Maatiiu 18

Ŋma di sá ukpaan ní?

(Kpèè Maar 9.33-37, Luuki 9.46-48)

1 Ŋyunti gbantee ní Yeesu boonnooliibi dɔ́miń u-cee ki bālifì-u yii: «Ŋma di sá ukpaan Unimbɔti Beelin ní?» 2 Ní u yíiń kibiyaawaai kiba ki yóoǹ bi-nimbiin, 3 ní ki bí-bi yii: «Ibaamɔn ní m tùkù-ni, ni yaa kaa kpántì ni-bimbim ki ŋá kii mbiyaamuee, ni kpá kí kɔ́ Unimbɔti Beelin. 4 Un sá ukpaan Unimbɔti Beelinee di sá un di sìntīǹ u-ba ki kpántí kii kibikee. 5 Un kamaa yaa fōō kibiyaawaai kiba kii kíǹee juti man puee, udaan fōō man dee.»

Unil ń nīn nyíǹ u-ba nì ikpiti

(Kpèè Maar 9.42-48, Luuki 17.1-2)

6 «Ama un di yaa yāntì mbiyaamu mun fōō-mi ki kíí nee kansikin kiba ŋá ikpitee, an sɔ́ bí dū kunakpaaŋŋu kí kúĺ udaan neen kí cáá-u kí tɔ̄ tiŋkun ú múĺ taapu taapu. 7 Mbusu bí duulinya pu, kun puee tiwan tikpil yàntī binib ŋáań ikpiti. Tin yàntī binib ŋáań ikpitee làá nīn pée bí ní. Ama mbusu bí ki tīī un pu ní án làá dīńee.

8 «An yaa sá a-ŋal kii a-taal di yaa làá yàntī á ŋá ikpitee, gùutīí fá kí wàatī a-ba! Á kɔ́ dimaŋfal din kaa kúntée ni nì ditaagindi kii diŋaŋgindi sɔ́ nì a-ŋalii liitil nì a-taaŋi liitil ń nīn bí, bí cáá-si kí tɔ̄ ŋŋmi ŋun kaa kúù jaanjaanee ni. 9 An yaa ti sá a-nimbil di yaa làá yàntī á ŋá ikpitee, á lúkutí-dì kí fá. Á kɔ́ dimaŋfal din kaa kúntée ni nì dinimbil dibee sɔ́ǹ a-nimbiliŋ liitil ń nīn kā, bí cáá-si kí tɔ̄ ŋŋmi ŋun kaa kúù jaanjaanee ni.»

Dipibil din wáŋkì bi fātìi kée bɔti

(Kpèè Luuki 15.3-7)

10 «Ní nīn nyíǹ ni-ba kí taa kpèè mbiyaamu nee kansikin kiba fám. M tùkù-ni ibaamɔn ní yii ituun in kpèé-muee bí m-Baa un bí yilpuee nimbiin ŋyunti sá kamaa. [ 11 Di sá yii man Kinibiki dɔ́miń kí fīī bin nìn wáŋkèe ní^a.]

12 «Ni dàkafī yii ba? Unil yaa cáá ipii dilaataal, ní ubɔ wáŋkì i-kansikinee, waa yàntī ubɔ kpá dilaataal in kíǹee ajoon pu kupikpaaun kí cùú nyàabìń ubɔ un wáŋkèeee? 13 M tùkù-ni yii, u yaa tin ká-uee, u-bɔti mɔ́ɔkíǹ-u kí jītíǹ ubɔ kpá dilaataal in kaa wáŋkèe bɔti. 14 Míǹ mbaantiim ní ni-Baa un bí yilpuee kaa là mbiyaamu nee kansikin báà kiba ń wāŋkì.»

Ŋāŋkì sii nì a-nabiki kansikin

(Luuki 17.3)

15 «A-nabiki yaa yīntiǹ-see, cù u-cee kí dàkà-u min ní u ŋá-si an kaa kítèe sii nì u ŋmaniŋma. U yaa gbìl̄ ki tīiǹ-see, mimmee, a ŋúń ki gíiǹní a-nabiki nsammɔntin dee. 16 Ama u yaa yíì, kaa gbìlīǹ-see, á kpáaǹ unil ubɔ kii bili kí cù u-cee, án nín làá ŋá pu binib bili kii bita ń ká kí ŋmā kí sòoǹ min udaan ŋá an kaa kítèe, kii Unimbɔti gbɔŋku poon nín lī puee^b. 17 U yaa kaa tí gbìl̄ ki tīiǹ bi muee, á tùkù Unimbɔti nikitil. U yaa tí yíì, kaa gbìlīǹ Unimbɔti nikitilee, ú kpántí a-cee kii unil un kaa nóó Unimbɔtee.»

