Eeseekiyeel 34

Ti-Dindaan làá jáǹ Isirayeel kpootiliibi

1 Ti-Dindaan bí-mi yii: 2 «Nisaaleen, dū m-bɔti tin jáà nì Isirayeel kpootiliibi nee kí nàatī-bi. Dū m-bɔti kí nàatī-bi kí tùkù-bi yii: <Man ni-Dindaan Unimbɔti nín sòon̄ puee sɔ̀. Nimbi bin kpàá Isirayeel yabee, mbusu dɔ̄ ki cí-ni, di sá yii nimbi ni-ba ní ni kpàá! An kaa sá ipii ní upikpaal máaǹ kí kpààa? 3 Ama nimbee, ipii biim ní ni nyù, ní ki cēē i-kuti ki lù tiwampeeŋkaal ki pèentí ní ki kù tiwaŋkuti tin cáá ŋkpamee ki ŋmóò, ama ní ipii bɔti kaa ká-ni. 4 Naa tīī ipii in pɔ̀fèe mpɔn, kaa cáaǹ in būǹee. Naa nyàab̄ ŋŋaabu ki bóob́ un taal gíìyee, kaa gíiǹní un kākatì u-ba ki wāatì kupicaŋkpuŋuee, ní kaa tí nyàab̄ un nìn wáŋkèe. Ama ni dū mpɔn nì nnimbinaakulim ní ki kpōotì-bi. 5 Niinee ipii túĺ laakin i yaa kée, di sá yii iaa nìn gíti cáá ukpaal, ní ki kpántì tijin ki tīī ipeel. 6 M-piii kpátìi gbí ajoon kɔkɔ nì ŋgbantamu kɔkɔ pu. I yàl̄ kitiŋ nee kɔkɔ pu ní ubɔ kpá kí nyàab̀-i, ní an kaa ká báà ubɔ mun. 7 An puee, Isirayeel pikpaaliibi, ní pīlifì tin m cáá kí tùkù-nee: 8 M bí dimaŋfalin! Man ni-Dindaan Unimbɔti nín sòon̄ puee sɔ̀. M-piii kɔ́ binaayub ŋaan. I nín kaa cáá bikpàaliibee puee, ipeecuncuti cúú-i ki tɔ̄ntì. Di sá yii m-pikpàaliibi kaa cūtìi nyàab̄ m-piii. Ama bipikpaaliibi gbanti kpàá bi-ba ní kaa fātìi tɔ́ m-piii. 9 Too, Isirayeel pikpaaliibi, pīlifìmaan tin man ni-Dindaan bíi sòon̄ee: 10 Man ni-Dindaan Unimbɔti bíi tùkù-ni yii m làá jáǹ-ni ní kí fōō m-piii ni-ŋaan. Maa làá ti yàntī ní kpàà m-piii. An yaa ŋá mimmee, naa làá ti jī i-pu. M làá dáaĺ m-piii kí nyāntí ni-nyɔmmun, ní iaa làá ti kpántí tijin kí tīī-ni.

11 «Man ni-Dindaan Unimbɔti nín sòon̄ puee sɔ̀. Kí yòon̄ kɔŋkɔnnee kí nīn cée, man m-ba di làá cù kí nyàab̀ m-piii ní kí kpàà-i m-ba. 12 Kii upikpaal piii nín yaa yàl̄, u péetí-i kí kpāfì puee, míǹ ní m làá kpàà m-piii. M làá cù kí nyàabìń m-piii laakin kɔkɔ ní i yàl̄ ki cūtì dipɔ̀ńdi nì dibɔmbɔndi dalee. 13 M làá nyāntí-i anibul kansikin ní kí kóoǹní-i nnicantimun kí kpāfì ní kí fàtīí gíiǹní-i i-tiŋkin. M làá cáá-i kí cùnnì Isirayeel jooŋŋi pu nì atantakan nì kitiŋ nee jaŋŋi laakin kɔkɔ ní binib kóòyee kí kpàà-i. 14 M làá cáá-i kí cùnnì kunaakpaapɔɔu kumɔntiiun. I làá ká timool Isirayeel jooŋŋi pu kí ŋmɔ́. Niin ní i làá ká timɔmɔntiil taapu kí dòon̄ kí ŋùŋfì, ní kí ká Isirayeel jooŋŋi pu laakin kitiŋ ŋān̄ee timool kí ŋmɔ́. 15 Man m-ba di làá kpàà m-piii ní kí yàntī í ŋùŋfì. Man ni-Dindaan Unimbɔti di sòon̄ míǹ. 16 Upii un wáŋkèe, man m-ba di làá nyàab̀-u. Un búntì ndanee, man di làá fàtīí gíiǹní-u. Un fōō tiweendee, man di làá nyàab̀ ŋŋaabu kí fìn̄-u ní kí tīī un būǹee mpɔn. Ama upii un di bí màlmal ki pɔ̄ɔ̄yee, m làá lēē-u. M làá dū deedee marab ní kí kpòotī m-piii.»

