Miika 5

Ubɔti ufiil làá nyánní Beetileem tiŋkin ní

5

1 Sii Beetileem Eefiraata,

Juuda timmu kansikinee,

sii di sá kitiŋwaŋwaai.

Ama sii poon ní m làá yàntī

ubɔti un làá kpòotī

m-nibul Isirayeelee ń nyānní^a.

U-nyeeŋŋu kíliń doooo cannaaku ní,

iyunti kpiŋkpiki poon.

2 Ti-Dindaan làá dū u-nibul kí fá

ŋyunti ŋubɔ poon,

kí nīn cí ŋyunti ŋun ní

unimpu un làá màal̀-uee

ń dāá màal̀-u.

Ŋyunti gbantee, u-nabiyaamu

mun làá dāá kíń kí nīn bí dimaŋfalinee

làá dāá dāan̄ kí kūtì

Isirayeel yab bin kíǹee pu.

3 Ubɔti gbantee làá dāá yīkì

kí dū ti-Dindaan pɔŋŋu,

ti-Dindaan u-Nimbɔtiu yiŋkpaandi kí kpàà-bi.

U-nibul làá dāá nīn bí ŋgbansɔŋfin.

Di sá yii u-kpaanti làá dāá gbìtī

kí bà ilaan kɔkɔ.

4 Úǹ di làá dāá cáań ŋgbansɔŋfi!

Asuur yab yaa láa kɔ́nní ti-tiŋkin,

bi-taaŋi yaa láa tāā ti-beeciŋŋinee,

ti làá dāá lēē ti-kpilib kupaau

bí já nì bi.

5 Bi làá dāá dū kitàataajiki kí já nì Asuur tiŋki

kí dāá dū kijisaakaai kí já nì Niimroodi tiŋki.

Asuur yab yaa láa dòoń kí já nì ti

ní ki kɔ́nní ti-tiŋkinee,

ti-bɔtiuee làá dāá fīī-ti.

Isirayeel yab bin kíǹee pɔŋŋu

6 Jaakɔb naantiibi bin làá dāá kíń

kí nīn bí anibul tikpil kansikinee

làá dāá nīn náań nì dimalindi

din nyánní ti-Dindaan ceeyee ní,

kii utaa nín nì ki sɔ̀ŋkī timool puee.

Baa làá nīn kā ki máká unil pu,

kaa làá nīn kā ki cɔ́tí nisaal pu.

7 Jaakɔb naantiibi bin làá dāá kíń

kí nīn bí atimbunni,

anibul kupaau kansikinee,

bi làá dāá nīn bí kii gbikintee ní

kupɔɔun peelii kansikin,

kii digbikintipɔmbil

din bí tipicaŋkpun kansikinee ní.

U yaa pée jítì laakin kamaayee,

u cútí ipeel ní ki tɔ̀ntī,

ní ubɔ kaa ŋūǹ kí fīī-i.

8 «Dúkutí a-ŋal a-nannanliu pu

kí nà kí dóó bin ná-see kɔkɔ.»

Ti-Dindaan làá kúntí dimákakulindi

9 «Ti-Dindaan nín sòon̄ puee sɔ̀.

Tin làá dāá bàń ŋwiin gbantee sèé:

<M làá dāá nàan̄ a-taamui^b,

ní kí dāá kúntí a-janjatɔrɔkub.

10 M làá dāá nàan̄ a-timmu,

ní kí dāá wīī agun ŋin a máń ki tú a-timmuee.

11 M làá dāá kúntí kusoou tuuŋŋi ni-kansikin.

Baa dāa gíti kāntí u-kpaŋkpanti ni-kansikin.

12 M làá dāá kúntí awaa

nì ataŋkpee ŋin ni cóoǹ ki tòotēe.

Naa ti làá gbàan̄ tiwan tin

ni dū ni-ŋalii ki máńee nimbiin.

13 M làá dāá cóotí ni-windɔi,

ní kí kúntí ni-timmu.

14 Nì mbum nì diŋuul poon

ní m làá dāá tɔ̀ atimbun ŋin

kaa tɔ́-mee ipɔntoon.»