Eeseekiyeel 7

Nnaabu tóobiń

1 Ti-Dindaan sòon̄ nì mi yii: 2 «Nisaaleen, pīlifì tin man ni-Dindaan Unimbɔti bíi sòoǹ nì Isirayeel yabee: An dóò! Nnaabu kpátì ki bàn̄ kitiŋ jannaatiliŋ. 3 Kɔŋkɔnnee an dóò ni-pu: m làá yàntī m-ŋuul ń jēetí ni-pu. Ni-bimbim ní m làá dūú sòoǹ ni-bɔti ní kí pà-ni ni-timbiilituuŋŋi paati. 4 M làá dàkà-ni nnimbinaakulim kaa làá sɔ̄ ni-saai báà fiii. M làá pà-ni ni-bimbim paati ní kí nyāntí ni-timbiilituuŋŋi kí páań mpaampiin pu. Niinee ni làá béé yii man di sá ni-Dindaan.

5 «Ti-Dindaan Unimbɔti nín sòon̄ puee sɔ̀: Nnaabu dòoń, nnaabu ŋun baa láá pée kée dòoń! 6 An dóò, an dóò ní, nnaabu bíi bɔ́ntí kí jēetí ni-pu, ŋu dòoń! 7 Nimbi bin kóò kitiŋ nee puee, dinàandi dòoń ni-pu! Ŋyunti dòoń, ibɔsoon wiiŋŋu tóobiń. Dipɔɔbiildi làá fōō dipɔɔpindi paaŋŋu ajoon pu. 8 An kaa ti làá tàan̄, kɔŋkɔnnee m làá kpáatí m-ŋuul kí sìtī ni-pu ní kí yàntī m-bum ń tɔ̄ mi-tundi kí cáá kátí. Ni-bimbim ní m làá dūú sòoǹ ni-bɔti ní kí pà-ni ni-timbiilituuŋŋi paati. 9 M làá dàkà-ni nnimbinaakulim kaa làá sɔ̄ ni-saai. M làá pà ni-bimbim paati ní kí nyāntí ni-timbiilituuŋŋi kí páań mpaampiin pu. Ni làá dāá béé niinee yii man ni-Dindaan di bíi dátí ni-tafal.

10 «Ibɔsoon wiiŋŋu sèé! Ŋu bāań ki dóò. Ipɔŋkpiti bí an kɔkɔ pu, dilambil yíkì tiŋan pu. 11 Tipɔmbɔti bí kii ndɔ ní bi dūu cóoǹ kí ŋá ikpitee. Ni-wanti tiba kaa ti làá kíń ni-cee, ni-gaajati kaa làá kíńaaa, ni-wíiŋŋu kaa làá kíńaaa, ni-nyooti mun kaa làá tí kíń. 12 Ŋyunti bāań ní nee, ibɔsoon wiiŋŋu tóobiń. Biwandaliibi ń taa nín̄ bíi fàal̀, biwannyafiliibi mun ń taa nín̄ bí kunimbaaun. Di sá yii m gíí samaa kɔkɔ pu diŋuul ní. 13 Báà uwannyafil yaa ŋmátì kaa kpíìyaaa, waa ti làá ŋmā kí gítí kí yòon̄ u-wanti tin u nyáfée. Di sá yii dileedakal din sòoǹ án nín làá nàan̄ samaa kɔkɔ puee kaa làá gbíntí fám. Báà ŋma bí ikpitin, an pu ní báà ubɔ kaa làá ti ká mpɔn. 14 Bi dāa ŋūǹ kí búń ŋyin kí bɔ́ntí kí cù kujaau, ama báà unibambaanti kaa làá cù. Di sá yii m gíí samaa kɔkɔ pu diŋuul ní.»

Ditafadaaldi dɔ̄ ki cí báà ŋma

15 An làá nīn sá kujaau ní mmɔŋki, ní bìlbil kúm nì ŋkùm bí adiinni ki nà. Bin bí tisatinee làá kpú kujaaun, ní bin bí kitiŋinee, ŋkùm nì iween ń kpɔ̀-bi. 16 Bin làá dāá kíń ki bí dimaŋfalinee làá dāá sāǹ kí cù ajoonni. Kii abeenanjil nín yáliŋkí puee, míǹ ní bi làá dāá yāliŋkì bi-kpitii pu.

17 Bi-ŋalii kaa dāa gíti cáá mpɔn,

ní bi-tabiŋyiliŋ ń dāá yɔ̀tī.

18 Bi làá dāá nīn lōō kpɔsatab,

ní bi-wunti ń dāá sāǹ yàrrr.

Icoo làá dāá cúú-bi ní gbòooo,

ní bí dāá kòol̀ ayibaakpan.

19 Bi làá dāá dū bi-nimbiliŋ kí fá adan pu,

bi-sindaariyau làá dāá kpántí kii

titampummoolee ní kí tīī-bi.

Di sá yii ŋwiin ŋun ti-Dindaan làá dāá gíí diŋuulee,

bi-nimbiliŋ àá bi-sindaariyau kaa dāa ŋūǹ kí fīī-bi.

Baa làá dāá ká tijin kí jī,

ní bi-pooŋyi ń dāá dūú fáká.

Di sá yii animbil nì sindaariya di sá bi-yìntitam nyeel.

20 Bi-gaajati nyaaŋku di nìn yòontí-bi

ní bi dūu mɔ́ɔ́ awaa ŋin sá

ntimbiil wanti nì titantaŋwanee.

An pu ní ti-Dindaan bí yii:

«M làá dū bi-gaajati gbanti

kí kpántí titampummool.

21 M làá yàntī binicambi ń fūkul̀-tì,

ní bin kaa bí tibanee ń yòon̄-tì

kí cáá búntí kii kujaau poon ní bi kée.

Bi làá dāá kɔ́ǹ-tì tijɔkɔndi.

22 Bi yaa láa bíi kɔ̄ntí m-Diiku kun sá

m-gaajawantee tijɔkɔndee,

maa làá pée ŋá tiba.

Digaŋgandambi làá dāá dāan̄ kí kɔ́ǹ-ku tijɔkɔndi.

23 Mɔ́ɔ́ ikusaka,

di sá yii binikpɔliibi gbí kitiŋin,

ní tipɔmbɔti gbí Jeerusaleem tiŋkin.

24 M làá cáań anibul ŋin cáá nnimbinaakulimee

ŋí dāan̄ kí fōō bi-diiŋŋi.

M làá kúntí bi-pɔndambi lambil,

ní kí bīil̀ bi-waatootipaaŋyi.

25 Dinyoondi bí ki dòoń.

Bi làá dāá nyàab̀ ŋgbansɔŋfi

kaa làá dāá ká-ŋu.

26 Inaabu làá dāá nīn dī tɔb,

ní atulim bɔti ń dāá nīn dòoń kaa gbèentí.

Binib làá dāá gbàam̀ Unimbɔti bɔnaatiliu yii ú ká dileedakal.

Usaraaŋakpil kaa dāa gíti cáá tiba kí dàkà,

ní bitindaŋkpilib kaa dāa gíti cáá isaŋki kí tīī.

27 Ubɔti làá dāá nīn kā dikpool,

dibɔtibil kaa dāa gíti cáá dimákal,

ní kitiŋee nib báà ŋma wunti dāa gbáà kpàkpakpa.

M làá dāá dū bi-bimbim ní kí sòoǹ bi-bɔti,

ní kí sòoǹ bi-bɔti kii an nín máaǹ puee.

Niinee bi làá dāá béé yii man di sá bi-Dindaan.»