Eeseekiyeel 17

Ikaalun ili nì fiinyi subu bubɔ bɔti

1 Ti-Dindaan sòon̄ nì mi yii: 2 «Nisaaleen, pɔ́ɔǹ Isirayeel yab ipɔɔn nee kí dū tibɔti nee kí ŋmàntī-bi. 3 Tùkù-bi yii man a-Dindaan Unimbɔti di bíi sòoǹ yii: <Ukaaluŋkpaan ubɔ di nìn bí ki cáá ifeeŋkpaan ní u-kuti fɔ̀kɔ̀ ki náaǹ ki cáá inyiŋfi kupaau. U nìn ŋàan̄ ki bāań Leebanɔn jooŋŋi. U nìn yá ki kɔ́fì seedir subu bubɔ yilpu. 4 U nìn bátì bu-pandi din fɔ̀kɔǹ ŋi-kɔkɔ kíǹee ní ki yōoǹ-dì ki cáa cūnnì binyampoobi tiŋkin ki dū-dì ki bíl̀ bibantiliibi tiŋkin. 5 Míǹ boonee ní u yōoǹ Isirayeel tiŋkin subu bubɔ ki cáa cóoǹ kitiŋ kin bi yɔ̄kɔtèe ni. U nìn cóoǹ-bu mbun ŋun cáá nnyim tikpilee gbandi, a lì kii busubu bun néeń nnyimee. 6 Busubuee cɔ́tì ní ki pɔ̄kɔtì ki kpántì bufiinyisubu ki lālim̀. Bu nìn tòó bu-paŋŋi ki cá ukaalunee watil pú ní bu-nyaaŋyi wīintí u-feeŋyi taapu. Busubuee nìn dūu kpántì bufiinyisubu ki cɔ́tì cɔ́tì ní ki tɔ́ tɔ́ mpamu. 7 Ama ní ukaaluŋkpaan uliliiti ubɔ mun dūu bāań. U-feeŋyi nìn sá ikpaan ní ki cáá tikuti tikpil. Niinee ní bufiinyisubuee tɔ́ bu-nyaaŋyi ki túĺ ukaalunee cee ní ki fātì bu-paŋŋi u-watil pú. Bu nìn dàkafī kí ká u-cee nnyim kí jītíǹ laakin bu cɔ́ee. 8 Ama bi nìn cóoǹ-bu kitiŋ kin ŋān̄ee poon ní, mbun ŋun cáá nnyim tikpilee gbandi, bú ŋmā kí tɔ̄ apan, kí lòoǹ abil kí kpántí bufiinyisubu bunyaambu.>

9 «Dū tin man ni-Dindaan Unimbɔti sòon̄ee kí nàatī yii: <Bufiinyisubu gbanti ŋūǹ kí wíiǹaaa? Ukaalumpeekaayee kaa làá cúú bu-nyaaŋyi kí fùkù, kí bīil̀ bu-biliŋ ní kí yàntī bu nín cɔ́tì cɔ́tì pu mpɔminee ń kpāaa? Kí fùkù-buee, an kaa làá bàlifì ú ŋá mpɔn àá ú nyàab̀ binib tikpil. 10 Bi baasii cóoǹ bufiinyisubuee ní, ama bu làá ŋmā kí pɔ̀kɔtāaa? Kubuŋu yaa nyánní ŋwìiń nyalaŋki pú ki jítì bu-puee, buaa làá kpā dicilpu dicilpu niinaaa? Laakin bi cóoǹ-bu bú bàà wíiǹee, niin ní bu làá kpā!>»

