8
1 A yaa bàà sá m-niija,man nì un ŋáam̀ dibiibaantiilee!
M yaa tú-si mmɔŋki laabee,
m bàà kpàl̀-si,
ní ubɔ kaa làá cɔ́kɔ́-mi.
2 M bàà cáǹ-si m-na cee
ní á bīfì-mi dineendi.
M bàà tìì-si ndaam min sɔ́fèe á nyɔ̀,
asubiman ŋin m ŋmáaḿee nyim.
3 U-ŋaŋgan tíkí m-yil,
ní u-ŋaŋgiil pá m-caŋ pu.
4 Jeerusaleem sapɔmbi,
m gbàam̄-ni,
ní taa fìntī m-neendi,
kí taa páb́-dì
kí nīn cí ŋyunti ŋun
ní di yaa láa lèe.
Bisapɔmbi
5 Unimpu ulɔu di nyánní kuteeun
u-ŋal nyīī un u néeńee pu na?
Dineendi pɔŋŋu
Usapɔɔn
Dineendi subu taapu ní m fīntì-si
laakin a-na cáá a-pool,
laakin u màl̄-see.
6 Dū-mi kí nákań a-pɔbil pu
kii kijalii kin a cáa nyìitī a-wanti puee.
Yàntī ḿ nīn pée bí ki lɔ́kɔ́-si
kii ditaŋkpal din pu bi kpítì a-yindi
a dūu fúuń a-ŋalee.
Tiŋman, dineendi pɔ̄ɔ̄ kii ŋkúmee ní,
ní kpɔkɔsi pɔ̄ɔ̄ kpaŋkpam kii ditaŋkpiilinee,
tiba kaa ŋūǹ kí pèefì-dì.
Di fòol̄ kii ŋŋmee
ní ki tòó kii utaayee.
7 Nnyiŋkpaam kɔkɔ kaa ŋūǹ
kí gbíntí dineendi ŋmiŋu.
Amɔɔ kɔkɔ nyim kaa ŋūǹ
kí bìin̄ di-pu.
Ubɔ yaa dū u-diikun gaajati kɔkɔ
yii u làá dūú dā dineendee,
u làá kúntíǹ ibeel ní.
8 Ti cáá naal ubɔ,
ama waa láá nyáń abii.
Ti-naal gbanti yaa bàn̄ dicamɔndee,
ba ní ti làá dāá ŋá kí tīī-u?
9 U yaa bàà sá kii digundee,
ti bàà dù animbil kúti ní kí mā
sintil difɔkɔŋi kí wúń u-pu.
U yaa bàà sá kipunyɔkɔee,
ti bàà làá dū seedir dɔi
ní kí kpáá punuu kí pìin̄-u.
Usapɔɔn
10 Man sá digundi ní,
ní m-biiŋi sá adifɔkɔ.
An puee, u-ceeyee, m sá
un tìì-u dipɔɔpindee ní.
Unaacimpɔɔn
11 Saloomɔn cáá bufiinyikpaa
Baal-Amɔn tiŋkin.
U dū-bu ki kpāaǹ bipaadambi ní.
Kí kìtī fiinyi gbanti biliŋee,
báà ŋma máaǹ kí pà animbil kúti jitɔmbi kutuku ní.
12 Saloomɔn, animbil jitɔmbi
kutukuee, sii di yì,
ní kí dū jitɔmbi kulaafaau
kí tīī bipaadambi bin cí kusaauee.
An yaa kíǹ man fiinyi kpaabuee,
m làá nīn cí-bu m-ba ní.
13 Sii un kóò bukpaa kansikinee,
a-bɔɔbi kpōoǹ bi-tafal
kí pīlifì tin a làá sòoǹee.
Ama man ní a máaǹ kí lì yii:
14 «Sii un m néeńee,
sāǹ kí kátí malaa!
sāǹ kii upeemanee,
àá kii kikɔniibikee
ajoon ŋin sɔ́fèe pu.»