Ŋweel yuntiŋu
14
1 Ti-Dindaan sòon̄ nì Yeereemii ŋweel bɔti pu.2 «Juuda yab kā dikpool,
bi-timmu pɔŋŋu dóò.
Binib bí kunimbaaun ki kā kitiŋ.
Jeerusaleem yab kuŋkuuntii nín jɔ́ḿ yilpu.
3 Akpambal tú bi-tɔntɔnliibi
bí cùú nyàabìń nnyim.
Bi bàn̄ dinyimbɔbilinee, nnyim fóotì.
Bi fātìi gítìń nì abɔkulim.
Bi-wunti yɔ̄tì kunimbaau kɔ́-bi
ní bi kíǹ ki tīī bi-yil.
4 Utaa nín yúl̀ee puee, kitiŋ fáá iwèeń.
Niinee bikpaabi wunti yɔ̄tì,
bi-yil kíǹ ki tīī.
5 Kipeewuŋ gba màl̄ tisatin
ki dū ki-biki ki fá,
kun puee timool kaa ti bí.
6 Kumooun mammu tɔ́kɔ́ ajoon pu
ki tíkì kubuŋu kii sinsiŋkubee.
Mu nyàab̄ timool mu-nimbiliŋ tin kpáàa lóoĺ,
ama ní muaa ká báà tiba.»
Isirayeel nibul
7 «Báà ti-kpitii yaa bíi kɔ́kɔĺ-ti,
ti-Dindaan, a-yindi puee, ŋá tiba kí tīī-ti.
Tiŋman ti nyáń a-boon, ti yīntiǹ-si.
8 Ti-Dindaan,
sii un pu Isirayeel yab mákée,
a nìn fīī-bi dinimbinaamandi yuntiŋu poon.
Too, kɔŋkɔnnee,
a sá kii unicaanee ní kitiŋ nee poon,
a lì kii usaŋkinli nín dɔ́miń kí dòon̄
kunyabambaantiiu kutaa ń wúntí ú nìkēe ní.
9 Ba pu ní a bí kii unil un wunti kpíìyee,
a lì kii ubaatandaan un kaa ti ŋūǹ kí fīī bin kíǹee?
Ama ní a bí ti-kansikin ti-Dindaan,
bi dū-ti ki sú-si ní,
taa dū-ti kí fá.»
*
10 Kpèèmaan ti-Dindaan nín sòon̄ dinibul nee pu tiŋyee: «Tiŋman, bi néeń ki sáń ki póotí an kɔkɔ kii bi nín là puee.» Ama tíǹ kaa fáatiǹ ti-Dindaan. Kɔŋkɔnnee u làá téetí bi-yìntitam nì bi-kpitii pu ní kí dáaĺ bi-tafal.
11 Ti-Dindaan bí-mi yii: «Á taa gbàam̀ dinibul nee yab pu, á taa mèè kí nyàab̀ bi-ŋanti. 12 Báà bi yaa bóob́ kinyɔkɔ ki mēē-mi, maa làá pīlifiǹ-bi. Báà bi yaa cáań-mi bisaraawɔkaabi nì saraabi bin kíǹee, maa làá fōō. Ama m làá kpɔ̀-bi kujaaun ní kí yàntī ŋkùm nì bìlbil kúm ń kpɔ̀ kí céetí-bi.»
13 Ní m kíí yii: «Too, ti-Dindaan Unimbɔti, bibɔnaatiliibi bí-bi yii: <Naa làá ká kujaauaaa, ŋkùm mun kaa làá jēetí ni-pu, ama Unimbɔti làá tīī-ni mbaamɔn gbansɔŋfiŋu mpaan nee pu.>»
14 Niinee ní ti-Dindaan bí-mi yii: «Tin bibɔnaatiliibi gbanti sòoǹ m-yindi puee sá nnyimɔn ní. Maa tú-bi, kaa tīī-bi mara ubɔ, kaa tí sòon̄ nì bi tiba. Bi-leedakaŋ sá tinyimɔmbɔti, ní tin bi sòoǹee kaa bí tiban. Bíǹ bi-ba di pée kāl̀ ki náań tinyimɔmbɔti gbanti kɔkɔ. 15 An puee man ni-Dindaan nín cáá tin kí sòoǹ bibɔnaatiliibi gbanti pu puee sèé: <Maa tú-bi, ama ní bi sòoǹ m-yindi pu yii kujaau àá ŋkùm kaa làá jēetí kitiŋ nee pu. Too, kujaau nì ŋkùm di làá kpɔ̀ kí céetí bi-kɔkɔ. 16 Ní kujaau nì ŋkùm ń kpɔ̀ binib bin bi nāatì tinyimɔmbɔti ki tīīyee kí bíĺ Jeerusaleem daŋŋi pu an kɔkɔ fìlfil. Ubɔ dāa kpá kí síb́ bi nì bi-nimpoobi nì bi-jipɔmbi nì bi-bisalib. M làá yàntī ikpiti in bi ŋée ń gítí bi-pu.
17 «Á tùkù-bi tibɔti nee yii:
«Nnyinnyim ń nyā m-nimbiliŋ kí nīn bàtifī
kí taa gbèen̄ ŋwiimpu nì kunyeeu!
Di sá yii asaluukpaan kɔ́ m-nibul.
Tiweendi tin di fōōyee kaa cáá dicáaǹdi.
18 M yaa nyáń ki cá kusaauee,
m kāntí binib bin bi kūū kujaaunee dɔ̄ dɔ̄.
M yaa tí nín kóò kitiŋinaaa,
m tí kāntí bin ŋkùm kūū kūūyee.
Unimbɔti bɔnaatiliibi nì bisaraaŋaliibi
tú ki yìiǹ kitiŋee ni,
baa bíi gbìl̀ tin bíi jītée taapu.»
Isirayeel nibul
19 «Ti-Dindaan, a lafun dū Juuda yab ki fá níii?
A núutiǹ Siiyɔn yab níii?
Ba pu ní a ŋáań-ti tiweendi tin
ubɔ kaa ŋūǹ kí cáaǹee ní?
Ti bàà kā ki cí ŋgbansɔŋfi,
ama ní tiwammɔntiil tiba kaa bíi dòoń.
Ti bàà kā ki cí kí ká dicáaǹdi,
ama ní dinyoondi bāań.
20 Ti-Dindaan, ti nyí ti nín ŋá tin kaa ŋān̄ee.
Ti béè mun yii ti-naanjab yīntiǹ-si.
Tiŋman, ti baasii yīntiǹ-si ní.
21 A-yindi puee,
taa kpèè kí sìŋkīǹ a-beejal din cáá tinyoolee,
taa fàtī a-boon kí tīī-dì.
Taa súntí mpèé ŋun a nìn ŋá nì tee pu,
taa kpìtī-ŋu.
22 Atimbun ŋin kíǹee waaŋi kansikinee,
diba ŋūǹ kí yàntī utaa ń nàaa?
Kutagbɔŋu ku-ba di yàntī utaa nàaa?
An kaa sá sii ti-Dindaanaaa?
Ti-Dindaan, sii pu ní timbi máká,
di sá yii sii di ŋáań tíǹ gbanti kɔkɔ.»