Maatiiu 24

Yeesu sòon̄ kunimbɔtidii wīitam pu

(Kpèè Maar 13.1-2, Luuki 21.5-6)

1 Ŋyunti ŋun Yeesu nyáń kunimbɔtidiin ki cée, ní u-boonnooliibi sútìń ki pìl̄-u ní ki bí yii ú kpèè bi nín baasii máń kunimbɔtidii puee. 2 Ní u bí-bi yii: «Kéè ni ká kɔkɔ neeyaa! Ibaamɔn ní m tùkù-ni, ditaŋkpal diba kaa làá dāá nīn gíti tɔ́kɔ́ di-juti pu, an kɔkɔ làá dāá wīī ní.»

Falaa un làá bàń kitiŋ kúntitamee

(Kpèè Maar 13.3-23, Luuki 21.7-24, 17.22-24)

3 Yeesu nìn kā Ɔliifi sufii jool pu, ní u-boonnooliibi dɔ́miń ki ká-u bi-ŋmaniŋma ní ki bālifì-u yii: «Tùkù-ti ŋyunti ŋun tin a bàà lēe làá dāá bàńee, nì kudaaŋŋu kun làá dāá dàkà-ti ŋyunti ŋun a làá gítińee nì ŋyunti ŋun duulinya mun làá kúntée.»

4 Niinee ní Yeesu kíí-bi yii: «Ní nīn nyíǹ ni-ba ubɔ ń taa ŋmàtiǹ-ni. 5 Di sá yii binib tikpil làá dāá dū man yindi kí kpántí bi-yaŋ kí lì yii bíǹ di sá <Meesiya> ní ki làá dāá kīil̀ binib tikpil. 6 Ni làá dāá gbìl̄ bi sòoǹ tijáti tin bi bíi jáàyee nì tin gíti bí ki dòońee bɔti ama, ní nīn nyíǹ ni-ba ni-pɔbiliŋ ń taa bīil̀. An máaǹ tíǹ kɔkɔ ń bàń, ama niin kaa dá láá sá duulinya kúntitam. 7 Ditimbundi diba dāa yíkí kí jáǹ diba, ní dibeel diba yab mun ń jáǹ diba. Ŋkùm làá dāá nyā, ní kitiŋ ń dāá cìŋkì ajan kupaau pu. 8 Tíǹ kɔkɔee dāa sá kii imatiŋween nín kífí puee ní.

9 «Binib làá dāá cúú-ni kí tīī bí sàaǹ-ni ní kí kpɔ̀-ni. Atimbun kɔkɔ nib làá dāá nīn ná-ni ni nín fōō man ki kííyee pu. 10 Ŋyunti gbantee, binib tikpil làá dāá fá bi-fookiiu un bi cáá man puee, kí nīn kíǹ ki nyáfí tɔb ki ná tɔb. 11 Bin yíì bi-ba yii Unimbɔti bɔnaatiliibi kin kaa sée làá dāá dāan̄ kí ŋmàtiǹ binib tikpil mun. 12 Tikpitil làá dāá wíiǹ, an puee, binib tikpil neendi làá dāá sɔ̀ŋkì. 13 Ama un di yaa pɔ́ɔǹ mmɔntiimin ki tin kátì-kuee di dāa ŋmátí. 14 Bi dāa sòoǹ Unimbɔti Beel bɔmɔntiiti nee kitiŋ jaŋŋi kɔkɔ pái, án nīn sá seera kí tīī atimbun kɔkɔ kí wàatī ní duulinya ń nín kúntí.»

