Eeseekiyeel 36

Isirayeel yab làá fàtīí fōō bi-tiŋki

1 «Nisaaleen, fōō m-cee Isirayeel jooŋŋi bɔti kí dūú nàatī. Tùkù-ŋi ŋí pīlifì man ni-Dindaan nyɔɔbundi. 2 Man ni-Dindaan Unimbɔti nín sòon̄ puee sɔ̀. Ni-nannanliibi nín bēel̀-mi ki lī yii: <Àa! Àa! Kɔŋkɔnnee Isirayeel cannaaku jooŋŋi nee kpántì ti-yaŋ dee!> 3 Too, dū m-bɔti kí nàatī kí tùkù-bi yii man ni-Dindaan Unimbɔti nín sòon̄ puee sèé: <Ijaan kɔkɔ puee, bi nāaǹ-ni ki kā ni-pu ki bàà là yii ní kpántí atimbun ŋin kíǹee wanti. Bi bēel̀-ni ki sīī-ni.> 4 An puee Isirayeel jooŋŋi, pīlifìmaan m-nyɔɔbuŋŋi! Man ni-Dindaan Unimbɔti, m bíi sòoǹ nì ajoon nì ŋgbantamu nì mbùmbiyaamu nì atantaka nì adigbuŋkati nì ntimu mun ni yíkì ki dūu fá anibul ŋin māntìi tú-nee fúkúl̀ ki sīīyee. 5 Man ni-Dindaan Unimbɔti sòon̄ m-ŋuul poon kí jáǹ atimbun ŋin kɔkɔ kíǹee nì Eedoom tiŋki kɔkɔ. Di sá yii nì dipɔɔpiŋkpaandi nì kpeefam ní bi fōō m-tiŋki nì ki-naakpaapɔɔku ki gāā bi-bindi. 6 An puee á fōō m-bɔti tin sòoǹ Isirayeel tiŋki puee kí nàatī. Nàatī ajoon nì ŋgbantamu nì mbùmbiyaamu nì atantaka tin man ni-Dindaan Unimbɔti sòon̄ee yii: M làá yàntī m-ŋuul ń tɔ̄ di-tundi. Atimbun ŋin kíǹee sīī-ni ki kpēē ki sīŋkiǹ-ni. 7 Too, man ni-Dindaan Unimbɔti nín sòon̄ yii bi làá kpèè kí sìŋkīǹ atimbun ŋin māntìi tú-ni nee. 8 Ŋyunti gbantee, isufi in bí Isirayeel jooŋŋi puee làá tɔ̄ apan kí lòoǹ abil kí tīī nimbi m-nibul Isirayeel yab. Di sá yii ni làá fàtīí gítí ni-tiŋkin án kaa làá yúntí. 9 M bí ni-cee, m làá fàtī m-ba kí túĺ-ni, ni làá kpɔ̀ ni-sati kí bɔ̄l̀. 10 Isirayeel tiŋki kɔkɔnee, m làá yàntī ní bùtī. Binib làá fàtīí kɔ́ ni-timmun, di sá yii bi làá fàtīí mā adiin ŋin nìn lítèe. 11 Binib nì tiwaŋkuti làá bùtī. Ni làá nīn wīikí ní kí màal̀ mbiyaamu tikpil. Kitiŋ nee làá fàtīí ká ki-nib kii an nín nìn bí pu dooooyee, ní kí yàntī án bútí-ni kí jītíǹ dooooyee. Niinee ni làá béé yii man di sá ni-Dindaan. 12 Isirayeel yab, m-nibul, m làá yàntī ní còom̀ kitiŋ nee kɔkɔ poon. Ni làá fōō-kì ní kí nīn kíǹ ki sá ni-yaka. Kàa ti làá kpɔ̀ ni-biyaamu. 13 Man ni-Dindaan Unimbɔti nín sòon̄ puee sɔ̀. Binib lì yii Isirayeel tiŋki tɔ̀ntī ki-nib ní ki kù bi-biyaamu. 14 Too, kitiŋ nee kaa làá ti tɔ̀ntī ki-nib kaa làá ti kpɔ̀ bi-biyaamu. Man ni-Dindaan Unimbɔti di sòon̄ míǹ. 15 Naa làá ti gbìl̄ atimbun ŋin kíǹee beelii àá ŋi-siibiliŋ pu. Di sá yii ni-tiŋki kaa ti làá nīn kù ki-biyaamu. Man ni-Dindaan Unimbɔti di sòon̄ míǹ.»

