Yoowaneesi 15

Yeesu dū u-ba ki nántiǹ fiinyi subu

1 Ní Yeesu bí yii: «Man di sá fiinyi subu tiŋman^a, ní m-Baa sá un ŋáŋkí-buee. 2 Apan ŋin túkú m-pu kaa lòoǹee, u gà-ŋi ki féeń ní. Apan ŋin lòoǹee, u ŋáŋkí-ŋi, ní ŋí mɔ̀tīí lòoǹ. 3 Tibɔti tin m sòon̄ nì nee, tì ŋáŋkì nimbi. 4 Ní nīn bímaan man ni, ní ma mun ń nīn bí ni-ni. Kii dipandi nín kaa ŋūǹ kí lòoǹ abil di-baba asee dí nīn túkú busubu puee, míǹ mbaantiim ní ni yaa kaa bí man ni, naa ŋūǹ kí lòoǹ abil.

5 «Man di sá fiinyi subu, ní nimbi sá apan. Un yaa bí man ni ma mun bí udaan nee lòoǹ abil ní tikpil, kun puee ni yaa kaa bí man ni, naa ŋūǹ kí ŋá tiba. 6 Un yaa kaa bí man nee, bi gà-u kí fá kii disupandee ní, ní ú kpā. Asupaŋkulimee, bi kōontí-ŋi kí tɔ̄ ŋŋmin, ní án wà. 7 Ni yaa bí man ni, ní ma mun bɔti bí ni-nee, bàlifìmaan tin tin ni yaa lèe, ni làá ká kudɔŋu. 8 Tin tìì m-Baa tinyoolee di sá ní lòoǹ abil tikpil ní kí nīn sá man boonnooliibi. 9 Kii m-Baa nín néeń-mi puee, míǹ ní ma mun néeń-ni. Nín̄ bímaan m-neendin. 10 Ni yaa ŋúb́ m-marabee, mimmee, ni bí m-neendin dee, kii ma mun nín ŋúb́ m-Baa marab ki bí u-neendin puee.

11 «M sòoǹ nì ni tin bí nee án nín làá ŋá pu m-pɔɔpindi ń nīn bí ni-ni, ní ni-pɔbiliŋ ń mɔ̀tīí gíti pīil̀ee^b. 12 Mara un m síiǹ-nee sèé: ní nīn néeḿmaan tɔb, kii man nín néeń-ni puee. 13 Dineeŋkpaandi diba kaa ti bí kí bà unil ń dū u-maŋfal kí kúntí u-bɔɔbi pu. 14 Ni yaa ŋáań min m bàlifī-nee, mimmee ni kpántì m-bɔɔbi dee. 15 Maa ti yíì-ni m-tɔntɔnliibi, kun puee utɔntɔnli kaa nyí tin u-kpiliu ŋáańee. M yíì-ni m-bɔɔbi ní, kun puee m dàkā-ni tin kɔkɔwoooo m gbìl̄ m-Baa ceeyee. 16 Man di lēē nimbi, kaa sá nimbi di lēē man. M tú-ni ní cùú lòoǹ abil, abil ŋin làá yúntée, mimmee, m-Baa làá tīī-ni tin kɔkɔ ni yaa mēē-u man yindi puee. 17 Tin tin m síiǹ-nee, di sá ní nīn néeń tɔb.»

Duulinya ná Yeesu nì u-yab

18 «Duulinya nib yaa ná-nee, ní béé yii man ní bi péé ki ná. 19 Ni yaa bàà sá duulinya yabee, duulinya yab bàà néeń-ni, kun puee ni sá u-yab. Ama m lútì-ni ki nyántì duulinya nib kansikin. Naa ti sá duulinya yab, an pu ní bi ná-ni. 20 Ní téetímaan tin tin m nìn tùkū-nee, yii: <Utɔntɔnli kaa jítiǹ u-kpiliu^c.> Bi yaa páb́ man, bi làá dāá páb́ ni mun, bi yaa bàà pílifì man bɔti, bi bàà dāa pílifí ni mun yati. 21 Man pu ní bi làá ŋá-ni tin bí nee kɔkɔ, kun puee baa nyí un túnní-mee. 22 M yaa kaa bàà dɔ́miń ní kaa bàà sòon̄ nì bi, baa bàà cáá ikpiti. Ama kɔŋkɔnnee, baa ti cáá nnaakpal báà ŋubɔ bi-kpitii pu. 23 Un yaa ná-mee ná m-Baa mun dee. 24 M yaa kaa bàà ŋá maamaacib bin bin báà ubɔ kaa ŋée bi-kansikin, baa bàà cáá ikpiti. Ama bi kántì m-maamaacib, ní ki gbíntì ki ná man nì m-Baa. 25 Too! An ŋá kii bi-marab gbɔŋku poon nín lī ki síiǹ puee dee yii: <Bi ná-mi fám, an kaa cáá taapu^d.>

26 «M yaa bàn̄ m-Baa ceeyee, m làá tɔ̄ń-ni Ututunli, úǹ di sá Unimbɔti Fam ibaamɔndaan un nyánní m-Baa ceeyee. U yaa láa bāańee, u làá sòoǹ m-pu, 27 ní ni mun ń dāá lēē m-pu seera, kun puee ni pée bí m-cee doooo ŋkilkaamin ní.