Eeseekiyeel 21

Atulim bɔti tin sá ki tīī Isirayeel yabee

1 Ti-Dindaan sòon̄ nì mi yii^a: 2 «Nisaaleen, fàtī a-nimbiin kí túĺ ŋgiil pú. Sòoǹ kí tɔ̄ dijandi gbanti pu, ní kí dū m-bɔti kí nàatī binib bin kóò Neegeeb bambaŋkunee. 3 Á tùkù-bi yii bí pīlifì tin man ni-Dindaan Unimbɔti cáá kí sòoǹ kí tɔ̄ ŋgiil pú bambaŋku puee. M làá tūū ŋŋmi ni-kansikin ní ŋú wà kí céetí isufi in sɔ̀m̀ee nì in kūńee kɔkɔ. Aŋmilimbil kaa làá kpú, ní án làá wà báà ŋma, kí yòon̄ ŋgiil pú kí cáá sāā ŋgan pú. 4 Báà ŋma làá dāá wāl̀ yii man ni-Dindaan di tūū ŋŋmi gbanti ní ubɔ kaa dāa ŋūǹ kí gbíntí-ŋu.» 5 Ní m kíí yii: «Áù ti-Dindaan Unimbɔti, bi bí ki yáliŋkí m-pu ki lì yii: <Alaŋkpan ŋma ní u pée nyí ki gà.>»

6 Ti-Dindaan sòon̄ nì mi yii^b: 7 «Nisaaleen, fàtī a-nimbiin kí túĺ Jeerusaleem tiŋki, kí sòoǹ kí tɔ̄ circir kɔŋkooŋŋu pu. Fōō m-bɔti kí nàatī Isirayeel yab. 8 Tùkù Isirayeel yab yii ti-Dindaan nín sòon̄ puee sèé: <M làá jáǹ-ni, m làá dáaĺ m-tàataajiki kí fúutí kujitooun ní kí kpɔ̀ deedeedaan nì unikpiti kɔkɔ. 9 M nín làá kpɔ̀ deedeedaan nì unikpiti puee pu ní m làá fúutí m-tàataajiki kujitooun kí tàntī-kì ni-kɔkɔ pu, kí yòon̄ ŋgiil pú kí cáá sāā ŋgan pú. 10 Báà ŋma làá béé yii man, ni-Dindaan di fúutì m-tàataajiki kujitooun. Maa làá fàtīí gíiǹ-kì kí fúuń.> 11 An puee, sii nisaaleen, nín̄ yáliŋkí. Nín̄ yáliŋkí nì dipɔɔbiildi poon nì ntuntun bi-kɔkɔ nimbiin. 12 Bi yaa láa bālifì-si yii ba pu ní a yáliŋkée, á kíí-bi yii: <M gbìl̄ atulim bɔti tin dòońee pu. Báà ŋma pɔbil làá bīil̀, iŋal kɔkɔ làá kpú, binib landɔkɔi làá gátí ní bi-tabiŋyiliŋ làá nīn jìkì. Ŋyunti bāań! Án làá pée ŋá míǹ ní kɔŋkɔnnee, ti-Dindaan Unimbɔti di sòon̄ míǹ.>»

Ti-Dindaan tàataajiki

13 Ti-Dindaan gíti tí sòon̄ nì mi yii: 14 «Nisaaleen, fōō m-bɔti kí nàatī. Tùkù binib tin man ni-Dindaan bíi sòoǹ nì bee.

Kitàataajiki kiba sɔ̀,

kitàataajiki kin jītí ki jìl̀ pàlpalee.

15 Bi lōoǹ-kì kí pɔ̀fì binib ní,

bi pítì-kì kí nīn jìl̀ ní.

16 M dū-kì ki tīī bí pítí-kì

kí ŋmā kí dū-kì kí tɔ̄ ditundi.

Bi lōoǹ-kì kì jìl̀ pàlpal

kí dū-kì kí ŋúbíǹ un làá kpɔ̀ binibee ní.

17 Nisaaleen, fáá dinimbinaamandi biilii!

Bi tāntì kitàataajiki gbanti m-nibul

nì abɔtibil ŋin kɔkɔ kpòotī Isirayeel tiŋkee pu ní.

Bi làá kpɔ̀-bi kí kpáaǹ m-nibul.

Fáá a-bindi kí dàkà a-nimbaaku.

18 An sá icɔŋki in pɔ̄ɔ̄yee ní.

Ba di làá jītí ŋyunti ŋun ní

mbɔtikpandɔ ŋun kaa bí tibanee gíti kpée?

Ti-Dindaan Unimbɔti nín sòon̄ puee dee.

19 Sii nisaaleenee, fōō m-bɔti kí nàatī.

Kpāafì abaal,

diba, mili, mita pu,

di sá yii ŋkúm tàataajiki dee,

kitàataajiki kin di làá pɔ̀fì binib

ki māntìi tú-bi an kɔkɔ puee.

20 Kì làá bīil̀ bi-pɔbil kí yàntī bí lítí tikpil.

M dū ŋkúm tàataajiki ki bíl̀ mpunyɔmu kɔkɔ pu.

Bi bɔ́ntì-kì kí nīn jìl̀ ní,

bi lōoǹ-kì kí ŋmā kí pɔ̀fì binib ní.

21 Kitàataajiki kin jītí pámpamee,

pɔ̀fì binib ŋgan pú nì ŋgiil pú.