Ti-Dindaan làá fàtīí kóoǹ Isirayeel yab kí kpāfì

16 Ti-Dindaan bí-mi yii: 17 «Nisaaleen, pīlifì! Isirayeel yab nín nìn dáá kóò bi-tiŋkinee, bi nìn dū bi-bimbikpitim nì bi-tuŋkpitiŋ ki kɔ́ǹ bi-tiŋki tijɔkɔndi. Bi-bimbim nìn bí m-cee kii unimpu nín yaa ká u-ba u bí tijɔkɔndin puee ní. 18 Bi dū nnikpaakoon nì iwaatooti ki kɔ́ǹ kitiŋ tijɔkɔndi. An pu ní m kpáatì m-ŋuul ki sītì bi-pu. 19 M jìn̄-bi ki kɔ́ǹ atimbun aban nì nnicantimun. Bi-bimbim nì bi-tuuŋŋi nín cáań-bi m-tafadaaldi diŋyee dee. 20 Atimbun ŋin kɔkɔn bi cūtèe, binib kpēē m-circir yindi fám bi-pu. Di sá yii bi nìn lì yii: <Ti-Dindaan nibul nìn yá, bi yíkì u-tiŋki pu.> 21 An nìn páb́-mi ḿ ká yii atimbun aba bí ki kpèé m-circir yindi fám Isirayeel yab bin nìn dòoń bi-ceeyee kpitii pu. 22 An puee, á nàatī-bi tin man ni-Dindaan Unimbɔti sòon̄ee yii: <Isirayeel yab, kun m làá ŋée, an kaa sá ni-pu ní m làá ŋá, ama an sá m-circir yindi din ní ni bíil̀ atimbun ŋin poon ni cūtèe pu ní m làá ŋá míǹ. 23 Ni-puee, atimbun ŋin kíǹee nib kpēē m-yindi fám. An puee, m làá dàkà-bi yii man di sá Unimbɔtikpaan nì circirdaan. Ni-pu ní m làá dī kí dàkà-bi tíǹ gbanti kɔkɔ. Niinee bi làá béé yii man di sá ni-Dindaan, man ni-Dindaan Unimbɔti di sòon̄ míǹ.>

24 «M làá nyāntí-ni atimbun kansikin, m làá kóoǹní-ni ntimu mun kɔkɔ poon ní ni bée ní kí fàtīí gíiǹní-ni ni-tiŋkin. 25 M làá kpáatí nnyim min bí circiree kí sìtī ni-pu, ní kí ŋá-ni circir. M làá fíntí-ni kí nyāntí ni-jɔkɔntuuŋŋi kɔkɔ poon nì ni-waatootii poon. 26 M làá tīī-ni dipɔɔpɔndi ní kí dū ŋfampɔm kí ŋá ni-ni. M làá lēē ni-pɔbil din pɔ̄ɔ̄ kii ditaŋkpalee ni-ni, ní kí tīī-ni dipɔbil din pɔ̀fì ki gbìl̀ tibɔti taapuee. 27 M làá dū m-Fam kí ŋá ni-ni. M làá yàntī ní ŋmā kí nīn tɔ́ m-marab ní kí ŋúb́ m-bɔkpaaŋi kí ŋá ŋi nín bí yii ní ŋá puee. 28 Niinee ni làá ŋmā kí kɔ́ kitiŋ kin ní m tīī ni-naanjabee poon. Ni làá nīn sá m-nibul ní man ń nīn sá ni-Nimbɔtiu. 29 M làá nyāntí-ni ni-jɔkɔnti kɔkɔn. Maa làá ti dū ŋkùm kí tɔ̄ ni-pu, ama m làá yàntī ni-bileeu ń nyā ní kí lòoǹ tikpil. 30 M làá yàntī ni-sufii ń lòoǹ abil tikpil tikpil ní ni-kpaajinti mun ń lòoǹ tiŋan tiŋan. An yaa ŋá mimmee, ŋkùm kaa làá ti cúú-ni ní kɔ́ icoon atimbun ŋin kíǹee kansikin. 31 Niinee ni làá téetí ni-bimbikpitim nì ni-tuŋkpitiŋ pu. Ni-naŋki làá nyā nì ni-ba ni-kpitii nì ntimbiil tuuŋŋi ŋin ni ŋée pu. 32 Ní béé yii an kaa sá ni-pu ní m làá ŋá míǹ, man ni-Dindaan Unimbɔti di sòon̄ míǹ. Isirayeel yab, ní yàntī ni-bimbim ń kɔ́ǹ-ni icoo ní yāliŋkì i-pu!

33 «Man ni-Dindaan Unimbɔti nín sòon̄ puee sɔ̀. M yaa láa fíntì-ni ki nyántì ni-kpitii kɔkɔ poon ni nyáń dándanee, m làá yàntī binib ń fàtīí kɔ́ ni-timmun ní bí fàtīí mā adiin ŋin nìn lítèe. 34 Ni làá fàtīí kpɔ̀ tikpaatan tin ni nìn dūu fée, bisanjitiliibi kaa làá ti ká yii bi dū tikpaatan ki fá. 35 Bi làá lì yii: <Kitiŋ kin bi nìn dūu fée fātìi kpántì kii Eedeen kpaabuee. Ntimu mun poon bi nìn gbáń ki wīil̀ adiin an kpántì adigbuŋkati ŋmee, bi fātìi máń adiin binib kíǹ ki kóò mu-ni. 36 Niinee atimbun ŋin dáá gbíntìi bí ki māntìi tú-nee làá béé yii man di sá ni-Dindaan, un di fàtīi māā ntimu mun poon bi gbáń ki wīil̀ adiinee, ní ki fàtīi cōontí tin bi fùkū ki fée. Man ni-Dindaan di sòon̄ ní tin m yaa sòon̄ee, tíǹ ní m ŋáań.

37 «Man ni-Dindaan Unimbɔti nín sòon̄ puee sɔ̀. M làá yàntī Isirayeel yab ń mèè-mi ní ḿ kíí-bi ní kí yàntī bí bùtī kii ipiiyee. 38 Dooooyee, binib yaa nìn kpáfì kí jī jiŋaalibee, ipii in bi nìn cáa ŋáań saraabee nìn gbéè Jeerusaleem tiŋkin ní. Bi nìn cāabìń-i tipicaŋkpun tipicaŋkpun ní. Míǹ ní binib bin làá dāan̄ kí kɔ́ ni-timmu mun kpántì adigbuŋkati nee làá nīn wīikí. Niinee, báà ŋma làá béé yii man di sá ni-Dindaan.»