Eeseekiyeel 39

Ti-Dindaan gíti sòon̄ ki bíikì Gɔɔgi pu

1 «Sii nisaaleen, dū m-nyɔɔbundi kí nàatī Gɔɔgi kí tùkù-u man ni-Dindaan Unimbɔti nín sòon̄ puee yii: <Sii Gɔɔgi, Meeseeki nì Tuubaal bɔtibikpiliu, m làá jáǹ-si. 2 M làá nyāntí-si a-tiŋkin. M làá ŋá-si mpɔn á nyā a-tiŋki kin bí ŋgan púee kí jáǹ Isirayeel jooŋŋi. 3 Míǹ boonee ní ḿ fáá-si ní butɔbu ń ŋmátí kí nyā a-ŋaŋgan poon kí lítí, ní ipiin ń ŋmátí kí nyā a-ŋaŋgiil poon kí lítí. 4 Niinee, sii nì a-janjakitil nì a-bɔɔbi bin kútì a-puee ń kpú Isirayeel jooŋŋi pu. M làá yàntī kaajiikub nì ipeel ń ŋmɔ́ ni-nanti. 5 A làá lítí kitiŋ kí kpú, di sá yii man di sòon̄, man ni-Dindaan Unimbɔti di lī míǹ. 6 M làá sēē Maagoogi tiŋki ŋŋmi nì bin kóòń ntimu mun nnyim māntìi tú bi bí ŋgbansɔŋfinee. Niinee báà ŋma làá béé yii man di sá ni-Dindaan. 7 M làá yàntī m-nibul Isirayeel ń béé m nín bí circir puee. Maa làá ti yàntī bí kpèè m-circir yindi fám ní atimbun ŋin kíǹee ń béé yii man di sá ni-Dindaan, Isirayeel circir Nimbɔtiu. 8 Tiŋman, tíǹ gbanti kɔkɔ làá ŋá míǹ, ní an kíĺ ki bíi ŋáań míǹ gba. Ibɔsoon wiiŋŋu ŋun bɔti m nìn sòon̄ ki síiǹee dee. Man ni-Dindaan Unimbɔti di lī míǹ. 9 Isirayeel yab làá dāá nyā bi-timmun. Bi làá dāá kpāā ŋŋmi ní kí dū bi-nannanliibi janjawanti kí ŋá poon án wà. Agbampɔɔ, akpaan nì ŋwaamu nì itɔfi nì ipiin nì ŋkpamu nì ntàataajimu làá nīn bí ŋŋmee poon ki wù áli abin aluli. 10 Binib kaa dāa gíti cá kusaau idɔpu àá kí cù kupɔɔun kí gāā isufi, di sá yii tijanjawan gbanti ní bi làá nīn cáa kpà ŋŋmi. Bin nìn fúkúl̀-bee, bi làá dāá fūkul̀-bi kí téeǹ. Bin nìn kóoǹ ni-wantee, ni làá dāá kóoǹ bi-wanti kí téeǹ. Man ni-Dindaan Unimbɔti di lī míǹ.

11 «Ŋwiin gbantee, m làá dāá tīī Gɔɔgi ntaŋkpiifal ŋun poon bi làá síb́-uee Isirayeel tiŋkin. Bisanjitiliibi tantakalin, Ŋyaam mɔɔl ŋwìiń nyalaŋki pú ní án làá nīn sá, ní ntaŋkpiifal gbanti làá pìin̄ bisanjitiliibi nsan. Niin ní bi làá síb́ Gɔɔgi nì u-janjakitil kɔkɔ. Bi làá nīn yíì mpaan gbanti yii <Gɔɔgi Nipaaku Tantakal>. 12 Isirayeel yab làá dāá dū iŋmal iluli ní kí síb́-bi, ní kí fíntí kitiŋ kí nyāntí tijɔkɔndin. 13 Kitiŋ nee nib kɔkɔ làá dāá síb́-bi, ní kí dāá nīn bí dipɔɔpindin daliŋkin m làá lēē m-nyooti kí dàkèe. Man ni-Dindaan Unimbɔti di sòon̄ míǹ. 14 Iŋmal iluli gbanti boonee, bi làá dāá lēē bininjab biba. Bíǹ tundi di làá nīn sá bí nīn yìiǹ kitiŋ kɔkɔ pu, kí nyàab̀ anikpil ŋin dáá gbíntìi dɔ̄ kitiŋee kí síb́, kí ŋá kitiŋ circir. 15 Bi làá dāá yìiǹ kitiŋ nee kɔkɔ pu. Bi-kansikin ubɔ yaa ká anikpabee ní ú tòò ataŋkpee kí kpúkuń ŋi-caŋin. An di làá nīn sá kudaaŋŋu. Niinee ní bin gbì itaŋkpiifalee ń dāan̄ kí yòon̄ akpabee kí cáá síb́ Gɔɔgi Nipaaku Tantakalin. 16 Kitiŋ kiba gba làá dāá nīn bí niin bí nīn yíì-kì yii Amoona, taapu di sá yii: <Kunipaau>. Án nín làá ŋá pu kitiŋ nee ń nyā tijɔkɔndinee dee.»

