Eeseekiyeel 31

Bi dū Eejipiti bɔtiu ki ŋmāntiǹ seedir subu

1 Bi nín cúú Isirayeel yab ki cūnnì kuyuŋu abin saalaa nì diba boon, uŋmatataati wimpeekaaŋuee ní ti-Dindaan sòon̄ nì mi yii: 2 «Nisaaleen, tùkù Eejipiti bɔtiu Faaroo nì kunipaau kun pu u kā dibeelee yii:

<Sii un cáá mpɔŋkpaan nee,

m làá dū-si kí ŋmàntīǹ ba dee?

3 A náań nì Leebanɔn subu bun bi yíì seedir

bu cáá apan ŋin ŋān̄

ki tìì mboon ŋun taapu sɔ̀m̀ fílfilee ní.

Busubuee fɔ̀kɔ̀ tiŋan

ní bu-yilpu tùutī atagban.

4 Ntaanyim yāntì bu wíiǹ.

Kitiŋ taapu buŋŋu ŋubɔ yāntì bu yíkì ki jɔ́m̀.

Nnyim nìn kōontí kí màntīí tū bu-nyaaŋyi,

ní kí pùub̀ kí cù tisatin sufii kɔkɔ cee.

5 Nnyim min u nìn kāntí tikpilee puee,

bu nìn wíiǹ ki jítiǹ isufi in kíǹee kɔkɔ.

U nìn cáá apan náaǹ ki lālim̀ ki cūtì ndan.

6 Inoon kɔkɔ nì i-bulifi nìn pāantí i-diti bu-paŋŋi pu.

Ipeel kɔkɔ nìn dɔ̀ ŋi-taapu ki màal̀

ní atimbun tikpil nìn kóò ŋi-booŋyi taapu.

7 Busubuee nìn ŋān̄ ní ki fɔ̀kɔ̀

ní bu-paŋŋi béetì tiŋan pu,

di sá yii bu-nyaaŋyi nìn kóò kitiŋ taapu taapu

laakin nnyim wīikée.

8 Unimbɔti kpaabunee,

seedir subu bubɔ kaa bí bí dū-bu kí ŋmàntīǹ,

siipreesi subu bubɔ kaa cáá apan ŋān̄ kii bu-yaŋee,

plataani subu bubɔ faati kaa bàn̄ bu-faati

ní busubu bubɔ kaa bí bukpaayee poon ki ŋān̄ nì bu.

9 M nìn tīī-u apan ŋin ŋān̄ee

áli gba Unimbɔti kpaabu Eedeen

sufii kɔkɔ nìn cáá bu-pu ipoompoon ní.>»

Eejipiti bɔtiu làá kɔ̄fì kii seedir subuee

10 «Too, man ni-Dindaan Unimbɔti nín sòon̄ puee sèé: <Buseedirisubu wíiǹ. Bu yíkì ki tūū atagban ní ki kpántì ulambidaan. 11 An pu ní m dū-bu ki fá ní ki dū-bu ki ŋá kitiŋ pu bɔtiu un pɔ̄ɔ̄yee ŋaan. Busubuee nín ŋá ikpiti puee, míǹ ní ubɔtee làá ŋá-bu kí téeǹ. 12 Binicambi bin néeń tipɔmbɔti tikpilee gāā-bu ki lúkú ní ki fātì bi-boon ki tīī-bu. Bu-paŋŋi kɔkɔ lítì ki dɔ̄ kitiŋee jooŋŋi pu nì ki-tantakaŋin. Binib bin kɔkɔ nìn kóò bu-booŋŋu taapuee yíkì ki dū kitiŋee ki fá. 13 Inoon kɔkɔ nì i-bulifi dòoń ki tɔ̄kɔntí bu-dɔŋu pu ní ipeel kɔkɔ yùkufī ki póotí bu-paŋŋi pu. 14 Tin bí nee kɔkɔ ŋá míǹ án nín làá ŋá pu isufi in yú ibun caŋinee bubɔ ń taa tí kɔ́ dilambilin kí wíiǹ kí tūū atagban, ní isufi in kāntí ntaanyimee bubɔ ń taa yòon̄ bu-ba yilpu kí fɔ̀kɔn̄ kí jītíǹ in kíǹee. Di sá yii isufi nì binib kɔkɔ bí kí kpú ŋwindal. Bi-kɔkɔ làá kɔ́ kitiŋ taapu kí cùú ŋàl̄ bin kpíì ki dɔ̄ niinee.>

15 «Man ni-Dindaan Unimbɔti nín sòon̄ puee sèé: <Daliŋkin seedir subu nín cá ditaŋkpiilinee, m nìn yāntì tin kɔkɔ bí duulinyanee kāl̀ dikpool ní. Bu-puee, m yāntì mmɔɔnyim min bí kitiŋ taapuee bīiǹ bu-pu. M yāntì mi-buŋyi yúl̀, m cúú mi-nyim mí taa ti pùub̀. Bu-puee, m yāntì Leebanɔn bambaŋku kɔ́ dibɔmbɔndin ní ki yāntì tisatin sufii kɔkɔ kūń. 16 M nín yāntì busubuee lítì kí cùú ŋàl̄ bin bí ditaŋkpiilinee, atimbun nib gbìl̄ ní ki kɔ́ dinyoondin. Ditaŋkpiilin niinee ní an mɔ́ɔkiǹ Eedeen kpaabun sufii nì Leebanɔn sufii in ŋān̄ ki kāntí ntaanyim tiŋanee. 17 Bi mun kútì seediree pu ki sīntì ditaŋkpiilin ki cūtìi ŋàl̄ bin di kpíì kujaaunee. Bíǹ di nìn tíkí-u ní ki nìn kóò bu-booŋŋu taapu atimbun kansikin.>

18 «Eedeen kpaabunee, busubu bubɔ kaa ŋān̄ àá ki wíiǹ ki bàn̄-si. Ama m làá yàntī sii nì bíǹ kɔkɔ ń sìntī kitiŋ taapu. Niinee sii nì bin kaa gíí dikpancandee nì bin kpíì kujaaunee di làá kpāfi kí dòon̄. Kun di làá bàń Eejipiti bɔtiu Faaroo nì u-samaau puee dee. Man ni-Dindaan Unimbɔti di sòon̄.»