2
1 M làá yūĺ sintil,m làá jɔ̄m̀ kí tɔ́kɔń digunlɔkɔl pu
kí kpèè tin Unimbɔti làá tùkù-mee,
nì m nín bíi yáliŋkée, u nín làá kíí-mi puee.
Kun dɔ̄ ki cí deedeedaan nì un wɔ́b̀ u-jutiibee
2 Niinee ní ti-Dindaan kíí-mi yii:
«Ŋmà tin m bíi lèekī ki dàkà-si nee.
Ŋmà kí nákań tipilindi pu,
binib ń ŋmā kí kàaǹ sɔkɔmii.
3 Dileedakal nee cí di-yuntiŋu ní
kí ŋá kii an nín lēē ki dàkā puee.
Di-yuntiŋu tóobiń,
dàa làá gbíntí.
Báà an yaa yúntàaa, cīití-dì.
Tin m lēē ki dàkā-si nee,
án làá pée ŋá míǹ ní.
An pée kpá kí gbíntía.
4 Kpèè, unil un kaa bí deedeeyee
yòontí u-ba yilpu,
ama deedeedaan kāntí dimaŋfal
u-deedeeu pu ní.
5 Tiŋman ndaam kíiĺ unileeee!
Ulambidaan kaa cáá diŋuŋfil.
U wàatī u-nyɔkɔ bàaa kii ditaŋkpiilee,
waa díkì kii ŋkúmee.
U jáà ki fòol̄ atimbun kɔkɔ,
ní ki cáá anibul kɔkɔ pu mpɔn.
6 Ama, binib gbanti kɔkɔ
làá dāá nīn gà alaŋkpan ki bèel̄-u
ní ki lāā-u.»
Mbusub bɔti
Bi dāa lì yii:
«Mbusu dɔ̄ ki cí-ni!
Ni bí ki fìkì binib wanti
kí cáá sāā ŋyunti ŋulɔŋu?
Ni mɔ̀tīi kútí ni-pɔɔŋŋi nyiŋfiŋu pu dee!
7 Bin pīnnì-ni animbilee
làá dāá cíliń ni-pu ní dicilpu dicilpu.
Bi làá dāá yīkì kí cìŋkì cìŋkì-ni.
Bi làá dāá fūkul̀-ni kí téeǹ.
8 Ni fúkúl̀ atimbun tikpil.
Anibul ŋin kíǹee mun
làá dāá fūkul̀-ni míǹ mbaantiim.
Di sá yii ni kūū binib,
ki ŋá Juuda tiŋki nì ki-timmu
nì bin kóò mu-nee tipɔmbɔti!
9 «Mbusu dɔ̄ ki cí-ni!
Ni nyàab̀ dulim gaajati
kí dūú kpāafì kí síiń ni-dicaŋŋi yab,
ní ki māā ni-diiŋŋi ki tɔ̄kɔntí yilpu,
nnaabu yaa páaǹnée, án taa gbēē-ni.
10 Tin ni bɔ́ntì kí ŋée làá cáań icoo
kí tɔ̄ ni-dicaŋŋi yab pu ní.
Ni nín nāaǹ anibul tikpil puee,
nimbi ni-ba maŋfal ní ni nāaǹ.
11 Ataŋkpee ŋin bi dūu máń agunee gba
làá nīn kūuntí ki kɔ́kɔĺ-ni,
ní idɔ in bi dūu tɔ́kɔǹ kudiiyee ń kíí-ŋi.
12 «Mbusu dɔ̄ ki cí-ni!
Ni māā ni-timmu ki tɔ̄kɔntí
nnikpaakoon nì tin kaa bí deedeeyee pu ní.
13 An pu ní anibul gìńdi kúntí ŋŋmin,
ní atimbun bí ki bìǹ fámb.
Tíǹ gbanti kɔkɔ kaa nyánní
ti-Dindaan Mpɔŋkɔdaan cee níii?
14 Tiŋman, báà ŋma làá béé ti-Dindaan nyooti,
tì làá dāá gbí kitiŋ pu kii
nnyim nín gbí tiŋku poon puee níc.
15 «Mbusu dɔ̄ ki cí-ni!
Ni páb̀ ni-jutiibi bí nyɔ̀ ndaam,
ki tìì-bi ndaam min poon ni ŋmālim̀ nnyɔkɔee
bí nyɔ̀ kí gbí kí fá bi-ba
ní wāl̀ bi-cancaŋgbeel.
16 Ama icoo làá cúú-ni gbòooo,
kaa sá tinyool!
Ni mun, nyɔ̀maan kí gbí bí ká ni-cancaŋgbeeŋi.
Ti-Dindaan làá páb́-ni ní nyɔ̀ u-ŋuul
din kā u-yukubilinee.
Ni-jilmau làá kpántí icoo.
17 Di sá yii tipɔmbɔti tin ni ŋá Leebanɔn tiŋkinee
làá fàtīí gítiń ni-pu.
Ni pɔ̄fì tiwaŋkuti.
Too tiwaŋkuti gbanti
di làá kɔ́ǹ-ni dinyoondin.
Di sá yii ni kūū binib,
ki ŋá Juuda tiŋki nì ki-timmu
nì bin kóò mu-nee tipɔmbɔti!
18 Ba ní bi làá dū diwaal kí ŋá
ní ukpiŋkpiiti kpítí-dì ní?
An sá tikúti ní bi dūntì ki dūu mɔ́ɔ́
ní an dàkà tinyimɔmbɔti.
Ukpiŋkpiiti di kpítì-dì ní dàa ŋūǹ kí sòoǹ.
Kin ba pu ní u gíti máká di-pu nan dee?
19 «Mbusu dɔ̄ ki cí-ni!
Ni tùkù didɔgindi yii: <Yīkì!>
ki tùkù ditaŋkpal din kaa ŋūǹ
kí sòoǹee yii: <Fìntī.>
Ditaŋkpal kaa ŋūǹ kí dàkà-si tiba.
Báà bi yaa dūntì sindaariya nì animbil ki nákaǹ-dàaa,
dàa cáá kufoou!
20 Ama ti-Dindaan úǹ kóò u-circir diikun ní.
Kitiŋ kɔkɔ pu nib ń ŋmīĺ fɔ́ŋfɔŋ u-nimbiin!»