Eeseekiyeel 19

Gbikintib yaliŋkii

1 Ti-Dindaan bí-mi yii ḿ gāā iyaliŋki laŋŋu nee kí tīī Isirayeel bɔtibiliŋ:

2 «Ni-na nìn sá ugbikintinaati

ní ki bí gbikintib kansikin.

U nìn dɔ̀ agbikintipɔmbil kansikin

ní ki kpīintí u-biyaamu.

3 U nìn péé u-biki kiba.

Kíǹ kpántì digbikintipɔmbilee,

ní ki bífì ki kíǹ ki ŋūǹ kí tɔ̀ntī kuwaŋkuluu,

ní ki cútì binib ki ŋmɔ́.

4 Binicambi nìn gbìl̄ u-pu.

Bi nìn gbìn̄ mbòó ki sàl̄-u

ní ki dū dibɔmbil ki túuń u-maŋfal

ki cáá-u ki cūnnì Eejipiti tiŋkin.

5 Ugbikintinaati kāl̀ ki cíitì ki gīī.

Ŋyunti ŋun u ká yii dimákal kaa ti bée,

ní u lēē u-biyaamu kansikin kiba.

U nìn dū-kì ki kpántì digbikintipɔmbil din cáá mpɔnee.

6 U nìn kóò gbikintib kansikin

ní ki dūu kpántì digbikintipɔmbil.

U bífì ki ŋūǹ kí tɔ̀ntī kuwaŋkuluu

ní ki cútì binib ki ŋmɔ́.

7 U nìn gbáń ki wīil̀ bi-gunlɔkɔŋ

ní ki nāaǹ bi-timmu.

Kitiŋee pu nib yaa nìn gbìl̄ u sūǹee,

dinyoondi nìn cútí-bi ní.

8 Niinee atimbun nib kpáfì kí jáǹ-u,

anibul nìn nyánní an kɔkɔ pu.

Bi nìn dū kulaaŋŋu ki cúú-u

ní ki dū-u ki tɔ́ mbòó poon.

9 Bi dū dibɔmbil ki lɔ̀kɔ̄-u

ní ki dū-u ki tɔ́ dikantandin

ki cáá-u ki cūnnì Babiloon bɔtiu cee.

Bi nìn dū-u ki tɔ́ sarkan kí taa ti gbìl̄ u-pu

yii u gbùkum̄ Isirayeel jooŋŋi pu.»

Bufiinyisubu yaliŋkii

10 «Ni-na nìn náań nì bufiinyisubu

bun bi cóoǹ mbun caŋinee ní.

Bu nìn lòoǹ tiŋan ní ki cáá tifaal tikpil,

kun puee bu nìn kāntí nnyim tiŋan pu.

11 Bu-paŋŋi nìn pɔ̄ɔ̄ tiŋan,

ní ki kpántì bibɔtiibi kpandɔŋu.

Bu nìn wíiǹ ki fɔ̄kɔǹ ki páaǹ isufi pu.

Bu-fɔkɔŋŋu nì bu-paŋŋi puee,

báà ŋma nìn wāĺ-bu ní.

12 Ama ní bi fùkū-bu nì diŋuul poon

ki lúkú kitiŋ.

Ŋwìiń nyalaŋki pú buŋku yāntì bu-biliŋ kūń ki lítì.

Bu-paŋŋi ŋin nìn pɔ̄ɔ̄yee kūń

ní ki wùn̄ ŋŋmi.

13 Kɔŋkɔnnee, bi dū bufiinyisubu ki cóoǹ kuteeun,

kitiŋ kin kūń nnyim kpée.

14 Ŋŋmi ŋubɔ nyáń bu-dɔŋu poon,

ŋu wùn̄ bu-paŋŋi nì bu-biliŋ.

Buaa ti cáá dipandi din pɔ̄ɔ̄

ki ŋūǹ kí kpántí ubɔti kpandɔŋuee.»

Bí nīn gà nlan nee kii bi nín gà ŋkpiisilan puee.