Maarki 6

Naasaareeti yab kaa fōō Yeesu

(Kpèè Maat 13.53-58, Luuki 4.16-30)

1 Yeesu nyáń niinee, ki nín kùǹ u-tiŋkin laakin u kāl̀ ki wíiǹee^a, ní u-boonnooliibi táá-u. 2 Ŋwiŋŋuŋfikaa bāańee, ní u kíĺ ki bíi dàkà binib Unimbɔti bɔti kukpafidiin. Kunipaau kun nìn bí ki pílifíǹ-uee bākatì ki bíi lì yii: «U nín kánní la tin u sòoǹ nan dee? U nín kánní la iciin nee bulifi dee? An dī mana ní u ŋūǹ ki ŋáań maamaacib nee? 3 Ti nyí-uaa! An sá Maarii jipɔɔn kapintaa^b! U-naalib mun di sá Yakubu nì Joosee nì Juudi nì Siimɔn. U-niisalib mun di kóò ti-kansikin neeyaa!» Ní an yāntì baa ti ŋūǹ kí fōō-u kí kíí. 4 Ní Yeesu bí-bi yii: «Laaba yab kaa kpèé Unimbɔti bɔnaatiliu fám, see u-tiŋkin yab nì u nì bin pēēyee nì u-cindin yab^c.» 5 Waa nìn gíti ŋúń ki ŋá maamaaci tuuŋŋi niin, see bibunliibi ŋwaam pu ní u nìn dū u-ŋalii ki páaǹ ki cáaǹ-bi. 6 Ní u bākatì bi nín kaa fōō-u ki kííyee.

Yeesu tú u-kpambaliŋ saalaa nì alee

(Kpèè Maat 10.5-15, Luuki 9.1-6)

Ŋyunti gbantee, Yeesu nìn yìiǹ ntimbilimu nì ikpaanceeti ki dàkà binib Unimbɔti bɔti. 7 Ní u kpáfì u-kpambaliŋ saalaa nì alee, ní ki tú-bi bili bili, ní ki tīī-bi mpɔn bí nīn jì arasiniibi, 8 ní ki kpáafì-bi yii: «Ni yaa cée, ní taa nín̄ ŋúb́ tiba see ŋkpandɔ baba. Ní taa nín̄ ŋúb́ tijin kí taa yòon̄ atɔkɔl kí taa nín̄ fúuń animbil mun, 9 kí taa pèen̄ abɔkuti ali ali, ama kí nīn táká anaataka.»

10 U tùkū-bi yii: «Ni yaa kɔ́ kudii kun nee, nín̄ bímaan niin kí nīn cí daliŋkin ni làá yīkèe. 11 Ni yaa bàn̄ laakin binib yaa yíì, kaa là kí fōō-ni, kaa tí là kí pīlifiǹ-nee, nyāmaan niin kí gbāfì ni-taaŋi kpɔŋkpɔm^d, kí dàkà yii ni sòon̄ ki kpáafì-bi.» 12 Ní bi búntì ki cūtìi bíi sòoǹ nì binib yii bí kpántí bi-bimbim. 13 Bi nìn jì arasiniibi tikpil biwaatiibi pu, ní ki nìn bàtī ŋkpam ki jòotī bibunliibi tikpil pu ki cāantí-bi^e.

Yoowaneesi unyiŋfaldi kúm

(Kpèè Maat 14.1-12, Luuki 9.7-9)

14 Ubɔti Eeroodi nìn gbìl̄ bi sòoǹ Yeesu pu, kun puee u-yindi nìn gbītì ajan kɔkɔwoooo. Binib biba nìn sòoǹ Yeesu pu yii: «An sá Yoowaneesi un nìn fùul̀ binib Unimbɔti nyimee di fīkitì ditaŋkpiilin, an pu ní u ŋūǹ ki ŋáań maamaacib.» 15 Biba lì yii: «An sá Eelii.» Ní bin kíǹee mun lì yii: «U sá Unimbɔti bɔnaatiliu kii bitiŋkpikib bɔnaatiliibi ubɔee ní.» 16 Eeroodi, úǹ nín gbìl̄ee, ní u lī yii: «Yoowaneesi un man yāntì bi tīl̀ u-yilee, di fīkitì.» 17 Di sá yii Eeroodi nìn tīī mara bí cúú Yoowaneesi kí bóob́-u kí cáá tɔ̄ sarka. U-maan Fiiliipi nimpuu Eeroodiyadi un u nìn cááyee pu ní u nìn ŋá míǹ. 18 Di sá yii Yoowaneesi bí Eeroodi yii: «An kaa máaǹ á cáá a-maan nimpuu^f.» 19 Eeroodiyadi nìn fōō Yoowaneesi pu kudɔ̀ŋu ki nyàab̀ kí kpɔ̀-u, ama waa nìn ŋūǹ. 20 Di sá yii Eeroodi, úǹ nìn fàŋkí Yoowaneesi ki nyí yii Yoowaneesi sá ibaamɔndaan ki sá Unimbɔti tɔntɔnliu. An puee Eeroodi nìn mɔ́tí u-pu. Yoowaneesi yaa nìn sòoǹee, an nìn páb̀ Eeroodi, ama u nìn néeń ki pílifíǹ-u.