Nnaabukpaan bɔti

(Kpèè Maar 13.14-23, Luuki 21.20-24)

15 «Ni làá ká kuwaŋkpitiu kun cāabìń ntimbiilee, kun pu Unimbɔti bɔnaatiliu Daniyeel nìn sòon̄ee^a sí kunimbɔtidiin. - Un kàaǹ tibɔti neeyee ń gbìl̄ ti-taapu! - 16 Ŋyunti gbantee, Juudee tiŋki yab ń nīn sáń ki dàb̀ ajoon. 17 Un yaa láa bí dicindee ^b ń taa láa lì yii u làá kpákatí kí kɔ́ kudiin kí yòon̄ tiba, 18 ní un yaa láa bí kusaauee ń taa láa lì yii u làá gítiń mmɔŋki kí yòon̄ u-bɔkutil. 19 Ama falaa dɔ̄ ki cí bipɔdambi nì bimatib iwiin gbanti poon! 20 Mèèmaan Unimbɔti an bɔtee ń taa bàń-ni kuseeun, kí taa nín̄ sá ŋwiŋŋuŋfikaa dal, 21 kun puee doooo duulinya nín kíliń ki dāa sāā an yuntiŋuee, an nimbinaamandi juti kaa láá cúú binib, ki kpá kí gíti cúú-bi mun^c. 22 Unimbɔti yaa kaa bàà bātì falaayee wiiŋyi pu, unibaanti kaa bàà ŋmátí. Ama binib bin u lútì bi sá u-yabee pu ní u bātì iwiin gbanti pu. 23 «Ŋyunti gbantee, ubɔ yaa tùkū-ni yii: <Meesiya bí doo,> àá <U bíń lapu,> ní taa fōō kí kíí. 24 Di sá yii, bin làá dāá mɔ̄ntì yii bíǹ di sá Meesiya nì Unimbɔti bɔnaatiliibee, làá dāá nyā ki ŋáań tikpaŋkpantiil nì maamaaci tuuŋŋi ki nyàab̀ bi yaa ŋūǹ kí ŋmàtiǹ bin Unimbɔti lútèe gba. 25 M tùkū-ni ki yóoǹ dee.

26 «Míǹ puee bi yaa láa tùkū-ni yii, m dɔ́miń ki bí kuteeunee, taa cùmaan. Bi yaa láa tí bí-ni yii, m bí dilɔnlɔkɔlin kudiinaaa, taa fōō kí kíímaan. 27 Kii utaa nín ŋmóò pu nyàlab báà ŋma wāĺee, kí kíliń ŋwìiń nyalaŋki pú kí cáá sāā ŋu-jeetilaŋki pú puee, míǹ ní man Kinibiki dāantam dāa bí. 28 Laakin diwaŋkpil yaa dɔ̄ee, niin ní kaajiikub kpáfí.»

Yeesu gítintam

(Kpèè Maar 13.24-27, Luuki 21.25-28)

29 Yeesu gíti lī yii: «Dinimbinaamandee yaa jítì kpalaayee, ŋwìiń dāa kpántí dibɔmbɔndi ní uŋmal mun kaa dāa gíti pīiǹ. Iŋmalbijaa dāa kìtīń kutaa pu ki lítiń, ní ipɔn in bí kutaa puee ń cìŋkì^d. 30 Niinee ní man Kinibiki daaŋku ń nyā kí páanní kutagbɔŋu pu, ní duulinya timbuliŋ kɔkɔ ń dāá fōō itiminsi, ní kí ká man Kinibiki ń páanní yilpu atagbanni nì mpɔn nì tinyool^e. 31 M làá tɔ̄ m-tuuŋyi kitiŋ jaŋŋi kɔkɔ kí tin sāā kutagbɔŋu nì kitiŋ kúntinyɔkɔ ní í búń dikantáŋkpaandi, kí kpāfì bin Unimbɔti lútèe^f.»

Isufi túkutam nín dàkà-ti kuŋyee

32 «Pīlifìmaan fiigi subu nín dàkà-ti tiŋyee. Di sá yii, ni yaa ká fiigi subu tɔ́ apan ki bíi túkù tifaapɔnee, ni béetí yii kuseeu tóobiń dee. 33 Míǹ mbaantiim, ni yaa láa ká tin m máafì nee bíi jītée, béémaan yii m-dāantam tóobiń, m sútì ki pìlìń kipunyɔkɔ dee. 34 Ibaamɔn ní m tùkù-ni, waanee nib kɔkɔ kaa làá kpú kí dóó ní an bɔtee kɔkɔ ń bàń. 35 Kutagbɔŋu nì kitiŋ dāa bí kí kúntí, ama man bɔti kpá kí kúntí jaanjaan.»

