Yeereemii 12

1 M-Dindaan, a baasii sá deedeedaan ní,

maa ŋūǹ kí kpákáǹ-si.

Ama m là kí sòoǹ nì si tin bí deedeeyee pu.

Ba pu ní an bútí binikpitib ní?

Ba pu ní bin kaa bí deedeeyee bí ŋgbansɔŋfin ní?

2 A cóoǹ-bi bi báaǹ inyaan

áli ki lòon̄ abil.

A-yindi pée kā bi-nyɔkɔn,

ama ní bi-pɔbiliŋ dátiǹ-si.

3 Ama mamee, m-Dindaan, a nyí-mi,

a wāĺ-mi ki nyí m-landɔkɔi,

i dɔ̄ a-nimbiin.

Gàntī binikpitib kí síiń

kii bi nín lèekī ipii in bi làá kpɔ̀ee kí síiń puee.

Kpāafì-bi kí síiń ŋwiin ŋun a làá kpɔ̀-bee.

4 Kí tin sāā ŋyunti ŋulɔŋu ní kitiŋ nee làá nīn bí kunimbaaun ní? Kí cáá sāā ŋyunti ŋulɔŋu ní akpaan làá nīn dɔ̄ ki kūń ní? Kitiŋ nee peelii nì ki-nooŋyi bíi kúù bin kóò ki-puee kpitii pu. Bi lì yii: «Yeereemii kaa ti làá nīn bí kí ká tin làá bàń-tee.»

5 «Sii nì binib yaa bíi sáń ní a gīīyee,

kin mana ní si nì itaamu ŋūǹ kí sāǹ kí kpáká?

An yaa sá kitiŋ kin cáá ŋgbansɔŋfee poon

ŋmaniŋma ní a ŋūǹ kí nīn bí a-pɔbil sɔ̀m̀ee,

kin mana ní a làá ŋá

a yaa láa kɔ́ Jɔɔdan mɔgbaakin?

6 «Di sá yii, a-nabiyaamu, a-dicaŋkun yab nyēē a-boon. Bi kóoǹ binib ki kpáfì bí já nì si ní saa nyí. Bi yaa bíi sòoǹ nì si nì anyɔɔbummɔntee, á taa nín̄ máká bi-pu.»

Ti-Dindaan dū u-diiku nì u-nibul ki fá

7 «M dū m-Diiku ki fá,

m fātì m-boon ki tīī tin sá m-yatee.

M dū dinibul din m néeńee

ki líiǹ di-nannanliibi.

8 Bin nìn sá man yabee kpántì

kii gbikinti di bí kupɔɔunee.

Bi gbùkum̄ ki tátí m-pu,

an puee ní maa ti là bi-bɔti.

9 Bin nìn sá man yabee

kpántì kii kinɔmbiki kin ŋān̄,

ní ikaabu gbáb́ ki bīiǹ ki-puee.

Ní cùmaan kí kóoǹ ipeel kí kpāfì,

í dāan̄ kí jī jiŋaal.

10 Bipikpaaliibi tikpil dɔ́miń ki bíil̀ m-fiinyi kpaabu,

bi tāā m-tiŋki kì ŋá púb,

ki dū m-tinjandi din ŋān̄ee

ki kpántì kunimbaau teeku.

11 Bi yāntì kì kpántì inimɔɔn tiŋki,

ki bí kunimbaaun,

kì kpántì kitiŋkuliŋŋi.

Bi nāaǹ kitiŋee kɔkɔ

ní báà ubɔ kaa fātìi tɔ́.»

12 Binàanliibi páaǹní kuteeu jooŋŋi pu ki dòoń.

Ti-Dindaan tàataajiki bíi pɔ̀fī tikɔkɔ,

kí yòon̄ kitiŋ kílilaŋki ki tin sāā ki-kúntilaŋki.

Báà uniseen kaa ti bí ŋgbansɔŋfin.

13 Bi nìn búĺ bilee ní ki dāa cáń ikuŋkum,

bi bìn̄ ki gīī púb, ama kaa ká ipaati.

Ti-Dindaan ŋuukpaandi din u fōō ni-puee

di yì-tì ní tin ni cáńee cáá-ni icoo.

Ti-Dindaan nì Isirayeel yab kɔŋkɔnnaatɔb bɔti

14 Ti-Dindaan nín sòon̄ puee sɔ̀. M-kɔŋkɔnaatɔb bin kɔkɔ sá binikpitib ki gbēē kitiŋ kin m dūu tīī m-nibul Isirayeelee, m làá jà-bi bi-tiŋki pu. Ama m làá cúú Juuda nibul kí nyāntí bi-kansikin. 15 Míǹ boonee, m làá sɔ̄ bi-saai, ní kí gíiǹní-bi bi-tiŋkin, báà ŋma nì u-kpaatanti pu. 16 Bi nìn bífì m-nibul bí nīn pùtī Baal yindi pu. Ama bíǹ bi-ba yaa kíǹ ki cáá m-nibul bimbim, ki kíǹ ki cáá m-yindi ki pùtī ki lì yii: <M pūtì ti-Dindaan un bí dimaŋfalinee>, m làá dāá fōō-bi m-nibul kansikin. 17 Ama atimbun gbanti diba yaa yíì kaa pílifiǹ-mee, m làá kpìkitī-dì kii bi nín kpìkitī busubu puee ní kí dū-dì kí líiǹ ŋkúm, ti-Dindaan di lī míǹ.