18 «Ibaamɔn ní m tùkù-ni, tin ní ni yaa bóob́ taapu dooyee, míǹ ní an bóob́ yilpu mun^c.

19 «Ibaamɔn ní m tùkù-ni, binib bili ni-kansikin yaa kpáfì kinyɔkɔ taapu doo ki mēē báà kuŋyee, m-Baa un bí yilpuee làá tīī-bi kudɔŋu. 20 Di sá yii laakin binib yaa kpáfì bili kii bita man yindi puee, m bí bi-kansikin.»

Utɔntɔnli un kaa pūǹ ikpitee

21 Niinee ní Peetroo dɔ́miń Yeesu cee ki bālifì-u yii: «Ukpil, m-nabiki yaa yīntiǹ-mi, kí tin sāā miŋa ní an máaǹ ḿ dūú pɔ̄-u ní? Kí tin sāā milulaaa?» 22 Ní Yeesu kíí-u yii: «Aayee, an kaa sá miluli, an sá kí tin sāā imuŋku ita nì saalaa miluli pu ní á pɔ̄.» 23 An puee, Unimbɔti Beel náań nì kii ubɔti ubɔ nín yíiń u-tɔntɔnliibi bí dāá pà-u bi-pɔɔŋŋi puee ní. 24 U kíĺ ki bíi kàaǹee, ní bi cáań-u u-pɔ̀nliu ubɔ un cáá-u dipɔndi miiliyɔmbi kutukuee. 25 Kijapaayee nín kaa nìn cáá kun ní u làá dūú pèe, ní ukpilee bí yii bí dū u nì u-nimpuu nì u-biyaamu nì tin kɔkɔ u cááyee kí nyāfì án ŋmā kí bà kunimbiŋmiiu. 26 Ní utɔntɔnlee tātìi gbāaǹ u-kpiliu nimbiin, ki dɔ̄ kitiŋ ki fìlim̄ ki gbāam̀-u yii: «Á jī kimɔtii! M làá dāá pà-si kɔkɔ.» 27 U nín kaa ŋūǹ kí pà puee ní u-kpiliu súń u-saai ki dū u-pɔndi ki pú-u, ní ki bí yii ú nīn cá. 28 «Utɔntɔnlee nyáńee ní ki dūu tú u-tɔntɔnjuti un mun cáá úǹ dipɔndi kutukuee nsan, ní ki cìb̄ ki cúú-u ki ŋmáaḿ u-neen ki bí-u yii <Pà-mi m-nimbiliŋ!> 29 Ní u-tɔntɔnjutee gbāaǹ u-nimbiin ní ki gbāam̀-u yii: <Á jī kimɔtii, m làá pà-si.> 30 Ama waa kíí see u nín cáá-u ki tɔ́ sarka ú pà u-pɔndi kɔkɔee. 31 U-tɔntɔnjutiibi nín ká min jítèe, ní an kɔ́ bíǹ inimɔɔn, ní bi cūtìi kàan̄ tin jítèe kɔkɔ ki tùkū bi-kpiliu. 32 Niinee ní bi-kpiliu yíiń utɔntɔnlee ní ki bí-u yii: <A sá utɔŋfiti ní! A nín gbāam̀-mi puee ní m dū a-pɔndi ki pú-si. 33 An kaan máaǹ á sɔ̄ a-bɔɔ saai kii man nín súń a-saai pueeee?> 34 Ní u-kpiliuee gíí diŋuul, ní ki yāntì bi dū-u ki tɔ́ sarkan bí dáaĺ u-tafal áli ú dāá pà u-pɔndi kɔkɔ kí dóó.»

35 Ní Yeesu bí yii: «Míǹ ní m-Baa un bí yilpuee làá dāá ŋá un kamaa kaa dū u-nabiki kpitii ki pú-u nì u-pɔbil kɔkɔee.»