17 Ti-Dindaan Unimbɔti gíti bí-mi yii: «Nisaaleen, tùkù inoon kɔkɔ nì i-buluku nì ipeel kɔkɔ yii í nyānní an kɔkɔ pu kí dāá kpāfì kí jī saraa un m làá ŋá kí tīī-bee jinti. Án làá nīn sá saraakpaan ní m làá ŋá Isirayeel jooŋŋi pu. Ni ŋūǹ kí ŋmɔ́ tinan kí nyɔ̀ fatiku. 18 Ni làá ŋmɔ́ bibaatandambi nanti kí nyɔ̀ abɔtibil fatikuu, bibaatandambi nì abɔtibil ŋin bi dūu ŋá saraa ipijaa nì apibil nì iŋɔjaa nì Baasan nabiliŋ ŋin cáá ŋkpamee yil puee. 19 Saraa gbanti pu ní m yíì-ni, ni làá ŋmɔ́ ŋkpam kí díkí ní kí nyɔ̀ fatiku kí gbí. 20 Jiŋaakpaan gbanti poonee, ni làá ŋmɔ́ itaamu nì bitanjakaliibi nì bijanjaliibi nì bijanjaliibi bin kíǹee kɔkɔ nì bi-bulifi kii ni nín là puee. Man ni-Dindaan Unimbɔti di sòon̄ míǹ.

21 «M làá dàkà atimbun ŋin kíǹee nib m-nyooti. Bi-kɔkɔ làá ká m nín cáá m-pɔŋŋu ki tūǹ ditundi ki sòoǹ binib bɔti puee. 22 Kí yòon̄ ŋwiin gbantee, Isirayeel yab làá béé yii man di sá bi-Dindaan, bi-Nimbɔtiu.»

Bi nín kúlifì Eeseekiyeel bɔti puee

23 «Atimbun ŋin kíǹee nib làá béé yii bi cúú Isirayeel yab ki cūnnì kuyuŋu bi-yìntitam pu ní, di sá yii baa yúl̀ man bi-Dindaan deedee. An pu ní m fātì m-boon ki tīī-bi. M dū-bi ki ŋá bi-nannanliibi ŋaan ní ki yāntì bi kūū-bi kujaaun. 24 M nín fātì m-boon ki tīī-bee, m dàkā-bi bi-jɔkɔntuuŋŋi nì bi-yìntitam nín máaǹ kuŋyee ní.

25 «Ama man ni-Dindaan Unimbɔti nín sòon̄ puee sɔ̀. Kɔŋkɔnnee, m làá sɔ̄ Isirayeel yab, Jaakɔb naantiibi saai. M làá nyāntí-bi kuyuŋun kí fàtīí gíiǹní-bi ní kí yàntī bi-kɔkɔ ń nīn kíǹ ki tɔ́ m-circir yindi kii an nín máaǹ puee. 26 Niinee bi làá súntí bi-cooi nì bi nín yīntiǹ-mi puee. Bi làá kàl̄ bi-tiŋkin ŋgbansɔŋfi ní ubɔ kaa làá ti fàaǹ-bi. 27 M làá nyāntí-bi bi-nannanliibi tiŋkin ní kí kóoǹ-bi kí kpāfì ní kí gíiǹní-bi bi-dumpu. M làá dī bi-pu ní kí dàkà atimbun tikpil yii man di sá Unimbɔti circirdaan. 28 M yaa láa kóoǹ Isirayeel yab ki kpáfì bi-tiŋkin kaa yāntì ubɔbɔ gbíntì kinicantiŋin kuyuŋunee, bi làá béé yii man di sá bi-Dindaan bi-Nimbɔtiu. 29 Maa làá ti fàtī m-boon kí tīī Isirayeel yab, kun puee m làá tīī-bi m-Fam. Man ni-Dindaan Unimbɔti di sòon̄ míǹ.»