21 Dalbee, Eeroodiyadi ká nsan ŋun u làá dī kí kpɔ̀ Yoowaneesee. Di sá yii Eeroodi nìn bíi jīǹ u-maaliwiiŋŋu jiŋaaliu. U nìn yíiń u-kpilib nì bisoojakpilib nì Galiilee yidambi kɔkɔ. 22 Ŋyunti ŋun bi kpáfèe, Eeroodiyadi bisal kóoń bi-kansikin ki ŋɔ́ń ní u-ŋoolee fáatì ubɔti Eeroodi nì bin kɔkɔ u yíińee, ní u bí usapɔɔnee yii: «Mèè-mi tin kɔkɔ a lèe, m làá tīī-si!» 23 Ní u pūtì ki lī yii: «Tin kamaa a yaa bālifì-mee, m làá tīī-si, báà an yaa sá m-beel dijandi, m làá tīī-si!» 24 Niinee ní usapɔɔnee nyáń ki cūtì ki bālifì u-na yii: «M-na, ḿ mèè ba?» Ní u-na kíí-u yii: «Lì yii a là Yoowaneesi un fùul̀ binib Unimbɔti nyimee yil.» 25 Ní u fātìi tóotì ki gítì ubɔti cee ki bí-u yii: «M là yii á tùkutī Yoowaneesi un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.» 26 Niinee, kunimbaau kɔ́ ubɔti. U mun gíti dáá pūtì u-nicambi bin u yíińee nimbiin, waa ti ŋūǹ kí yíí. 27 Ní u tú dicilpu niin u-soojau ubɔ ki tùkū-u yii ú cùú cáań Yoowaneesi yil. Ní soojee cūtì ki kɔ́ kusarkadiin ki lafun tūkutìń Yoowaneesi yil 28 ki tākaǹní kpaatan, ki cáań ki ŋúbíǹ usapɔɔnee, ní usapɔɔnee mun cáa tīī u-na. 29 Yoowaneesi boonnooliibi nín gbìl̄ an bɔtee, ní bi dɔ́miń ki yōoǹ-u ki cáa síb́.

Yeesu kpíiǹ binib kutukub biŋmoo

(Kpèè Maat 14.13-21, Luuki 9.10-17, Yoow 6.1-14)

30 Yeesu kpambaliŋ ŋin u nìn túee kpáfì u-cee ki máafì-u bi nín cūtì ki ŋá tiŋyee nì tin bi dàkēe. 31 Ní Yeesu bí-bi yii: «Dāam̄maan tí kàkatī ŋkpaanceeti, laakin binib kpée ní ŋùŋfì fiii.» Kun puee binib nìn cáá ní lìbiti libiti. Biba kùǹ ní biba bàń, an yāntì Yeesu nì u-kpambaliŋ kaa nìn cáá mpaan kí jī tijin. 32 Ní bi kɔ́ buŋalimbun ki kākatì laakin binib kaa bée. 33 Binib tikpil ká bi nín cée ní ki béè-bi, ní ki sáǹ ki nyáń ntimun ki dū ataa ki péeǹ-bi ki bàn̄ laakin bi cée.