Tibɔŋmantikaalee taapu

11 Ti-Dindaan sòon̄ nì mi yii: 12 «Bàlifì pɔɔgaatib nee yii bi gbìl̄ tibɔŋmantikaal nee taapuɔɔɔ? Tùkù-bi yii Babiloon bɔtiu dɔ́miń Jeerusaleem ki cúú ubɔti nì bitindaŋkpilib ki cūnnì u-tiŋkin. 13 U nìn yōoǹ ubɔti dicaŋkun niliu ubɔ, ní u nì u ŋá mpèé ní ki yāntì u pūtì yii waa làá nyā mpèéyee boon. U nìn yōoǹ kitiŋee pu bɔtibiliŋ 14 án nín làá ŋá pu kitiŋee ń sìntī ki-ba taapu kí taa ti ŋmā kí yīkì, ní kí nīn tɔ́ mpèéyee deedeeyee. 15 Ama ní ubɔtipɔɔnee yíkìi bíi jáà nì Babiloon bɔtiu. U tú ituun Eejipiti án nín làá ŋá pu Eejipiti ń tīī-u itaamu nì bijanjaliibi tikpilee. Án làá ŋmā kí bútí-uaaa? U nín bíi ŋáań mimmee, u làá ŋmā kí fīī u-baaa? Waa làá ŋmā kí fīī u-ba, di sá yii u nyáń mpèé boon!

16 «Man ni-Dindaan Unimbɔti nín bí dimaŋfalin nee, ubɔti gbanti làá kpú Babiloon bɔtiu un di kāaǹ-u dibeelee tiŋkin ní. Di sá yii u kpēē dipùtil din u pūtèe fám ki nyáń mpèéyee boon. Míǹ puee Babiloon tiŋkin ní u làá kpú. 17 Báà Eejipiti bɔtiu Faaroo yaa cáań bijanjaliibi bin pɔ̄ɔ̄yee tikpil gba, waa làá ŋmā kí mɔ̄tì u-pu, kun puee Babiloon yab làá mā ŋgumu mun boon bi làá nīn bāal̀ee, ní kí gbà ibòó kí pɔ̀fì binib tikpil. 18 U nín kpēē dipùtil din u pūtèe fámee, u nyáń mpèéyee boon dee. U nín ŋá pu ki kíí ki nyīī ŋŋal ní ki ŋá tin bí nee kɔkɔee, waa làá ŋmátí!

19 «Man ni-Dindaan Unimbɔti un bí dimaŋfalin nee nín bíi sòoǹ puee sɔ̀. Isirayeel bɔtiu nín ŋá pu ki nyáń mpèé ŋun ní u nìn pūtì m-nimbiin ki nyīī ŋŋalee boonee, m làá dáaĺ u-tafal. 20 M làá píĺ-u kutaliŋŋu ní kí cúú-u. M làá cùnnì-u Babiloon tiŋkin ní kí sòoǹ u-bɔti niin, di sá yii waa yúl̀ nì mi deedee. 21 Bi làá kpɔ̀ u-janjamɔntiibi kujaaun ní bin kíǹ kaa kpíìyee ń sāǹ kí yàl̄ ijaan kɔkɔ pu. Niinee ni làá béé yii man ni-Dindaan di sòon̄.»

Ti-Dindaan pooŋyi

22 «Man ni-Dindaan Unimbɔti nín sòon̄ puee sɔ̀. Man m-ba làá lēē seedir subu yilpu dipampɔmbil din túkú bu-paŋkpaaŋŋi nyɔkɔpuee ní kí cáá cóoń dijoofɔŋfɔkɔl diba yilpu. 23 M làá dū-dì kí cóoń Isirayeel jool din fɔ̀kɔ̀ee yilpu. Di làá wíiǹ kí tɔ̄ apan, kí lòoǹ abil ní kí kpántí buseedirisubu bunyannyaambu. Inoon kɔkɔ nì i-bulifi làá páań i-diiŋi bu-paŋŋi pu, ní kí nīn ŋùŋfī bu-booŋŋu taapu. 24 Niinee tisatin sufii kɔkɔ làá béé yii man di sá ni-Dindaan. M gùutī isufi in fɔ̀kɔ̀ee pu ní kí yàntī in kaa fɔ̀kɔ̀ee ń wíiǹ. M làá yàntī isufi in sɔ̀m̀ee ń kpā ní kí tīī in kūńee ŋkpiim. Man ni-Dindaan di sòon̄, ní tin m yaa lēe, m ŋáań míǹ ní.»