Unimbɔti jòó u-nibul

17 «Nimbi m-piii, man ni-Dindaan Unimbɔti nín bíi sòoǹ nì ni puee sèé: <Man di làá sòoǹ kí ŋāŋkì m-waŋkuti kansikin, kí sòoǹ ipijaa nì iŋɔjaa bɔti. 18 An kaa fáatiǹ ni-kansikin bi-ba bí ŋmɔ́ kunaakpaapɔɔu moomɔntiiti. Ba di yì míǹ? Ba pu ní ni tà timool tin kíǹee ní? An kaa bàn̄-ni ní nyɔ̀ nnyim min wāĺ kílkil neeee? Ba pu ní ni cáá ni-taaŋi ki tà ki gbàtī nnyim min kíǹee ní? 19 See m-piii in kíǹee ń ŋmɔ́ timool tin ni tàn̄ tàn̄ee ní kí nyɔ̀ nnyim min ni gbātèe. 20 An pu ní man ni-Dindaan Unimbɔti sòon̄ yii man m-ba di làá nīn sá m-piii in gbìfèe nì in bí ŋkaŋkalimuee kansikin ubɔsoonli. 21 Di sá yii ni dū ni-gbigbipati nì ni-takakalii ki yáŋkì ipii in būǹee, ní ki dū ni-yiŋyi ki sāatì-i ki nyántì kupicaŋkpuŋu kansikin. 22 An puee m làá dāan̄ kí jòoń-bi, án nín làá ŋá pu bí taa dāan̄ kí yɔ̀-iee. Man di làá nīn sá nimbi nì bíǹ kansikin ubɔsoonli. 23 M làá yàntī upikpaabaanti nín kpàà m-piii. Úǹ di sá m-tɔntɔnliu Daafiidi. U làá kpàà m-piii ní kí nīn sá i-pikpaaliu. 24 Man ni-Dindaan, man di làá nīn sá bi-Nimbɔtiu ní man tɔntɔnliu Daafiidi ń nīn sá bi-bɔtibil. Man ni-Dindaan di sòon̄.

25 «Man nì m-piii làá ŋá ŋgbansɔŋfi pèéŋu ní kí kúntí ipeel kitiŋ nee pu. Niinee m-piii làá ŋmā kí nīn bí ŋgbansɔŋfin kuteeun ní kí dòon̄ kubambaŋŋun kí gèeǹ. 26 M làá yàntī bí nīn kóò m-circir jool caŋin. M làá yàntī utaa ń nīn nì ŋyunti ŋun ní an máaǹee, utaa gbanti làá nīn sá dibiindi taau ní. 27 Isufi làá lòoǹ abil ní kitiŋ ń lòoǹ tikpaajin ní báà ŋma ń nīn bí ŋgbansɔŋfin kitiŋ nee poon. M làá gbá kí tìl̄ ikusaka in di ŋúb́-bee ní kí nyāntí-bi kuyuŋu kun poon bi bée. Ŋyunti gbantee bi làá béé yii man di sá bi-Dindaan. 28 Binicambi kaa ti làá yɔ̀-i ní ipeecuncuti kaa ti làá cúú-i kí ŋmɔ́. Bi làá nīn bí ŋgbansɔŋfin ní ubɔ kaa làá fàaǹ-bi. 29 M làá tīī-bi tikpaatan tin di lòoǹ tiŋanee. Ŋkùm kaa làá ti cúú-bi kitiŋ nee poon. Atimbun ŋin kíǹee kaa làá ti kpèè-bi fám. 30 Báà ŋma làá dāá béé yii man bi-Dindaan bi-Nimbɔtiu bí bi-cee, ní Isirayeel yab lafun sá man nibul. Man ni-Dindaan Unimbɔti di sòon̄ míǹ.

31 «Nimbi m-piii, m-piii in ní m kpàáyee, nimbi binib, man di sá ni-Nimbɔtiu. Man ni-Dindaan Unimbɔti di sòon̄.»