

21 Unil yaa sɔ̄kɔl̀ u-tɔntɔnliu doooo tibiyatinee, u làá dāá kpántí uwutijoodaan ní.

22 Unil un kaa pɔ̄ɔ̄ diŋuul digiilee sàal̄ kujaau ní, unil un fōō mbumee ŋáań ikpiti tikpil ní.

23 Unil nín yòontí u-ba yilpu puee làá sìntīǹ-u taapu. Ama un sīntiǹ u-ba taapuee làá ká tinyool.

24 Un nì unaayuu yaa pēē kinyɔkɔee ná u-ba ní. U nyí mbusu un dɔ̄ ki cí-uee^a, ama waa làá bìitī unaayuu pu.

25 Á nīn fàŋkí binibee sá kii kutaliŋŋuee ní. Ama unil un máká ti-Dindaan puee kaa fàŋkí tiba.

26 Binib tikpil nyàab̀ bi-kpilib pampakaku ní, ama ti-Dindaan baba di sòoǹ unil kamaa bɔti.

27 Deedeedambi ná binikpitib, ní binikpitib ná deedeedambi.