34 Yeesu kpákatì buŋalimbunee, ki ká kunipaau sí kii ipii in kaa cáá ukpaalee^g. An nìn kɔ́-u falaa ní u kíĺ ki bíi dàkà-bi tibɔti tikpil. 35 Kujoou bíi jóotée, ní u-boonnooliibi sútìń ki pìl̄-u ki tùkū-u yii: «Binib kaa kóò laakin ti sí nee, kí wàatēe, kujoou mun bíi jóotí. 36 Yàntī binib nee ń cù ikaan nì ntimbilimu mun pìlīǹ dooyee kí dā tijin kí jī.» 37 Ní Yeesu kíí-bi yii: «Nimbi ni-ba, tīīmaan-bi tijin bí jī!» Ní bi fātìi bālifì-u yii: «Mimmee, ti dù animbil jitɔmbi alaataa ali^h ní kí dā tijin kí tīī bí jī deeyaaa?» 38 Ní Yeesu mun fātìi bālifì-bi yii: «Kpɔnɔb biŋa ní ni cáá? Cùú kpèèmaan!» Bi cūtìi bālifì ki béèyee, ní ki bí-u yii: «Ti cáá kpɔnɔb biŋmoo nì ijɔm ili.» 39 Niinee ní u tùkū u-boonnooliibi bí tùkù binib ń kàl̄ akiti akiti kumɔsɔŋu pu. 40 Ní bi kāl̀ kitiŋ. Akiti aba cáá binib dilaataal, aba mun cáá imuŋku ili nì saalaa. 41 Yeesu fōō kpɔnɔb biŋmoo nì ijɔm ilee ki wáaǹ ki kpēē kutaa pu ki jáam̀ Unimbɔti tijinee pu, ní ki gífì gífì kpɔnɔb ki tīī u-boonnooliibi bí yàkatī binib. U yākatì ijɔm ilee mun ki tīī bi-kɔkɔ, 42 ní bi-kɔkɔ jíń ki díkí. 43 Ní u-boonnooliibi tōō akpɔnɔkati nì ajɔŋgin ŋin kíǹee ki gbéeǹ tikabiti saalaa nì tiliⁱ. 44 Bin nìn jíń tijin gbantee nìn nyáń bininjab kutukub biŋmoo ní.

Yeesu cōom̀ nnyim pu

(Kpèè Maat 14.22-27, Yoow 6.16-21)

45 Niinee ní Yeesu bí u-boonnooliibi yii bíǹ ń kɔ́ buŋalimbu kí lìntī malaa kí dùtī dimɔɔl Beetisayida watil pú, ŋyunti gbantee úǹ ń yàntī samaayee ń kpì. 46 U yāntì samaayee nín kùǹee ní u jɔ́m̀ dijool pu kí mèè. 47 Kunyeeu bíi móotée u-boonnooliibi bàn̄ dimɔɔl kansikin, Yeesu úǹ dáá bíń dimɔɔgbandi u-baba. 48 U nìn ká yii u-boonnooliibi bí ki ŋàal̀, an kaa cá, kun puee kubuŋu nìn túŋkiń-bi. Ki cá kutaawuntuŋuee ní u tɔ́kɔǹ nnyim pu ki còom̄ ki cá bi-cee ki làá jītí bi-pu. 49 Bi nín ká u còomìń nnyim pu ki dòońee, ní bi dākafì yii an sá ufaŋfanti, ní bi kíĺ ki bíi gbáà ibiil, 50 kun puee bi-kɔkɔ nìn wál̀-u ní bi-pɔbiliŋ bíil̀. Kpalaayee, Yeesu sòon̄ nì bi yii: «Cúúmaan ni-pɔbiliŋ, an sá man! Taa fàŋkìmaan!»

51 Niinee ní u jɔ́m̀ bi-cee buŋalimbun, ní kubuŋu mun ŋmíl̀. Tifaandi nìn kɔ́-bi, ní bi kāl̀ ki bākatì. 52 Di sá yii baa nìn gbìl̄ Yeesu nín nìn dū kpɔnɔb fiii ki būtì ki kpíiǹ kunipaauee taapu, kun puee an nìn pɔ̄ɔ̄ ki tīī-bi bí gbìl̄ tibɔti taapu.

Yeesu cáaǹ bibunliibi Geeneesareeti tiŋkin

(Kpèè Maat 14.34-36)

53 Bi dūtì dimɔɔl ki dóòyee, ki bàn̄ Geeneesareeti tiŋkin ki síl̀ dimɔɔgbandi. 54 Ŋyunti ŋun bi kpákatì buŋalimbunee, binib kpáàa béè Yeesu, 55 ní ki sáǹ ki cūtì ntimun ki máafì ní binib yòontiń bibunliibi ki tūntiń ilún pu ki cāabìń laakin Yeesu bée. 56 Míǹ ní báà laakin ní u yaa nìn bàn̄ee, ntiŋgbamuneeee, ntiŋkpaamuneeee, ikaaneeee, binib nìn cāabìń bibunliibi ki bīil̀ imɔŋkijaa ní ki gbàam̄-u yii ú pée yàntī bibunliibee ń dáb́ u-bɔkutijúti. Bin kɔkɔ yaa nìn gbēē-uee pɔ́ɔkí ní.