Unimbɔti baba di nyí Yeesu gítintam yuntiŋu

(Kpèè Maar 13.32-37, Luuki 17.26-30, 34-36)

36 «Báà ubɔ kaa nyí ŋwiin nì kukúluu kun ni an bɔti làá bàńee. Unimbɔti tuuŋyi in bí yilpuee kaa nyí, man u-Jipɔɔn gba kaa nyí, see Ubaati Unimbɔti baba di nyí. 37 Tin nìn jítì Noowa yuntiŋuee, man Kinibiki yaa làá dāá dāan̄ee, míǹ mbaantiim di làá tí jītí. 38 Kí wàatī nnyiŋgbeen ń bàńee, binib nìn jīǹ ki nyù, ní ki cāab̀ binimpoobi ki cáá bi-bisalib ki pūǹ ticati, áli Noowa dāa kpáàa kɔ́ meelan^g, 39 ní baa kpáàa béè kun dɔ̄ ki cí-bee ní nnyiŋgbeen dɔ́miń ki yōoǹ bi-kɔkɔ. Míǹ mbaantiim ní man Kinibiki yaa làá dāá dāan̄ee, án làá ŋá^h. 40 Bininjab bili dāa gbāā kusaaun ki kù, ní ḿ yòon̄ ubɔ kí yàntī un kíǹee. 41 Binimpoobi bili mun dāa gbāā kunaau pu ki nà, ní ḿ yòon̄ ubɔ kí yàntī un kíǹee. 42 An puee, ní taa nín̄ gèem̀maan, kun puee naa nyí ŋwiin ŋun ní ni-Dindaan làá fàtīí gítińee. 43 Nín̄ nyímaan tiŋan yii, kudiidaan yaa bàà nyí kukúluu kun unaayuu làá dāan̄ kunyeeuee, u bàà kā ki cí ní, kí taa yàntī unaayuu ń cíĺ u-diiku. 44 Míǹ puee, ni mun bɔ́ntímaan kí nīn cí, kun puee man Kinibiki làá dāan̄ kukúluu kun naa dàkafī yii m làá dāan̄ee ní.»

Utɔntɔŋkpiti nì utɔntɔmmɔnti bɔti

(Kpèè Luuki 12.41-48)

45 «Ŋma di sá utɔntɔnli un bí deedee ki cáá iciinee ní? Úǹ di sá un u-kpiliu dū u-tɔntɔnjutiibi ki ŋúbiǹ ú nīn tìì-bi tijin ŋyunti ŋun máaǹ ú nīn tìì-bee. 46 An sá mmɔn ki tīī utɔntɔnli gbanti u-kpiliu yaa láa fātìi bàn̄ ki ká-u, u bíi tūǹ u-tundee. 47 Ibaamɔn ní m tùkù-ni, ukpilee dù u-gaajawanti kɔkɔ ní kí kūtì kí ŋúbíǹ utɔntɔnlee. 48 Ama utɔntɔnlee yaa sá ukpitee, u làá dàkafì yii: <M-kpiliu kaa láá yàkań digitindi,> 49 ní ú kíĺ ki bíi gbáà u-tɔntɔnjutiibi ní u nì bidanyɔgbiliibi bí ki jīǹ ki nyù. 50 Niinee ní u-kpiliu ń dāá dūú túuǹ-u ŋwiin nì kukúluu kun pu waa nyí yii u làá bàńee, 51 ní kí dáaĺ u-tafal ŋkpitim pu, kí pà-u mpoonnyoondambi paati. Niin ní u làá sɔ̄ ní u-nyiŋŋi ń nīn gà tɔb kàkaka.»