Kugbɔŋu nee sòoǹ atuun ŋin Unimbɔti bɔnaatiliu Agaayi túń Jeerusaleem Unimbɔti diiku mātam puee. An sá ŋyunti ŋun Juuda yab nìn nyánní Babiloon tiŋkin laakin bi nìn cáá-bi ki cūnnì kuyuŋuee boonee ní. Kugbɔŋu nee dàkà Unimbɔti nín dī u-bɔnaatiliu pu ki sòon̄ tibɔti tiŋyee. Tibɔtee kaa fɔ̀kɔ̀. U nìn sòon̄-tì abin 538 ki wāatì ní Yeesu Kriisitoo nín dɔ́miń duulinyan.

An nìn sá yii Juuda yab bipeepeekaabi bin nìn nyánní Babiloon tiŋkin ki fātìi gítìńee ń fàtīí mā kunimbɔtidii kun Babiloon yab nìn gbáń ki wīīyee, ama bi-wunti nìn yɔ̄tì malaa. An pu ní Unimbɔti bɔnaatiliu nìn bíi tìì bikpootiliibi kunyannyaau bí fàtīí kíĺ ditundi. Bin nìn fātìi kíĺ atuun abin 520 ki wāatì ní Yeesu nín dɔ́miń duulinyan, ní Agaayi nìn tīī bin nìn bíi pílifíǹ-uee kunyannyaau bí ká difaŋgiil, kun puee disool din ŋúb́ samaayee nì bi-kpaajinti nín lòoǹ fiii puee nyánní kunimbɔtidii nín bíil̀ ki sí mpaan ŋun puee ní (1.1-14). U gíti tùkū-bi yii kunimbɔtidii kupɔŋu kun bi bíi māā nee nyooti làá nīn jítiǹ kukpikuu kun bi wīīyee (2.1-9). Kunimbɔtidii gbanti mātam di làá kúntí tijɔkɔndi nì disool din poon Unimbɔti nibul bée (2.10-20). Unimbɔti nìn pōoǹ Daafiidi naantiiu Sooroobabeel un sá gɔminee yii úǹ di baasii lēē-u ú nīn bí u-tundin (2.20-23).

Bi nín kā ki cí kunimbɔtidii kun cáá tinyool ki jítiǹ kupeepeekaauee, nì Unimbɔti nín làá dī u-tɔntɔnliu un u làá lēēyee pu kí tɔ̄ ditundi puee di làá dàkà Isirayeel nibul dipɔndi din làá nyānní kuyuŋuee nín làá nīn bí puee. Agaayi tīī u-yuntiŋu yab kunyannyaau bí fá bi-landɔkɔkpitii kí nīn tūǹ ditundi ki cí ŋyuntimɔnti ŋun Unimbɔti bíi bɔ́ntée.