Fàtī a-nyɔkɔ kin cɔ́m̀ee an kɔkɔ pú.

22 Ma mun làá kpāafì abaal ní kí yàntī m-ŋuul ń tɔ̄ di-tundi. Man ni-Dindaan di sòon̄.»

Bi bíi jáà nì Jeerusaleem tiŋki

23 Ti-Dindaan bí yii: 24 «Nisaaleen, cátí adan ali ŋin pu ní Babiloon bɔtiu tàataajiki làá ŋmā kí dī kí dāan̄ee. Adan alee làá nyānní kitimbaantiin ní. Didandi kamaa kílilaŋkee, ní ŋmà kupiliŋu pu kitiŋ kin poon ní di cée yindi. 25 Cátí didandi din pu ní Babiloon janjaliibi làá dī kí cù Amɔn yab tiŋki Raabee, ní didandi din kíǹee ń nīn cá Jeerusaleem tiŋki kin bi máń digundi ki tú kì bí Juuda tiŋkinee. 26 Babiloon bɔtiu síl̀ isampuyakati, laakin adan alee kífée kí bɔ̄ tibɔɔl. U cīkifì ipiin, ki bālifì awaa ki kpēē tiwaŋkuti pɔɔŋi címmm. 27 Mpiin ŋun dàkà Jeerusaleemee lítì u-ŋaŋgiilin. U làá pɔ̄ kinyɔkɔ bí cùú kpɔ̀ binib bin bí niinee ní kí fáá iwinliili bí kíĺ kujaau. U làá dū kujaau masiimbi kí gbàan̄ kitiŋ punyɔmmu pu, kí mā agun ŋin boon bi làá nīn bāal̀ ki jáà kujaauee, ní kí gbà abɔbil ŋin poon bi làá nīn kàal̀ ki jáàyee. 28 Jeerusaleem yab dākafì yii bi nín bālifì an cúú Jeerusaleemee kaa sá tiba, di sá yii bi pūtì yii bi làá wúń bi-pu. Ama ní Babiloon bɔtiu bíi téetí-bi bi nín kaa yúl̀ nì ti-Dindaan deedeeyee pu. An puee u làá cúú-bi kí cùnnì kuyuŋu. 29 An puee man bi-Dindaan Unimbɔti bíi sòoǹ nì bi tin bí nee yii: <Ni pée téetí-mi ni-yìntitam nì ni-kpitii pu ní kaa gbèentí. Ni-tuuŋŋi kɔkɔ poonee, ni-kpitii pée nyáń ní ki pá mpaampiin pu. Too, ni nín kaa yàntī bí súntí ni-puee puee, ni làá kɔ́ unannanli ŋaan.

30 «Sii dibɔtibil din di kā Isirayeel tiŋki pu dibeel kaa yú deedee ki sá unikpitee, ŋwiin ŋun ní a-kpitii làá gbèen̄ee dòoń. 31 Man a-Dindaan Unimbɔti nín sòon̄ puee sɔ̀. Bi làá fōō ŋŋaabu ŋun dàkà yii a sá ubɔtee ní kí cíkití a-beefuuliiki. Tiwan làá kpántí ti-paaŋyi! Bi làá yòon̄ un nìn sīntì u-ba taapuee yilpu, ní kí sìntī un nìn yōoǹ u-ba yilpuee taapu. 32 Adigbuŋkati, adigbuŋkati ŋma! M làá yàntī Jeerusaleem ń kpántí adigbuŋkati ŋma. M tīī ubɔ mpɔn ú jáǹ-kì. Bi làá yàaǹ Jeerusaleem tiŋki kɔkɔ, ama see un m tīī mpɔn gbantee ń bàń kí wàatī.»

Bi làá jáǹ Amɔn yab

33 «Nisaaleen, sòoǹ m-bɔti kí nàatī Amɔn yab. Sòoǹ nì bi yii ti-Dindaan Unimbɔti nín sòon̄ Amɔn yab nì bi nín sīī Isirayeel yab pu puee sèé, yii: <Kitàataajiki! kitàataajiki! bi fúutì-kì kujitooun. Bi lōoǹ-kì kí dūú kpɔ̀ binib, kí tɔ̀ntī binib ní kí nīn bí ki ŋmóò làka laka. 34 Ŋyunti ŋun ni kā ki máká inyimɔn leedakaŋ nì bi nín sòon̄ ki nāatì-ni tinyimɔmbɔti puee, kitàataajikee kíǹ bɔ́ntì kí tùkutī binikpitib nì bikpitiŋaliibi yiliŋ dee. Di sá yii ŋyunti ŋun ní bi-tuŋkpitiŋ làá gbèen̄ee dee.> 35 Kɔŋkɔnnee, gíim̀maan ni-tàataajimmu kí fúuń mu-jitootin. M làá sòoǹ ni-bɔti laakin bi náań-nee, kitiŋ kin poon bi màl̄-nee ní. 36 M làá kpáatí m-ŋuul kí sìtī ni-pu. M làá dū m-ŋuul ŋmiŋu kí tɔ̄ ni-pu, ní kí dū-ni kí ŋá kìrikiri nib ŋaan, binib bin tundi pée sá yii bí nīn kù ki céetée ŋaan. 37 Ŋŋmi di làá wà-ni ní ni-fatikuu ń nīn pùub̀ kitiŋ nee kɔkɔn. Míǹ boonee ubɔ kaa ti làá téetí ni-pu. Man ni-Dindaan Unimbɔti di sòon̄.»